C LALROSANGA : Vawiin hian MNF MP Candidate Pu C Lalrosanga chuan Mamit District khaw hrang hrang - Chuhvel, Saikhawthlir, Zamuang, Zawlnuam, Bungṭhuam, Kanhmun, Rengdil, Kawrthah, Tuidam, Darlak leh Mamit-te a tlawh a. Heng hmunah hian thusawiin, Pu C Lalrosanga chuan, "Pathian leh mipui zarah thlantlin ka nih chuan Citizenship Amendment Bill 2016 do zawng hian Parliament-ah vote ka thlak dawn a ni," a ti.
MNF MP Candidate chuan MP a nih angin ram hmasawnna kawngah a tangkai thei ang bera thawh a tum thu a sawi a. "Ka hnathawhna avangin hmarchhak leh India ram hmun hrang hrang ka lo tlawh ve tawh ṭhin a, rualawh a na fo ṭhin. Kawng ṭha zawk kan neih zel theih nan te, inbiakpawhna lama hma kan sawn theihna tur te, kawlphetha ṭha zawk kan neih theihna turtein sorkar nasa takin MP ka nih chuan ka puih theih ka ring," a ti a. "Ṭhalaite'n an talent hrang hrang Sports, music leh thil dangtea ei an zawn theihna tur kawng ka theih chinah dapsak ka tum bawk a ni," a ti.
Pu Rosanga chuan, "Vote chiah ka zawng lo, hnam hmangaiha penchhuahpui tur ka zawng a ni," a ti a. "Central Scheme tam tak awmte haichhuah kawngah Mizoram sorkar pawh nasa takin ka puih theih ka ring a. He laia ruling sorkar nena inngheng riala hma la ho thei, ruling MP Mizoramin kan neih hi a pawimawh hle a ni," a ti bawk.
MNF MP Candidate Pu C Lalrosanga hian Dt 22.3.2019 atang hian Sesawng, Khawruhlian, Ratu, Sakawrdai, Darlawn, Suangpuilawn, Phullen, Saitual, Keifang leh Seling khuate a tlawh leh dawn a ni.
Source: LALLENMAWIA JONGTE
Joint Secretary, Media & Publicity Dept., Mizo National Front
Post a Comment