BAPTIST CHURCH of MIZORAM (BCM) ASSEMBLY 2019

Mizoram Baptist Kohhran Rorelna Sang ber, BCM Assembly rorel inkhawmah chuan Kristiante hunpui, Krismas leh Good Friday bawh buai thei zawnga programme siam lo turin Central Sorkarah ngenna thlen tura rel a ni.

Nilaini zan atanga Lunglei Venglai Biakina tan BCM Assembly Mizoram Baptist Biak In, Venglai, Lunglei-ah tanah hian BCM Pay Commission report leh rawtna chu pawm a ni a, April 2019 atangin hei hi hman tan tur a ni ang. Chanchin tha thlen kum 125-na (Gospel Quasquicentennial) hriat reng nan Odisha ah Mission Field thar hawn remtih a ni a. HATIM ah Core subject 2 leh Elective subject thar 2 hawn tum a ni a. Nursing School, Serkawn chu College of Nursing ah upgrade tum a ni a. Kum 2021 a Assembly neihna tur chu BCM Ramthar, Chanmari Bial a ni ang.

Hriat theih chinah BCM Assembly rorel palai 1080 chuang kalin, la in report lo palai engemawzat an awm nia hriat a ni. Ningani zing dar 9:30 khan Rorel Inkhawm tan a ni a. Rorel inkhawm hi Rev. Lalbiaksanga Chinzah, President-in kaihruaiin Devotion hun hman zawhah BCM President Elect Rev PC Liandula hnenah President charge hlanin Rorelna dawhkan a kian a. BCM President thar hian Rorel a kaihruai nghal a ni.

Hun hmasa lamah President Elect thlanna neih a ni a. Rev. Dr.K.Lalrinthanga chu President Elect atan lungrual taka thlan tlin a ni a, BCM Constitution-in a sawi angin kum 2019-2020 chhung President Elect niin, 2020-2021-ah BCM President a ni zui dawn a ni.

Report atanga a lan danin, Tun dinhmunah Mizoram Baptist Kohhran-ah Area Baptist Council 14, Pastor Bial 85, Tualchhung Kohhran 677 an awm mek a. Kohhran member zawng zawng nuai 1 sing 7 sang 3 leh 373 awmin, Chhungkua 36,242 an awm a ni. BCM hnuaia Minister (Pastor) Active Service – 154 an awm a, Probationary Pastor – 27, Kohhran Upa-3329 leh Rawngbawltu – 34,150 an awm mek bawk. Mission Field & Station – 24 awmin, chung zinga 19 chu Foreign Mission (Partnership) an ni a, Missionary leh Local Worker –1297 Mission Field hrang hrangah an bung mek a. Kum 2018 January atanga 2019 January chhungin ringthar baptisma chang 4205 awmin, Kohhran thar 34 din a ni bawk.

Tun tum Assembly Rorel Agenda-ah hian Assembly hnuaia Committee hrang hrang – Executive Committee, Central Committee, Mission Committee, Service Committee leh Nomination Committee te thurel fel tawh Assembly-a report leh pawmpui tura thlen chhoh turte bakah Area Baptist Council (ABC) hrang hrang atanga thu lut agenda 27 a tel a ni.

Tukin chawhma Inkhawm chu Pastor (Minister) nemngheh Inkhawm (Ordination Service) atan hman a ni a, kuminah hian Minister ordain tur mi 8 an awm a, President thar Rev. PC Liandula’n a nemnghet a ni. ~ (Desk & PTC Lunglei)