HRUMZIAL VANGKHAW HRAICHAWI HRANGTHANPUIA I - 2 - TIMES OF MIZORAM

Home Top Ad

Post Top Ad

HRUMZIAL VANGKHAW HRAICHAWI HRANGTHANPUIA I - 2

HRUMZIAL VANGKHAW HRAICHAWI HRANGTHANPUIA Ziaktu-Thunderboy Chinzah


EPISODE 1
Mizo thawnthuZo hnahthlak hrang hrang te zingah chuan Pawih/pawi hnam hi mi luhlul leh hrat khawkheng hmasa, tuarchhel leh tumruh em em mai an ni. (Tun thleng pawh hian kan Burma unau pawih tlangval, vai tawng leh sap tawng kawi khat mah hre lo, Kolkata khawlai a tei ta nawlh nawlh hmuh tur an la awm fo hi) Lusei, hmar leh zo hnahthlak chi peng tam tak, Shan hnam ho, Karen, Kachhin etc.. ngamlo a thlang an rawn tlak hnu ah pawh, thlang tla ve duh hauh lo a chhak nawr lui tang tang tu te an ni. An huaisen a, ralrel an thiam a, an tuarchhel bawk a, ei tur mumal neilo pawh in ram palai leng ah nitam tak tak an thangbo thin. He tih lai hun hi chuan tanrual nachang la hre heklo le, an tanrualpui te nilo tawh phawt kha chu an hmelma ah an ngai mai thin a, hnam hrang hrang chu sawi loh, mahni chipui ngei ngei te pawh an indo fo thin a ni.

Heng hunlai hian Hmar hnahthlak hrang hrang te leh Paite hnahthlak ho te hi hnam bil ang in khaw te reuh te te a inbawk hran an ching em em a, indo tur a inzirtirna an nei ngailoh avangin do an la ve ngai lo. Hei vang hi a ni ngei ang Lal hrang hrang hian an zuam em em mai a, run an hlawh zing in, Sal ah pawh an man nasat ber an ni awm e. Mahse, nunnem avang ringawt hian mihring hi an dawihzep a lo ni awzawng lo mai, mi hmuhsit leh hnuaichhiah, Sal kumhlun hnam ni awm lek a an ngaih Hmar hnahthlak peng zing a mi, Hmar Selawn hnam ngei atang chuan Pasaltha ropui leh huaisen, ralrel thiam leh fing em em mai, hnam hrang hrang zing a seilian anih avanga a khawsakna hmun apiang ah tawng a buaina neilo, mi hrat khawkheng, khawchhak ral lak a Zoram humtu, Pasaltha huaisen hi alo chhuak thei ang tih hi tu mah in an ring phak biklo ange.

Pawih ram awp chhung a sukte Lal Zamunga khua Ralvawn ah chuan, Lal in ah Lal leh upa te chu an pasaltha te chetlak dan tur rel in an thukhawm thap mai a, favang boruak thawt hun ni tawh mah se, khua a tuifur rei kum a nih avangin ruah ala sur duh hle. An thlawhhma lak leh ruahtui tla in a zir bawk a, buh leh bal ah kum dang zawng ai a hausak an in beisei ani. Chu kum that kum denchhen chuan khaw ropui tak nih theih an in beisei a, a kum leh lo awm tur atan thlawhhma zau zawk an in valh theuh theih nan hnathawktu tur Sal tam tak mamawh in an in hria a, chumi tur atan a an pasaltha leh tlangval te chetchhuah tir tum pawh an ni reng ani. Naktip mai a Tiau lui kan thla a rammu a chhuak turin an rorel chu an tlip ta a, an pasaltha te in buatsaih uluk a ngaih zia hrilh tur in Lal chuan a upa te chu thu han chahin, an in mangtha ta hlawm a.
An rorel tuk ah chuan rammu a kal tur zawng zawng chuan funpui er in, thahnemngai takin nileng in hun an hmang a. Zan alo thleng a, zanriah eikham hnu ah pawh rei rial lo in zawlbuk ah chuan an chuangkai sap sap hlawm a, an phur tlang in an helhhawlh tawh hlawm bawk a, mawng a hawlh ang mai in an phi chung tawh mai. A phur zual phei chu tuai til hup sak ang mai in an ri le lu hlawm a, Lengi run kai tlai rawih khawp in an rammut tur chu an sep rawtui ani. Lenglen ar khuan hnu fe ah an nula rim tur te in theuh pan chuan an in zui chhuak ta thliai thliai a, an lenna theuh ah pawh ti ti dang a leng meuh lo a ni e. Nula te pawh chuan an lawmpa te leh an in leng te chu tluang tak a kal a, hlawhtling tak a lo let leh tur a an duhsak thu te chu an fah mawlh mawlh hlawm a, hlim tak a in kawm in, leng hawn ar a rawn khuan tak ah chuan zawlbuk pan tur in an tin ta sang sang a. Mi tin an thuhmun fo theilo, chu Ralvawn khua ah ngei pawh chuan thenkhat in phur em em a hun an hman lai in, nula te leh thenkhat te rilru ah erawh chuan an hmabak chu huphurh rilru tak chung in mut mu an lo tuah ve bawk ani.

A tuk zing khua alo var chuan nu te leh nula te chuan tui um khirh in, tuikhur lam pan in an liam sap sap a, rei thang lo in hmanhmawh takin an lo let leh thuai a. Buhhum rap a hak chu chawithla in sumhmun a sum ah chuan an deng lawp lawp hlawm a, a kar lak ah chaw chhum va siam in hmanhmawh tak in an che zung zung hlawm a ni. Pi tar leh pu tar te pawh chuan archhiar atang a ar lo chhuah in, arbawm a arpui no hruai te chu arbawm chhip kua atang a chaw thlak sak in an lo buai ve em em bawk a. Tlangval te leh chhu rawng vuan tuaitir deuh zawlbuk a la riak thin ho te pawh in, mahni in lam pan in, tlai bik nih hlau reng reng in an inhmakhua vat vat hlawm a. Chempui an tat hriam a, an silai te chu tuaihnum in, zing ni chhuah sar ah te chuan an silai zen te chu an han pho tang nawn leh bawk a. Chutia an inbuatsaih lai chuan veng tin suar tluang in tlangau pa pawh in Lal thu chhuak, "Chaw eikham veleh rammu a kal tur te, Lal mual a kal khawm vek tur", a tih thu chu a rawn pau pui ve awl awl bawk a.



Tukthuan te an ei kham hnu chuan pasaltha leh tlangval rammu a chhuak tur te chu Lal mualzawl ah chuan an thuam famkim inbel in an rawn chhuak khawk khap khap a, a kal ve lo tur khaw mipui te pawh in, Ralvawn khua leh tui te tan a rammu a chhuak tur te thlah tur​ in an rawn in sehmur tuau tuau hlawm bawk a. An kim ta maw tih ah chuan Ralvawn lalpa Zamunga chu a luhkapui ah chuan rawn chuang chhuak in, a hawi vulh vulh a, a khaw mipui te ngawi rih tur in a hrilh tih en tir nan, a ban chu a rawn phar chhuak ta vu vu a. Chu ve leh mipuite pawh chu thehmeh ang mai in an reh ta thiap mai, tichuan Lal Zamunga chuan Ralvawn khaw tan a rammu tur te chu tihian a rawn fuih ta a. "Ka khua leh tui, Ralvawn khaw tan a rammu tur, pasaltha huaisen leh tlangval chhuanawm tak tak te u, nangmahni avang in he khua hi a ding a, in huaisenna leh tlawmngaihna avangin ralmuang in kan awm thin. In lak ah hian kei leh in khaw mipuite hian lawmthu sawina tur kan va ngah em.! Tun ah pawh in nunna hial thap in he khaw tan hian in pen chhuak leh dawn a ni a, englai mah a fimkhurna thlah lo turin ka duh che u a ni. 

Amaherawhchu hei hi in Lal leh khawnbawl te duh dan a ni a, tu pawh in rawn zawm theuh in tum dawn nia. Sal a tam thei ang ber rawn hruai haw ula, in thunun theih loh mihring an nih ngawt loh chuan tumah kut thlak lo thei ula kan duh ani. An ro thi leh dar neih ang ang te a kim thei ang ber in rawn keng nghal sela, tumah in chhuh kher a tul lo ang. In sal man te a rual khai thei ang ber in kan in sem tlang a nga, a man tu te erawh chuan in duh zawng in thlang thei ang. Tumah in ka thu lo chuan sal chhinchhiahna siam in an beng in hleh sak tur a ni lo, kan beisei ang a in hlawhtling thei anih chuan in mi man te chungchang chu tha thar in kan ngaihtuah tha leh dawn nia. Tluang tak in kal ula, hlawhtlinna bawhhla chham chung in in vangkhua hi lo lawi ngei ang che u. " ti in a thusawi chu a ti tawp a, mipui te chuan kut lo beng hluah hluah in, duhsakna tinreng in hlan chung in, an khua Ralvawn tan a rammu a kal chhuak tur te chu an thlah liam liam a, Rammu a chhuak tur te pawh in leh hawi meuh in an kut chu an vai lap lap a,an lawmnu te nen a an in hmuh leh hun a a hlimawm tur zia mitthla chung in, rilru tha tho tak chung in an khaw kawt chhuah chu an kal liamsan ta tham tham hlawm a.

EPISODE 2
Ralvawn khawchhan valrual te chu Ralvawn khaw chhuahtlang atang chuan Tiau lui lam pan in khawthlang lam zawngin an in zui chhuak nguah nguah mai le, an kut tuar tu nih leh lo hmachhawntu nih chu thil phurawm tak zawng a ni mawlh lo ang le.. Khawdai atang a an chhuah rual chuan an chung zawn ah Bawngpui(irliak sava) chu rawn hram in, ram lam hawi zawng chuan a thlawk vang vang mai bawk a. Ai en na chikhat a an hman thin a ni a, an pasaltha te phei chu tawn leh dai hriat ngah tawh an ni bawk a, hlawhtling ngei tur a in ngai in, an hlim ru lawk veng veng mai ani. Engtia rei nge an thang dawn tih hriat ni hek lo le, Sailo ni chuang kal em nilo mah se, uih zawn ang vut vut a kal thu awm hek suh. A hmahruaitu te zai ngai zel chuan an kal a, vanglai tha hmang mek te kalchhuak an ni bawk a, an kal sawt viau tho mai. 



Mual leh kawr ruam te chu a vang tan zawng hlir a tan in, an bawhliam zung zung mai a ni. Thui tawk fang an kal hnu chuan an han hawi let a, Ralvawn khaw chawitu tlang dung pawh a bawk hla raih tawh mai. Ni in vanlaizawl a pelh hret hnu chuan lui luang dam reuh rawih, a kuang tawn tawn chawlhna a tan a it awm leh rem fahran mai chu an pawh ta hlawl a. Chawfak te alo hun tawh bawk nen changel hnah te sah belh in, an chawfun dahkhawm atang a hlui tam tham tak an han buatsaih hnu chuan, puar el euh in chaw chu an bar ta hlawm a.

Chaw te an fak zawh hnu chuan vaibel te tan kai in, tawk fang chawl a puar an nghah thlak hnu ah val upa te rorel ang chuan kal zai an rel leh ta a. Han zi mar ar ar in an hmalam pan chuan mual dung chu nak pek in an kal vet chho zel a, an hma tlang chhip chu chuan chhuah phawt an tum ani. Hah khat zet an kal hnu chuan tlang chhip chu an chuang chhuak ta mai reng a, an kalna tur lam pan dan tur rel pah in thlifim chu an dawng hauh hauh a. Chulai hmun atang a an han thlir chuan lentlang chu an hma lam ah chuan a in chhawng paw vo mai a, thawk an han lak te te hnu ah mual dung zam nuam zet mai lentlang va sawh fin tu chu tlangdung sahmul then ah chuan an zawh ta zel a,kal hahdam anti ta phian mai.
An tlangdung zawh in lentlang bul thut ava sawhfinna lai an thlen meuh chuan zanriah chhum hun lai alo nih tawh avangin, Val upa Thanghuta leh pasaltha Hranghrima ho te chuan ro an han rel a, pasaltha Hranghrima chuan an rorel dan chu tlangval te hnen ah chuan a rawn puang a. "Hei khua han en in zanriah chhum hun lai mai a nih tawh hmel a, zanriah hmeh tur hnephnawl fahran pawh kan la in dap khawm si lo. Riah hmun zawn leh buk sual nen khua in min thim hnan mai hmel bawk si a, tihian remruatna kan han siam ta a ni. Kei leh silai keng mi sawmthum vel bawr hi kan lo va kal hmasa anga, kan hma ruam hnih na kawr ah sawn in zar chho in kan lo chang dawn a ni. Kan in rem fel hnu awm vel ah in rawn in zar pharh anga, kan hma thang hmun leh a chung ram tau awih tlan deuh saw in rawn tuam phei a ni, Tumbu vui hmuam leh chimchawk ilo fahran te pawh in rawn vai phei nghal dawn nia" ti a a sawi zawh hnu chuan ami thlan silai keng te chu hruai in ngaw kar ah chuan an dawk phei par par hlawm a.

Tuibur hmuam dak chhung vel zet a rei an han nghah hnu chuan val upa Thanghuta chuan tlangval rual ho te chu inzarpharh tur in a han hrilh a. A chhak ber a kal tur in a kalna tur hmun a han thlen chuan chuan chempui zangchhah lam in thingtuluang chu a han khawng ri chhawk chhawk mai a, a ri chu kawr dung leh ral leh lam thleng chuan a thangkhawk rawih rawih mai a. Chu veleh an za vai mai chuan awrawl nen, haw haw hulh hulh chung in an hmalam chu an pan phei ta a. Amaherawhchu, ram tau phihrit leh thang hmun pik bawn tak mai su an nih avang chuan kal chak erawh a har an ti tlang hle, kalsan an nei ang tih hlau tak chungin an sir tawn a mi te nen chuan in au pah in, pheikhai rual tak chuan hmalam chu an pan ta zel a. Chutih lai tak chuan an hmalam kawr ruam a tang chuan chengrang a au khawk ta rawih rawih mai le, an phur zual chu an thawm pawh ana zual in, pik bawn kar ah an put lut zung zung tawh mai ani. Chutia an phur vanglai tak mai chuan silai ri chu vawi li lai a rawn in ruan leh ta ulh ulh mai bawk nen, an ngaih a tha in, sa tui hang hawp hun an suangtuah thleng hial hlawm mai.

An hma kawr ruam hmuh theihna tur mual ziding an chhuak tep tih ah chuan an hmalam atang chuan thawm a rawn ri phei rawk rawk mai a, hual lut ho in an han hmuh meuh chuan an lo in hnaih tawh hle, zukpui lian zet mai chuan hmalam ah hlauhawm a awm tih hria in, hualluttu te lam ah relh chhuah a rawn tum alo ni a. An han au ngial pawh in a let mai ngam hauh lo, huallut te in tlarna hma si ah chuan chhuk zawng in a tlan thla leh ta zuk a, hualluttu silai keng te zing a mi Robuka hma zawn a thlen chuan le silai chu a puak ta thuai mai, a kaptu chuan tlu mai tur a a ngaih lai in a tlu ta hauh lo. A han awp deuh rawk na a, tho leh vat in, an hma changtu te awmna lam pan chuan a tlan ri thla ta rum rum mai a, a kahna a hnaih teh reng nen a tlu mai lo chu Robuka chuan mak a ti hle mai. Mual sezang lai chu chuang chhuak zui in changtu te chu an han au a, "Sazuk a rawn tlan thla e" ti in an au thla luah luah hlawm a, changtu te pawh an lo in ring viau a niang chu rei pawh an ngaihchan hma in silai chu a puak ri leh ta dur mai a. Chhuk zawng deuh a bawh thla zel in kawrkam chu kar lo ah an thleng zui chu a ni ta mai, changtu kam ten lo hmu hmasa in an lo au a, an lo chhuah kim thleng chuan an innghak khawm ta a, an han in chhiar a, tumah in kalsan lo in an lo chhuak kim e.

An sa kah chu hmun rem lai ah chuan an han dah khawm a, nghalrual pathum leh nghalrul rawng sei zalh mai chu an han hmu a, Robuka zukpui kah hliam an lo kah hlum sak nen an han dahkhawm zet chu an hlim ngei e, hah reng reng an hre chang tawh hlawm lo. Ramsa te hi chu an tuar a chhel in an lo fel mang e, Robuka zukpui kah pawh an han belh chian nak chuan a dar veilam ruh a lo kap chhe hle a, a ham hawng zawngin silai mu a lut lo hlauh, ke hma veilam hmang thei tawh lo chung in chak takin changtu te hnen ala pan thla pur pur thei a nia, an lo danglam teh e. Val upa Thanghuta leh Hranghrima ho pasaltha te chu an han in rawn khawm a, an chawlhna lai hmun chu a rem in tui a nuam bawk a, riahbuk sual nan chuan an rawt thlu ta mai reng a. Chanpual in sem in thenkhat in sa an chan a, a bak midang zawng chu hmun hnih ah inthen in, pawl khat in riahbuk an lo sual a, pawl khat dang in thing tuah tur an lo fawmkhawm bawk a, sa an ngah avangin thing an mamawh hnem dawn tih in hre chung in, thahnem ngai tak in an che sang sang hlawm a. 

Pasaltha Hranghrima nge nge, a remhriatna a tangkai leh ta, fur khua ngang ala nih avangin an thingro fawm te pawh a hnawng chuap hlawm mai si. A naute sawm vel chu hruai in mual dung lai a fah kung, thil leh thingse tuai malte tiat rual ho chu a kih pui ta rum rum mai a, a tlawn tlawn chuan kawr ah an khawh khawm ta rum mai. Midang te chuan an khawh khawm sa chu buk sakna hmun ah chuan an lo thiar ve sauh sauh bawk a, an duhkhawp an sah hnu chuan chhuk thla in an han thiar pui leh a, an zo thuai mai reng a. An thiar zawh hnu chuan buk tual ah chuan sarep na tur an han siam leh a, thenkhat in an buk sak te chu an lo phuar pui mawlh mawlh bawk a. A tul apiang ah chuan in pui tawn in, tlangval thenkhat te pawh in buk kawt sir deuh hlek ah chuan mau phel a tui lai in an lo khawh tir tau tau tawh a. Mei an han nun tur chu thing a hnawn em avangin a nung mawh kher mai, mahse hetiang thil hi an vawi khat tawn na a ni tlat lo, khu luai luai khawp a an chhem hnu chuan a rawn alh chhuak ta nge nge a.
Khua te a thim chhulh tawh avang in ei rel pawh chu tan an han tum a, mei a vam mawh viau mai si, tlangval tuai deuh ho te chu val upa Thanghuta chuan an thing tuai chheh khawm te chu hlam chen vel chuan a han tan khawl tir a, tlangval te chuan buk sak zawh tawh hnu a thing hring chappui lian pawl tiat zet zet tur hmun thum lai a chheh vum thur mai an hmuh chuan mak an ti in a a ngaihna an hrelo hle hlawm a. An meichheh a vam chhuak ta maw tih ah chuan val upa chuan thing tuai tan thar hlim, la tui tluk tluk thei ho chu meipui chung ah chuan a dung zui zawng in tlawn sawm tha zet tur hi a rawn tuah ta ur mai a, mak an ti hle. Thingro pawh a alh hleihtheihloh lai a thing hring kih hlim hlawt han tuah chu a mak em bawk ani. Sa chan tu te pawh in sa chu an chan zo khat ta bawk a, zanriah hmeh atan a an tih a kawchhung chu thenkhat in an lo sufai bawrh bawrh hlawm bawk a. Buk lian zet zet pa li lai mai chu an khawrpum zo tawh bawk nen, thu hah chawl in vaibel te an han tan kai a, an pak talh talh hlawm a.

Vaibel te an han zuk zawh a, an han thut khaw muan hnu chuan meipui chu alo in ur lum a, thing hring nen lam chuan alo alh sawr tluk tluk tawh a, thing hring chu thing ro ai chuan a alh na in, a vam a sa em em mai a, an rawngbawl te chu a hmin zung zung tawh mai ani. Meipui chu hmun thum lai ah chuan chheh belh in, an sa chan hrang lian pui pui te chu an bang uai fur mai a, an rep far tluk tluk ta mai a, an la hriat ngailoh thing hring nen a meipui chheh alh nat zia leh aling vam te a sat bik zia te chu mak ti in an sawi zui nak nak a. Lenglen hun pelh hret awm ah chuan chaw ei chu an peih ta mai a, tlangval naupang lam tha za rual chu che sang sang in, chaw chu hlui sawmhnih zet tur chuan changel phah in an han bun kual a, sanghal leh sazuk kawchhung leh a sa enge maw zat mau thei a chhum chu an rawn bun kual zung zung a, puar el euh chuan zan riah chu an kil ho ta a. An ei kham hnu ah chuan meilum ai pah in an ti ti a, sa te chu an rep pah zel bawk a. Pasaltha Hranghrima chuan val upa Thanghuta hnen ah chuan zawi sap in, "U Thang, kan han phur rilru viau na a, zan in chu khua a thiang bawk nen, kan thla de tir khi a lang chiang viau mai a, mahse a vei lam ah arsi ka hmu tlat lo, milu a khai hauh lo mai, kan tum fuh loh ni te hi a ni mai lawng maw?" a han ti a. Val upa Thanghuta chuan muang chang in a puan ven chu phelh in, a khup ah chuan a han suih a. A vaibel pak talh talh pah chuan, "Hma lam hun zawng hriat lawk theih ni suh, Amaherawhchu, kan Lal pa khan milu khai tur in min thlah loh kha maw! A tam thei ang ber sal a hruai haw tur in min chah kha a nia le, milu a khai lo a nih pawh in ngaih that loh phah nan hmang suh u, tun tum zawng duh leh mi lu te chu kan khai malek a nga, sal tam tak kan kai haw duah duah mai ang chu le", a han ti a. A tawng thlamuan thiam in ngaih tha lo tak a lo awm ho te pawh chuan hahdam ta huai in an in hre hlawm a, an meipui chheh chu a sa tha bawk nen, leng hawn hun vel ah chuan sa pawh chu an rep zo ta mai a. A tuk lam a kalchhuak leh tur an nih avangin mu tur chuan buk chhung lam chu pan in, an zal ta diai diai hlawm a.

Zan chu tui tak a mu in a tuk zing khawvar rual chuan tlangval tuaitir lam deuh pathum chu tho in, mau thei chuan ei rawng an bawl zung zung a, a nawlpui an rawn thawh chhuah meuh chuan ei rel an lo peih der tawh mai. Val upa te rawt ang chuan chaw chu fun in, ni alo tlangsan hma a athui thei ang ber thlen hman tum chuan an chhuak ta a. Rawtna fing tak a ni, kawng chho kal a, tlang lawn chhuak tur an ni si a. Lentlang chhip lam pan chan an kal chho ta ngat ngat mai a, tlang chhip chhuah chhoh hma deuh an thlen chuan an ril alo tam in ni alo sang tawh bawk nen, chaw chu an bar zung zung a, an eikham a vaibel te an han zuk zawh hnu chuan tlang chhip lawn chhuah vat tum in an kal leh ta a. Chho zawng a an han kal leh chu Charchhawn veng tlangval Rikhuma fiamthu duh a chhuak leh pek ta.! A hma a kal thirdeng fapa Manga chu a fiam awl lo mai a, "I chaw ei zozai kha khawnge maw a thawh le? I kal te lah hi I sechek kal ang boh boh a, kawngsir a zun tum ni awm tak hian I her tlun reng mai. Han chau chhe na teh, ka paw peih hlek lo che a nia", an tih chuan a hre phak chin zawng chu an nui phuh thawt hlawm a. "Khawnge ka hnung ah kal teh, Rothluai-i pa khuang kaih sual I ang a, I mar ang hnuang a, I dul ang tung lawi bawk sia, kal I ti lai", an ti leh zet zawng, thlan sa phul kai a kawng chho kal e ti lo chuan dul dawm ngawih ngawih leh mittui tla phung chuan an nui hlawm a. A awm viau e, Manga hmel han en chuan a in awm em a tin ni, kar lo ah chuan tlangdung chu an chuangkai ta mai a, thlifim alo tam in an hah te chu a dam sawng sawng mai le.



Thaw te an han lak hah dam hnu chuan kal an han rel leh ta a, tlangdung an chuan chhuah hnu chuan chhuk kal tur a an in ngaih lai in alo ni hauh lo. Tlangdung pakhat chuan khawthlang atang a khawchhak lam hawi zawng a in khawh in lentlang chu a rawn khawh fin alo ni a, chu tlangdung chu nileng a an zawh hnu ah tlangdung tawp chu thim dawn a thleng in riahbuk an sual ta a. Chu hmun a tang chuan khawthlang lam chu a lang chiang hle a, Than tlangdung sei tak in kham ruah thleng chuan a lang chiang em em mai a ni. Fur khawthiang kar ah chuan chhum lei vak a tlem avang in khawthlir a nuam hle, a lang chiang kuk zel mai a ni. Pasaltha Hranghrima'n khua a han chuan vel vel chu a tum loh tak in an piah tlang dung ah chuan meikhu zam raih chu a hmu ta tlat mai, a thiante hnen ah chuan ram vak tur ang a in sawi in, a thil hmuh va chian tur chuan a chhuak ta a. Hmanhmawh tak a kal in a meikhu hmuhna chung tlang chhip a va thlen chuan a rin loh tak in khua a hmu ta tlat mai le, in sawmruk atanga sawm sarih vel khua lek an ni awm e. Mak tak mai in zawlbuk awm reng a hmu tlat lo mai, chu a chhap ah Lal in awm ang lian deuh bik pawh a hmu chuanglo chu mak a ti deuh deuh mai. An rawn hmuh ve a hlauh avang chuan hman hmawh takin a let san ta vang vang a, leng len hun vel ah chuan an buk awmna hmun chu a va thleng leh ta a.

A thil hmuh leh hriat ang te chu val upa leh pasaltha te chu ko khawm in a han hrilh a, mak an ti tlang hle. An mei eng te chu a lan hlau in changel hnah sat in an tun hliah ta khup mai a. He lam hi ramchhuah nan pawh an hman ngailoh avang in tu khua nge ni ang tih pawh an ring thiam lo ani. An val upa chu rawn tawng chhuak in ruahman na a rawn siam a, "Tu khua nge tih hre lo mah ila kan aihnah phahpui khua an nilo tih kan chiang bawk a, kan tum ai in kan hlawhtling hma tur ah ngai ang. Zanin ah khua kan hual a nga, naktuk zing khawvar rual in kan che chhuak dawn nia", a han ti a. Thawm chhuah rin ngam a nih loh avang in an remti tlang tih hriat nan chuan an lu bu nghat nghat in, an hmanrua te chu an en fel ta sap sap a, mut hmasak phawt chu tha ti in, ral veng an in dah hnu ah chuan an mu ta sap sap a. An muttui vanglai tak chuan ral veng chuan a rawn kaitho a, zan lai ar khuan hun awm alo pel der tawh tih hriat tak in zangkhua pawh alo bungbu vu tawh mai. An hriat loh khua chu hual tur in hmun thum ah an in then a, an che chhuak ta sang sang mai le.

Next Episode

No comments:

Post a Comment

Post Bottom Ad