MZP-IN CHAKMA INHUNG BIK NGAIMAWH - TIMES OF MIZORAM

Breaking

Home Top Ad

Post Top Ad

MZP-IN CHAKMA INHUNG BIK NGAIMAWH

CAB PASS A NIH LOH VANGA PATHIAN HNENA LAWMTHU SAWI TAWNGTAIHNA NEIH TURAH MIZO MIPUI ZAWNG ZAWNG SAWM

Mizo Zirlai Pawl

Vawiin 18th February 2018 (Thawhtanni) chhun dar 12:00 khan MZP Conference Hall-ah MZP Executive committee meeting neih a ni a, Meeting hi Tv. L. Ramdinliana Renthlei, MZP President chuan a kaihruai a ni. Meeting-ah hian CADC Area chhung a Chakma inhung bik lutuk chungchuang te, Zoram Ni hman dan tur chungchang te, Mizoram sawrkarin zirtirtu hna lak thar a tum chungchang te rel a ni a. Tin, CAB 2016 chungchang a hmalakna te thlir letna leh sawi hona neih a ni bawk.

Meeting chuan, CADC Area chhung a Chakma inhung bik lutuk leh inluling lutuk chu tha lo a ti hle a, CADC huam chhungah hian Chakma ni lo chuan Ram leh In leh Lo engmah a neih theih loh a, a ram neitu Mizo te ngei pawn Mizo hmingin eng hmun mah a nei thei lo a ni. Hei hi MZP chuan a ngai mawhin tha lo a ti hle a, hemi chungchang hi ngun takin meeting chuan a ngaihtuah a, Chakma inhung bik lutuk hi thiah a nih theih nan hmalak a tum a ni. Tin, CADC area chhunga Zohnahthlak khua awm chhun te hian CADC area chhungah hian endawng leh hmuhsit an hlawh hle a, hemi chungchang zirchiang tur leh thlamuan tura a hmuna kal nise tha a ti bawk.

Meeting chuan, kum tina a lo hma tawh thin angin kuminah pawh March ni 5th ‘ZORAM NI’ India sawrkarin dimdawina tel miah lova Mizoram a bomb ni champha phak chu uar taka hman leh nise a ti a, he hun hi Zo-Nationalism inzirtirna hun atan hman nise a ti a, he hunah hian Paper present tha tak tak ngaihthlak tura ruahman a ni a, MZP chuan Mizo mipui a duh apiang tel turin a sawm nghal bawk a ni.

Meeting chuan Mizoram Sorkar enkawl school hrang hranga zirtirtu indaih lo chungchang a ngaihtuah a, zirtirtu indaih lo hi zirtirtu tlem vang nilo in zirtirtu awmsa semrual loh vangah a ngai a. MZP chuan Mizoram Sorkar chu Thingtlang leh khawpui lama zirna a khairual theih nan zirtirtu awmsa semrual turin a ngen nghal bawk a ni. Tin, Mizoram Sorkarin zirtirtu lak thar a tum mek niin a hria a, hemi chungchangah hian MZP chuan Sorkarin zirtirtu a la thar dawn a nih chuan zirtirtu a tana training chhuak ngei, qualify ngei la turin a ngen nghal bawk a ni.

The Citizenship Amendment Bill,2016 chungchang a hma lakna hrang hrang te thlirletna neih a ni a, CAB chungchanga Mizo Mipui thawh hona chu a ropuiin tha a ti hle a. The Citizenship Amendment Bill, 2016 dodalna kawnga tha thawhtu zirlai zawng zawng te leh Mizo mipui zawng zawngte chungah MZP chuan thinlung takin lawmthu a sawi tak meuh meuh a ni. Tin, Hmarchhak State hrang hrang te inlungrualna chu tha a tiin lawmawm a ti hle bawk. MZP Executive meeting chuan The Citizenship Amendment Bill,2016 chungchang Rajya Sabha a pharh a ni ta lo chu Mizo mipui ten Pathian kan auh vang leh Pathian hnena kan tawngtaina Pathianin a chhan vangah a ngai a, ni 21st February 2019(Ningani) hian Pathian hnenah lawmthu sawina hun MZP Conferance hall-ah hman ni se a ti a. Pathian hnena lawmthu sawina hunah hian a duh leh thei apiang lo tel turin MZP chuan Mizo mipuite a sawm a ni.

Sd/-
(ROTHANLIANA) 
Secretary i/c publicity

No comments:

Post a Comment

Post Bottom Ad