ASSEMBLY-IN ZU KHAPNA DAN PASS - MIZO AW Editorial - TIMES OF MIZORAM

22 Mar 2019

ASSEMBLY-IN ZU KHAPNA DAN PASS - MIZO AW Editorial

ASSEMBLY-IN ZU KHAPNA DAN PASS

Mizoram Liquor Prohibition Act
Nimin khan Mizoram Assembly chuan Zu khapna Dan ‘The Mizoram Liqour (Prohibition) Bill, 2019’ chu an pass ta a, kum 17 chhung Mizorama lo hman tawh aia a danglamna chu ‘Total’ tih a tel lo a ni. Mahse, a tum leh a zia chu a ngai tho a ni a. ‘total’ tih thin kha a chuangtlai a, Prohibition tih mai chu a tawk hle a ni.

Hei hi MNF sawrkarin mipui a tiam tihhlawhtlinna a ni a, MNF chuan a tiam a hlen dawn a ni. MNF-in Prohibition an duhna chhan ber emaw, zu khap bawk, zawrh bawk (license neite chauhin) avangin mi tam tak zu avangin an thi, hmeithai tam tak a siam tih a ni a, chuvangin, zu khap a nih atang chuan zu vanga thihna tawp tur emaw tlem sauh tur emawin an ngai emaw an beisei emaw tihna a ni ang.

Kohhran zingah Presbyterian Kohhran hruaitu leh a thawkte (pastor leh revival speaker) thenkhatte pawhin zu chungchanga sawrkar kal ta, Congress, zu lo zuar a, lo khap a, zuartute chu an sawi chhe nasa hle a. Chumi hria chuan kohhran support-na neih nan MNF chuan he Prohibition hi a tlangaupui ni ber maiin a lang a, chu chu sawrkarna an channaah an ngai a, an tipuitling dawn ta a ni.

The Mizoram Liqour (Prohibition) Bill (thar) chuan license emaw permit emaw nei lo tan zu lakluh, thawn chhuah, phurh, kawl, zawrh, lei, siam, thil dang siamna atana kawl leh hman leh zu in a khap a ni.

Hremna hrang hrang a awm a, a tawi tleh a tlangpuiin, zu lalut, thawn chhuak, phur chu kum 5 lung in tantir leh cheng nuai khat chawitir theih a ni a, zu in chu thla ruk lung in tantir theih, cheng sangnga chawitir theih, a pahniha hrem theih a ni. Vantlang hmuna zu ruia hmuh emaw, buaina siam emaw, zu in hnua motor khalh emaw chu kum hnih lung in tantir leh cheng singkhat chawitir theih a ni. Zu sawimawina advertise khap a ni a, bawhchhiate chu thlaruk lung in tantir theih a ni ang a, cheng sanghnih chawitir theih a ni a, a pahniha hrem theih a ni. Doctor-ten damdawi atan an chawh thei a, chawh dik lotu chu hrem theih a ni dawn bawk a ni.

MNF duh dan (an mi leh sa zu in tam tak an awm tho a) ang leh kohhran hruaitute duh dan angin April ni 1, 2019 atang chuan la tih ngai loh ni lo, zu khapna dan chu kalpui a ni leh dawn ta a, an duh dan leh beisei anga zu avang leh a kaihhnawih avanga natna nei te, thi te an tlem tial tial beisei phawt mai ila. A hlawhtlinna hmasa ber tur chu zu zawrh a hlawk em em ang a, a zuar an pung ang a, zu man a let tam takin a pung (hlu) dawn a ni. (Date. 21.3.2019)

No comments:

Post a Comment

Post Bottom Ad