Mizo Thawnthu - HRUMZIAL VANGKHAW HRAICHAWI HRANGTHANPUIA 9 - 10 - TIMES OF MIZORAM

6 Mar 2019

Mizo Thawnthu - HRUMZIAL VANGKHAW HRAICHAWI HRANGTHANPUIA 9 - 10

HRUMZIAL VANGKHAW HRAICHAWI HRANGTHANPUIA Ziaktu - Thunderboy Chinzah

Previous : Episode 6-8
Writer te zalenna
EPISODE 9
Saibual khua te chu an hmabak ah thil huphurhawm takin a hmuak tih hre reng in, buh lu chuh in an buai phe dawr dawr a ni ber e. Theih tawp a an tan tlan hnu chuan buh chu seng zo in, pawlzem ah an in khung fel tawh hlawm a, buh an ngah hlawm tih hriat takin an buh vuakna hnu buhpawl te chu in za nufa khua zawlbuk tia lek lek chuan a vum ther thur hlawm mai. An han in peihfel meuh chuan rei an awl hmanlo, kar lo ah pawltlak thla chu alo de seki lah ta vun mai le, a tuk chu mihrang val te thingluang zawh a an inbeihna ni tur a lo ni ta reng mai. Saibual khua atang chuan Pasaltha Keikhuma, Pasaltha Chawngthianga leh Hrangthanpuia ten khaw ai awh in thingluang an zawh dawn ani.

A tuk khua alo var a, zingkar ah inbuatsaih zung zung in, tuk thuan eikham hnu chuan Lal mualzawl ah an lo chhuakkhawm mup mup a. Lal Duhmanga chuan an awm dan tur leh engpawh tawk thei an nih thu sawi in, a khua leh tui te chu huaisen tak a an hmabak hlen theuh turin a fuih a, inbeihna ah nunna chan an lo awm a nih pawhin, an kalsan tak an chhungte chu Saibual khua in a tuamhlawm zel tur thu te a sawi zawh hnu ah, Saibual valrual te chuan inbeihna hmun tur Mualnuam khua nen an inkar a fangfar lui chuan pan ta hum hum a.
Mualnuam khaw tan chuan an inbeihna tur hi a hlat tham deuh avangin a hma ni atangin, an Lal pa Hualvunga ho in an thawkchhuak tawh a, zanriak meuh a lokal hmasa an nih avangin inbeihna tur hmun Saibual ho in an zu thlen chuan an lo zi mur mur tawh mai, Saibual khua an zu thlen chuan auh zam tum ni awm takin an lo haw haw dur dur a. Saibual khua te an han chawlh hahdam hnu chuan fangfar lui lichep kiang a Tei kung lian zet chu kit in, lichep chung ah chuan a in khang kai ta ruah a, chu thingtuluang chung chep tak chu a ni, khaw hnih ai awh mihuaisen te inbeihna tualzawl tur chu.. Khaw hnih Lal te'n an khua te fuihna hun an hman zawh hnu ah khawhnih ai awh tur te chu an lo pen chhuak ta thauh thauh a.


Mualnuam khaw ai awh in pasaltha Rolawma alo chhuak a, Saibual ai awh in an pasaltha chhuanvawr pahnih zing a mi Keikhuma chu a rawn pen chhuak ve bawk a, thingluang hmawr ah ve ve chuan an ding ta ran mai le. Mualnuam val upa in, "Khai le, tan rawh u le," a tih rual chuan an hming chhal dun lauh lauh in an inpan ta chheu chheu mai. An mit meng ah zam hmel a lang lo. A lai a an han in tawk chu an ding chat a, pasaltha tih dan dik takin Keikhuma chuan, "Nang in min sat hmasa rawh le, pasaltha Keikhuma nghawng hian I chempui a nghak reng a nia," a han ti a. 

Rolawma chuan thamlo zet in, "Pasaltha hming inchhal tlak I ni meuh maw? Han che hmasa zawk teh, pasaltha Rolawma tan chet lak hmasakna tham I nih pawh ka ring nek lo ve a," an ti ve leh salh bawk a. Hriam lek hmasak tum an awm loh avangin val upa bawk chu a rawn inrawlh leh ta, "Khati zawngin huaizawk in awm thei dawn hauhlo, ka au anga, ka au rualin in hun a in tan ang. In inring maw? Khai le", a han ti thawt a. Val upa au zawh rual chuan an chempui chu a phe rual nghal zawk mai, Rolawma khabe chu a ri rawp a, a uai nghal duai mai, Keikhuma pawh tawlh hnung rang viau mahse a hnute dinglam chung chiah ah chuan a kak phei ve nghal hawk tho mai le. Inhnaih chilh lehnghal in an thiam thil tinreng nen an han inbei meuh chu a hmuhnawm bawk a niang, an ngawi duk mai a, hmeichhe dawhkilh pawh tla se a ring viau awm e. Vawi sawm dawn chempui an vai chhuah hnu chuan Rolawma zawk chu vanduai hmasa ah tangin, a nak thler hnuang atang a a ril uai chhuak pur chung chuan an hnuai lichep chung ah chuan a phar thla dawr dawr a, Keikhuma pawh in hmun thum lai ah hliam pui a tuar ve tho mai. A kut phar pah in thingluang chu a zawh let ta a, chutih rual chuan Saibual valrual te chu an haw haw thum ta hluah hluah mai a ni.

A thawh hnihna an han tan leh dawn a, Saibual lam atangin pasaltha Chawngthianga lo chhuak in a chempui lian hlai hlep hlawp chu zo zet in a rawn vilik chhuak valh valh a. Mualnuam lam atangin pasaltha Vanmawia alo pen chhuak ve bawk a, duhsak zawk neih hlauhthawn thu ah Saibual val upa chu a au ve ta thung. A hma a mi te tih dan ang bawk in an hming chu an chhal dun ve leh lauh lauh mai bawk a. A in bei te pawh an tha a tha in an rang dun bawk a, an hmuhnawm ngei mai. An chempui ken lohna lam zawk pawh awl hman lo in an hriam lek kar ah an in thuai pah nawk nawk mai bawk a, an hmuhnawm kher mai. Chem an han vai leh chu Chawngthianga chu kun zauh in alu chung ah Vanmawia chempui chu a thlawk tlang ri fua mai a, chutih rual chuan Vanmawia malpui tha pek natna lam zawk tihrawl chu vang tan zawngin a chhat phei ta thawt mai le, mi pangngai tan din ngheh zawh rual a ni lo. Chutih rual in Chawngthianga pawh Vanmawia chempui a bumna lam ah a che sual ve tlat, a thingluang rah chu pial palh in, an hnuai li thuk tak lam pan chuan an bir dun ta vang vang a. An vai mai chuan khaw hnih val rual te chu tho suau in, lichep dum kuk mai chu hmu lo bik nih hlau awm fahran chuan an thlir thup mai. Chawngthianga pawh lo chhuak mai tur a an ngaih lai in a lo chhuak mai bik ta tlat lo, lichep tui chu che hluau hluau in a rawn so leh bawrh thin. A thlirtu te pawhin thawchham lek lek a an thlir hnu chuan lichep mawng zum lam ah chuan Vanmawia zawk chu rin loh takin a rawn dak chhuak ta hlawl mai, a mal leh lam hnuk hrat hrat in vau kam lam a pan a, chutih lai chuan a thlang deuh ah Chawngthianga pawh chu a rawn lang ve hlawl mai bawk a, luikam leh lam ve ve ah chuan perkai in, chau tih hriat zet chuan an mu thlawp mai ani. Inbei leh chi rual an nih tawh loh avangin val upa chuan inhnehtawk ah apuang ta a, khaw pahnih tlangval ho te chu an thum hluah hluah mai.

Reilo te chawl in vaibel te an han zu te te a, chumi hnu chuan a tawp ber a inbei tur te chu an lo chhuak leh ta. Mualnuam lam atang chuan an pasaltha chhuanvawr ber mai, palian zet leh en reng reng pawh a thahrui ngah tih hriat hliah hliah mai Rochhuaka chu lo ding chhuak in, a chempui dap tle vur, hriam hmel em em mai nen chuan thingluang lam chu a rawn pan ngulh ngulh ta mai le. Mualnuam lam hian ruahmanna fel tak nei in, an pasaltha rothap zawk te chu a hnu khar ah an lo dah alo ni. Saibual erawh in an pasaltha chhuan ber atangin bul an lo tan tir mai si, pasaltha an ngah loh avangin pasaltha te thlawp turin Hrangthanpuia chu an thehchhuak ve ta kha a nia, hnung dawl tur a la ni zui bawk nen, an ti sual mai awm mang e.! Chutih chiah chuan Thanpuia thusawi thin, "Huaisenna chu a hun ah alo kal mai," a tih thin chu a mah ah alo lang chhuak ta, hlau leh zam hmel reng a pu hauh lo.

Saibual lam atang chuan tlangval la naupan hmel tak, hmaitlang hriam lek lek, mit meng fiah zet mai chu a rawn pen chhuak ve ta thauh thauh mai, chempui ai ah kawlhnam te zet zawt, chhah bal mai chu a rawn lek chhuak a. Pasaltha Rochhuaka'n a lo hmuh chuan a zuam lutuk chu a nuih te lam lam a za a, nui vur vur chung a lo au in, "Tlangval, kha eng tur nge ni ngai ka ke hling khei I tum em ni? Kha tiang tul thir tia lek te chuan ka sepui ek tharlam deuh bak I vaw pherh zo nang mawle. Sete pakhat vang a nun chan meuh zawng ila phu lo ka va ti em! I la nau mange aw, in lam let la, ka tlawm ti mai rawh, ka nun ang che, "a ti huah huah mai a. Thanpuia erawh a ngawi ngal mai a, mit khap leklo chuan a en kal mai ani. A beihpui tur in inlamlet a tum lo tih a hriat chuan Rochhuaka chu a thinrim ta kher mai, " Keimah Mualnuam khawchhan pasaltha Rochhuaka, ral lu sawm chuang khai tawh ka ni ngai e. Pawihte mawngkhak thah hi fanghmir thah tluk ah pawh ka ngai lo ve," a rawn ti ta piap piap mai. Mualnuam khua te chuan Rochhuaka chu an hlauh em avangin an ti ril a khur ru der der hial a ni.


Thanpuia chuan a han ngaihtuah a, pasaltha ti a inchhal ve tlak a nilo tih hria in a ngawi ngal mai a ni. Val upa in, 'Tan rawh u le' a tih rual chuan in pan hnai in an inbei zui nghal ta chat mai, Pasaltha Rochhuaka hre tan chuan Thanpuia chu a dam chhuah ring reng an awm lo. Mahse an ngaih ang ngawt in thil a kal bik lo tlat, pasaltha Hranghrima ke bul a seilian, ralthuam engkim hman dan nal tak a zirchhuak tawh kha a ni tlat, Rochhuaka chempui vai chhuah apiang mai chu awlsam em em in alo la leu zung zung mai a ni. Inbei entu te mak ti lutuk chu an hawi a ho a ni ber e, chutiang em em a kawlhnam chelek hnehsawh chu an la hmu tlat lo a tin ni. "A beihpui pa chu thah a tum lo a ni awm mang e," tih tur in kut a thlak tha duh hauhlo mai leh nghal a, mahse Rochhuaka chempui rawn vai chhuah alo dan tleu a piang mai chuan a kawlhnam hmawr in a taksa rem chang lai apiang mai chu a va thai kak sak zauh zel mai thin a, Mualnuam pasaltha chu a thi pheng phung tawh mai a ni, an tang bawk aniang Rochhuaka chu a chau tan ta tlat.

Thanpuia chuan dam thlap mai in, "Kan Mualnuam pasaltha chu a chau ta mai em ni? Khati zawngin ral lu I khai belh thei nang mawle," an ti zauh a, Rochhuaka thinrim lutuk chu a puak keh lo chauh a ni mai. "Naupang leh! tih pahin a han bawh leh ta buan buan a, Thanpuia chuan a ngai te bawk a lo dan tleu pah in Rochhuaka puan ven tlang veilam chu a thai chat tlang thla hrawk mai le. A puan ven tla tur chu a kut veilam a sawk khawm in a chempui chu a la vai fur fur tho mai, remchang hmasa a hmuh ve leh Thanpuia chuan Rochhuaka puan ven tlang dinglam chu a vunpui chat tel thawt khawp in an chhat thla leh hrawk mai a, dawm tan ngaihna awm tawh heklo le, Mualnuam pasaltha chhuanvawr ber mai chu silhfen ngai theilo ni awm fahran in a ding uai ta thuah mai, a taksa lah chu zungchal chen lek lek hian a kak pheng phung tawh mai bawk a, an chhung chhung in an lang ta kung a ni ber e. 

Rochhuaka hawiher pawh a beidawng hmel ngang tawh mai,a tawp nan ti ni awm takin a chempui chu Thanpuia nghawng zawn ah chuan an vai leh fur mai a, Thanpuia chuan lo kun zauh pahin a banrek ah chuan alo khak zauh a, Rochhuaka chem chu a per ta nawlh mai, chutih rual chuan a chempui vai tha pe na lutuk chu a taksa rihna chuan buk in, hnung lam ah a eu phar ta uan uan mai le. Thanpuia chuan a kawlhnam chuan va dang vat in, tla lo chuan a din ngil leh theih phah ta a. Chutah mi rinloh lutuk thil a thleng ta! Rochhuaka mi seh hel ber leh pawisak nei miahlo a an ngaih chu tlawm tih hriat takin, Thanpuia hma ah chuan a thingthi ta rup mai. "Tlangval, kei ni ang beih mi rual I ni lo ve, min chhaih kual rei mah mah e, kha ka lu hi la tawh rawh le," ti in a kun ta ngaih mai. Thanpuia chuan Rochhuaka tawngkam vek a chhang let in, "Sete rang pakhat vang a nunna chan zawng I phu mawlh lo ve, tlawmngamna nun tluk a huaisenna dik hi a awm theilo, pasaltha diktak zawng ilo ni e," ti in a kai tho ta zawk a, chu ve leh Saibual khaw ho chu an thum hluah hluah mai a ni.

An au thawm a reh fel hnu chuan Rochhuaka chu ring takin a au a, "Vawiin ah hian kei pasaltha inti Rochhuaka hi ka tlawm ta, he Saibual tlangval lak atang hian zir tur tam tak ka hmu a ni. Huaisen tak a tlawm ngam nih hi ka zirchhuak ta. He inbeihna a ka tlawmna hi ka dawihzep vang ni a ngai a min diriam in awm a nih erawh chuan kei Rochhuaka hi hmachhawn tur che u in ka inpeih reng e, "a han ti a. Thanpuia'n kut alo beng thak thak an hmuh chuan kut chu an beng zui ta dur dur a.
Lal Hualvunga chuan thusawi in," in chak ta e, khua kan thlen tuk ah in lawmman tur sepui pahnih chu ka tlangval te ka rawn dah tir ang, tha tak in lo dawng sawng ang che u, "ti in a in her vut a, tlawm la tih hriat zet chuan a kal zui ta nghut nghut a, a upa te ho chuan an um zui nghal dawr dawr bawk a. Khaw hnih tlangval te chuan an mi huaisen ruang leh hliam tuar te chu buaipui in, mahni khaw lam ve ve pan chuan an in zawn liam ta thliah thliah a. Inbeihna pumpui ah mi pakhat chauh nunna chan an awm chu a khawi khua ve ve tan pawh thil lawmawm tak a ni awm e.

Buhchhek chu tul viau mahse, Thanpuia rilru chu enge maw tak hian a mawlh tlat mai a, khawhnih inkar a buaina chuan chhan tha tak enge maw a neih a ring tlat mai a ni. Tuk thuan eikham veleh a insiam mawlh mawlh a, Mualnuam khua nen an khaw inkar lam chu panin a chhuak zui ta a. Hnu hma eng eng emaw chu hmu nual mahse han chhui zui tlak a hmu mai tlat lo,ruah a sur zen zen tawh loh avangin ngaw hnuai ah phei chuan hnuhma chu a reh mai mai in a ring tlat lo a ni. Nau riltam hun vel ah chuan Tlangnuam hmun rai nuam zet mai chu a thleng phei a, hnuhma thup deuh tih hriat tak mai chu dam lam mual ah chuan a lut tih hmu in a chhui zui ta char char a. A chhui thui deuh hnu ah phei chuan hnuhma a inthup tawh hauh lo, ramsa hniak nilo in se hnu lian vak lo hnu hma ngei a ni tih chu a hrethiam vat a, hmanhmawh tak chuan a chhui zui ta par par a. Thui fe a kal hnu chuan sih lian vak lo, dum hmun chu a paltlang ta a, mahse hnu a hloh ta tlat mai, dum hmun ah pawh chuan se hnu reng reng a lang lo, chutia hnu hma a han hloh ringawt chu mak a ti ngei mai, tui te in pahin vaibel zuk pah in a chawl ta vang vang a.

Chawlh pah a ahawi kual vel na lam ah chuan a mit la tu deuh mai chu a hmu ta tlat, sih hmun thlen hma theitit kung lian deuh ding awn du mai awmna hnuai chu a pawng deuh thar a, lung pathum vel chuan a in delh bawk a. Pan hnai in lung a dah sawn hnu ah a chempui chuan a cho kual ta zung zung a, leivung tih hriat tak in chawh khuar pawh a harlo hle. A ngal rek pil awrh chauh ala cho hman tih ah chuan Sete ruang chhe tan tawh chu a cho chhuak ta, a awmna hmun a dam duk em a, alo la tha hlauh zawk a ni e. A duh anga a hailan hnu chuan a han belchiang a sete tui pal rang, beng dinglam hmawr hlehsak ngei a ni a, a beng veilam erawh a him thung. Uluk tak a chhilh in, lung a a delh hnu ah a hawsan ta vang vang a, a mak tih na chu reh in a thinrim ru teuh tawh mai. He thil verther tak ti duh tur hi tumah dang han rinhlelh tur rual an awmlo, pasaltha rilru tenawm Chalmawia chauh lo chu.

EPISODE 10
Hun leh ni te chu alo herliam ve zel a, favang alo thaw ta tih hai rual loh in rengchal alo kiu ta vawl vawl mai. Pawhchhiat nisa hnuai ah chuan an thlawhhma theuh te chu thlo zo in an indah thei ta hlawm a, hna uluk zual deuh ten buhseng nawm nan ti a hnuhthial an rit leh tih chauh lo chu hlo thlawh ngai an awm tawh lo. Favang ni chhuak engmawi tak hnuai ah chuan kum hmasa lam chulram a hmarcha leh thlai rah ilo vai turin Pu Doliana te pafa pawh chu an inzui chhuak hnak hnak a. An chul thlam, ram rip rep tawh ah chuan innghat in vaibel an han fawp khu hlat hlat a, an thlan te a dai ta tih ah chuan Thanpuia leh apa chuan Hmarcha leh thlai rah ho te chu an han mal kual zung zung a, chawhma zet an mal hnu ah chuan an ipte khat chu an in veh khawl thei ta a.


Chaw te an han fak kham chuan haw tur a inbuatsaih in, muangchang in an inzui ta bek bek a. Tlangdung kawngpui an pawh hnu chuan kawng pawh a zal nuam ta deuh, Thanpuia chuan apa hnen ah, "Ka pa, ala tlai chhe lo bawk a, saw lai vawngthir rah saw sakhi ten alo tlawh tak in ka rawn tlai teh ang, kan sarep bawm pate pawh a phai tawh e mai," ti in a pa chu a han rawn a. Pu Doliana pawh chuan, "I peih a hnu rawn tlai la ti nia, I hlawhtling mial mah na le," ti in a kalsan zui ta a. Vawngthir kung chu kawng atang a perh nuam tawk chauh a hla a nih avangin a han bih kual thuak thuak a, sakhi hnu chu a lo chiar dup mai. Kawng a tanga hlam thum vel a ding zihnghal kung hniam te, tawi buk laih mai ah chuan a thu lut ta vat a,a silai dawt phir chu uluk tak a han enfel hnu chuan rinawm tawk tur ah ngai in, a silai lek dal thei te chu thliak awng nghauh nghauh in ngawi reng chuan a thu ta a.

Kum hmasa lam a an thlawhhma neihna hmun hi Mualnuam khua nen a an inkar lam ah a ni a, tun a Thanpuia te kalna hmun chul ram ni ta hi a ni. Rei pawh ala thu hmanlo tih ah chuan Mualnuam lam atang chuan inbe bawrh bawrh thawm a hre ta a, a zawn an lo thlen chuan zihnghal buk chu keu dek dek in a han en a, a rin loh tak mai in an khaw chhuahsan tu Chalmawia leh thingluang zawh a an inbeih tum a pasaltha Chawngthianga khingpui, mualnuam pasaltha Vanmawia te hmel a hmu ta tlat mai le.! Engtak chu rawn kal chhan ang maw? ti a ngaihtuah rauh rauh chungin a thlirliam ta a. A piah mual thumna, a sachanna ep lam a kawng rawn herchhuah lehna zawn vel an thleng phei tawh ang a? tih ah chuan patling thinrim inhrosa kuk kuk ri leh in elhsenna nui ri uar uar te a hriat tak ah chuan Thanpuia chu harhchhuak zawk in, "Ka pa an va umpha a ni maw?," ti a inseh ruh rap rap chung chuan a lawnna zihnghal kung a tang a zuangthla in, hmanhmawh tak in a um ta sawk sawk a.

Chalmawia hian Vanmawia chu thiam tak a vehthlem in, "An hneh loh Saibual pasaltha lu chu a hawn theih chuan thingluang zawh a inbeihna hmun a an mualpho lutuk pawh a chhawk zia awm thei ang," ti in a rilru a hmin sak a, Hrangthanpuia chu hnung lam atang a kah tluk tawp a, a lu laksak tur in an lo thawkchhuak a ni. Hrangthanpuia nilo in apa zawk an hmu hmasa ta si a, thinrim takin Chalmawia chuan an khum in a han vau vel a, Pu Doliana lah chuan alo hlau aw zawng lo mai, a ke pen buai map lo chuan a kal nghauh nghauh mai a ni. Chalmawia thinrim chuan Pu Doliana lu laksak chu a tum ta a, mahse Vanmawia chuan a remti ta hauh lo mai. "Pasaltha lu khai haw turin kan kal a ni lawm ni? Putar lu la tur ni lo in," a ti hmuk mai a, Chalmawia thinrim lutuk chuan Pu Doliana tih thaih nan van vawr zawng chuan a silai chu a hmet puak ta thuai a. A mu te a thun fel leh hnu chuan chul ram thlam ah zan riahna tur zawng a, a tuk lam a Hrangthanpuia ram kal enthlak zui tum in an let san ta a ni. An let deuh chauh tih ah chuan saphu ko pang kai tum, kai hlei thei silo chu hmu in, Chalmawia chuan, "zanriah hmeh atan a remchang hlauh e, " ti in a chem phek chuan a han hem thlawp a, a inzial mum hnu chuan a ip pui ah a khung ta a.

Silai ri te hial a hriat tak ah chuan Thanpuia chuan a pa chu a dam reng a ring tawh lo, mahni inthunun hram hram chungin fimkhur tak chuan hma lam chu a pan zel a, a hma lam ah thawm a lo hnai tih a hriat chuan kawngsir a khuangthli kung lian tak phen ah chuan a per lut ta zauh a. Chalmawia leh Vanmawia te thlamuang zet a an rawn in zui lai chuan an hma ah Hrangthanpuia ngei mai chu in ring tak chung a laiphir tin kawh va chung chuan a lo ding ngalh mai. "Ka pa chung ah tu nge kut thlak zawk che u?" a han ti khawl mai chuan nelawmna a keng mawlh lo, Chalmawia ipte puar mum nalh mai chu apa lu ngei a nih ring in a thinrim chu a puak keh lo chauh tawh a ni. Vanmawia zawk chuan silai rawn chuh thut in, "Nangmah ngei hi...." tih bak a sawi hmanlo, a mit pahnih inkar ah chuan Thanpuia ngen mu chang tak chuan deng dawt in, a tukkhum ah chuan a chhuak pawrh nghal tuam a, a silai pawh a hmet per ve hman ta lo. Thanpuia chuan a silai la lek kawh va chung chuan Chalmawia chu a tin ran mai bawk a. Chalmawia tan chet na chi a ni tawh lo, Thanpuia laiphir kaw leh lam atang a lo chhuak tur chu atan thihna a ni tih a hrechiang em a ni.

Chalmawia chuan tih dan tur dang dap in, a silai chu kawng sir ah chuan an theh thla tawp a, "Mipa leh mipa chu a fawng chelh tu zawk awmlo in, dinhmun in ang atangin kan sawifel tur a ni dawn lawm ni?" tih pah in a ipte chu a sir thingtuai zar filawr ah chuan bang in, a chempui chu a rawn hum ta ran a. Thanpuia pawh chuan a ipte chu nghat in a chempui chu a han phawichhuak ve ta zal zal a, a silai tun pah chuan, "A ni tak e maw! Mipa leh arhluisen te chuan damreng kan thlahlel tur a ni hleinem maw le, nang hian awlsam tak a thih hi I phu mawlh lo ve, " ti in a pan hnai ta chhat chhat a. Chalmawia chuan Thanpuia chu thinrim tak leh rilru mumal lo pu a siam tum in a han tawng elhsen zui sak a, " I pa dawihzep leh tlaktlailo zet khan zuncheh tuar tuar khawp in a nunna zuah sak turin min ngen asin, dam tlak a ka ngaih loh avangin a hrawk ka zai sak ta a nih kha," a han ti a. 


Thanpuia chu a thinrim kher mai, mahse a pa phuba a lak sak theih nan rilru fim tak put a ngai tih hria in a in thunun hram hram a ni. An han in veh tan ta tham tham a, Thanpuia chuan, "Engti tur a helai thleng lo vak lut nge in nih," a han ti a. Chalmawia chuan, "I thih hma hian kan tih tur hriat chu I phu ve bawk e, I lu la a, kan Mualpui vangkhaw sahlam mawi tir turin maw le, I hre chiang meuh maw?" tih pah chuan a rawn vai ta fur a, Thanpuia chu lo tawlh sawn zeuh pawh in Chalmawia chempui in a pel chiah tih ah chuan Chalmawia malpui tihrawl chu a han chhah sak thawt a, "Hmeichhia leh naupang lu hawn thei pasaltha, I tum I thelh hlauh mai," a han ti zui a. Chu tawngkam chuan Chalmawia chu a ti thinrim kher mai, an chhe tin reng chhak chhuak chungin a rawn bawh zui buan buan a. Thanpuia duhthusam ang chiah ni in, alo bum pah chuan Chalmawia taksa hmun tin mai chu a lo hliam sak hman ziah mai. Chalmawia chu a hnungzang tihrawl a kak duai a, a awm ah saipir chen dawn in a kak bawk a, a kaihza tha veilam in chhat tawh avang leh a kaihza chung a mal hliam na tak te chuan a tuan a ti fum tawh kher mai. 

A tawp nan ti ni awm fahran in a rawn bawh leh thut a, a chem vai chhuah hma chiah in Thanpuia chuan a chem vawnna ban chu a rawn sat uai ta hnawp mai le, chumi pah chuan a chem la kual in an vai let zui leh nghal a, Chalmawia dul chu a thler kau ta huau mai,a kut vei lam chuan a hup ve tawk tawk a, a thingthi ta rup a. Thanpuia chem in a hrawk hrui a rawn chhah leh thawt tak ah chuan hmalam a bawk thlawp in, thi tur chal chang tih hriat tak in a leng khur ta dar dar mai, pasaltha ti a inchhal ve meuh si chuan pialral thleng phak lo in, thlafam vangkhua chu inthlahrung zet in a han lawi lut ve duk duk ngei ang le.! Thanpuia chuan Chalmawia ipte chu va keu vat in apa lu alo ni hauhlo mai, saphu inzial mum mai alo ni tih a hriat chuan a mi thah te silai pahnih chu khawm sak in, beiseina chhete nen chuan a tlan haw ta vang vang a.

Kawng chanve a pel hret tawh ang tih ah chuan a rinloh tak leh beisei ruk deuh ni si, a beisei ngam tawh chiah si loh chu a hmu ta, a pa ngei mai chu ipte puar nalh ak chung chuan tiang hawl in kum upa lam losul haw tih tak ah, alo hei ha chho dap dap a. A han ko a, a bul a thlen chuan a hah a dam huai huai mai, Pu Doliana chuan a fapa Thanpuia thisen kai nuaih mai a hmuh chuan thil awmdan tur chu a ring thiam deuh ruak mai, a han zawh chian hnu chuan in thlen veleh Lal hnen a thlen a ngai ngei dawn tih a hre ta a, rilru ipik ru tak chuan an vangkhua Saibual chu an lawi lut ve ta a.

In an thlen ve leh insil dai hmanlo in Lal in chu an pan ta nghal a, Lal hnen ah chuan an thil tawn engkim chu a chinchhuak in an hrilh fai vek a ni ber e. Lal Duhmanga chu a han ngawi vang vang a, ti hian a rawn tawngchhuak ta a. "In dinhmun chu ka hriatthiampui khawp mai che u, mahse in thil tawn ang chiah hian lo sawi ta dap ila, Mualnuam Lal Hualvunga hian a pawm kher chuang in ka ring hauh lo,mahni in lei do I la ngam ta zu nia le, Hualvunga chuan a pasaltha pahnih a chan tih a hria a nih chuan leido khua kan ni nghal ngei in ka ring. Thanpui, ka tan loh vang che a ni hauh lo, mipui nu nau pawisawi ve lo in an tuar tur hi ka ngai ngamlo a ni,leido kan neih avang in nangpawh dinhmun hlauhthawnawm ah ka dah tawh che tih ka la hai mawlh lo ve. Ka khua hi min chhuahsan la, tichuan Hualvunga hnen ah pawh, 'mahni a leido la ngam a ni a, Saibual khua a chhuahsan ta,ka khua leh tui ten mawhphurhna engmah kan neilo e,' ti in ka lo sawi mai dawn nia, lo hum ngam tu tur che Lal belh tur zawng mai rawh, kei chuan ka hum ngamlo a che, " a han ti a.

Thanpuia chuan a pa chu lo tawng khalh in," Lal pa, I zahngaihna avangin ka lawm e, ka tihsual a nih chuan ka tuar mai tur alawm. Chutih rual in, tih sual nei ve lo ka nu leh pa leh ka chhungte tal hi chu I hum thei hram lawm ni? ti in a han ngen a. Lal chuan, "a ni khawp mai, tihsual neilo leh pawi khawih ve lo na na na chu, an tan theih tawp kan chhuah a niang chu, ka tih theih bak erawh in beisei ngaihna a awm dawnlo ania," a han ti a. Thanpuia chuan, "Lal pa ka lawm e, ka chhungte tan hian theih tawp min chhuah sak ang tih hi ka ring tlat a ni. Chutih rual in I hriat ngei ngei tur thil rawl ruk tur che ka nei a, ngun tak in lo ngaithla ang che. Mualnuam khua nen kan inrem lohna chhan chu I pasaltha hnawhchhuah tak Chalmawia rilru vervek vang a ni e. Kan khawhnih inkar buaina thlentu sial hi I sial a ni hauh lo, Mualnuam khaw upa Vankunga sial ngei a ni e. Vankunga sial kha Chalmawia'n a ruk a rawn kai in, I se rual ho zing ah a rawn hnutchhiah a, I sial zawk chu kai bo in, kan khaw in kar tlangnuam dam lam ah her luh pui in, thui tak a kalpui hnu ah sih zu then dawn theitit kung lian tak, to kual deuh ruih hnuai ah khan I se ruang chu a in phum tih i zu finfiah thei ang. Kei erawh in harsatna thlentu ni lo tur in ka pem a nge, lei do khua neilo in thlamuang tak in lo cheng ang che u", a han ti a. Zanriah ei a lo hun dawn tawh bawk nen an haw san ta a.

Lal Duhmanga chuan a han ngaihtuah vang vang a, leido neih chu a zuam hlawl lo, Thanpuia erawh a khawngaih ngang mai. Thanpuia hnen ah chuan a thilsawi a finfiah chhung chu khua chhuahsan lo turin a hrilh a, Mualnuam khua chuan an hriatchhuah hma in kar khat tha zet chu hun la nei tur ah a in ngai a ni. Chutih lai chuan thival zuar pawih sumdawng te chu Saibual upa in ah chuan an thleng a, an khaw thu kal lam leh haw lam zawng zawng chu an hriatpui ve vek mai. Sumdawng an nih miau a vangin khaw khat a cham reng thu awm hek suh. An thi zawrh an hralh zawh hnu chuan a man atan an dawn thi leh darmang te chu phur in hmanhmawh takin an haw ta par par a, khaw kar kawng a zan li an riah hnu ah Zahau Lal huaisen Liankhuaia khua Hrianghmun, khawchhak tuipui ral a mi chu an ban hman ta hram a.

Lal Duhmanga'n an khawhnih in kar buaina tobul zawng zawng a han hailan theih tak ah chuan a rilru a na ngei mai, Chalmawia ti hlum lo va a chhuah mai kha a inchhir vawng vawng mai a ni. Thapuia hnen ah chuan thu pha chawi in, a khua chhuahsan lo tur chuan a han ngen leh chiam a, mahse mi rilru luhlul Thanpuia meuh zawng koh kir theih mai mai a ni tawh lo. "Mualnuam khaw tan harsatna thlentu ni in hnawhchhuah ka ni tawh a, kir ngam tur ka ni tawh lo ve, mangan ni khua ah chuan Hrangthanpuia hming hi lam rik a ni fo thin a, mipui te sawi nasat ber a ni fo thin. Induhsak nikhua ah erawh Hrangthanpuia hming hi hriat a ni ve ngai lo ve, dam takin lo awm ang che u, "ti in chhuah a tum nghet ta bur mai a ni. Lalnu mittui meuh pawn a au kir zo tawh hlawl lo.

Pawih sumdawng ten Liankhuaia khua Hrianghmun an han thlen hnu chuan, an zinna khua a an thil tawn an han sawi a, Lal Liankhuaia beng chu a verh ta hle mai, "Mahni chauh pawh a leido la ngam khawp pasaltha huaisen chu ka khua hi lo kai rawh se, ka lo hum a nge a ti ta chhek chhek mai. A tuk ah chuan a pasaltha zing a mi pahnih, Vawmphunga leh Pakthanga te chu ko in, an hnung zui tu tlangval paruk nen, Saibual pasaltha huaisen, mahni chauh pawh a leido nei ngam khawp a khual thang pha, HRANGTHANPUIA lam tur chuan a tir chhuak ta ani.
Vanglai tha hmang tih tak ah Vawmphunga leh Pakthanga kaihhruai te ho chu an kal chak par par hle mai, zan thum lek khaw kar ah hmang in Phawngpui tlang piah, Cheu lui ral khua Saibual chu an ban hman ta mai reng a ni.

Lal Duhmanga hnen ah an Lal Liankhuaia thu chah engkim chu thlen in zan an riak ta a, a tuk zing hma tak ah tho in, Hrangthanpuia leh a nupui rai hram tawh tak Thansiami nen chuan Lal huaisen Liankhuaia a khua Hrianghmun chu pan in an in awi chhuak ta a, hmeichhia a kar a rai hram tawh tak kalpui an ni bawk nen, an kal sawt lo hle mai. Khaw kar kawng a zan ruk zet an riah hnu chuan Hrianghmun khua chu an lut ta a, Hrangthanpuia pawh a hmingchherna khua lo ni kumkhua tawh tur chu lawi lut in, Hrianghmun khaw pasaltha alo ni dawn ta a ni.
***The End***

No comments:

Post a Comment

Post Bottom Ad