CHIEF MINISTER HOVIN MIMER GOVERNING COUNCIL MEETING HMASA BER THUKHAWM
Vawiin chawhnu khan Chief Minister's Office Conference Hall-ah MIMER Governing Council chu a vawi khatna atan Chief Minister Pu Zoramthanga kaihhruaiin an thukhawm a, MIMER kal zelna tura thawktu leh hmasawnna ruhrel hrang hrang mamawh siam dan tur leh Medical Council of India (MCI) endikna hmachhawn dan tur sawiho. He meeting-ah hian Champhai North bialtu MLA Dr. Z.R. Thiamsanga leh Aizawl South-III bialtu MLA Dr. F. Lalnunmawia te an tel a ni.
Chief Minister chuan Aizawl leh a chhehvela cheng te tan mai nilo Mizoram pum tan medical college chu hmun pawimawh a nih avangin college changtlung tak a nih chhoh zel theih nan Council member te chu uluk taka an ngaihtuahna seng turin a sawm a. College hlawhtlin theihna tura thahnemngai taka hma an lo lak tawhnaah lawmthu a sawi bawk.
MIMER ah tunah hian MBBS zirlai batch hmasa ber te chuan tluang taka class neiin, sememster exam te pawh neih tawh a ni a. August thla hian admission thar te buaipuiin, second year pawh hawn chhoh tur a ni a. Chumi atan chuan MCI chuan an tihdanphung angin MIMER hi rawn endik lehin, teaching faculty leh thawktu dang hrang hrang awmzat tur an bituk te leh tul dang hrang hrangte second year zirlaite leh zirlai tharte mamawh tur ang peihfel a ni em tiin an rawn endik leh dawn a ni.
Tun dinhmunah MIMER ah hian zirlai 99 an awm a. Seat hi 100 awmin, Mizo zirlai 77 an awm a. State quota 70, NRI Quota 14 leh All India quota 15 a awm a ni. ~ DIPR
Post a Comment