Mizoram B.Ed Pre-service Trained Association (MBPTA)

DAN LO A HNALAK CANCEL TUR LEH DAN ANGA HNA LA TURIN SORKAR NGEN

PRESS RELEASE

Mizoram B.Ed Pre-Service Trained Association(MBPTA) din chhan chu kan ram zirna siam that a nih theih nan zirtirtu atan Trained Teacher chauh la tura hma lak hi a ni. Mizoram sorkar thupekin March ni 27, 2015 khan Zirtirtu lakna tur - Recruitment Rules *‘Mizoram Education and Human Resources Development Department Recruitment Rules, 2015’* chu hman tan a ni. He dan hnuaiah hian High School leh Higher Secondary School Zirtirtu atan Recognised University atanga Graduate /Post Graduate leh NCTE-in a pawmpui Zirna In atanga Bachelor of Education (B.Ed) neite chauh lak tur a nih laiin Recruitment Rules(RR) bawhchhiaa Zirtirtu atan B.Ed trained lo lak an la ni reng hi hriatthiam har kan ti takzet a ni.

1. Nikum lama dan bawhchhiaa zirtirtu lakte (Govt. Adhoc Aided High School - Vanhne H/S , Mualthuam ‘S’ H/S , Vaivakawn H/S, Chanmari ‘W’ H/S , Zoluti Memorial H/S,New Serchhip, Lianchhunga Memorial H/S, Hualtu ) sorkarin min cancel sak hi kan lawm takzet a ni. Chutih rualin Vanhne H/S -a Zirtirtu lakna tura Interview -ah khan Candidate 42 zingah Qualified lo mi 24 lai Interview tura koh an nih mai bakah Interview nia Interview Mark leh Interview Result chhuah hnua RTI Act hmanga Interview Mark vawi hnih dil chhuah hi pakhat mah inang a awm lo a ni. Hetianga dik lo taka thil tih a nih avang hian Zirtirtu atana lak pawh sut leh a ni ta a ni. He hna atana Candidate zinga Qualified chauhte Interview tura ko thar leh mai tura kan lo thlir reng laiin Interview Mark dik lo taka Panel List ami chu Zirtirtu atana lak a lo ni daih mai hi mak pawh kan ti hle mai. Dik lo taka Zirtirtu lakna hi kan dem takzet a, Appointment Order hi a rang thei ang bera Cancel tur leh dik lo taka thil titute hrem ngei turin thuneitute kan ngen a ni. Kan ngenna hi min tihhlawhtlinsak loh chuan a tawp thlengin hma kan la zel dawn a ni.

Tin, tun hnuah hetiang thil hi thleng tawh lo se, Sorkar school leh sorkar tanpuina dawng school (Adhoc Aided school) - a zirtirtu lakna reng rengah dan ang taka Advertisement chhuah tur leh a tlingte (Qualified) dilna chauh pawm tur leh hna atana tling ngei chauh la thin turin School Managing Board leh thuneitute kan ngen takzet a ni.

2. Kum 2018 September thla, MLA Inthlan dawn tep khan RMSA hnuaiah Advertisement chhuah lo leh Interview pawh awm loin H/S Zirtirtu atan mi 53 lak an nih mai bakah Qualified lo mi eng emaw zat lak an ni hi kan duh lo takzet a, dik lo taka hna lak(Qualified lo zawng) cancel vek tur leh thil dik lo titute hrem ngei turin Mizoram sorkara thuneitute kan ngen a ni.

RMSA hnuaia HSS Lecturer lakna turah pawh hian danin a phut angin Zirtirtu atan Qualified chauh la turin thuneitute kan ngen a. Dan bawhchhiaa zirtirtu laknaa inhnamhnawih reng reng chu MBPTA chuan a enliam mai mai dawn lo a, a tul angin a puangzar zel dawn a ni.

3. Aikal lak chungchang : Dan ang thlapa zirtirtu atana lak, mahni hnathawhna hmuna awm tha duh lo, aikal la an la awm reng pawh hi a pawi kan ti. Trained kan nih avanga lak kan nih ang ngeiin kan thiamnate a tak hmang chhuak thei tura mahni hna rinawm leh taima taka thawk turin kan inngen a ni. Zirtirtu, aikal la mekte chhuichhuak a, zirna tha kan neih theih nana a rang thei ang bera hma la turin sorkar kan ngen tak meuh a ni.

4. IASE-a B.Ed Multimode Programme 2015 atanga kalpui mek hi Sorkar School - High School leh Higher Secondary School-a zirtirtu ni mek, kum 2015 hma lama lut, B.Ed la trained lote tana buatsaih anih laiin, Govt.H/S leh HSS - a zirtirtu ni lo leh 2015 hnu lama zirtirtu atana lakte B.Ed Training -na tur emaw tih mai tur a ni ta! IASE-a B.Ed Multimode Programme hi dan bawhchhiaa Zirtirtu lakna remchanga hman thin a ni hi a pawi kan ti em em a ni. Chuvangin, IASE-a B.Ed Multimode Programme hi din a nih chhan ang taka kalpui a nih loh avangin a rang thei ang bera titawp thuai turin Mizoram sorkar leh Mizoram University thuneitute kan ngen nawn leh a ni.

Tin, IASE-a B.Ed Multimode Programme hi amah leh amah intum tura zirlaite hnena Fee lak a nih laiin he Programme kalpui nan hian Faculty Member awmsa te Class tam zawk fe la tura rin an ni a, hei hi B.Ed Regular Class hian a tuar nasa em em a, Regular-a B.Ed zir ten an tawrh zel loh nana hma la thuai turin thuneitute kan duh takzet a ni.

5. NCTE Recognised Institution hnuaia Distance Learning kaltlanga zir lo leh exam mang lo a awlsam taka sum hmanga B.Ed Certificate nei hi sorkar hnuaia thawk mi eng emaw zat an awm leh, hetianga B.Ed Certificate neih tuma la bei mek an awm hi pawi kan ti a.Mizoram sorkar hian awlsam tak leh diklo taka B.Ed Certificate neite hi chhuichhuaka, hma la vat turin kan ngen a ni.

Dan bawhchhiaa Zirtirtu lak leh B.Ed Train tur lak reng reng theihtawp chhuahin kan do zel dawn tih hi Mizoram Sorkar leh mipuite kan hriattir bawk a ni.