MIZORAM NGO: Central YMA, MUP, MHIP, MZP leh MSU telna NGO Co-Ordination Committee huaihawtin vawiin khan Aizawl Vanapa Hall kawtah Citizenship (Amendment) Bill 2016 duh loh lantirna neih a ni a, CAB pawm a nih loh nan kalkhawmten tawngtai rualna hun an hmang.
CAB Protest day-a inkhawmtawi buatsaiha thusawitu Central YMA president Pu Vanlalruata chuan, British-in India a awp laia India ram dinhmun hre turin India a chah a, an dodalna boruak kha lo hre ve rawh se tih chu a chah duh a nih thu a sawi.
CYMA president chuan, Mizo ten buaina an duh lo tih a sawi rualin a tul chuan hmachhaw an ngam tih sawiin, Mizo mipuite pawh buaina hmachhawn ngam turin a sawm a. India hmarchhaka chengte bill duh loh em em chu pass lo turin sorkar laipui an ngen tih sawiin,"Mizo leh kan hmarchhak unaute tana bill tha lo hi kan dodal zel dawn a ni," a ti.
MZP president L Ramdinliana Renthlei chuan, CAB chu Mizoram tana thil tha lo leh hlauhawm a nih avangin a do kawngah tanrual a tul hle tih a sawi rualin he bill dodalna kawngah Mizo te an tangrual tawk lo nia a ngaih thu a sawi a ni.
MUP president Pu RK Thanga pawhin inlungrual a tul thu a sawi a, MHIP general secretary Lalthangpuii pawhin thu a sawi a, Citizenship Amendment Bill chu Mizo mipuite tan a hlauhawm em em tih sawiin, a dodalna kawngah tanrual a pawimawh hle nia a hriat thu a sawi.
Tawngtaihonaah hian minister Pu Lalruatkima leh Pu TJ Lalnuntluanga te, Chief minister hlui Lal Thanhawla te nupa, minister hlui PC Zoram Sangliana leh Pi Lalawmpuii Chawngthu te pawh an tel a ni. ~ AIR Aizawl
Post a Comment