Thingtlang Tlangval Thlirletna (Review)
Character - Rema hian a chan a hnehsawh takzet a. Thingtlang tlangval nun heti taka anga a taksa chezia leh ţawngkam kaltlanga a lantir thiamna hi khuareiah pawh film industry titi a la nih fo a rinawm hle.
Zuali - He a changtunu mawlh mai hi a ni chang thiama Casting Director fakawmna chu ni! A hnuaia he film thuchah laimu hmangaihna kan tarlan hmangaihna pahnih zinga pakhat zawk changtu tur hian ani aia thlanawm an awm leh thei tawh kher lovang!
Hmeichhe nunnêm leh hlim thei, a hmangaih tâna inpe zo thiam lutuk, hmangaihna avang veka thinlung kehsawmna, a tak taka chang thiama lantir thei khawpa acting skill nei ţha a ni tlat a ni.
A chang chuan hmangaihna avangin naupang sikul ban hun nghakhlel, ban a huna hlim taka in lam pana hmuh thuai thuai duh nei niawm takin a hlim haw thiam a.
Chutih rual vek chuan naupang sikul kal hreh ber ang maiin a lungngai thiamin a titau thiam bawk. A lungngaihna vawrtawp he hla hmanga puantirtu Script ziaktu/Producer hian fak a va phû êm!
Thinlai dam ni a awm lo,
Nang ngaih banzai ka rel lo,
Min dawn ve che maw?
Theih chang se lunglai chhirin,
Kirzai rel lehin duhte'n ka ţang bei leh la......
Suihlunglên hian chinlem a nei si lo.....
ti chunga a han ţap zet hi chu Mizo Film-ah a aia lungrun a awm leh thei tawh chuang ang em? Thinrim hlei hleite hi a thiam zual zel emaw tih mai tur a ni! Hmangaihna avanga zauthauna, duhthawhna, lungngaihna leh ţahna vawrtawp zel kan hmu a ni ber.
Cindy - He hmeichhia, Rema thinlunga ngawi renga hmangaihna kuiţiak zeta, nuihsawha nunrâwng taka a chhawr fîp hnua hnawltu hian a role a hnehsawh zet mai!
A awm tawk leka Rema thinlung hneh turin a nui hmel a hmang thiam a. Rema'n a duh zual sawtna tura induhtawk thiam, a sapţawng taka cold blooded bitch kan tih ang takin a chang thiam kha a ropui hle bawk a ni.
Hmangaihna chi hnih - He film hian nula tlangval inkâra hmangaihna ze hrang hlak, hmangaihna ni ve ve si chanchin min hmuhtir a.
Rema'n Cindy a hmangaihna, hmangaihna mahni hmasialnaa khat ţhin leh Zuali'n Rema a hmangaihna, tlawm zawk zel ţhin leh mahni inphata midang tâna engkim hlan ţhin hmangaihna chanchin chu le!
Mihringa mize chi hnih chu - He hmangaihna chi hnih avang hian kan ţhalai duhawm tak takte nun chu hmangaihna hian thlipui hrâng ber ang maiin a nuai sawk sawk ţhin. A chhan bulpui ber chu hriatthiamna a bihrûk tlat vang a ni!
Hmangaihna mitdel - Hei hi a ni chimawm em em, kum naupang zinga thleng chamchi reng, hmangaihna dik tak hliah tlattu chu lo ni. Sapţawnga 'Love is blind' tih nen inanna reng an nei lo.
Ngaihtuahna fim a neksawr thiam em em a, mithmuhna fim tak laka vaivut ang maia men tinuam lo leh mit tivaitu a lo ni zawk ţhin. A hnawk thiamin bumhmang ber a ni zawk tih he film hian min hmuhtir a nih hi.
Hmangaihna kan tih hi piantharna nen inanna riau an nei a. Thinlung chawh thawh theihna thahrui mak tak nei ve vein phûrna kaltlangin thil tak ni si lo kha mawi takin an tarlan thiamnaah tun thlenga lo tlu lut ţhin kan la awm ta zel a nih hi.
Hmangaihna dik tak – He hmangaihna Zuali nuna awm hi a ni hmangaihna dik tak chu. Cho loh a nei lo va, chinlem a nei bawk hek lo. A nu leh pa kalsan ngam tur khawpin a huaisen a, a dawhthei reng ţhin.
Hmangaihna mahni hmasial Rema erawh chuan a bansan mai a, a tuar thei bawk hek lo. Mahni tawrhna baka lak lungrun a nei thiam lo va, hmangaihna dikin phut nei hauh lo mah se, pêk let ve a châk ţhinna zawk pawh a nei thiam hman bawk hek lo.
Nu leh pa mawhphurhna – Tunlai Zoram nu leh pa tam tak hlawhchhamna, fate dinhmun dik tak zuk hriatsak tumna nei hauh lo va fanau enkawlna nun kan hmu bawk. Nulat tlangval kawnga rilrem loh zawnga fate khawsakna chu Pathian hnena thlen aiin fate chunga hriatthiamna tel hauh lo va ţuanna rah ţhin chu tarlanin a awm nalh hle a ni.
Selna – Thingtlangnuin rangkachak bengbeh beh chunga kuthna a thawk tlat te, in chhe taka cheng chunga thawmhnaw ţha tak nena inthuam tlat te, dialogue duhthusam lo awm te, music mix duhthusam tawk lo, plot chhumbung zeuh zeuh leh film entawn awm nual te hian mit an tikham deuh.
Tlipna – Kan film industry hmasawn chakzia hmuh hian awmhmunah kan lo lawm ve ţhin. Scooty, Nunna Thar, Lungdumtu, Where etc han en hian hma kan sawn nasatzia chu kan hmu ţheuh awm e.
Tuna kan mamawh ber nia ka hriat ve chu story leh plot ţha, dialogue ngaihnawm leh hlimawm bakah acting bik liau liauah ţawng lai taka ţawng rik dan leh hmelhmang lan dan, body behavior bakah music mixing-ahte hian hmasawnna tur a la tam hle niin kei ve tehlul hian ka hria ka han ti ve a ni e.
Post a Comment