KOHHRAN BELH TUMNA
12th February
RETHEIH CHUAN A HARSA -
Nu leh pa sakhaw bel lem lo, inhlawhfa chawp karah chuan nula pumpa, Kohhranah a kul a tai nih a har khawp mai. An in ve zeuh zeuh a, an in hau fova, an in tum leh tawk thin. Ka nulat puite, Kohhrana inhmangte ka awt ru thin khawp mai. Nun tuihal takin ka awm a, ka mamawh ka inhre ran a, mahse nei turin theihna ka nei tawh lo.
KA IN KHAWM VE TAWP -
Ka vawikhat inkhawmna ah chuan ka tlingtla ve mai a, a vawi hnihna atang kha chuan ka thuamhnaw neih loh zia ka in hre chhuak a, mi an nalh a, ka thing lawr lak!! Puan leh kawr 2/1 ringawt torawt tan chuan a tei rei ve theih ta loh. Vawi thum ka inkhawm thlengin thusawi ngun takin ka ngaithla a, ka mamawh, Chunglam thlamuanna thute, piantharna dik te, Isua min tlanna te hriat tur a awm lova, Target tlin vanga lawmna te, thilpek chungchang leh keini thlawh khuma ram thim/thar chungchang deuh hlir an sawi ta berin ka hria. Ka chang chhuak lo chiang ta hle bawk.
THALAI PROGRAMME AH MIN SAWM -
An fel fu mai, Special Programme eng eng emaw a lo awm ve deuh reng ni tur a ni. Group hruaitute chuan min rawn sawm satliah ve peih hle mai. Ka chhinchhiah ve theih china ka telna te chu ; Sports, Danglam Zan, Outing, Half Yearly, Joint Fellowship, Musical Meet te ni ta in ka hria. Tah chuan ka Thlamuanna Isua tawn beiseiin ka lo châng khiau a, ka hmu lova, ka nun tuihalna phuhru reng reng ka tawng ve lo. Changkanna leh neih Show na ni berin kei tisa mi tak chuan ka hmu ta tlat a!! Ka in kil tawihna a ti zual a, ka reh ta.
ISUA AN RAWN KENG LO -
Nun khawhar taka hringnun ka hman zel lai chuan zan khat chu Thalai rual an lo leng a, Evangelical Cell an ti. Bible chhiarnate an nei a, eng eng emaw an sawi. Kan in a tawp sia, an fai sur bawk sia ka inthlahrung. Hmeichhia te pawh an tel ve a, kan chhungkua kan tawp sia an ni an fel fai ngei mai. Heng hi an thu ken chu a ni; inkhawm ve tawh turin min sawm a, Thalai Fellowship ah kal ve thin turin, Faith Promise tlem lua awm lova pe ve thin turin. Kohhran belh hi zahawmna a ni tihte a ni. Ka mamawh ber Isua an rawn hruai chuang lo !! A behbawm an rawn keng a, chung chu an hlimpui a, a berah an ruat a ni. Isua erawh an rawn keng tel lo fo!!
An haw tur chu ka bih ru dak dak a, Bike leh Scooty in a Pair te te in an in phur thliai thliai a, tun hnu a ka zawh leh hian khang ho kha an lo in ngaizawng fir fer tak tak!! A nuam duh awm mange ka ti rilru. Programme erawh ka thenga thawngah a va lut lo tak.
UPA KA CHÂNG -
Inrinni zanah ka pa zu ruiin ka nu a khawih a, a mit ko a duk raih mai. Ka tha a khur nasa lutuk. Pindanah ka va tawngtai ve zuai a, ka thla a ngam thei chuang lo. Naktuk zing, Chawlhni zing hian Kohhran upa a lo kal ngei ang, ka hrilh vek dawn. Kan chhungkua leh ka mimal harsatna, thawpikna hi kan in lum ngeiah ka lo hrilh dawn a ni ka ti a, ka mu ta.
Zingah hma takah ka tho a, eirawng ka bawl laiin ka rilrua a awm lai takin min bialtu upa a lo lang ta, ka nu te thawh hun a la ni lo si, inthlahrung siin ka veng deuh huai a. Pathian ram a khawn thu leh Pastor Programme ah a kal ve dawn thu a sawi zung zung a 'I nu leh pa an la tho bawk si lo' tiin a kal ta vut mai a, ka va hnual chiang tak.
CRUSADE -
Kan Kohhran hlim zia kha, an lam mup mup a, kan in atangin a hla lo, a hriat phak vek. Inkhawm bang titi pawh kawng anah kan awm a, ka ngaithla kiau thin. 'A ropui tiraw, a va sawi tha chiang tak' an ti haw zan tin mai. Khang nu ho te khan mamawh em emtu kei hi an rawn thleng pha chuang si lo. An hlimna te chu a thik awm rum rum a, Camping a lut tura mib sawmtu ah chauh an tlak tlai leh si. An neih Isua kha ka duh ve a, tinge min pek chhuah ve theih miah loh le...
Post a Comment