KOLASIB MZP FILED FIR AGAINST KOLASIB DIET - TIMES OF MIZORAM

2 Mar 2019

KOLASIB MZP FILED FIR AGAINST KOLASIB DIET

Kolasib Diet Logo
KOLASIB TUALCHHUNG CHANCHINTHAR: MZP Headquarters Kolasib chuan Kolasib DIET sum chetvel danah thil dik lo tam tak a awm nia an hriat avangin Anti-Corruption Bureau (ACB)-ah FIR an thehlut.
Hemi chungchang hi vawiin khan Kolasib Press Club-ah chanchin thar theh darhtute hrilhin Kolasib MZP chuan, nikum June thlaa DIET Trainee hnen atanga an lehkha dawn atangin Kolasib DIET-ah hian thil dik lo tam tak a awm tih an hriat avangin an chhui zui tih an sawi a. 



Kolasib DIET Pre Service Trainee 1st Batch ten nikum May thlaa inthlahna an hman tumin Kolasib DIET Principal Pu C. Vanlalmawia’n, an pawisa dawn te chu Pre-Service-te hman tur ni lova zirtirtu tanglai mek te training pekna tur a nih thu a sawi laiin zirtirtu tanglai training-te tana sum hmanna a awm hriat a nih si loh avangin nikum October thla khan RTI hmangin 2013-2018 chhunga In-Service Training neih tawh zat, In-Service atana Fund lut tawh zat, khawi School te nge lo kal tawh tih leh Attendance Sheet te an dil tih Kolasib MZP chuan an sawi a.



Kolasib DIET-in ni 30 chhunga chhana an pek theih loh avangin Aizawl lamah bawhzuiin RTI chhanna hi pek an ni ta a. Hei hi Kolasib MZP-te’n an zirchian hnuah Attendance Sheet-a signature te chu mi pakhat kutchhuak nia a lan avangin attendance sheet bika hming lang, Kolasib-a zirtirtu thenkhatte an hmu a, anni hian an Training loh thu leh signature te pawh anmahni kut hnu a nih loh thu MZP te hi an hrilh a. Hei bakah hian Attendance Sheet-ah hian pension tawh te leh thi tawh te hming engemawzat a lang bawk a. RTI chhannaa Training neihna atana Hall an hman nia an sawi te pawh an chhuizui hnuah Hall enkawltute’n DIET hian training-nan an hman loh thu an sawi a ni .

District Institute Kolasib

Training-na sum chungchangah hian Directorate leh Kolasib DIET ten RTI zawhna an chhanna a in ang lo bawk a. Directorate lamin ‘In-Service tan a hranin sum a awm lo’ an tih laiin Kolasib DIET chuan ‘In-Service training-na atan Cheng Nuai 25 Sing 2 Sang 7 leh 341 an dawng’ niin an tarlang thung a. 

SCERT leh Kolasib DIET te chhanna pawh a inmil lo a; SCERT hian Kolasib DIET tan 2013-2018 chhung khan fund Cheng Nuai 164 leh Sang 5 an pek thu an tarlang a, amaherawhchu heng sum te hi Kolasib DIET-ah hian a hmanna hriat a ni lo a. 
Hetianga thil felhlel eng emawzat a awm nia a lan vang hian tunkar Ningani khan Directorate of Anti-Corruption Bureau-ah thil dik lo awm chhui chhuahsak tur leh mawhphurtu laka dan anga action lak a nih theih nan FIR an thehlut tih Kolasib MZP te chuan an sawi.

FIR an thehluh hma hian Kolasib DIET-a thil dik lo awm hi School Education Minister Pu Lalchhandama Ralte leh Kolasib bialtu MLA, Supply Minister Pu K. Lalrinliana te sawipuiin, an hmalakna tha an tih thu leh a tul anga an lo bawhzui tur thu an lo hrilh tih Kolasib MZP chuan an sawi bawk. -AIR Aizawl

No comments:

Post a Comment