VAWK VULHA EIZAWNG HLAWHTLING, F.LALRAWNGBAWLA, MISSION VENGTHLANG

VAWK VULHA EIZAWNG HLAWHTLING, F.LALRAWNGBAWLA, MISSION VENGTHLANG

Hmanni lawka DDK-in mahni eizawnna kawnga mi hlawhtling langsarte an kawmna ka lo en fuh ve a. An ngaihsanawmin entawntlak tak an ni. An zinga mi Pu F. Lalrawngbawla vawkvulha eizawng chanchin kha ngaihnawm ka tizual a. Nimin zing kârah khan Mission Vengthlanga a vawk vulhna hmunah ka va kal a, inkawmna hun ṭha tak kan nei a, a bengvarthlakin a lawmawm ka ti khawp mai.

Vawkvulh hi eizawn nana a tuina a nih avanga thlang a ni a. I Dam Chhan Eng Nge Ni? tih bu-a kan hriat ang khan mahni tuina lam kawng kan zawh chuan kan zeina leh kan chemkalna te a lo ni nge nge ṭhin a. Tih tak takna rilru nena beihin a kaida te kan hre thiam hma bika kan hlawhtlin phah nge nge ṭhin kan tih ang khan Lalrawngbawla pawh hian a tuina a nih bakah tumruhna leh taihmakna nen tih tak meuha a tih avangin harsatna tawng ve ṭhin mah se, a rawn hlawhtling ta a ni. Lalrawngbawla tihdana ka ngaihsan zual te chu:

1. Vawk hi thla ruk vel a nih hian a hrisel lai tak a ni a, chutiang hun velah chuan a hralh chhuak ṭhin. A upata a thau lutuk hnu hian a hrisel ta lo ṭhin a ni. Sapho vawksa ei kan hmuh chuan hetiang hi an tihdan a ni a, a thau hmuh tur a awm ngai meuh lo. 

2. A vawk in luhna kawngka bulah tuisen(potassium permanganate) chawhtawlhah a dah a, chumi rap lo chuan an lût ngai lo. Hei vang te pawh a ni ang a, ṭum khat an vanduaipui ve tih loh chu vawk hrisel lo an nei ngai lo.

3. A chaw atan phai lam atangin a ṭha chi an chah ṭhin a, vaimim nen an hman pawlh ṭhin a ni. 

4. Vawk 100 chuang zet chu an kawl reng a. Vawktệ kum khatah 1000 chuang zet an thar a, an thar rual rualin a lâk theih chu zing kârah an lâksak deuh zel a ni. 

Lalrawngbawla hian sawrkar ṭanpuina a dawng ngai lo va, a hlawhtlinna hi ama taimakna leh tumruhna vang liau liau a ni. Hetiang hun hi sawrkar sawiselna remchanga hman tum kan ni lo va. Mahse, kan hnam ṭhanmawhbâwk leh corruption hluarna ber kan nih hi pawisa a hman lohna tura kan hman hi a ni tlat si a, sawikai loh theih a ni lo. 

PWD hian an pawisa hi kawng siam nan an hmang lo va, anmahni insiam nan an hmang tih hi kan hriat dan tlangpui a ni a. Department dang pawh hi chutiang deuh vek chu an ni. A tih tur dik tak an tih rah ṭha hi hmuh tur alawi a awm lo va, anmahni erawh hi chu an hausa thûr thûr deuh vek thung a ni. Kan mamawh tam ber, buh te, sa te, thlai te, thei te thlengin ram pâwn aṭanga kan lakluh a la ni deuh vek zel hi Agriculture, Horticulture, Animal Husbandary & Vety, Fisheries te an hlawhchham chianzia tilangtu a ni. 

Hetiang kâra Pu Lalrawngbawla te mi taima leh rinawm kan nei hi Mizote tan malsawmna leh vanneihna a ni e. Tluang taka an kal zel kan beisei a ni. Amah hi mi inngaitlawm, mihring mihrinnaa belhchian dawl leh ngainatawm tak a lo ni bawk a, a ngaihsanawm ka ti hle a ni.