Kum 2017 March thla vel atanga Lungzarhtum khua Tlangpui venga Pu Lalcheua bawng rual zinga rawn tla lut thin Sele nia rin chu nimin khan thiin hmuh a ni a, a thih chhan hriat a la ni lo.
Thudawn danin nimin (1.3.2019) chawhnu lamah khan Pu Cheua chuan a bawng rual ngaihvenin a bawng tlat thinna hmun velah a ramvak a, Mulukawlh thlawk bir zauh zauh a hmuhin bawng thi ruang a awm ngei niin a ring a, chulam chu a pan ta niin a sawi. Pu Cheua chuan Tlangpui leh Lungzarhtum inkar kawngpui chhak lam metre 200 velah Sele thi chu a hmu ta a ni.
He Sele hi a bawng zinga tla thin kha a ni ngei em tih erawh a hrechiang thei bik lo niin a sawi a. Sele thi a hmuh veleh Feorest RO Charge la mek Pu Thangvunga phone in a hrilh thuai a, Pu Thangvunga te nen Sele thi ruang hi uluk takin an enchiang ta a ni.
Pu Thangvunga chuan "Khatia Pu Cheua'n tlai lam dar 4 vela Sele thi a hmuh thu min rawn hrilh veleh, a hmun panin kan naute nen kan tlan nghal a, Sele thi ruang chu uluk takin kan han enchiang a, a ruang kan kuai thalin a pang tawn tawn pawh kan bih chiang a, a taksaah silai luhna emaw hliam hnuhma engmah a awm lo a, a tai leh a hnar bakah a bengte chu mulukawlhin an lo pet nual tawh niin a lang" a ti.
Pu Thangvunga chuan "He Sele hi Pu Lalcheua bawngrual zinga tla thin kha a ni ngei em tih kan la hrechiang thei lova, natna emaw food poisoning vang emaw-a thi a ni em tih pawh hriat theih a la ni lo. Nizan lamah khan mi tuten emaw a sa an lo chan darh vak mai a, a dar lehlam, a kawchhung leh a ir leh awm bawr vel an la bang a, heng atang hian eng vanga thi nge tih chu laboratory lamah test theih a nih kan beisei" a ti.
Forest department RO hian he Sele thih chhan chhui chiang turin vawiin khan Bualpui Police Out Post-ah FIR an thehluh thu a sawi a, Lungzarhtum khawtlang an rilru a nat thu sawiin, "Khati khawpa khawtlangin an duat, a ruang ngei nia rin chhar a han ni mai hi an hrilh a hai takzet a, nunau te pawh an mittui a tla hial a ni" a ti.
Lungzarhtum Joint Action Committee chuan he Sele thih chhan hi chhuichianga a tul anga hma la turin FIR an thehlut ve nghal bawk niin thu kan dawng.
Bio Diversity And Nature Conservation Network (BIOCONE) President VL Hrima chuan, "He sele ruang hmu hmasatuten a uluk taka an endik thu an sawi a, silaia kahna hnumha emaw mihringin kut an thlakna hnuhma an hmu lo nia sawi a ni a. Hrai hlum emaw hri avanga thi pawh a ni thei a, a tisa leh kawchhung them atangin chung chu mithiam ten an chhui thei turah kan ngai a, hemi buaipuitute lawmman atan BIOCONE sum atangin cheng singkhat kan phal dawn a ni" a ti.
Lungzartum Sele thih thu hian Zoram pum a tuam chhuak rang hle a, mi hrang hrangin social media lamah an ui thu an tarlang hlawm. Vawiin khan Pu C. Sangliana DCF Siaha, Forest Hqrs. RO Pu Albert-a te, Bualpui RO Pu Lalrinmuana te bakah LAD lam Vety doctor Lalnunpuia ten Sele thihna hmun hi an pan nghal a ni.
He Sele thihna chungchangah hian Lungzarhtum YLA Secretary Pu Dawlliana chuan "Nizan lamah khan he Sele thi ruang an hmuh thu hi kan lo hre ve miah lo va. Tukin zing lama kan hriatin rang takin a ruang awmna kan han thleng ve a. An lo chan darh vek tawh mai a. Kan rilru a na hle mai. A sa an chan darh bang, a ir hnuai lamah silaimu luhna ni ngeia lang kaw duk ruak kan hmu a. Kei ni chuan kah hlum ngei niin kan hria a ni" a ti. A sawi zel danin Pu Dawlliana chuan, "A sa chantute zingah hian kan khaw mi pakhat a tel ngei tih kan hrechhuak a, he kan khaw pa hian a chhungkhat hnaivaite a sa a lo hleh nual tih thlengin kan hria a, an In-a a sarep a kawlte pawh JAC te hian kan man sak nghal vek a, amah hi man turin Police te hnenah kan ngen nghal a, tunah hian khuaah a awm lova, an man ngei kan beisei" a ti.
"He sele ruang thlalak leh a ki vel kan han enchianga Pu Lalcheua bawng rual zinga tla thin ngei kha niin keini chuan kan hria a, 100% in kan prove-ah kan ngai" a ti bawk.
Source: Vanneihthanga Vanchhawng
2nd March, 2019 (MSR)
Post a Comment