MIZORAM RECORD A SIAM LEH TA
Mar 3, 2019 (MSR): Mizo Bullet Rider zinga khawvela motor tlan thlen theih sangber, Khardungla, Ladakh tlan thleng hmasaber leh awmchhun leh Mizoram tlan sangber, Phawngpui tlang chhip bike a tlan chhuak hmasaber leh awmchhun ni bawk, Hc. Lalhmahruaizela (Puitea), Hnahthial chuan kar kalta khan Mizoram record Royal Enfield (Himalayan) hmangin Mizoram record thar a siam leh ta.
Puitea hian kar February 27, 2019 (Nilaini) khan Mizoram chhimtawp ti a sawi theih, Zochachhuah atangin Hmar lama Mizoram khaw tawp, Vairengte nikhatah a tlan a, hriat theih chinah Bike emaw Two Wheeler emaw a nikhat (Darkar 24 chhung) a Zochachhuah atanga Vairengte tlan thelng hi sawitur an la awm lova, Mizoram Record thar a siam leh a ni. Zochachhuah leh Vairengte inkar hi 500km chuang a ni.
Hun rei tak atang tawh khan Puite a hian Zochachhua atanga Vairengte tlan tum hian alo inbuatsaih tawh a. Alo tih tawh thin angin tumna te Pathian hnenah tawngtaina nen a thlen thin a. A thiltum tihlawhtling tur hian Feb 25 (Thawhtan) khan Hnahthial atangin Lawngtlai a thleng a. Lawngtlaiah hian zankhat riakin a tuk, February 26 (Nilaini) khan Zochachhuah panin Kiddy Vanchhawng nen an chhuak a.
Tunlai hi Mizoram chhimlam, a bik takin Zochhachhuah bawr vel hi India sipaiin an vil ngun hle a. Khua-a luh leh chhuah a harsa em em a. Zochachhuah phei hi chu an khirh berna hmun pakhat a ni a. Hei mai bakah hian ruah a sur nasa hle a. Heti chung hian Puitea hian, "Pathian hnenah ka inhlan tawh a, tumdangah pawh harsatna em em tawk lovin minlo hruai tawh thin a. Tuntumah pawh hian min hruai leh dawn tih hi ka hrechiang a ni," tiin Ruahsur leh Sipai hrang tak karah a chhuak lui ta tho a. A sawi ang ngeiin nilengin ruah a sur lova, Sipai duty lam lahin engmah harsatna anlo siam loh mai bakah an lo ngaisang der hle zawk a ni. Hemi chungchangah hian Puite'an Pathian a rin zia leh Pathiana a innghah zia chiang takin a hmuh theih a ni.
Amaherawh chu Zochachhuah atanga zanlai dar 12 a chhuah a tum erawh an remtih sak ta lova. Zochachhuah an thlen hnu in Zochachhuah a sipai duty-na hmun atangin a zinkawng hi a zawh tan ta zawk a. One Day Ride anih ang ngeia a dik thei angber tura tlan hram a duh avangin Zochachhuah atangin a tum hunah chhuak theilo mahse a ride tan nghal ngawt lovin a hun hmang dik thei tur angberin Zochachhuah hnaivaiah zan hun hi a nghak ta a ni.
TichuanFebruary 27 zan dar 10-ah tluanga takin Vairengte hi a thleng a, Vairengte-ah hian Excise & Narcotics check Gate-ah Excise mi leh sa thenkhat leh Pu Lalmuanpuia Colney, VCP, Vairengte-I ten anlo hmuak a ni.
Post a Comment