Party Mala Chuh An Tum - Mizoram Politics - TIMES OF MIZORAM

3 Feb 2019

Party Mala Chuh An Tum - Mizoram Politics

Mizoram PoliticsParliament inthlan lo awm tur leh Aizawl West –I assembly bial by-election lo awm turah political party-te thawhpui nei lova mal din an tum vek.

Lok Sabha inthlanpui leh Aizawl West-I by-election hi neih rual tura rin a ni a, rorellai MNF, ZPM leh Congress te chuan thawhpui nei lova an mal chuh vek rin a ni a. MNF Vice President Pu R. Tlanghmingthanga chuan a hranpa a thutlukna siam thar a awm lo na chungin an party chuan party dang thawhpui an tum lo niin a sawi a. AMC leh Assembly inthlan hma a thutlukna awm sa ang leh an kal dan ang khan an mal din dawn thu a sawi. Assembly a MLA 8 nei ZPM leh MLA 5 nei Congress pawhin a tirah thawh ho an sawi ri na-in an mal chuh ve ve dawn niin a lang.


ZPM leh Congress hruaitute hi thawhho chungchangah hian an inbe tawh a, mahse, ZPM thuneitu sang chuan thawh ho an remti lo. Hemi chungchangah hian ZPM hruaitu Pu Lalduhoma leh Congress hruaitu Pu Zodintluanga te an inbia niin an sawi a. Congress lam hian Lok Sabha chuhtu tur candidate siam a chu chu ZPM-in thlawp a, ZPM lamin Pu Lalduhoma chhuahsan tak Aizawl West-I chuhin Congress in thlawp se tiin rawtna an siam a. An inrem thei ta lova. ZPM hruaitu Pu K. Sapdanga chuan Congress leh MNF ni lo sorkarna siam duha thil inthlakthleng duhtu leh tlangaupuitu an nih avangin an pawl thlawptute duhdan angin an kal dawn tih a sawi a. Congress legislature party hruaitu Pu Zodintluanga chuan an mal din tur thu a sawi chiang tawh bawk.

Zoramthar party hotupa Rev Zaichhawna Hlawndo chuan Aizawl West –I by-election chuh an tum thu a sawi a, Lok Sabha seat khat inthlanna erawh chu chuh an tum lo niin a sawi. Zoramthar hian Aizawl West – I by-election ah hian an president Rev Zaichhawna Hlawndo hi an dintir tur thu an puang tawh a ni. PRISM party chuan Lok Sabha leh by-election hi chuh turin thutlukna an siam tawh a. BJP chuan tunkar chho hian thutlukna an siam a rin thu state unit president Prof. J V Hluna chuan a sawi. ~AIR Aizawl

No comments:

Post a Comment