Mizo Thawnthu - HRUMZIAL VANGKHAW HRAICHAWI HRANGTHANPUIA 6 - 8

HRUMZIAL VANGKHAW HRAICHAWI HRANGTHANPUIA Ziaktu - Thunderboy Chinzah

Previous : Episode 3-5

EPISODE 6

Saibual an han kai chu ram ngaw a chhah tha in sa an la tam ngang mai a, pasaltha ti a chhiar ni lemlo pawh in sa an la deuh reng hlawm mai a ni. Hrangthanpuia pawh a ramchhuah tawh chuan kutbeng a haw a nei ngai meuh lo, hlawhchham tlawmla chi a lo ni bawk nen a hlawhtlin hma chu avak ngat ngat zel mai ani. Riahfai keng miahlo a kar khat dawn dawn thangbo pawh a nei fo mai, salu ropui tak nen Saibual khua a lawi lut leh nge nge thin a, hlado hlawhchhuak zo khawp a sahrang leh salu ropui tak tak pawh a thlen zing na rawh e. Tum khat chu pasaltha h no o leh tlangval enge maw zat nen kar khat thang tur in an ramchhuak a, cheu lui kam ah innghat in buk an sa ani. An riah luh tlai hian hmun hrang hrang ah vak darh in, riah chawhmeh dap a chhuak an ni a, Sakhi pahnih leh hauhuk chal kap thla in, chawhmeh na na na chu an hnianghnar kher mai. Rawng te bawl sawk sawk a zanriah puar el euh a an tlak zawh hnu chuan meipui hnungpuak in an thu kual far mai a, vaibel chu an pak khu bial laih laih hlawm mai bawk a. Val upa chuan a thutna chu han siamtha te te in, a puan ven chu pawt phelh in a khup ah a han suih leh a, aw a han then kharh kharh hnu ah an awm zel dan tur chu a nau te ho a han hrilh ta a.

"Naktuk atang chuan a zau thei ang ber bawh kan tum anga, buk chhak lam tlang pang per leh lui mawng lam leh lu lam ah nen kan in sem darh dawn nia. Naktuk atang hi chuan a rem apiang kap mai tawh lo in, nghalchang leh Zukchal ai te ah chuan thal I thlah tawhlo ang u, kan hlawhchham tak ngial dawn a kan hriat tak leh zan thumna ah ro kan rel tha leh dawn nia, "a han ti a. An Sakhi sa chu an ur vut vut mai bawk a, cheu luikam anih avangin tui a awlsam mai bak ah, fur tuilian in a alen khawm thingro te chu te deuh atang a lian tak tak thlengin buk sir mai luikam ah chuan a in chhek thluah mai bawk a, awlsam tak a lakhawm in an mut vut vut mai a ni. Tui leh mei ah chuan engto teh chiam tur an neilo a, an hahdam phah em em mai ani. Zan te alo rei ta deuh a, siruk pawhin vanlaizawl a kai lek lek tih an hmuh chuan mut a hun tawh tih hriattirna tha tak a ni a, tawnmang ramnuam a lengi tawn inbeisei tak in, an buk chhung ah chuan an zal ta sang sang a.

A tuk khua alo var chuan tho tlai bik nih hlau in an han thochhuak sap sap a, an meipui chheh ala vam tha hem hawm bawk a, tuk thuan tur chu an han rel nghal zung zung a, an sathing chu tlem deuh tawh a an hriat avangin an han thlak belh leh nual a, sakhi sarep tihrawl tha deuh deuh ho chu an han thukphum bawk a. Puar el awl a tukthuan an kil zawh hnu chuan puar nghah thlak pah in vaibel chu an pak khu talh talh hlawm a, an hmabak chu phurawm an ti in an sep rawtui nasa mai ani. Pasaltha Thangkawnga ho ten lui hnar lam an pan a, val upa Robuaia ho in buk chhak mual hrut tur in an kai chho bawk a, Pu Tawnvela leh midang pahnih te chu kum upa lam an lo ni tawh bawk nen buk nghak ah dah in, a bak Thanpuia leh mi panga te chuan lui mawng lam chu an zawh thla ta a. Lui kawi sarih zet an zawh thlak hnu chuan mual vangtan zawng zel a chho zawng deuh a hrut tur in a remchang lai apiang ah chuan an per kai ta zauh zauh a.

Midang zawng an kai zawh hnu chuan Thanpuia chuan lawnkaina remchang a hmuh mai loh avangin lui dung chu a zawh thla ta zel a, luikam zawl zau deuh Phairuang hmun chu a thleng ta hlawl mai. Vaibel tan kai in a han thu hahchawl vang vang a, thawk te la hahdam a, tawk fang a chawlh hnu chuan lui kuang chu a chhuahsan ve ta. Luikam zawl chu enge maw chen a zawh hnu chuan mual mawng zing zum lai rawn inkhawh lut, perkai nan a rem fahran mai chu hmu in, mualdung sahmul then ah fingkhat awm zet a zawh chhoh hnu chuan mual vangtan zawng chuan a lut phei ve ta a. Sa hnu chhia va te te tharlam tak tak chu hmu nual mahse, han chhuizui tlak em ala hmu thei tlat lo. Chutih lai chuan kawr hnar lam ah chuan silai puak khawk raih raih chu ral khat hriat rai rai in, a hnu lawk ah chuan vawi khat dang a rawn puak leh a, a reh zui ta vang vang a. Lui hnar lam thiante thawm a hriat chuan Thanpuia chu kiai sak in, hlawhchham bik nih chu a tum lo kher mai. Mual lian tak tak pathum a kan phei hnu pawh a hnuhma tih tlak deuh pawh a hmuh loh avang chuan kawr lam chu pan thlak leh phawt mai tha in a hria a, kawr dung enge maw chen zawh thlak chuan hnu hma tih tlak deuh hmuh a inbeisei a ni.

Thui vak lo a chhuk thlak hnu chuan sa hnu lian tha tak la thar zet mai chu a hmu ve ta hlawl mai, an belchiang deuh a, mak a ti tawlh tawlh mai. Sanghal emaw zukchal hnu ah emaw han puh dawn se a lian nasa mai si, sai la puitling chiah lo deuh hnu ani awm mang e, han tih ngawt dawn lah in sai ke hniak a ni hauh silo, bak ah sai puitling lo chu mahni in a tla hrang hauh lo ang tih a hrechiang bawk si. Mak ti taka a hawi vel lai chuan a chhak tlang ah chuan silai a in lawn ta un un mai, sai kiu ruai ruai ri chuan a rawn zawm ta bawk. Pui tur in a han chho ang nge a hnu hmuh chu a chhui zawk ang tih a ngaihtuah vang vang lai chuan silai a rawn ri leh ta dur mai a, thawm pawh enge maw chen chu a reh ta vang vang a, a piah mualdung pawng lai ah chuan lawn chho in thawm a han ngaithla vang vang a, hlado chham vang vang leh silai puak ri a hriat zui tak ah chuan a veng ta huai a. Han pawh chhoh vat pawh chu tha ti viau mahse, a sa hnu hmuh chu ala thar bawk nen enge anih hriat a chak em avang chuan chhui zui zel turin rilru a siam ta zawk a.

Sa hnu chuan lui mawng lam a pan a, hmanhmawh leh fimkhur tak chuan a chhui thla zung zung a, kawi thum a chhui thlak hnu chuan kawr te in lui lian zawk a rawn finna zawl deuh, dum tui ti chip chep awmna chu hnu chuan a pal tlang a, a han belhchian chuan hnu ah chuan tui lo tling in a rawn nu tan ngiai ngiai a, tho mitchhaih leh tlippui an lo thlawk fur fur mai te a hmuh meuh chuan, sa chu a hlat tawhlo ani tih chu hrilh nawn a ngailo kher mai. Fimkhur leh zual chuan a chhui phei leh ta thauh thauh a, mual rawn inkhawh lut mawng ah chuan tan phei in, mual sezang lai a han chuang chhuak a, a hma lam chu awi deuh vut ni in, a hnuai luikam hmun zawl ah chuan a sa chhui lai ngei chu a zu hmu ta, a rin loh leh beisei loh lutuk mai in sa vang tawh em em mai, hmuh ve theih pawh a in beisei loh Samak ngei mai chu a lo ni. Thing ding thelh thuau mai kar ah chuan a thlir veng veng mai. Thal thlah nan duh ai in ala hla deuh bawk nen, chu ramsa che zia mak tak chu hmuhnawm ti em em in a thir ta reng mai a ni.

Samak kal kawng ah chuan thing tuluang mawih lam hmel tawh lek lek, dawrawn tlang tiat vel zet a lian chu a awm a, a kakpui chunglam chu a mawih bal zo tawh a, inchhung vangtan zawng chen vel a sei a ni awm e. Samak chuan an hel thut thut a, a lo let leh thin, a kalna dal a thil dang lo awm chu a ngai thei thlawt lo a ni awm e. Vawi hnih a hel that that hnu chuan a kalna zawn ah chuan lo let leh in, thing tuluang chu a pir kang uk uk a, a thlauh leh thul, vawi thum a pir kan na ah chuan a hnung lam ah a bin liam thei ta a, a ma ngum ah chuan tlak in a phu zuk a, a awrawl nen thawm a chhuah hlut leh ta nghal a. A che zia mak sak tak mai chuan Thanpuia nuih chu a ti za rum rum mai, "Ramsa luh lul tak chu in nih ngei dawn hi" ti rilru rauh rauh pah chuan kawr pui lam chu a pan San ta a.

Thanpuia chuan a sa um lai chu hnung lam atang a beih chuan tihsual palh awm thei a ahriat avangin hmalam a lo chan chu fuh zawk in a hria a. Ni pawh a chawhnu her bawih tawh tih a hriat avangin muangchanna chi a ni tawh lo. Luikam tiau pho ah chuan hmanhmawh tak in a tlan par par a, mual leh lam tawp, sakhan in a rawn pawhna lai ah chuan alo chang ta ran a. Rei chan a ngailo, a chan khan ah ngei chuan Samak chu alo chhuak phei ta luai luai mai le. A hma zawn thing bul atang a a lu a rawn lawr fel chiah tih ah chuan thun tling el awl ngei a ni tih hriat zet mai chuan chengrang a au khawk ka rawih rawih mai le. Samak pawh chu a mit leh a beng inkar a ngenmu chang tak in kua a hreuh tak a vang chuan hreh zet in a let ta ngut a, thawh leh chak in han leng viau mahse, tho leh thei rual a awm tawh lo. Kar lo ah a hnuk pawh a chat fel chu a ni zui ta mai, pasaltha kutthlak nge nge zawng alo na bik ngai e. Thanpuia chuan hnahchhawl tlem chu sat in a han chhawlchhin a, a chung ah chuan a diar in a khuh zui bawk a, hmanhmawh takin buk lam chu a pan ta vang vang a.

Behliang mun hun vel ah chuan buk chu thleng chho in, pasaltha Thangkawnga ho te chuan zukchal an lo kap a, val upa Robuaia ho te nen in fin in buk an lo thlen thlap tawh a, an chan darh mek alo ni. Tin, lui mawng lam a a vah thlak pui ho te pawhin sai tluang hmu fuh in, a huho in an chhui a, sai padawp an kap alo ni a, lamkal atan Rorehlova chu tir in chanchin engkim alo thlen vek tawh a. Val upa Robuaia chuan Thanpuia chu lo chhawn in, "Thanpui, hei Rorehlova hian I silai ri ni awm tak hria in a insawi a, enge ni I an le? An ni lam mual hrut a fuh deuh a, sai padawp an rawn thal hual mai lehnghal a ni awm a," alo ti bawrh bawrh a. Thanpuia chuan, "Uai chu thiante zar ah kan tum ai hma a hlawhtling in, hmai a uang haw thei ngei dawn a va ni awm ve? Kei a kah ve te zawng eng tham a ni law, nghalrual chaw zawng ve thei tawh rual vel te hi alawm maw ka rawn sai thluk ve tak mai mai le", a han ti a. A diar khim an hmuhloh dan ah erawh sa chhiava mai mai zawng a kap lo ang tih chu an ring vek thung a.

Pasaltha Thangkawnga chuan rawn chhunzawm in, "Hei kan sa chan pawh kan zo ruai chu a ni ta mai a, helai ah hian sarep tur leh buk nghak tur in mi panga inhnutchhiah ila, a bak zawng chu mutbu leh riahfai te nen in sakahna hnaih a buk sual chilh mai tur in inchhawp thla ila a fuh viau lo maw? Sai sa pawh lui kam atang in han thiarna hla lutuk lo tur ah ngai ila, " a han ti a. An pawm zawng tak mai alo ni bawk a, insiam sawk sawk in, lui mawng lam pan chuan zawng hnuhnung ang lawp lawp chuan an phe thla ta dawr dawr a.

Sai kahna zawn mual mawng an thlen chuan remchang lai ah innghat in, buk sual a mei lo nun tur in kum upa lam deuh te chu val upa Robuaia ho in mi pali an han ruat a, han tang viau mahse la an hna tur chu a pawimawh dan a inchen vek ti a an nawr luih avang chuan an hnial ta bik lem lo. Mi pali te chuan buk chak tur chu lakhawm zung zung in, buk chu an sual ta thuai thuai a, buk dang ang a a chhuat dawh kang hman an ni tawh lo a, tiau pho lei rem lai deuh chu buk chhuat ah hmang in an riak mai dawn a ni. Changel hnah chu buk chung atan leh sa chan vel nan thahnem tak chu an sat a, sarep na tur sei tak tak in hmun hnih ah an siam zawh hnu chuan meipui tur lui kam ah thingro te chu an keuh vum thur mai bawk a ni. Pasaltha Thangkawnga ho te pawh kawng sat chho pah zel in an kal a, sa phurhna tur atan lengphek hrui hlai tha tak tak te chu chhat in an ak chho teuh mai bawk a. Sai kahna hmun an thlen chuan a hmun nghak mi pali te chuan an lo chiau au vat a, sai sa pawh chu phur tawk awm zel a lian pui pui a hlep thla in an lo chan darh zo deuh vek tawh mai a, a kawchhung chauh chu buaipui ngai alo awm tawh ani. Chawl khawmuang lo in an han buaipui zung zung a, kar lo ah chuan an zo ta mai reng a. Hmanhmawh tak in buk lam ah chuan an thiar thla a, mi sawmhnih bawr vel in zo tawk a phur an ni bawk a, vawi hnih an kal chuan an thiar zo ta duak mai.

Ni suk chen vel ala awm tih ah chuan Thanpuia sakahna hmun pan chuan hah sawi hman leklo in an liam thla leh ta. Nghalchang a kap in an ring theuh a, a hmun a chan buai lo in an thahnem tho bawk a, a pum a buk a zawn chhoh mai chu an rilruk tlang a ni. A hmun an han thleng, Thanpuia sa kah an han hmu zet chu mak ti lo reng an awm lo, meng phar awn awn in an chek tlawk tlawk mai a ni, pum zawn chi rual lah ni hek lo le. A then in a ki te an lo tuai vei thul, a kawr sak tak mai te chu an chempui zang lam chuan an khawng bawl bawl mai a, mak an ti ngei mai, samak a ni miau alawm le. Rorehlova chuan an bel chiang that that a, "Chaw zawng thei tan tir pawh hetiang tiat a nih chuan a pachal phei chu a lian awm mang e," an ti hluk a, an nui ta ham ham mai, Thanpuia pawh chu za lo zet chuan a kiai ve suk a. Muangchang hman an nilo tih hria in, sa chu an chan darh zung zung a, lui kawi thum vel awrh a hla a nih avang chuan an thiar zung zung a, khawthim ruai ah chuan buk chu an inthlen kim thei hram a.

Sa chan pah chuan zanriah ei an rel pah bawk a an buai mam mam hle mai, meipui chu lian tak a chhep in, Sai leh Samak sa hrang lian tak tak a an chan ta chu an vawm lut zung zung mai ani. Sa an chan mawlh mawlh lai chuan Rorehlova pek chu a rawn tawngchhuak leh ta hlut a, Thanpui, tiang khawp a sa ropui saithlu meuh meuh te chuan hlado nen chengrang lawn un un tur che a lawm mawle, I hlado chham thawm kan hre mang si lo, "a lo ti a. Thanpuia lah chuan nui suk pah in," Hlado chham te chu ka duh ve tho alawm, mahse samak hian hlado aneih awm ka hre lo a nih hi. 'Nghovar e' han tih chi ni silo, 'Vawmphuai e' han tih dawn in dik bawk silo, 'Tharsa thlunglu hreu vung e', han tih dawn lah in a ki a hreu lo nasa mai bawk si a, chham ngaihna awm hawt lo chuan, " alo ti zet chu an vai nuih ta ham ham a.

Sa te an han chan zawh meuh chuan lenglen hun pawh a pel daih tawh mai, an han in silfai thuak thuak hnu chuan zanriah chu an ei ta bawrh bawrh a. An chau in an riltam tlang tawh hlawm bawk a niang e, an ei hnem tlang ngei mai. Chaw te an eikham a, vaibel te an zuk zawh hnu chuan sa bawk chu an buaipui leh ta sang sang a, meipui a an vawm luh bak ah sarepna an siam ah chuan an bang uai fur mai a, an ur tui tluk tluk mai a ni. An buaipui zawh meuh chuan zanlai arkhuan hun zet chu a ni tawh awm e. An chau tlang bawk a ni ang, buk chhuat hrehawm pawh hre hauhlo chuan an hnar zui bawrh bawh hlawm mai a ni.

A tuk zing ah chuan hma tak ah tho in, sa rep thalo deuh ho a an hriat te chu an han rep nawn leh thuak thuak a, luikam a rawnal kumkhat tuai hnah nei ve tan hlap tawh ho ngei mai chu sat in, bawmrang lian pui pui chu an tah ta sup sup a, an in beng muk tan hnu chuan an inbeng leng thei hram a ni. Zankhua in meipui in atuipai zawng zawng ur chhuak vek mahse, sa chu a tam tham em avangin an rit viau tho mai. Lengphek an chhah ho ngei mai chuan luihnar lam pan in an in awi chho la luai luai hlawm a, an hei ha chho dap dap mai a ni. Buk chhak nghak ho nen an inhmu khawm chu an hlim hle mai, hlawhtling inti takin khaw lam pan chuan an in zui haw ta thliai thiai a. An rit tlang bawk a niang e,a khat mawi tawk in an chawl zut mai a, kal lam a chawhma zet chauh kal nan a hun an hman kha chho zawng a kal an ni tawh bawk nen, ni tlak dawn ruai ah khua an lut thei hram a ni.

EPISODE 7

Saibual khaw kawtchhuah chu an han thleng a, khawthar kai hlim tih tak ah lungdawh leh lungrem ilo fahran pawh ala awmlo. Han thu thlandai a vaibel te an zuk zawh hnu chuan val upa Robuaia chuan hlado chu a han chham fan ta raih raih a, a chham zawh rual chuan a silai chu a puak khawk kal nghal rawih rawih a, midang te pawh chuan an silai chu a mu la chhuak in, zenching, kelpa riahna kumhlun a azunna thli al an thlawr hnu a an teng khang hnu hmang ngei atang an siamchhuah chu, meilung innawt tek in silai bengzeh zendip chu a man kai rual in, silai dawt chhung a uluk tak a an lo sawh muk tawh zen nen chuan inmankai nghal a, a dawt hmawr lam a thawm ring tak rawn siam nghal in, an chengrang chawi theuh te chu an lawn un un mai a. Hlawhtlinna thawmri nen an vangkhua an han lawi lut tur zet chu an phur tlang ngei mai. Khawchhung a lo awm te tan lah ramchhuakte hlawhtlinna au thawm chu hai thu awm hek suh, nuber zanriah hlui siam in vawngpui thlengdar lian ah chaw khawrh in, alai hawt kua a maian bai tharlam zet a chhun khuk hlat hlat hnu ah fate tualchai chu han ko haw ve bawk mahse, kawtchhuah au rawl mawi tak chuan naupang te chu a rawn koh meuh chuan chawhlui kil ngaihsak reng awmlo in kawtchhuah lam pan chuan an phe dawr dawr hlawm a. Salu te chuan a kaptu sumhmun bang a mawi dawn tih hriat tak in kaptu te theuh in lam pan chuan an zawn laih laih hlawm a, zawnna chang ve lo tlem a nau deuh zawk te chuan kut hnunglam a mittui luang hruk chat chat pah a tlan hlak hlak in, hnap tawlh par a tap chung chuan an u te salu zawn chu an hnunglam ah an um ve dat dat bawk a.

Lal Duhmanga pawh chuan a leihkapui tlangsang atang meuh a ram chhuak te chu lo hmuak in, chawl khawmuang rih turin alo au a, a zupui bel han en reng reng pawh a thlathum zu ai a nau lo tih hriat zet mai, a taife tlafim kuk tawh chu tlangaupa chawichhuah tir in, mihrang val ramchhuakte chu hahzu alo zuk a, an khawn tliar tliar hlawm a. Lal pa zu thlum tui zia chu fak pah zelin, rui chhe lo turin an duh tawk zel a. Lal pa chuan tlanghrang chang anih hnu ah ramchhuak hlawhtlin hmasak ber tum anih avang leh, vangkhaw dang pawh lawi zen zen lo samak lu in a khua a den tak ah chuan a tuk ah awm ni kham a lawm ngei chu a tum a, a sepatuai nguntang chen dawn ki chhuak tawh chuan salu chu a aih tur thu sawi in, mahni in lam chu an pan ta sang sang a. Ni e, chhungpuinu ber tan ah pawh an pasalte'n hahthikul a hlawhtlinna an rawn chan zan a ni bawk nen, an pasalte chu hahdam taka lo siam chak in, khum laizawl a kumkar pialral ramnuam hawnsak pawh a phurawm sarh ngei ang le.

Zanriah te an han eikham fel a, an sarep hawn te chu Lal sachhiah bak ah thenawm khawveng te an in hleh diat diat hlawm a, ramchhuak haw ho bik te chu an chet a tlai deuh avangin lengi run kaina hun an nei tawh lo, Thanpuia pawh in mu turin zawlbuk chu a lawi phei ve ta a. A mawng a nghat fel awrh tih ah chuan Tlangau chu rawn au kual lauh lauh in, a tukah tumah ram kal lo tur leh, ran lu ngei a salu ai a, khawtlang intihhlimna hun hman tur thu chu a rawn sem kual a nih kha. Nula rim hmanlo leh la rim ngamlo te chu zawlbuk meipui ai in mawng paw hrut khawp chuan an tawlh a, an ri leh dar dar thin. Thanpuia chu tawng chi hrang hrang te chuan an rak kual tir vel a, a phawk a chhuak fuh ve bawk nen an hlimpui phian mai.

Zan dang anglo takin Pasaltha Chalmawia, chapo zet mai miten an tih ruk theuh chu a kawmchhak pa Thangvunga nen zawlbuk an lo chuang kai ve khauh mai. Tlangval ho nui hluah hluah kar lak ah chuan mei nei zet zet hian Thanpuia chu itsik rilrukna avang chuan alo khak zauh zauh a, Thanpuia chuan hrethiam ru mahse, huat thu ah la duhlo in fiamthu zawng in a lak zam sak lui zel a. Chalmawia run tawk a tling em em mai si, "Hmar thimpui, zangkhaw bungbut hnan nih zawng zawng hi in neih zo a, finvar tehchiam ngaihna a awmlo, Chhura thlah diktak chu in lo nih ngei hi," a ti ta hmuar hmuar a. Thanpuia chuan thinrim lo a fiamthu a lak zel chu finthlak a hria in, "Kan pu Chhurbura kha alo a vak lo a niang, a bum pa ngei pawh kha bel zuar, pawihte dik tak a nih kha maw le, kan khawtlang a parawnkai tam tak pawh hi pawihte belzuar, Chhura bumhnu thlah te vek an nih hi le," an ti chiah chu an nui thum ta ham ham a. Chalmawia thinrim chuan a lei a sehchilh nawk nawk tawh tih a kawmchhak pa Thangvunga'n a hmuh chuan thil thalo zawk a thlen hlau in, "Ti teh kawmthlangpa, kan nau te hi zing sa chan an ngai awm si a, I tin san tawh teh ang khai, mawng pawh a kham ta e," ti in a haw pui ta a.

A tuk khua a lo var chuan hma tak ah tho in, pathlawi Zanghang te leh tlangval zuan zang tak tak te chuan se tuai chu talh in, khawnbawl pakhat in vawkzel a rawn thawh belh bawk a, chu nen chuan puah in an chan ta zung zung a. Nula ho ten tui lo chawi khawl in, an han chet tak tak chuan tukthuan ei hun ai hma fe ah chhuankai theih turin an peih ta mai a, har mei nun in, Belpui lian tak tak te chu an chhuangkai ta fur a. Tukthuan eikham ah chuan Lal mual ah lo chhuak khawm in, an thawmhnaw neih that thulkhung ho te phawrhchhuak a an han inchei zet chu nalh an inti em em hlawm mai ani. Nula leh tlangval te chu a kar thlak a ding kual in, an inkuah put mai a, an di ruk te mit ngo rang in hmuh rukna hun remchang tak a nih avangin chhingmit an len ralh ralh hlawm mai a ni. Thinlung chhung a in vei ru em em te mit leh mit a han intawng zeuh thin te chu nui var var in, lenlai chen ta hliah hliah in an in hre awm e.

Nula leh tlangval te mual kur dulh dulh khawp a an han chai su dup dup mai chu ropui an ti hle, an hlimna in van a tawng a ni ber e. An han lam chau deuh ta maw tih ah chuan Lal in ah lut khawm in, an thu kual leh put mai a, tlangval te chuan nula te chu an chawi (tlangval thutna hma ah chuan nula an thu) a, rei lo te te ah thutna chu an sawn kual zel a, nula an chawi lai a lo kuthlei deuh emaw, lo chet mawi loh chu mualphona vawrtawp a ngaih a nih avangin an fimkhur tlang em em mai a ni.

Chheih lam an han vawr a, a sir a mi ten kut ben pahin an lo zawm bawk a, Rorehlova phur a chhuak leh ta. "Vawi khat pian ve man a khualkai khawp nula hmeltha Thanthuami lampui miah loh zawng len lai ka chan nasa lutuk dawn e," ti in Thanthuami chu a va kaichhuak ta ngei a. Khuang bengtu khuang ben mil thlap tur chuan hla thar ruah thamloh ngei mai chu a rawn chham chhuak ta, a mah chuan a hril pah lauh lauh mai bawk a.

"Tha ta chu tleidang leng zawng pawh,

I zun ah lamsul ang an haw ma bil lawng'e tiraw Mate.

Sakhmel vulmawi senhri par iang reng kha.

Ka hel ang che vangkhaw mawitu chu nang ngei hi,

Hai ang tar hun khuarei lenlai hril chang ni a,

Tumloh leng 'Vuaia' I tih tur reng an. "

an ti zet zawng an hlimpui tlang ngei e.

Rorehlova ber mai chu phur em em a lam in, a chang leh vamur sawmfang hrut in an hrut delh delh a, a chang leh mute thlifim dawn in an dir leh ngar ngar thin. Thanthuami(Thanhmeltha-i) lah zei em em in, zawhte chingal rui ang hnep hnep a an in theh no zet zawng, tufa mah hian an thlir ning hian a rinawm mawlh lo ve. A puan bih kar atang a a chawn leh khawivah lawi chumbiang mai lo lang phe leh zauh thin te chuan mit a ti tlai in, tlak lam veng pathlawi phei chuan a mah ani tih a intheihnghilh hial a, chilthli uai duah in alo thlir pek anih kha. An hlim zai ri chuan Lal pa lunglen a kai tho ani chek ang chu, a lai ah lut in hla ruah thamloh bawk chu a rawn hril ve leh ta.

"Saibual vangkhua kan pan ni khan e,

Ka thlir thin a puallawi reng a zau lua e;

Thleng zo hian ka in ring lo ve khua per pur",

a rawn ti chhuak zet zawng an hlimna chan san zia chu rau hnih/thum tal chenchilh theuh ni awm a mawi an ni, an vai in an lam suau suau mai a nih kha.

Ni pawh alo chawhnu thlangher bawih tawh, behliang mun hun awm vel ah chuan fatu te chu che sang sang in, changel hnah hlai tak tak an phah a hlui an siam chu kil in khawtlang chuan hlimna ruai ropui chu an kil mup mup mai a ni. A sa te chu phulraw fianpui ngei mai chuan suak in an sem dan dan a, a rawhkawl erawh suah a harsat avangin fatu te chuan kut lawng a thum bawrh bawrh in hlui tin ah chuan an rawn vulh thum tawk tawk a. Buhchangrum leh sa hmeh a, a tuipui leh chek tui nen an han khahchhilh leh zet zawng an puar tlang teh e. A ei duham fal ho phei chu an a deuh chhuih thei hial a ni.

Ruai an theh zo ningnawi te an han thenfel hnu chuan tlai ni nem hnu lo ni tawh bawk nen, thalai nula tlangval leh naupang nawi deuh chen chuan Lal in sir mual bawk a rihmim thing zar duai mai hnuai ah chuan khua chuan in an leng sup sup mai a, an hlim tlang hle. Tlai lam zanriah eirel a ngai tawh hranlo bawk a, an hun thawl neih chu am takin an hmang ani. Chutia hlim tak a an awm lai chuan pasaltha Chalmawia zupui khawn hnem tawh rui lungpuam chu lo thleng in, a ri lung lung mai a, tumah lah chuan an khap ngam der bawk si lo, Lal leh upa te pawh chuan leikapui atangin enghelh zet in an lo thlir ve reng bawk a.

Thanpuia lo rin lawk ang ngei in a rawn bitum deuh chat mai,Thanpuia bul alo thlen chuan "Sal dam leh an va tam ve mawle, an rimchhe viau lo maw?" a rawn ti phawr phawr a. Nula pakhat chuan inti huaisen lui in, "Pa Chalmawi, Sal sawi a ngai tawh hleinem, tun ah chuan Sal awm tawh lo in khawchhung mimir pangngai vek kan ni tawh alawm," alo ti a. Pu Chalmawia chuan, "Ralvawn khaw thli al liah rawn dil a dam khawchhuah ve hram an nih hi, kawl bun vek pawh ni ila sawisel ngam tur an awm hleinem. Selawn leh dapzar ho hian min ti tawp mai mai anih hi," an rawn tih leh kher chuan Thanpuia ngeng a chhun ta hrak mai. In sum hram hram a pangngai tak a tawng chhuak in, "Pa Chalmawi, Ralvawn khua kha kan duh reng vang a rawn lawi kan ni hauh hleinem, min rawn run in min hruailui lo ni ula zawng, Ralvawn thli liak kher lo pawh khan kan nung thei em em ang," a rawn ti ve ta khawl mai a, chu hun chiah chu a ni pasaltha hming pu Chalmawia lo nghahhlelh chu, Hrangthanpuia hian hmingthatna tam tak hlawh tawh in, Chalmawia hming hi a hliah hneh em em mai a, a it sik in naupang mai ni in ala hre bawk nen, vau zam mai theih a in ring a ni.

Chalmawia chuan, "Uai khawilam dai kilkar zawhte nge lo ngiau ve ta mai, in khawi ngam mah mah ani lo maw?" a rawn ti a. Thanpuia lah chuan awlsam zet in, "Keipui hma a thih hmabak a let reng kha daikil kar zawhte chhanchhuah ngai in a ni lawm ni a awm?" a rawn ti let ve sak a. Chalmawia thinrim tawh lutuk chuan aw khur deuh dawt dawt in, "Nau-a, I hmachhawn hi min hre chiang meuh maw? Pasaltha Chalmawia ral lu sawm chuang khai tawh ka nih hi, ka hma a din chu thih na asin," a ti teng ta chhur chhur a. Thanpuia pawh a sa ve ta phat mai. "Hria e, ka hrechiang khawp mai che. Mi hliam tuar che thei tawh lo leh nunau mahni inveng theilo te lu khai haw a, pasaltha hming inchhal ve ringawt I nih hi ka hai hleinem," a ti bul ve ta ngat a. Chalmawia chuan, "Chuti zawng famkhaw lawi tur a I in buatsaih a hun a nih chu, ka chhawn in a hem nge nge dawn che zuk nia, enge pasaltha nun ah hian tih ve I neih, salu pa hnih thum in hawn ve dek dek a, kei ber a maw I in tih chu le, I pu Chhurbura hnen chu ka thlen mawlh ang che, "a han ti tun tun a. Thanpuia tan pawh in ven a hun ta, a tho ta phat a." Keimah HRUMZIAL VANGKHAW HRAICHAWI HRANGTHANPUIA, Hmar Selawn chhul chhuak, Khampui huai te chenna puk a riah run rem thei, Keipui mei a chaih ngam, I tluk loh Pasaltha Hranghrima ke bul a seilian ka ni ngai e. I ngam ngam ka ngam, in ral sai I tih pawh in ka ngam a, awmhmun rawt a in mal beih I tih pawhin I thu, I duh duh hmanrua va thlang rawh, awmhmun rawt a nang beih nan che hian eng hmanrua mah ka mamawh lo ve, " a ti ta chher chher mai le.. A mit meng leh a ka atang a thuchhuak in thihna rim a nam rum rum tawh mai.

EPISODE 8

Chutiang boruak teh nuaih in a tuam vel tak ah chuan tu mah reng chuan tawng chhuah zai an rel lo, thinphu dep dep in thil lo thleng tur chu an Sakuh serfang nghah tawp tawh mai a ni. Pasaltha ni a inchhal ve meuh, thang that vawi tam lo hlawhchhuak ve tawh Chalmawia tan lah rawlthar chhuak zet chauh ni a angaih chu han hlauh thu awm bik heklo. Thanpuia lah in a ti mai mai lo tih hriat zet in hmuh hmaih neih hlau hmel fahran chuan a lo thlir uluk ngang mai bawk si. Lal Duhmanga chuan a bahzar ban sir lawk a thil thleng zawng zawng chu a hai bik hauh lo, a inrawlh vat loh chuan nun chan zawk an awm ngei dawn tih a lang reng mai si. 

Mi ngaih a mawi dawn chung chuan naupang zawk Thanpuia chu a koh tir ta a, chu tah zet phei chuan Chalmawia rui phur tawh pheng chuan Lal leh upa te chuan Thanpuia chu a dik loh zawk avang leh ai a upa zahna neilo ti a zilh an tum vang ah ngai in, mipui zing ah chuan a inhrosa kuk kuk mai ani. Thanpuia chuan Lal leh upa te hnen ah chuan, "Pu te u, ka tihpalh a ni e, min hrethiam teh u. Ka chung a in rorelna ang ang chu ka pawm vek e," a han ti hul hak mai a, Lal leh upa te chuan a rilru chu a dam nganglo ani tih chu an hai hauh lo. Thanpuia hnen ah chuan, "Thanpui, I thiam loh vek chu ni lah lo ve, a bul a bal atang a hmu ve vektu te kan ni, In chungchang thu erawh upa te nen kan ngaihtuah ang. Haw la, pawn chhuak tam lo ang che, hetiang mi buluk te lung kan tih awiloh tawh hi chuan hnunglam ah pawh mit nei ran a kan inven fimkhur a ngai tih hriat tur. Naktuk zing khua lo var se, harhfim lai in amah Chalmawia pawh kan ko ang. Kan rorel thu chhuak te chu kan in hrilh leh dawn nia, chumi hma zawng chu dawhthei tak in lo nghak ang che, " an ti a.

Zan lam ah Lal leh upa ten rorel fel in, zingkar ah tlangau pa chu Chalmawia ko tur in a tir nghal a. Chalmawia leh tlangau pa in Lal in an rawn luh chuan khawnbawl upa te pawh an lo kim thap tawh mai. "Zing thang thang a min rawn ko ta chu pawi pang a awm em ni Lal pa?", a rawn ti lut a, Lal Duhmanga chuan thu tur a atih hnu chuan an rorel dan chu a han hrilh ta fak fak a. "Nimin ah he Saibual khawtlang hian lawmna ruai ropui takin kan kil za a, kan hlimna ten van a tawng in, khabe bal lek lek in kan nui tlang a nih kha. Chutih laiin kan hlimna boruak zawng zawng ti chhetu chu nangmah hi I ni. Pasaltha ti a ka thlamuanpui leh ka lo chhuan ve em em, mi dangte entawn tur leh kaihruai tur ber a ka ngaih chu khatiang khan maw a lo chet theih le? Midang te hmuhsitna leh chapo na tinreng te, khawtlang rikrap te kha maw I mizia lo ni a? I Lal nih hi ka zak ngawih ngawih tih hi hria ang che," an ti khawl khawl mai a, a thinrim em avang chuan a vaibel dawn te chu a thial rawp rawp tawh mai. 

Chalmawia chu a ngawi ngal mai a, hrehawm chu a inti ve hle, a hmuhsit em em Hrangthanpuia lak a tlawm nih erawh tlawm pa ar ek a alak anih avang in a tum hauh lo. Lal chu lo tawngchhuak leh in, "Nangni pahnih kha inbei ula tunge mualpho ang? He khaw mualphona hi ka ko a innghat a ni asin," ti in an tawng khum sawk sawk ta mai a. Chalmawia chu a ngawi ngal mai, inchhir hmel a lang lo a, lawm hmel a pu hek lo. Lal chuan ti hian thu a rem ta a, "In mal beih I thlang lui hram a nih chuan duhthlanna chu kan pawmsak ang che, ka hriatpuina in ka tualzawl ah ngei a ni ang. Chumi nilo a rilru dang pu a he khua I chhuahsan duh a nih pawhin kan dang lo ang che. He khua a I cheng zel duh anih chuan ka rorel hi lungdam takin I pawm tur ani. 'pasaltha nun zaidam, Mi te innghahna tlak leh khawtlang muantu' nun zahawm kha I nunpui tawh tur a ni. Tin, I chet mawilohna leh khawtlang ti thlabar a, hmuhsitna zahpuiawm tak I lantirna, Thanpuia pa, Pu Doliana hnen ah Salam I chawi tur a ni. Sepui I chawi a nga, naktip ral hma ngei in ka luhka ban ah a rawn in thlung hman tur a ni ang, I thu thu a ni, I kal thei tawh e, " a han ti a, Chalmawia chu Lal in atang a chhuak in a in lam chu a pan hnu hnu a.

In a thleng chu a buzawl tih tak ah a inhrosa nasa ngang mai, a an hla atang chuan an nu chuan thil kalphung chu a hrethiam ve ta a. A nupui chuan "Ngaihdam dil in lei chu chawi mai rawh, inbei in Thanpuia chu lo that thei teh reng pawh ni la khawtlang in min en dan a dang vek tawh tho tho dawn, kan tan men ngaihna a awm tawh chuanglo ang, nunna chan zawk ah i tang a nih ngat phei chuan I nupui fanau te hi hmeithai dinhmun hrehawm tak ah min dintir nghal dawn asin, in ngaihtuah chiang la ngaihdam va dil mai rawh," a lo ti hlawk hlawk a. A han ngaihtuah vang vang hnu chuan engti pawhin awm se, a nupui fanau te thlengin mi in an hmu danglam vek tawh dawn a, an tan he khua a chen ve reng chu a hrehawm sei ting mai dawn tih chu man thiam in, pem chhuahsan chu an chhungkaw himna kawng awmchhun ni in a hre ta. Thanpuia lak a tlawm ang a lan chu hreh hle mahse, a chak zolo a nih chuan a chhungkaw dinhmun tur a han ngaihtuah a, a ruk a pemchhuah tum chuan rilru a siam ta ani.

Tukthuan te an han ei kham chuan a ruk te a chhuak in, a sial ho chu a kawi khawm a, Sailo Lal Hualvunga khua Mualnuam a pem tum in, chu lam hawi chuan a khalh ta dum dum mai a,kawng lak ah chuan a in sawh a insawh mai. "Saibual khua te u ngawi tak rawh u, Pasaltha Chalmawia tih lungawi loh pawi zia chu in hre mawlh ang. In hlim in haihlim chu a tia rei hauh lo a nge," a ti tun tun a, nileng leh zankhua a in khalh hnu chuan Hualvunga khaw ram chin ah thui tak a in khalh lut tawh a. Zing khawvar veleh a sial te chu thlung khawm in a kirsan ta vang vang a ni. Ran rual khalh lo va kal ta chu a kal sawt viau a, tlai thim hma a Saibual khua lut in, an vawk leh ar thenkhat chu a kawm chhak pa Thangvunga hnen ah chuan lo enkawl sak turin a chah a, remchang hmasa ber a rawn lam leh ngei chu tiam in, zan mut reh hnu ah Saibual khua chu an chhungkua in an chhuahsan ta hnu hnu a.

Kum te alo vei a, pawl delh ruah ten tin zai rel in, thalvaekchar hun alo herchhuak a, chapchar awl len lai ni bawk nen, an duh lam hawi zawng theuh chu zawh in nuam an ti ngei mai. Tlangval thenkhat an ram chhuak a, thenkhat ten chi phur in khua chhuah san bawk a. Nula lam pawh la te kai in, puan an tah tluk tluk a, thenkhat in thing ai an chhuah bawk a, fur pui lo thleng tur atan an inhmakhua sauh sauh hlawm mai a ni. Chu hun thawl lai chu chuh in Pu Doliana chuan a fapa Thanpuia tan an khaw nula hmeltha leh hleitling Thansiami chu a biak sak a, palai ten biahthu thlun rem in, man leh mual chungchang ah tlanchhiat ngai khawp a michhia an ni lem lo bawk a, vauthla arkaiden zan a lawithat zan hmang turin an inrem fel thei hlauh a ni.

Chhinlung fa hnahthlak hrang hrang te nun ah hian nulat tlangvalna nun a rinawm inzirtirna hi kan inzirtirna tam ber a ni hial awm e, mahse kan zawm loh nasat ber a ni hial ang. Mipa in Pawla sai pumpelh nan nula a ngaih ngei kha tihmakmawh a ni tlat, hmeichhia in thianghlim takin pasal an nei deuh vek thung, mak tak, ril deuh si chu a ni. Hetiang hian hla a chhuah nghe nghe kha....

"Di neilo Pawla'n a sai an ti,

" Fam mah ila min sai tawh hlei lawng'e;

"Ka nemrang tial ka Di zawnna."

ti in.

Tlangval piantha leh huaisen te, mualkil mi tha tlangchhuak bai al liak phak chin fate chu an to em em mai a, an thlen chin apiang nula lak ah khan hnuhma thup ngai an hnutchhiah zel zul awm e. Hrangthanpuia pawh tlangval piantha thelh thawlh, nula te enthlak leh tlangval te entawn a nih miau avangin a sulhnu hriatchianpuitu ber chu a thianpa Roenga hi a ni awm e. Tluang tak a inneihna chu buatsaih in, lawichhiat zan pawh an hmang ral ve ta reng mai, Lawichal Zirkunga'n zir viau lo phei se chuan mo hmel hmuh tlak mang loh khawp in chirh a kai beh viau awm e. A mak hran lo, khaw khat nula hmeltha leh hleitling meuh chuan, neih phakloh avang a rilru na leh itsiktu chu a nei ve nual ngei ang le..

Vau thla arkaiden zan alo thleng a, thla eng chu langsar viau mahse, lei lam erawh romei leh khawmei chuan a bawm zing chuai a, chuvang tak chu a ni ang thla eng pawh chu ngaih la na tawk chauh a a en ni. Tih buai thianglo a ngaih an nih tawh a vangin Mo pawh a thuam zalpuan leh cherthil chi tinreng nen a lawi lut ta rup mai, thenrual tha lenpuitu pawh an ngah na rawh e. An hlim in haihlim a tiat hial ang tih lai chuan Roenga phawk a chhuak ta, tih takzet hmelpu in a thianpa Thanpuia hnen ah chuan a thil duh tih hlawhtlinsak turin a ngen a. Thanpuia chuan a tih theih thil te anih chuan tih hlawhtlinsak chu alo tiam a, mahse Roenga chuan, "I hriat theih ve loh thil a ni dawn a, chuvang chuan I remtihna ka lak a ngai a ni," a ti tlat mai si, a ngaihna hre hmel lo zet chuan a remtih thu a sawi ta nge nge a. 

Roenga chuan phur tawk in, "Hei mai te hi maw le, kei ai a I boral hmasak hlauh chuan I ruang banglai ngheng in an chawnglai che a nga, (chawnglai hi hmanlai pawih hnam te in vui dan a ni) chutih hun ah chuan chhawn ka tawn tir duh che maw le," a han ti a. Thanpuia chuan kiai suk pah in, "A va han ho mai mai e aw, patling in tih tak zet a han in dil em atan chuan. Ka chhawn ah chuan eng e thiah tel I tum a?," a han ti a. Roenga chuan awlsam zet in, "E le, vakul chang, arpui chang thiang leh vaki chang sei leh a tawi," an ti vut a. A ngaihna hrelo zet in Thanpuia chuan, "Enge chu chu a awmzia," an ti ha a. Mo lawm a leng ho lah chuan a awmzia hriat chak in an beng an rawn dawh he haw hlawm bawk a. Chutah Roenga chuan thupui fun zet leh ring leng lawng in, "I chhawn tawn a sava chang ka thiah tel chuan hei hi a entir dawn a ni. Vakul chang chuan Lal nula ngai tih a entir a nga, arpui chang thiang chuan unau ngai kawp tih na, vaki chang sei leh tawi chuan nufa a ngai ve ve tih na a entir dawn a ni," an tih zet chuan an za vai in za em em chuan an nui tlawrh tlawrh hlawm a. Thanpuia lah chuan "Tih sa loh loh a nih chu," tih pah in alo nui phuh ve thut bawk a.

Hun leh ni te lo herliam zel in, buh hmawr a lo eng tan a, zawngtah bilhbawlawk pawh huihchhuk thli in a rawn chhem then leh nawlh nawlh ta mai. Chipte leh lailen sava te tual lai leh daitam ah an rawn su leh ta lauh lauh a, pang kung ler ah thlasik arpui a rawn tuvu tai leh tuk tawh a, tlaizawng kung lah in parfung chawi a hlat tawhlo tih hriat tak in a hnah ta chu tlakkawlh hmabak in a rau uar tawh bawk a. Eng dang vang a nilo, thlasik a lo thleng leh tan mek a tin ni. He tih lai hun ah hian alawm hun remchang melh reng reng a Mualnuam leh Saibual inkar kar tawn reng reng thin Chalmawia'n hun remchang a hmuh tak ni.

Mualnuam khawnbawl upa Vankunga se te ki chhuak tan tir leh Saibual Lal Duhmanga se te chu in rual khat em em an ni tih hria in, an tui pal chin ve ve a rang bawk a, an in ang em em mai a ni. Lal Duhmanga sial chu chhinchhiahna siam sak ni in, a beng dinglam hmawr chu rual tak a hleh sak a ni. Chu thil a hmuh chuan Chalmawia chuan khawnbawl upa Vankunga chu bek bawr in, "Sial inchuh te awm thei thil a ni a, I sial hi chhinchhiahna put tir a tha lo maw?" a han ti a. Upa Vankunga rilrem zawng tak mai alo nih avangin a duh ang thlap chuan a beng dinglam hmawr chu hlep in, a beng veilam hmawr chu a zai kak bawk a. Hun remchang hmasa ber a hmuh in Chalmawia chuan a ruk in upa Vankunga sial chu a kai ta vang vang a, hnu hma chu langsar thei ang ber turin a hnutchhiah zel zul mai bawk a. Saibual sial tla ho zing ah chuan thlah in, Lal Duhmanga sial zawk chu a kai bo ta daih a, hmun pilril tak ah kalpui in a tih hlum sak a, a phum bo ta hmiah mai a ni.

Upa Vankunga chuan a sial kimlo chu ngaihven in tlangval pahnih phungbawm a sawm a, hnu hma an hmuh chu chhui zel in, Saibual khawram an chhui lut a, Saibual Lal se huang ah chuan a sial ngei mai chu a va hmu ta tlat mai le. Lal Duhmanga in ah chuan lawi lut in, "Lal pa I pang dam lai a ni ang maw? Kei hi upa Vankunga ka ni a, heng tlangval pahnih te hi ka nau te an ni. Sailo Lal Hualvunga khua Mualnuam khua leh tui kan ni e", a han ti dap dap a.

Lal Duhmanga chuan, "E nge pawi pang awm ta ngai le? In va hlauhawm khual khual ve maw le, thu hahdam rawh u," a lo ti a. Upa Vankunga chuan, "Pawi pang dang awm lah lo ve, ka se te, a tui pal rang chu alo haw lova, hnu hma rawn chhui zel in I se huang ah ka hmu tlat mai ka ti, e nge thil awmzia ni dawn le? Nang in khual rawn kai in I kai haw lo ang tih lah a chiang reng mai bawk si a," a han ti a. Lal Duhmanga chuan, "Aw haw! Lo zu ni tak a, khaw thenawm se ruk sak chan te pawh kan chang dawn dawn alawm le, khawnge meichher kha han nun ula, ka se huang chu I va chian teh ang u, ka sial bak lawi lut awm reng ka hre lo ka ti," a han ti ve bawk a, meichher nen se huang chu an va pan ta a. Serual bawk khup mai zing a sete tui pal rang, beng dinglam hmawr hleh sak leh, beng vei lam cheh kak ngei mai chu kawk in upa Vankunga chuan, "Hei ngei hi ka sial chu a ni e, engtia I se huang lo thleng thei ngawt nge a nih erawh ka hre hauh lo mai," a han ti a. 

Lal Duhmanga chuan han en chiang in, "Ngawi teh u, thenawm upa te chuan in sial in hai a ni lo maw? Hei hi chu ka se pui chi tha ber no ngei a ni, a beng dinglam hmawr pawh kan hleh sak nghe nghe hi," a han ti a. Upa Vankunga chuan, "A nih tak chu, kei pawh in ka se te kha a beng dinglam hmawr ka hleh sak ngei a, a beng veilam hmawr kan zai kak bawk a ni, hei han en mah ula, a beng veilam pawh a kak ngei a lawm," a han ti leh hram a. Lal Duhmanga ngaihdan a pel ta a niang chu, "Sial te chu ram pik tak tak a che thang an ni a, ka se te beng pawh hling in a kaihthler sak na a nih dawn kha, tha te te in kan in dawr dawn a maw tia, ka se huang a ka sial ngei min rawn chuh pui tlat mai chu in huangtau mah mah a ni. Sawi tur kan nei tawh lo ve, "ti in a in her vut a, a kal ta nul nul a. Upa Vankunga leh a nau te pawh in thin damlo zet in Saibual khua chu zan a zan in an chhuahsan ta a.

Mualnuam khaw Lal in ah lenglen hun hma deuh atang tawh in Lal khawnbawl upa te chu an to kim leh ving veng tawh mai, upa Vankunga chuan a sete bo an chhui dan leh Saibual Lal se huang a a va hmuh dan te, Saibual Lal pa lo chhan dan zawng zawng te chu a han sawi ta thlap thlap a, a sial ngei a nih thu chu thinrim tak chuan a sawi nghauh nghauh a. Lal pa Hualvunga chu thinrim hmel zet chuan chhuat lai ah chuan a vei tawn ta nghut nghut mai, "Kan thla hmawr ah khua ka sat e, an rawn ti a, inenhrang thei kan awmlo e ti in kan la hrethiam zel a, ka khaw ramchhung ngei a ka upa min sial chu rawn chaih chhuak in, an Lal se huang ah an lo khalh lut a, an ta neih ngam ta hial maw ni? Upa Chalbuang, nang ka upa ho zing a dai vak taima ber leh vanglai tha la thlawp zo ber tur I nih avangin, naktuk zing ah tlangval sawm rual te nen in thawk chhuak a nga, Saibual Lal hnen ah chuan ka thusawi hi va thlen ang che u, lo ngaithla uluk ang che aw". Kan pawihte dul khak Lal Duhmanga hnen ah chuan kei sailo Lal Hualvunga thu chu hei hi a ni. Kan pawihte dul khak, sal ai a ka en san hauh loh te hian maw ka upa sial min ruk sak a, min chuh pui ngam ni? He sial hi ka khua leh tui te sial ngei a nih avangin kan kai haw ngei tur a ni, min lo dang suh ang che. I remti lo a nih chuan leido khua kan ni nghal anga, in run a indo induh pawh in kan tlanchhe lo, thingluang zawh a inbeih in duh pawh in ka pawm vek, in duhthlanna a ni e, va ti ang che u, " ti in thu a chah a.

A tuk zingah ah upa Chalbuanga ho in tlangval sawm zet te chuan Mualnuam khua chu chhuahsan in, Saibual khua chu an pan ta khup khup mai le. Saibual khua an thlen chuan Lal in ah lut nghal in, Lal pa zu khawn pawh nghak zolo in Lal Hualvunga thuchah chu an han hrilh ta a. Lal Duhmanga chu ngawi vang vang in, an thuchah te chu ngun takin alo ngaithla a, 'pawihte dul khak, sal ai a ka en san hauh loh' ti a hmusitna tawngkam a dawng chu ala na em em mai a ni. Aw te a han then kharh kharh hnu ah ti hian a rawn tawng chhuak ta a. "In Lal sailo lulian in a thuchah che u chu in sawi kim meuh maw? Sawi kim loh hni hne te hi in nei a nge?" a han ti dam thlup a. An sawi kim thu a an chhan hnu chuan ti hian a chhang ta a. "Sailo Lal ropui inti te chu an va han rawp awm em em ve mawle? Ni leh thla kar a leng an nih na a chuai ta a niang maw, chuti fakau a ka sial it a alo rawp tak le? Mahse la ka sial te hi sailo hnartawk rawp phuhruk nan mai mai a ka vulh ni bik hek lo le. Ka khua ah kelte vak vai tu ta mah ni lo a awm lai te chu ni se in han kai haw hnang hnang tur a nia le, amaherawhchu chutiang remchang alo awm mai bik silo nen, hlawhchham a in Lal hnen in thlen leh a ngai dawn zu nia. Tin, indo hi kan duh vang a ni hauh lo a, mahse in Lalpa in a rawt a nih miau avangin kan pawm mai a ngai dawn a ni. Amaherawhchu, pawi sawilo nu nau te ti thlabar lo leh rik rap lo zawng in, Thingtlang zawhin kan in hmachhawn a niang chu, " a han ti a.

Upa Chalbuanga chuan lo chhang ve leh in, " Kha ti kha ka thu in hawntir dan tur a nih zawng in thu tlem a zawng ka han rawt belh a nge. Thingluang zawh a achak zawk zawk in he kan sial inchuh hi chang se la, tin, inbei a pasaltha chak zawk apiang in sepui an hlawh tur a ni, chu chu chaklo zawk Lal zel in a chawi ang. Tin, kan in beih ni atan thla thar thla det hun ni rawh se, " a han ti a. An pawm tlan zawng tak alo ni bawk a, zan pawh riak lo in upa Chalbuanga leh a thuihhruai te chuan Saibual chhuahsan in Mualnuam khaw lam pan chuan an liam zui ta nghal a.

Next Episode