HRUMZIAL VANGKHAW HRAICHAWI HRANGTHANPUIA 3 - 5 (Mizo Story)

HRUMZIAL VANGKHAW HRAICHAWI HRANGTHANPUIA Ziaktu - Thunderboy Chinzah

Previous Episode 1 - 2

EPISODE 3

Khua a var dawn tan, kawl a eng deuh ruau tawh tih ah chuan khua hual chhuah vek a ni tih hriat zet mai chuan khaw dai kil tin, chhim leh hmar, chhak leh thlang ah te chuan silai a ri kual dur dur mai le. Khawchhung a cheng nunau leh mipui te chu mangang thla bar in an te teng tung hlawm mai, hual beh vek tawh an nih avangin tlanchhiat ngaihna a awm der silo. Khawchhung luhchilhtu te chuan mipui zawng zawng te chu kawtzawl zau lai ah chuan an khalh khawm a, ral hlauh avang a dai hnai in banpui vat chhuak lo deuh chauh a thlawhhma la an nih avang in ram riak a hnathawk an awmlo a, khua atang chuan an thawk mai thin a lo ni. An han belchiang a, Hmar selam hnam an tam ber a, Khawbung hnam tlem in an pawlh ve bawk a, tlak lam veng in sawmhnih tha awrh a cheng ho chu Paite dapzar ho an lo ni ve bawk. Inrunna in a um darh ho te chu in tawkkhawm in, Lal pawh nei mumal lo in raltlan ang mai in helai raidinkawn ah hian an lo in bawk ve a lo ni. 

An zing a pawih tawng thiam Dolienrum chuan an chanchin chu a sawi fiah a, tumah kutthlak lo tur a ngen in, an duh ang a an awm zel tur thu a tiam a ni. Ralvawn tlangval te pawh chuan an bungrua theuh te phur tur leh an ran neih kalchhuahpui theih awlsam deuh te chu kalpui nghal tur a hrilh in, an sial te erawh Ralvawn tlangval sawmhnih rual ten an hnung ah an rawn chhawm haw tur thu chu an hrilh a, an zavai chuan an kawi haw ta diak mai a ni.

An bawk khawhna hmun Raidinkawn hi a hming put chhan nen a in hmeh hle. Sailo Lal ropui Lallula khan zopui khua a kai hma khan Lentlang siper ah hian khua a sat a, hmanlai mizo Lal te khan tlangchhip ah khua an din thin reng a ni. An thlawhhma lakna atang chuan engkim chhoh lak vek a ngai thin. Raidinkawn hnuai an theh kum hian feh haw kawng a chho em em mai a, raipuar rit phur chung leh nghal a kal, feh hawng lam hi chu an hah theih em avangin kawn an chhuak chho hi thaw te lak hahdam pah in an ding ngei ngei thin a. Chuvang chuan Raidinkawn tih hming hi a lo pu ta zel a ni.

Kan ti ta sa sa, Ralvawn Pasaltha deh khirh ber mai Hranghrima chanchin hi tlem sawi lang ve law law teh ang aw. Palian hruang hrau zet mai, a palen ai a mahni in tha zo tak, hlauhawm awmzia la hre ngailo, a thil tum tawh chu hlen tum tlat mi, khua leh tui tan a thahnemngai tak mai ani a, mi te sawi dan in engmah in an ngam loh, huai leh thlahrang ai pawh a hrang zawk ni in an sawi thin a, a hming a pu zo hle. Thlanrawn Lal te chu fing hmasa in, hnam upa zawk kawl ho nen remthu an thlun hnu ah chuan in run an bansan a, an hnam pawh an changkang chak hle. Lusei hnam leh thlang tla ho tan hnawksak an ni ngai tawh lo. Heti a nih tak avang hian Thlanrawn pasaltha Tawnhlianga, zopui run lai a pasaltha hmingthang em em hnu lam ah chuan Hranghrima hi Tiau ral pasaltha hmingthang ber a sawi a ni hial awm e. A tlawmngaihna theihnghilh in, a thil tih rapthlak tak tak te chu an chawi vul sak a, mi hrang rapthlak eltiang ah an chhuah ta a ni. An hun lai chuan Mipa unau rual hi an hlu in an zahawm em em mai a, chuvang pawh chu a ni ang sukte unau Sal sarih zing a mi Zamunga, mi huaisen tak mai chu Ralvawn khaw dintu ten Lal atan an va sawm tak nachhan ni.

Ralvawn khaw ho te chuan an sal man te chu dimdawi tak chung chuan an khalh haw zel a, an salman te pawh in a ngaihna hre lo tak chuan an zui ve zel a, engtin tak an chung ah rorel sak ang I maw!! An buk sakna hmasa chu zanriah bawp man tawk in an thleng a, an sarep dahthat thing a an khai te chu an han la thla a, tho ek awm nual tawh mahse, thing tuah tur an la ngah bawk nen, an han rawh tha leh nawk nawk a, ei tur a siam in, an sal man te nen an vai chuan an ei za ta a.

Ralvawn khua an han lut chu mak an ti ngei mai, mipui nu nau ho te chuan an lo thlir thup mai a, Lal mual zawl ah chuan an in nghat ta nghuk mai. Rammu a chhuak te chuan an duhzawng Sal chu an han thlang nak nak a, rin loh tak in Pu Dolienrum te chhungkua chu an pasaltha min ber Pu Hranghrima chuan a thlang tlat mai le. Lalpa Zamunga chuan Sal ho dinhmun leh an awm zel dan tur chu remchang hmasa ber a rel tur in thu a ti tlu a, Sal a neitu te theuh in lam pan chuan an tin darh ta sang sang a.

Pu Dolienrum hian fa pali lai a nei a, a upa lam pahnih te chu hmeichhia ni in, chhangkhat tak in mipa pahnih an neih belh leh a ni. A fapa u zawk Lienmoui chu zawlbuk thingnawi fawm rual a ni ve tawh a, a mizia zawi tak mai leh mit meng dum fiah kak mai chuan mi lawm a hlawh hle. Pasaltha Hranghrima hian fanu pahnih a nei a, mak tak mai in a nupui hian nau a pai chhunzawm ta reng reng lo mai a, a fanu naupang zawk pawh a tleirawl chhuak lek lek tawh ani. Chutia sal chhungkua a neih chin ah chuan an khawsak a zangkhai in hun awl a ngah ta viau mai a, a sal chhungkua a mi Lienmoui chu a ngaina in khawikip ah a hruai awl lo mai. Pu Dolienrum chu Pu Doliana ti in an ko thin a, Pu Doliana hnen a alo dil tawh ang in Pasaltha Hranghrima chuan Lienmoui chu a fa atan a nei ta a, "Chhak thlang chhim leh hmar ah hian mi in ka thil tha tih an sawi ngailo, ka thil tih ai a nasa hlir in min sawi hrang em em mai a, felna lam ai chuan mihrang ka nih na hi ka hming thanpui ta anih hi. Chuvang in he ka fapa thar pawh hian ka hminglarna hi chawi se la, a lai ah hming nawt reh in a hming a tan 'HRANGTHANPUIA' ni rawh se" ti in a phuah sak ta a. A hming hmasa chu tumah in an hre reng ta lo, 'HRANGTHANPUIA' tih hming chu dai tawh ngailo tur in a pu hlen ta ani.

Hrangthanpuia te pafa chu khawihmun ah pawh an inzui a ni ber mai. A mizia hi zezawi tak a nih rual in mi tum ruh em em, hlawhtlin hma loh a bei mi a nih na hi apa hian a hmuh hmaih hauh lo. Pasaltha Hranghrima hian mi tih dan lo deuh mai in, Hrangthanpuia hi naupang a nih lai atang silai a ngainat tir a, silai kah chu a rang in, rin phak bak in a thiam a ni. Tum khat pawh an pafa in feh kawng ah an in zui hnak hnak a, an kal hma deuh avang in mi dang thawm hriat tur ala vang hle. Hrangthanpuia chu naupang te mah nise apa in silai a put tir a, thawk leh khat ah an hma ko pang a tang chuan Tlakawrh sava a rawn thlawk chhuak phut mai le, silai a ri nghal thuai a, Tlakawrh sava pawh chu leng lawp in, kawng thlang hnim buk chung ah chuan a tla che ta laih a, kah thelh a nilo tih hriat tak mai in a hmul a rawn leng cham cham mai.

Pu Hranghrima chuan a fapa chu a en a, mak hi ati em em mai. "Hrangpui, I thiam hle mai, ka ai I awh thei tep tawh a nih hi, sava kha ka zu chhar a nge aw?" , ti in a biang ah chuan a piai zauh a, kawng thlang hnim pik ah chuan a lut thla ta tuih tuih a. A rilru erawh chuan mak a ti tawp theilo, Tlakawrh te chu sava zawng zawng zing a sava thlawk chak ber ni a kan ngaih a ni a, chutiang khawp a rang pawh a fapa chuan in ring lawk hauh lo in a kap fuh nalh hman a nia, a rilru tak chuan a chhuang ngei mai. "Mihrang val HRANGTHANPUIA ti in mi ten I sakhming an la chawi ngei dawn e, ti rilru chung in kawng chu a chhuak chho leh ta, apa hauh hlau tak chuan Hrangthanpuia chu a lo kun chal mai a, mahse a pa chuan nui var var chung a a han pawh tak ah chuan a hlim ve ta deuh, hauh a hnek in a chhuang ru em em zawk si a.

EPISODE 4

Ralvawn khawlal Zamunga chuan a upa te leh pasaltha te, val upa te chu a ko khawm a, Lal in an chuan an thu far hlawm a, eng tak chu ngaihtuah ngai pawihai awm chek chu ni maw? ti in an Lalpa in a koh khawm chhan chu an hre lo tlang hle mai. Vaibel zuk khat hun an han thut khawmuan hnu chuan Lal Zamunga chu a rawn ding chhuak tuih tuih a, aw te a han thian fel te te a, ti hian a koh khawm chhan chu a rawn sawichhuak ta a. "Ka khua leh tui innghahna pasaltha leh val upa te, ka rorelna tlang a mi pawimawh ber ber upa thluakfim tak tak te, in hriat lawk hauh loh a rorel tur a ka koh khawm thut che u avangin in mi hriatthiamna ka ngen e. Zanin a kan in koh khawm chhan chu sal ho chung chang rel tur in ani. Kan hna lam tul in min bawh em a, an chungchang rel hman lek lo in kan buai a, sal ho zing ah huaikawmbawl zawng a che an awmlo bawk a, rorel te a awlsam zawk nan ti hian ka lo ngaihtuah a, ka rorel dan fuh lo lai emaw, belh duh nei kan awm anih chuan ka sawi zawh ah kan ngaihdan kan sawi tlang zel dawn nia. "

" Upa in zahngaihna lantirtu chung ah chuan malsawmna in bu a khuar thin, an lo ti mathlawn lo thin a, kan sal te chung ah pawh hian thatna kan lantir zel ka duh a ni. Ka sawi tawh ang khan sal tu pawh hi kawlbun emaw, benghleh sak emaw, thirkual awrh tir thleng pawh in eng sal chhinchhiahna mah kan siam sak tur ani lo. Thubuai neih chungchang ah pawh khawtlang mipuite nen ang khat vek a en an ni ang. An ranvulh neih ve chhun te tih nat sak emaw talh sak khap tlat ani a, thi leh dar ro an neih ang ang pawh Lal in char lam bang hrul a papui lian ber ah hian kan dahthat sak anga, zalen an nih hun an mahni ta theuh an la chhuak thei ang. Sal chhungkua te pawh an duh phawt chuan in hrang an chang thei anga, Amaherawhchu, kum khat chhung a an tha leh thawhchhuah zawng zawng atang in hmun thum a then a hmun khat an pute hnen ah an hlan tur a ni a, chu chuan Fathang leh pumkai man a huam lo ang. Sal reng reng te hi an pute remtihna anih chuan englai pawh in chhuah zalen theih an ni anga, tin Ralvawn khua chhuahsan a khawthar kan kai anih chuan chumi rual rual chuan zalen an ni nghal bawk ang. 

Chu hun chu kan thleng thei a nih chuan an duh duh khaw dang Lal pawh belh phalsak an ni anga, ka rorelna hnuai a an awm zui duh anih pawh in khawtual mi pangngai an ni tawh ang. Chumi hun a an intunnun ve nan an ro neih chhun leh ran vulh te kha kan dimdawi sak dawn nia, enge in rilru a rawtna dang in neih te khan han tuihnih ve teh u le, " a han ti a. An tum loh tak mai thil an Lalpa in a han relpui chu an ka ho hlawm mai, an hmabak an han ngaihtuah a, tu pawh zankhat thil thu a sal ni mai thei an nih zia te chu ngaihtuah in, an Lalpa finzia leh ngaihtuah thui zia te chu an fak mawlh mawlh hlawm mai a ni. In khat a sal ho nen tam tak han chen ho dual dual mai pawh chu kawng thenkhat ah chuan a hautak em em mai a, chengho lo va sal te thawhchhuah tam tak an han hui thei tur te chu hlu an ti em em mai a ni.

An Lalpa thusawi an fak mawlh mawlh lai leh han belh vak ngai pawh an hriat tawh loh thu an sawi laih laih lai chuan pasaltha Hranghrima chu rawn dingchhuak in aw a han thian kharh kharh a. "Kan Lalpa rorel nge nge a fing thin teh e, khawtlang thil leh hnathawh kawng ah chuan han belh leh chuan tur ka hre hauhlo mai, kan nunphung atan erawh rawtna tlem siam belh ve ka duh ani. Khawtual tlangval in sal nula a hmel duh a, nupui atan a nei duh anih chuan sal nula man ah hmeichhe man chanve ni sela, thutphah atan a pek tel 'Tlai' (sial no lian ve tawh tak, kan hriatthiam dan tur in Rs 20/- ai a an pawm thin) erawh chu kir let tawh lo in nei thung se la. Sal tlangval in khawtual nula a nei duh anih erawh chuan hmeichhe man chu a let ni rawh se, khawtual mihlun zahawmna ani anga, khual kai thil anih erawh chuan an Lal te thu thu ni thung se, hei hi erawh hman reng tur nilo in sal an nih hunchhung atan chauh ni teh se, " a han ti a, an pawm tlang hle mai. Lal pawh chuan lo tuihnih in," Kan pasaltha thluakfim nge nge, I dawn thui thin teh e, ka ngaihtuah phak loh ah I lo chuang thin a, I zar ah Lal ka mawi leh dawn ta e," a han ti a. Hranghrima chuan, "Mai mai thin a, kan thu fahrah te te min lo pawmsak thin a, I khua leh tui nih hi a nuam kan ti tlang theuh zawng a nih hi," ti in a han chhang a, lungrual takin an rorel na chu thu an keuh thlu ta a.

Ralvawn khawtlang rorel ang chuan sal ho te chuan in thar puah in an han in mualvawm hrang sap sap hlawm a, a tu lam ve ve pawh chu an veng huai ngei ang le. Pasaltha Hranghrima chuan a sal pu Doliana te chu duh a thlan tir a, an fate an lo in ngaina tlang tawh nen Pu Doliana chuan a hreh lem loh avangin awm ho zel chu a thlang a, thlawhhma lak ilo fahran ah pawh a ho a hnathawh chu an fate chuan nuam an ti in an sawt em em mai ani. Pasaltha Hranghrima tan ah lah a thawven thlak bawk, ram lam a hun hmang tam chi tih tak ah in lam ngaihtuah ngai miah lo in a ram vak thei a, an khawsak an in pawh tlang in an inchhawk zangkhai a, nuam an ti em em zawk a ni. Ei leh in, buhchangrum leh sa ah chuan an hnianghnar teh e, chuvang a ni mahna an fate pawh in an ngeih in, an kang awk awk mai a ni. Hranghrima fa u zawk nula hmelchhe lo leh hleitling tak mai Zaliani pawhin palai hmel hmu in, khawnbawl min fapa Chalkhuma tawn ah khiang a awi ve ta nge nge a nih kha.

Hun a kal ve zel a, Hrangthanpuia pawh zawlbuk kai rual a rawn ni ve ta der mai. A mah hi ruakhau chi a nih avang in a lian khoh tawh mai a, hmai tlang hriam lam pang, mitkhur thuk lek lek, khabe kual lian reih rawih hi a ni a, hmeltha ti a sawi tur nilo mahse, a hmel chu a pa rem rawm hle mai. A u Zaliani fa upa ber Chhunthanga chu a awm rawt mai a, khawi kip ah pawh kal se an inzui chawt a ni mai. Chhunthanga pawh selem chaih rual dawn a rawn ni ve tawh a, an in ngai tawn em em mai ani. Pasaltha Hranghrima chuan Hrangthanpuia chu a ramchhuahpui nasa em em mai a, pasaltha nun zia tin reng chu a hrilh awl lo mai a ni. A mah Thanpuia lah lo duai hek lo, a chak vak in thil a thiam chak em em mai a, thalvaekchar khawro eng ang ah pawh thawm chhuah hauh lo in a put kual zung zung thei a, fimkhur leh hmanhmawh tak a sa an veh te hian vazar leh koro rual ram tla te hi an mei a pawt til thawt thawt hman thin ani. Pasaltha Hranghrima chuan eng ang a chhel nge a nih finfiah a chak thin em avangin tum khat chu fiahna tur remchang a awm ta hlauh mai.. Sih tui an chan tum hian sazuk an chang chhuak hlauh mai a, pasaltha Hranghrima chuan a hliam tawk in a mawng tam ah a kap lui salh mai a, riak tur a kal an nih loh avangin riahfai engmah an keng bawk silo, "Thanpui, nang in sahliam hi rawn chhui mai ta che, pasaltha sahliam man theilo nih zawng a tlawm thlak e a, I man hun hun ah chhawlchhin la, I rawn hawsan mai a nga, tha thar in kan la leh mai dawn nia, hei khua a tlai lam tawh sia, muangchang in ka lo han haw san che a nga, min rawn um pha thuai in ka ring.,"a han ti a.

Hrangthanpuia chuan sahliam chu a umzui ta ngar ngar a, a thi thlauh te chu hmu thin mahse a sa chhui chu a hmu thei reng reng lo mai, zan alo ni a, khua in a thim hnan a, a rem lai lai ah riak in a tuk zing khaw en tirh atang chuan a chhui zawm lehnghal thin a, a riltam hle mahse, a sahliam chu a hnu a hloh mai ang tih a hlau bawk nen, a umzui ngat ngat mai ani. Chutiang hlir a a chhui hnu chuan a tuk thum ni feh reh san hun vel ah chuan va nangching in a kap hlum ta a. A sa thenkhat a tam hnem atan a lak bak chu zukchal lu chauh chu a phur haw ta ngawk mai a ni. Hah taka a in phurh hrep hnu tuk hnihna tlai lam ah chuan in chu a thleng ta hram a, ram hla ah mahni a ramchhuah a la neih loh avangin a chau hle. Pasaltha Hranghrima chuan alo en vang vang hnu chuan a nuih suk a, hmel en chuan a lungawi hliah hliah tih a hriat reng mai. A sa kah na lai kha a hrechiang a, chauh pui mai tur nilo in a ti ti(tri) tawk lek a ni tih a hrechiang si, beidawng hauh lo a eitur mumal pailo chung a Thanpuia'n kar khat dawn a va chhui thei chu a chhuang em em a ni, pasaltha nun hrehawm lai a tem tir ve ta. Thanpuia hnen ah chuan, "Thanpui, I nun khawchhuah theih nan a Mipa diktak nun chu I rawn zawh dik chho zel a, ka lung I ti awi thin e. Mahse, mahni a ramchhuah chang alo awm a, hlawhtlinna chan reng reng in, salu ringawt an phur haw ngailo, a khel emaw, a dar emaw kan phur tel hram thin. Upa ten salu ringawt phurh haw chu kut a chawl duh ngai e, a tluang ngailo, an ti thin ania, "ti in a zilh mawlh mawlh a. Thanpuia pawh chuan," Ka pa, ka hriat loh vang a ni, tun hnu ah chuan ka hre reng tawh dawn nia, "ti in alo chhawn ve bawk a.

Hun alo kal ve zel a, pasaltha Hranghrima tupa Chhunthanga pawh zawlbuk thingnawi fawm rual a rawn ni ve ta, a pu Thanpuia nen chuan an in ngai in an inzui awl lo mai, a tak leh a mei ang rawt an ni ber e. He tih lai vel hian Ralvawn khua chu an hri a thalo em em mai a, in kaw kip ah chuan damlo an kawl ani ber a, Lal leh khawnbawl te pawh an lu a hai map map kher mai. An khawchhung a an in sak uluk ber Lal In leh zawlbuk pawh a ban te a lo rek ngit nget in, a bang thumbawh kaihsawih ngei a uluk tak a an tah te pawh chu alo mawih tan ta a. Lal Zamunga chuan a khawnbawlte chu ko khawm in ro dang a rel pui ta, "Khawlian ve pangngai tak kan lo nih tak avangin kan khaw chhehvel kan bawh phak zawng zawng chu thlawhhma atan kan tu dar zo in, kan chen bua zo ta a, khawchhung lah nise kan hrisel thei tawh hek lo. Kan zun leh ek hing kan tuar ta lo a niang e, khawthar kai kan hun ta, favang alo thaw tan ta bawk a, ka ar chhiarkhuan hi chhuahpui se la, kan pasaltha leh tlangval ngalchak ten khawthar va sat teh se. 

Tin, kan lo tiam tawh ang ngei in, kumin thlaithar atang chuan sal buhchhun kan la la thei anga, kumthar ah chuan khawthar kan kai tawh dawn avangin tumah sal an awm tawhlo ang. A duh an pem chhuak thei a nga, kan rorelna hnuai a khua leh tui ni zui duh an awm a nih pawhin lawm takin kan pawm ang, zalen an ni dawn ta a nih chu. " A han ti a. Lal upa te pawh chuan Lal remruat ang chuan pasaltha ho in mi samthum chu thlang chhuak in, khawthar sat tur chuan an tir chhuak ta a. Hmun hrang hrang an en kual a, chawlhkar thum awm zet an thang hnu ah hmun hrisel ber ni a an ngaih, Ar pawh a khuan that duh em em na hmun, Ralvawn atang a chhimthlang lam hawi zawng a ni thum kal, Phirthanga khuai kham chung tlangchhip hmun rem leh pharh nuam tak, sa leh ral lak a inven awlsam tak leh tui nuam bawk si, Manglala hmun hlui ah chuan khawthar tur sat in mang an va chhal ta a ni.

Khawthar an kai tawh dawn avang chuan a kum leh thlawhhma tur pawh tlangval te chuan zan tam tak riak in an va rek ngat ngat a, an duh tawk theuh an in valh hnu chuan khua ah bawk let leh in, buh luchuh lo hun tawh bawk nen, buh chu an seng thuai thuai hlawm a. Buh an seng zawh chuan khawthar kai hun atan lak a remchan zawk avang in zem ah an khung tha a, khua ah an phur haw ta lo a ni.

Lam alo hla tham bawk nen an khawthar din tur chu a hautak hle, chu ta chhap ah in bang tur mau sah na alo hla bawk nen, chapchar awllen pawh nei leklo a an buaipui hnu chuan an inpeih fel khat ta a, an chak lak hman bang te chuan hmeithai leh thawkmawh deuh chhungkaw in tur te chu relsak leh zung zung in, vauthla de tir ah chuan khawthar chu luah in, an in vawmlut ve thei ta hram a ni. Hemi kum hi chu lulet in an buai ani ber awm e, an thlawhhma ven ngai bawk, khawhlui lam a buh leh an thlai thar tawh ho te thiar ngai bawk nen, an inthlen kim meuh chuan fur chanve an hawlh rawk reng a ni.

Salte pawh zalen an lo ni ta bawk a, khawdang a pem chhuak pawh kut tang thliah tham pawh an awm lo. Mipui mimir pangngai an nih tawh avangin an thawhchhuah zawng zawng te an nei thei tawh dawn bawk nen an hlim ru em em tawh mai ani. An ro neih ve ang zawng zawng an dahthatsak te pawh an Lalpa chuan a pe let leh vek a, an ran neihchhun te pawh tam tak an lo inthlah pung ve tawh bawk nen, khaw hausa tak an ni ta ringawt mai. Khawthar an kai hnu chuan an hriselna te pawh alo tha ve zel a, an Lalpa remruat ang in khaw dai kham hrul ah chuan vawnban tlak dal an siam a, meihle kung ek phel in, alairil muat chu an kher fai a, Lei ah phah in kham ah chuan an hawlh lawr a, tahchuan an inthiar thin. Fur ah ruahtui in kham hnuai lam ah a tlengfai thla zel a nga, zun leh ek rim in khawdai chiah rim chhe lo in rei tak an khawsa thei dawn a ni.

Mak tak mai in pasaltha Hranghrima te chhungkua pawh pu Doliana te'n an rawn fin hnu atang khan ran vulh ah an hmuingil em em mai a, vawkpui no hruai ringawt pawh pui sawm lai nei in, sial lah nise, an se huang a leng lo khawp in an ngah tawh bawk. Pasaltha hrohrang na tak ni a mi hriat thin ni mahse, Pu Hranghrima pawh a rilru alo chhe lemlo a niang e, Pu Doliana ten in hrang an han chan meuh chuan a khua a har hle mai a, Pu Doliana fate chu a fate ang mai in alo ngaina tawh bawk nen, leng ah a sawm awl lo mai. An ran vulh te pawh kha in zat a insem a rawt kha a ni a, mahse pu Doliana chuan duhlo in sepui pariat leh vawkpui no hruai pui thum chu a indanpui ve ta hram a ni. Mahse, Pu Hranghrima chuan tawk ati tlat lo, "A tir atang in ran pui I rawn luh pui a, kan se chhu dawm a in neih ve ngawt lah ni hek lo, in malsawmna kan dawng in ran lah kan hmuingil em em bawk a, hei tal hi chu I hnar theilo ang," ti in sechal leh sepatuai pahnih leh tlai lian zet zet tawh Pali ngawt mai chu a pek belh leh ta a ni.

Hlo thlawh te an han zawh hnu chuan thlawhhma ringawt rilru ah an lo pe rei tawh bawk nen, pasaltha ho chuan ramchhuah an rel a, Hrangthanpuia pawh kal ve in Thekpui ngaw lam ah chuan mi sawmthum dawn mai chu zan sawm riah fai nen an thawkchhuak ta a ni. Zan thum an riah hnu pawh chuan Pasaltha Hranghrima'n zukchal a kah bak chu therhlo te te bak ala kap lo, a tuk nga na alo thlen chuan Pasaltha Hranghrima pawl te chuan Sele hnu an hmu fuh ta, in zar pharh in an han chhui ta ngat ngat a, a sulhnu tharlam tak te chu hmu thin mahse, a mah tak an tawng thei tlat lo. Khua in a thim hnan mai dawn avang chuan buk lam chu pan in an kirsan ta rih a. Buk an thlen chuan pasaltha Kungliana ho te chuan nghalchang lian zet chu lo kap in an lo puah mawlh mawlh a. "E khai, in va hlawhtling bik ve, keini zawng thlantui luan huh bak kan hlawhchhuak lo, zangbawng kan pal luhai vel mai mai a ni e," ti in an han pui nghal mawlh mawlh a, thenkhat in zanriah tur an lo buatsaih bawk a. Chaw te an eikham a, a tuk a chet leh dan tur an rel nak nak hnu chuan buk chhung ah chuan an zal ta diai diai a.

A tuk zing hma tak ah chuan tho in, tuk thuan an han rel zung zung a, hma tak ah ei in an hmachhawp lam pan chuan an liam ta sang sang a. A hma ni a an chhui tawpna atang chuan an chhui leh tan ta, an phur viau na in thawm erawh ala reh hle. Chawhma zet an chhui hnu chuan an hma lawk ah chuan Sele chu a kiu ta vung vung mai le, an thawm a hre tawh tih Hranghrima chuan hria in a nau te chu fimkhur tur chuan a han chah nawn leh a, Hranghrima hi a kum tam deuh tawh mahse, salian beih nikhua ah meuh hi chuan an innghahna ber ala ni fan zel mai. Thingbul chu phen pah zel in an han veh hnai hriau hriau a, Sele an hmuh chian theih hnu chuan silai chu a puak ta thuai thuai mai le. Silai ri hmasa ber kha a fal deuh a a puah avangin a tlan sawn hman a ni ngei ang, silai mu tam tak kha chuan a thelh nual awm e,hliam hnu hma hmu mahse, a tlu mai tlat lo.

An silai mu te chu an han sawh tha le te te a, an veh phei leh ta. Fimkhur tak in an piah mual chu an kai phei a, hmun zawl rem zet mai leh phul fua mai a lo ni a, kal zel in phul hmun laili an thlen lai chuan an rinloh lutuk mai in Sele hliam kawlh tawh chuan a rawn phin phei ta thut mai. Thing han lawn na mai tur awm bawk silo, a then tlanchhia in, thenkhat hnim pik ah an vak lut bawk, Hranghrima silai chu a puak thuai a, a in saseng hma chuan amah pawh chu Sele chuan a rawn phin vawr ta lawp mai le, a vanneih a siam in a tlakna bul lawk ah chuan sanghal in bahra a nawr na khur thuk zet mai chu lo awm in alum lut nghal a. A silai a thlauh daih avangin a tan chuan chetna chi rual a ni tawh lo,midangte chuan hla deuh hlek a thingkung atang chuan an rawn kap thin na a, a sahuat ah an kap fuh hlei thei silo. Sele lah chuan a mihring hliam chu a vil tlat tawh mai si, a thuk deuh avang chuan engtin a zu ti thei bik hauh lo, a chilthli chu ti phuan in a far tir duah duah mai. 

Hrangthanpuia chu a ai rual u vek an nih avangin chuhhelh nih a hlau a, a hnung ber a kal kha a ni reng a, apa Hranghrima Sele in a bin phar lawp kha rawn hmu ve hman zuau in tlan a va chhan ngawt chi a ni si lo, an thianten silai an hmeh puah reng avangin thiante silai mu tawn fuh palh a hlauhawm em bawk a ni. A silai mu chu kher chhuak in zen chu an hnawh belh leh a, silai an kap ruak deuh ni a a hriat hnu chuan Sele lam pan chuan a kal phei ta chhek chhek mai, midangte chuan mak thlir in an lo thlir tawp tawh, atthlak ti viau tawk lah bo lo. Sele hmuh theihna lang sar tak a thlen hnu chuan Sele zawk chuan a rawn phin phei ta thut mai, Thanpuia chu lei ah chuan a thingthi rap mai a, kut sai hleklo chuan a lo tin ngar mai. A awmna hmun hlam nga vel in alo la thleng lo tih awm vel ah chuan silai thun tling el awl tih hriat zet mai chu a puak khawk ta rawng rawng mai a, Sele tu tawm tawk in, a hawi chhuak leh tur chu a tlu thum ta dup mai. A chal dam lai tak a ngenmu lut avang chuan meng pual ru chung chuan thihsual tih hriat zet mai chuan a ke a khawng ta dawt dawt mai a, Thanpuia chu tlan phei vat in, kah nawn tlak a awm tawhlo tih a hriat hnu chuan a diar chu phelh in Sele chung ah chuan a vawm thlawp a, apa Hranghrima chu thi ngei tur ah a ruat bawk nen a tlan phei nghal hlawk hlawk a, Bahra khur ava en chuan khur mawng ah apa, amah enkawl a kaihruai thin tu ngei mai chu hliampui tuar in alo let ngat a, a malpui veilam chu ruh lang hawk khawp in alo kak tuar mai a, thisen in alo bual sen nguai tawh mai. 

Khur atang a an inlakchhuah fel hnu chuan midang te pawh an lo thleng ve ta hlawm a, an pasaltha ber mai hliampui tuar an hmuh chuan an ngui nghiai hlawm a, a hliam chu silfai sak in sairil hnang chu sinte in an hlai a, an chilh sak ta nghauh nghauh a, Thanpuia diar chuan uluk tak in an tuam sak ta a. Chutih chhung zawng chuan na tuar awm hmel pawh a pu hauh lo, a naute chu bia in a tawng reng mai a, chhel an ti in mak an ti hle. An silai ri hria in hmun dang a an thian te pawh an lo thleng tak tak a, sa chu chan darh in buk lam ah chuan an pu phei ta a. Hranghrima chu han tang teh mahsela, kal chi rual a nih loh avangin hlang an siam zung zung a, buk lam pan chuan an zawn ta nge nge a.

Hliampui an tawrh chu thuhran, an za vai mai chuan Hrangthanpuia huaisen zia mawlh mai chu an sawi cham chi hlawm mai a. A ni erawh chuan, "Ka pa ka ngaihtuah em avangin ka ngam mai mai anih kha, kha tiang nilo se, ka ngam bik thu va awm suh", ti in a pha ve ngial mai. An awih chuang kher angem le? Ni e, zathu kung ah pawh hreirawt a rah thei anih chuan, engvangin nge pu Doliana thalbe atang chuan pasaltha huaisen chu a chhuah theih loh bik teh lul ang ni...?

EPISODE 5

Manglala hmun an kai hnu chuan chu khua chu 'Hmunzawl khua' ti a sawi ani ta, khua a lian in, in zanga khua lai mai an ni tawh a, khaw hausa leh intodelh tak, pasaltha ngah khua an nih avangin an lar em em mai a ni. Pawih Lal Zahau, Halkha leh Fanai te chuan tlang hrang hrang an thut a, inbe thiam tawn in an inrun ngai meuh lo. Mimal intih thiamloh avang a inmalbeih te chu sawi tur tawk awm ve bawk mahse, khua leh khua inrun leh indo uaih uaih ang chu an nei ngai tawh lem lo ani. Paite hnam peng lian zing a indo hrat ve tak sukte ho pawh tlang hran ah an Lal bawk a, rammu in chhuak khat deuh thin mahse, an chhuah chhun ah chuan an che rawva thei hle a, Lal hrang hrang leh khaw tam tak te hlauh zing a mi an ni ve bawk a ni. Zamunga pawh hi Sukte ni mahse, Ralvawn khaw dintu ten a finna leh huaisenzia hria in Pawih hnam zing ah Lal atan an sawm ang in Pawih Lal a ni a, Raidinkawn bawk an run hma kha chuan a khua ah Zahau leh Halkha an tam ber a ni. Pawih pasaltha ten Lusei khua an ram sak hnu a dam chhuak mi tlem a zawng in a khua rawn bel in, tlanchhiatna tur hrelo leh inhumhimna tur mamawh ngawih ngawih an nih avangin Lal hnen ah vanlung ur a awm an rawn dil a, ani chuan lawm tak a lo pawm in, sal nilo in a khua a mi pangngai ang a awm alo phalsak ta zawk a, Ralvawn khawchhung in pawh a pun tir thiam hle reng a ni. Lusei mi leh sa te kha dem ngawt tur an nilo, han belh mai tur in lusei Lal ten thlang an tlak san deuh vek tawh a, an tan belhtur an vang em bawk atin ni. Ropui duhna avangin Zamunga khua pawh in thlang tla ho zu run in, rallak thil an zu hawn fo a, a pasaltha mahni hmingchhal ngam ngat ho zing ah pawh Halkha tawng chauh nilo, tawng hrang hrang a hmingchhal an awm thluah mai si, hei vang te pawh hi ani a nge, lusei ho ten 'pawihchhe ral' ti a an sawi tan tak nachhan pawh kha. Halkha te kha chu 'pawih ral' ti in an sawi mai thin.

Hrangthanpuia pawh huaisen tak mai a Sele a kah hnu kha chuan mi ten an chung en in, naupang te ni chung si khan pasaltha nih na chu an pem buhbel a ni hawt a, mi inthlahrung mi tih tak ah zahthlak ati in, phu lo a inti hle thin. Amaherawhchu, a tih tur atana a ko a tla tawh reng reng chu hlen tum tlat thin mi a ni. Ralthuam chelek lam hi atuina anih avang in a zir nasa em em a, eng hmanrua pawh hi nal takin a hmang thei deuh vek ani. Chung zing ah chuan kawlhnam vai leh silai kah hi a thiam fal hle. A mah hi a ruakhau in sa inphut tak nilo mahse, thahrui a ngah in a fei em em mai a, inmalbeih leh thingluang zawh ral ah chuan tumah in an hneh theih an ring lo hial a ni. Hmar hnam nih a zahpui ngai hauh lo, mahse amah kaihruai a enkawl seiliantu pasaltha Hranghrima ke bul a seilian a nih ang in a sam erawh chu a chhip ah a zial ngauh mai a ni. Hmel en a pawih diktak hmel lang si, pawih tawng a hming chhal ngai hauhlo mai chu 'pawihchhia' ti a sawi pawh a mawh ve reng e.

An khawnbawl upa min pu Darruma chuan Hrangthanpuia silai kah thiam leh tuanran zia an sawi chu a ring thei tlat lo mai. Tum khat chu Upa Darruma in ah chuan lalpa ho in khawnbawl ho chuan zu an khawn a, an inrawt phur zel chuan Hrangthanpuia ram kal haw chu an koh tir ta a. Hrangthanpuia lo thleng chuan, "Kan khaw upa zahawm te leh ka Lal zahawm tak te u, pawi hai a awm ta em ni? Nge in rilrem loh zawng thil ka lo khawih zawk le?" a han ti a. Lal chuan lo chhawn in, "Awm lah lo ve, hriatchian leh zual che kan duh mai a ni, Roneiha pa, I fungki leh silai kha a mu nen han chhawp teh",ti in upa Darruma chu a han au zui nghal a. An rawn chhawp chuan Thanpuia chuan a ngaihna a hrelo hle, a tawng chhuah hma chuan upa Darruma chu alo tawng chhuak hmasa ta a. "Silai, amu leh zen I nei a, ti chuan silai ruak kan chhawp bawk che a ni. Le, kan tih rual in I in buatsaih a nga, kan zubel bul a uipui bawk hi kan hnawtchhuak bawk ang. Uipui in sumhmun pel a kaiten a thleng hman emaw, I kap hmanlo anih chuan he khua a I awm chhung chuan pasaltha a chhiar I ni lo a nga, an ramchhuah pawhin I zui thei heklo ang. Sumhmun a pelh hma a I kap hman a nih erawh chuan ka sepui no dam ber hi I chan tur in ka hlan e" a han ti a. Khawnbawl upa zing a mi Thatthiauva chuan "kei pawn ka tlai lian ber ka thap e", a rawn ti ve leh a. 

Lal Zamunga ber pawh chu lo tawngchhuak in, "I chak a nih chuan fathang I awl ang, in chhungkaw pui pa ber Hranghrima khawnbawl ah a tel nghal bawk ang" a lo ti ve bawk a. Thanpuia chuan huphurh teh mahse phatna hun an siam tlat lo, a pa tan erawh theih tawp chhuah a duh a ni. "I inring maw? “ ti a an zawh chuan inring tih hriat nan alu chu alo bu nghat a, silai pawh chu ala ban chuang lem hleilo a. 'Le' ti a au leh Uipui mawng a tlawh chu Lal chuan a han rual nghal a,Uipui pawh chu hnute then dawrh dawrh in pawn lam pan chuan a tlan ta hnuk hnuk a, Lal leh upa te pawh sir lam ah chuan an thle ta suau mai bawk a. Thanpuia chu theih tawp a rang chuan a che zung zung a, Lal leh upa te chuan an inchawina Uipui ringawt chu an lo thlir zui tawh. Pen hnih vel in kawngka a la thleng lo tih ah chuan silai a puak thuai a, Uipui pawh chuan a duh vang ni hauh lo in kawngka biang a deng dawt mai le. A thi tur chu a uk thut thut a, a chatthla fel der mai. Sumhmun pelh chu sawi loh, kawngka tak ngial pawh a thleng hman hauh lo mai. Lal leh upa te chu mak ti lo reng an awmlo. Silai chu an han en a, 'Awlan' silai dawt var hiau huau, zen sawh muk hnu ah silai mu an sawh muk leh te te chauh na thin, chumi hnu ah pawh a chuanki a meilung in nawt tek in a man tur in a beng ah zen dip an la hnawh leh talh na kha a ni si a, Thanpuia tuan ran zia chu mak an ti tawp theilo a ni.

Thanpuia chuan fiamthu ah ngai in, "Lal pa leh upa te u, ka la insil dai hmanlo a, rem in tih chuan haw mai ka va duh em! Ka pa Dar, ka tih fuh a lei ah I Uipui in nunna a chan ringawt mai chu ania, a zia lo ngei mai, min hrethiam ang che aw?" ti in kal mai a han tum a. Lal leh khawnbawl upa te chu an lo fiamthu aw zawng lo mai. Lal pa chuan, "I chak ta, zanin atang ka rorelna min tawmpui tur in I pa Hranghrima ka in ah lo chuangkai tur in hrilh ang che," a han ti a. Upa Darruma leh Thatthiauva pawh chuan, "Tlangval I chak ta e, naktuk zing ah ka se huang atang in sial I rawn kai chhuak thei ang," an lo ti ve bawk a.

Hrangthanpuia hi mize mak tak nei a ni a, rilru fim tak a a ngaihtuah hnu a thutlukna a siam tawh chu a sawh sawn mai mai ngailo. Zawlbuk inbuan te hi a ngai ropui teh chiam lo, a tel ve ni khua ah pawh a hman hman in an phawi kang ringawt mai a ni, tha a thawh ve ngai meuh lo. "Kan chakna te hi lo chhawr tangkaitu an awm a nih loh chuan chapona min siam sak tu mai a ni. Chapona hian thil tha a thlen lo a, hmasawnna a hril hek lo, inlungrualna ti keh chhe tu mai a ni a, midang rilru ah itsikna a tuh thin," a ti tlat zel mai ani, a dik viau awm e. Tum khat erawh Kharpui buan chak leh pasaltha te mikhual an nei a, an buanchak chuan khing zo a hmu lo bawk nen, Kharpui buanchak chu a chapo in a au lung lung reng mai a, a dawhtheihna in a tlin ta lo. Khawtual tlangval ho lah in Thanpuia inbuan la hmu tam hek lo, fiamthu ah ngai in an nuih a za ting mai. An han in vuan chu an tang nghal pan pan hle mai a, Val upa in 'le' a tih rual chuan Kharpui buanchak, an chhuan em em chu a kang ta vawk mai le, a thawh hnihna an han tan leh pawh chuan a ai a chiang in, Zawlbuk bawhbel bawh liam duai duai khawp in a bin ta hrep a nih kha. Chuta tang chuan Hrangthanpuia chak zia leh chapo loh zia chu tlangval ho ti ti ber a ni ta. Kharpui buanchak erawh a kimki reng ta thung a nih kha.

Hrangthanpuia ngaihdan ah chuan huai ber a awm theih loh, "Mihring ah huaisen fal bik leh hlauh nei miahlo an piang thei lo, huaisenna chu boruak tawn a zir in rilru ah alo lut mai a ni," a ti thin."Hlauh nei ngailo hi mihring an piang ngailo, chu chu huaisen teh nan a tling zolo. Hlau chung chung pawh a rilru fim tak nen, hlawhtlin hma loh chu tawn lui hram hram zel thin tu te hi mi huaisen chu an ni, "a ti fo thin. Pan hun a awm ang bawk hian mi huaisen tan chuan tlanchhiat hun pawh a awm tur reng a ni, kan tlanchhe fo a nga, kan tlawm tihna erawh a ni kher lo," ti in a nau te ho chu fuih ve sauh sauh thin a ni.

Hmingthanna leh ropui nih duh vangin Hmunzawl khua pawh chuan Lusei khua leh remchang an hmuh ang ang te chu run turin an thawk chhuak ve fo mai. Mahse lo do let ngam an awm thin loh avang in rallak rohlu leh sial tam tak tak chu an kai haw duah duah fo thin a ni. Chutiang a lusei khua leh a chhehvel fang tur a an chhuah chang te chuan Thanpuia chu a kal ve deuh ziah thin. A hmangaih ram, a nunna zawng zawng thap a a hum tur tih reng a hre si lo. An ro tha tha te chu a phurh liam sak ang vut vut a, mihring hian hmalam hun hi kan hrelo thin teh e. Hetiang a pawih ral in an rawn run emaw, chhiah khua a an siam avang a an ro tha tha leh sial tam tak an kawi thin a vang hian alawm hla chul theilo alo pian tak reng ni.

"Hrumsawm lo lian pal ang kan dang zo lo ve,

Ka sepui in Tiau dung a zui."

ti in.

Heng lai hun vel leh a hma lam rei tak atang tawh khan lusei Lal te hi Lal dangte lak ah an kim ki hle. A chhan pawh an rilru a chapo a, ropui ber nih duh na an neih avangin lusei leh lusei te an indo vak mai thin a, tanrual nachang an hre tlat lo. Lusei Lal te zing ah indona rapthlak tum hnih a thleng a, chhak leh thlang indo chu hmanlai thil chang ti tih tawh mahse, Buanhmun khaw inchuh a Sailo Lal ropui pahnih, Lalpuithanga leh Vuttaia inhmuh thiamlohna avang a chhim leh hmar indona rapthlak tak erawh chu nimin lawk a thil thleng ang mai a la ni. Lal huaisen leh pasaltha ngah Vanhnuailiana pawh chhak nawrtu ber ni mahse, Tualte, Lungdup leh champhai te a zuan kual hnu ah a lo boral ve ta bawk a, Tualte ropuina vanglai a chuai ta si. Khawchhak pawih leh sukte ral lak a do la turin, lusei lalte dinhmun chauh hun lai ber a ni. Sailo Lal damrei hmingthang Vuttaia meuh pawh in an dinhmun chu hria in, a tupa Vanhnuailiana chu a ui em em mai a,

"A pawi mang e, tinreng in a pawi mang e,

Hmartlang chhimtlang ka daingul phaw;

Chhaktiang dai a'n a tlu e"

a ti hial a nih kha. He tih lai hun thawl tak mai ah hian ani Mihrang val Hrangthanpuia chu a lo chawrchhuah ni.

Hmunzawl atang a hmar lam nikhat kal ah hian Sunchung khua, zathum nufa zet a lian hi an awm ve bawk a, Hmunzawl nen hian aihnah phah in an in lungrual hle. Ral run pawhin an chhuak ho fo a, an rallak sum te pawh zat leh zat in an insem mai thin. Sunchung khua hi a danglam in sawi a hlawh hle, a khaw hmar lam leh tlak lam zawng chu kham chawi vel vek a ni a, luh ngaihna a awmlo. A bak zawng chhak lam leh chhim lam zawng pawh chu lungrem a hual chhuah vek a ni a, luhka pakhat chauh nei in dai kawngkhar rinawm tak in an siam a, kulh rinawm tak hi a ni ringawt mai a ni. Khawdang kulh ang a dai sakuh a hung mai mai a awm ve lo. An him em em mai a ni.

Hrangthanpuia pawh kum naupangte ni chungin ram lamah thang a chhuah der tawh mai, Tumpang, sai leh sakei nen lam ramsa an hmuh phak ho zawng te chu a kap kim vek tawh a, Muvanlai leh rulngan phei chu nikhat thil thu ah a hawn ve ve thei hial a ni. Silai hi atin ve vung vung ngai meuh lo, hmanhmawh thil ah phei chuan a kawng zawn atang pawh a hmet puak thuai mai thin. "Khawi lai zawn atang pawh nise, I kutzungchal a I kawk zawn thei a nih chuan a ai let enge maw zat a sei zawk silai phei chuan I kap fuh thei tur a ni", a ti mai thin. Hmunzawl Lal fapa pathum zing a upa ber Duhmanga chu a fate an lo lian ve ta bawk nen, khua an lo lian tham ve tawh bawk a, Lal chuan tlang hran chan tir a tum ta a, a ma duh ang ngei chuan thlang tla in, chhim lam phawngpui tlang piah, cheu lui ral tlangchhip ah chuan khawthar sat in tlang a rawn thut ta a ni. Duhmanga tlang hran chang a a indan hun lai vel hian Chhunthanga pawh pasaltha tuaitir te rawn ni chho in, a huaisen zia mi te hrilhfak a tling a ni. Duhmanga hian pem chhuah pui atan awt viau mahse, Hrangthanpuia a chhuah pui dawn avangin Lal Zamunga chuan a remti ta lo ani. An han inthen tur chu an hreh tlang ve kher mai, Chhunthanga hi Thanpuia u Zaliani fapa ani a, (Hranghrima fate leh Doliana fate chu unau piang hmun ang vek a khawsa leh in ngai em em an nih kha) Chhunthanga tet te atangin atak leh amei ang mai a inzui chawt thin an nih kha, vangkhaw hran bel tur a an han inthen meuh tur chu pasaltha hnuk a lo ulh ve thei a, mittui an lo nei ve tho a ni tih a lang chiang ngei mai.

Tichuan Lal Duhmanga ho chuan Tiau lui kan thla in, in zahnih tha zet zawt a pem chhuah pui te nen chuan Saibual khua chu an zu din ta a, Hrangthanpuia pawh Lusei ram pasaltha alo ni ve dawn ta a ni. Lusei lalte chuan Tiau chhak lam a pawih ral dangte lak a an himna anih beisei in Tiau rawn kan thla a khua rawn sat ngam, pawih lalte chu an be chhe ngam hauh lo. Enge maw chen chu an him phah in, an chhiah chawi pawh a tlem phah reng a ni. Chutih rual in Lal Duhmanga pawh hi a fimkhur a ngai, a mah huai veltu khua te hi lusei Lal te vek an ni a, an tual thu a chhiat hlauh chuan a mah chhantu tur te awmna a hla lutuk, Lal huaisen tak alo ni lemlo bawk nen, lusei lalte nen a inrem tak a awm ho tluk chu atan duhthlan tur a awmlo a ni.

Next Episode