MIZO STORY - AIZAWL CALL GIRL CINDY INPUANNA

~ Esther R Fanai

Red Ribbon Football Tournament-lai a ni a, Durtlang leh eng nge inkhel ka hre chiang ta lo. Semi final a ni tih erawh ka chiang. Lammuala grass phah hlim a ni bawk a, inkhel chuan mipui a hip kher mai. Lammual sir vel chu inkhêl enin mipui an khat vek tawh a, kei chu ka tlai deuh avangin thutna chang lovin ka tei kual ka tei kual a. Durtlang fans ho thutna lamah chuan ka phei zel a, beidawn tawh lamah thutna awl ka hmu hlauh a, ka thu ta nghal chat a. Ka thut atanga rei vak loah chuan ka bula thute thutna awl luah leh chiahin tleirawl pakhat a rawn thu a. An vêngte khêl chu enin a au nasa khawp mai a, kei pawh chu au ve tur leh an vengte tan tur chuan min sawm a, inkhel boruak a tangin fans an hot bawk a, a nuam kher mai. Boruak ri hut hut leh mihring au thawm karah chuan ka bula tleirawl pawh chu a au lauh lauh a. Ani chu hmuhnawm ti takin ka thlir ve thung a, a hmel chu a tha ka tiin ka ngainat tur tak hmel a pu a. 

Thut dun reng takah chuan kan inbe thei tan viau a. Reilote kan thut dun chhung chuan kan innel sawt hle a, kan inen a, kan nui a, hmingte kan in zawt ta zêl a, a hming chu Cindy a ni. Ka hmuh tirh atang chuan ka eng emaw ti tak hian ka awm a, ka sawi thiam chiah lo. Ngainatna satliah mai nilovin thinlung lamah min zem chiai chiai a ni ber mai. Chu chu emni Shakespeare-an, "Vawikhat hmuhna atanga hmangaihna lo piang" a tih kha ni ang le? Pu James Dokhuma'n, "Zawi zawi a thang lian hmangaihna chu hmangaih chiah loh avanga tum luihna leh loh theih loh avanga chher chawp hmangaihna a ni a, hmangaihna a chhiar tlakah ka ngailo, hmangaihna tak tak chu hun hrin nilovin, vawi lehkhatah thankin sain a piang thin", a lo tih kha tun a ka tawn hi a ni mai ang em? Keimah leh keimah pawh chu ka inhrethiam chiah twh bik lo! A zun zam chuan min zem a chiai a ni ber awm e. Inkhel chu kan en dûn ta reng a. A sir lam atang chuan Cindy chu ka melh zeuh thin a, a hmel chu sir lam a tang pawhin a tha kher mai! 

Inkhel a zo a, Durtlang an chak ta. Cindy chu thlahlel ru viau mah ila kan awm chhan ber inkhel a zo tawh si a, zah theih loh chhuahin a phone no. ka dil ta ngawt a, min lo pe phal ve mai a, ka no.pawh a la ve nghal bawk a. An veng ten khuang nên min lo chim a, Durtlang hla an sa dual dual a, a thian dang ten min lo chim bawk nen kan inbe thei ta lo a, a tlai deuh tawh tho avangin ka kalsan ta a. Lammual ka chhuahsan atang chuan ka thinlung chu a ruak huai a, ruak vek e ti lo chuan ka thinlungah chuan a cham tlat lawi si.

In ka thlen chuan sms ka thawn a, min lo reply ve nghal mai a, kan inbe chho ta zel a. Duhawm ka tih zia leh a bula awm nuam ka tih thu ka sawite chu ka rilru tak tak ka sawi a ni. Theih nise alaka ka rilru put hmang chu bun ruah nghal vek mai ka duh a, mahse, zahna chuan min la phuar hram hram rih a ni. Final ni a en leh turin kan intiam dun a. Kan intiam ang ngei chuan final ni chuan phur takin Lammual chu ka pan a. Inkhel en lam ai mah chuan a hmel hmuh leh chakna chuan chuan min hip nasa zawk fe mai! Ka va thlen chuan ani chu a lo lut tawh a, ruah a sur deuh fep fep a. Mipui lah chu an lo thu khat hmur tawh a. A awmna ka hriat mai lo avangin ka call a, Lammual lah hi mupui tam ni chuan network a chiang lo thei em em mai bawk si nen kan inbe pawp thei lawk lo a, kan inbiak pawh theih hnu chuan lammual chhim chhak lam gallery-ah kan thu a ti a, mahse, chuti zozai mipui zingah chuan zawn chhuah chi rual a ni si lo. 

A tawpah gate bulah ka awm ang a, lo kal mai rawh ka ti a. Ani chu mipui tam tak karah a lo inzep chhuak a, mipui khati zat kara keimah vanga a lo chhuak khan min ngaih pawimawh zia a va ti lang chiang em! Inkhel chu kan en dûn ta a, ruah a sur tawh lo nain chhum a zing mup mup a, inkhel en pawh a harsa hle mai. Mual chhak tlang sanga sipai ho quarter sakna bulah chuan kan thu dun a. Khua a vawh avangin ka pawm chial a, kan ti ti dun melh melh a, mahse, hmangaih thu erawh kan sawi chhuak mai rih lo ve ve a. Chhum zing avang chuan inkhel pawh chu kan en mumal thei ta lo va. A tawpah chuan Durtlang an champion zo ta lo tih chu kan hre ve a. Inkhel a tawp vangin kan hun pawh pawh thenin a awm leh ta a. Ui takin kan inmangtha leh ta rih a. 

Cindy nen chuan kan inhmu thei ta ngai lo va, call leh sms erawh chuan kan inbe zui reng a. Ka ngai theiin ka thinlung a luahkhat takzet thin. Vawikhat chu ka thianpate lnah in hmu turin kan intiam a, a lo kal ngei a, chumi ni a ka hmu chu ka hmu hmeltha zual sawt mai! Hlim takin kan inkawm a, ka hmuh tirh atanga ka rilru a luah tak dan zawng zawng chu ka sawi chhuak ta vek a, ani pawh chuan min lo hnar bik lo a. 'Min hmangaih ve thei ang em?' Ka tih chuan a nui seih a, "um" a ti a. Mahse, a hmel chu a inthlak thut a, thil hriat chhuah leh hlauhthawn nei thut ang mai hian. "Min hmangaih duh suh, i na mai mai ang" a ti a. 'Eng ang pawhin awm la ka hmangaih tho ang che' ka ti a. "A theih loh, min hre chiang lo a nih kha, i tan ka tling lo a, nang ang tan chuan ka tling mawlh lo a ni. Intheihnghilh tum zawk ang" a ti a. Bul tan puiah ka sawm chauh a ni a, chu a thusawi chuan min tihamhaih kher mai. 'Cindy, eng nge i tlin lohna chhan? Engkim min hrilh la, ka hriat vek hnuah thu tlukna ka siam ang' ka ti a.

Chuta a thusawi atang chuan a dinhmun chu ka hriat phah ta a ni. Cyndy chu fahrah a ni a, a nu chuan pasal pathum lai a nei tawh a. Shillong-ah a pûte hnenah a awm thin a, kum 13 a nihin Durtlanga a pûte hnenah tho a awm chho a. Chu hmuna awm ve a putea hnen atang chuan a ni vanduaina leh a hringnun rahbi a lo hman khawloh tak ni! Ti hian a chanchin min hrilh a- "Nikhat chu ka pi leh ka pute an chhuak vek a. Kei chu ka dam that loh avangin sikul ka kal thei lo va. Ka room-ah ka mut reng lai chuan ka putea a lo kal a. Ka putea chuan duat pawh min duat ve hle thin a. Damdawi min eitirin ka biangah te chuan min chul a, nidang ang lo takin min chul ta thuak thuak a, ka taksa bakah ka hnute thleng chuan khawih a tum ta a. Kei lah chu kum 13 chiah ka la ni a, nulat tlangval lam ka la ngaihtuah lo a, ka hnute pawh a um tan chiah a ni si a. Min chul dán chu a danglam ém avang chuan ka hlau lutuk chu ka khur ru der der a, thawh san ka tum lai chuan min pawm bet a, min bawh bet a, au ka tum lahin ka kaah a hup tlat si a. ka au chhuah chuan thahah min vo zui bawk a, theihtawpin tang mah ila ka hneh ta ngang lo va, a duhtawkin min sawisa ta a ni. A duhtawk angah hnu chuan min vo a, ka sawichhuah chuan ka tân a pawi tur thu a sawi chiam a. Lung chhe em emin ka tap hlawp hlawp a, ka thil tawn chu rapthlak ka ti a, ka hrethiam thei lo a ni.

Ka pi te lo haw lai chuan ka thla a muang huai a, mahse, engkim a tlai zo tawh si. Ka pite bulah chuan sawi mai ka duh a, mahse, putean a hriat leh chuan min thah duh mai ka hlau si a, ka sawi ngam ta lo a ni. Ka sawi chhuah tak loh avang chuan ka putea chuan min zuam ta sawt a, kei lahin sawi chhuah leh hnuhnawh chu chi tawhin ka hre si lo va, hun remchang a piangah chuan min voin min mutpui thin a, engmah sawi ngam lovin ka tuar ta tlawk tlawk mai a ni. A chang chuan ka Rilru na tih reh na'n damdawi(liquid) tih ka ching chho tan a. Kum ka tlin hmaa tihchhiat ka nihna chuan min nghawng nasa em em a, mipa mamawhna ka nei nasa a, mahse, tun thlengin ka la inveng thei hram hram a ni" tiin. Tin, a putea chu kum khat hnuah naupangtein a thi ta tih a sawi bawk a.

Cindy hmel chu ka han en a, a mittui kara a mit meng tle siar siar te chuan a hmelthat zia a ti zual a, Ka khawngaih takzet a ni. A thu sawi zawh chuan ka awm nghengin a tap hawm hawm a. "I tan ka tling tawh lo a ni" a ti a. Ka kuah a, a hmaiah chuan ka han ena a thinlung hliam karah chuan chhanchhuah ngai hmel ka hmu a, tanpui turin min au niin ka hria, ka lainat takzet a ni. A vanduaina chu ka hriatpui a, ka khawngaìh a, ka hmangaih bawk a. Engtin pawh lo awm tawh mahse ka hmangaih zel dawn a, a hringnun kawng laìhlawn chu ka dawh pui ang a, a ke pen tinte chu ka chhawm hnek hnek zel mai dawn a ni. Ka tan chuan a la thianghlim a, engmahin a la ti bawrhbang reng reng lo. Kan haw dawn chuan a hmui thianghlim takah chuan ka fawp a, rinawm tura intiam chungin kan inthen ta rih a.

Kan inhmuh atanga thlakhat vel zet chu thingtlang lamah hna thil vangin ka pa ai ka kal a, phone signal a that loh avangin signal thatna lai pan zel a ngai a, kan inbe thei ta meuh lo a. Zan khat chu zan dar 11 velah ka thianpa (kan inhmuhna ln neitupa) chuan min lo phone nawlh a, "Cindy kha zân dar sawm velah khan M.C kawtah a thiante nen kan hmu" a lo ti a. Chu thu ka hriat chuan ka lungphu chu a phu dup dup a, eng nge zan rei lamah te chutah an tih ang le? Ka rilruah chuan ngaihthat lohna tam tak a lo lût zut zut a. Thil ni lo lo thlengin ka suangtuahna chuan a dap nghal a, mahse, chu zawng, thleng tak tak tur chuan ka phal lawi si lo. A ni thei lovang, ka hmangaih Cindy te chu mi thianghlim a ni si tiin ka phun chhuak mawlh mawlh a. Cindy chu phone ka tum thin a, a tlang thei ngai lo. A tukah te, tuk lehah te, ka hman hun hunah signal thatnaah chuan amah phone tumin ka kal tluk tluk a, mahse, swich off a inti reng mai si. Ka rilru a hah tak zet a, ka ngaìhtuahna peng tinte chuan a mah hlir an ngaihtuah a, eng vanga swich off tlat nge a nih ang le? A n0.a thlak a nih chuan min lo hrilh ve awm ngei si a ka ti rilru neuh neuh a. Ngaihtuahna bak engmah ka ti thei chuang si lo, rilru ahah duh kher mai. . Rilru pangkhing taka ka awm lai chuan thingtlang hmun atang chuan ka haw a hun ve leh ta reng mai. Ka haw tur chu ka phur hle a, ka Cindy-i, zawlkhawpui mawitu leh ka nun chhungril khuavang lasi chu hmuh hlan ka nghakhlel tawh takzet a ni. Aizawl ka thlen leh hnu pawh chuan phone ka tum thin a, a phone theih si loh. An ln awmna lah ka hre der si lo va ka buai ru kher mai. Bazar leh khawpui chhunga ka kal chuan ka hmuh mial takin tiin ka zawng ru reng thin a, hmuh fuh lah a har ém em mai si, ka beidawng ta hle mai a.

Nikhat chu amah zawk chuan a n0. pangngai atang bawk chuan min lo text leh nawlh mai a, ka phu chiang teh a sin aw! Phur takin ka phone vat a, 'Cindy, i va reh em em ve, ka ngai lutuk che a sin' ka ti nghal tawp a, sawi tur ber pawh ka hre lo, ka hamhaih zo a ni ber mai. Cindy chuan, "Buaina eng emaw ka nei a, phone a sawi dawn chuan a thui dawn lutuk a, inhmu ila kan inhmuh hunah ka hrilh vek ang che" a ti a. Ka thianpa chu ka phone vat a, a ln chu inhmuh nan a rem leh rem loh ka zawt a, a lo remti mial a. Cindy chu ka phone leh a, ka thianpa lna inhmu tur chuan ka hrilh a. Hun reitak ka hmuh tawh loh hnua Cindy ka hmu leh tur chu ka phur kher mai, a lo thlen hmain ka thianpa lnah chuan ka chhuk a, ka thlen hnu rei vak lovah a lo thleng thla ve nghal a. A hmêl chu tlêmin a lang hriam hlek a, zan lama a mut tlem deuh vang anih ka ring mai a, achhan ka zawt duh hran lo. Mahse, a hmel thatna chu a la pawlh dal pha lo chiang teh emaw.

A lo thlen hnu rei vak loah chuan ka thianpa chuan min chhuah san ta a. A chhuak chiah vawm bei ang thlawrh kan ni mai, inthlahlel takin kan inpawm vawng vawng a.'Ka ngai lutuk che a, ka be chak thei lutuk che a sin' ka ti a. Chu bak chu sawi mai tur ka hre bik lo, ka sawi tum zawng zawng chu a bo zo vek a ni ber mai. Ka kokiah chuan a Khabe a chhuang a, rilru na tih hriat takin a tap feih feih a, eng emaw sawi a tum a, a sawi thei mai lo a, min pawm a, a kut tang chu a phut eih eih a, a thil sawi duh sawm tur chuan chakna a sawm khawm nasa hle mai. A sawi hun nghakin ngawirengin ka chul heuh heuh a. Ti hian a sawi ta a, "Kan inhmuh hnuhnun ber tum khan ka pu in ngaihzawng ka nei tih a lo hria a. Ngaihzawng neih hi an phal lo hrim hrim a, ka pu chuan bansan nghal tur chein min ti a, keichuan ka bansan dawn loh thu ka hrilh a, a thinrim lutuk chuan min vua a, min sawisa a, ln atang chuan min hnawt chhuak ta a ni. Thian ka kawm tam loh avângin kalna mai tur hre lovin ka chhuak tawp a, chutih lai chuan treasury-a ka thiannu chu pan mai thain ka hre ta a. Ka thiannu chu sikul ka kal laia ka kawm ve thin a ni a, a nu leh pa an inthen ve tawh tho a, a nu nen an khawsa a, an rethei ve hle thin. Chhungkaw mumal lo atanga seilian a nih avangin sual lam a dai hma a, tunah hian a pasal nen treasury-ah in an luah a, proxivon leh parvon-te an zuar thin a. Mahse, chu bâk chu belh tur ka hre si lo a, an lnah chuan ka awm ve tawp mai a ni. 

Chutia ka awm takah chuan ei hek tur ringawt a awm chu ka inthlahrung em em a, an lnah lah chuan ruihhlo ngai bawraw tak tak an awm reng thin a, hrehawm ka ti thei khawp mai. Pawisa hman chawp tur takngial pawh ka nei si lo va ka phone ka hralh ta ringawt a. Mahse, ka thiannu pasal chuan min dil zel si avangin pawisa pawh ka nei lo thuai a. Zan khat chu ka thiannu chuan hetia lna awm reng chu a fel lo, ka hnathawhnaah min lo pui rawh a ti a, ka zui ve ta ringawt a. Taxi-ah min luhpui a, damdawi kan sem kual ta a. Chumi hnuah mipa pakhat nen an in-phone mawlh mawlh a, an inbiak zawh chuan ka bulah lo kalin, 'Cindy, sum eng mah thawk chhuak si lo, chhungte belh tur nei si loa awm reng chu a tha lo. I hmel tha a, i duhawm bawk a, mipa it zawng tak i ni a, i taksa hmang hian sum hailuh tum mairawh, a hahdam ber a, a hlawk ber bawk ang' a ti a. Ka inngaihtuah nasa teh a sin. Ka rilruin a la ngaìhtuah chhin Ngai loh, sumdawnna tenawm taka ka ngaih thin kha keimah ngeiin ti ve tur a ka inchan chuan ka mur chum chum mai a, ka tiril thlengin a khur hial thei nia! Mahse, duhthlan tur kawng dang ka tân a awm si lo. Ka thiante ei hek ringawt lah a theih reng dawn si lo. 

Tichuan, loh theih lohna avangin chumi zan chuan ka thiannuin a phone pa nen chuan kan mu dûn ta a ni. Chumi zan atang chuan zan tin min lo phone a min lo beiseitu an awm reng a, keipawh chuan ka hnar thei ta bik reng lo a, than thi ka neih hmaa ka putea min tih chhiatna khan effect a lo nei nasa hle a lo ni ang insum harsa ka ti ta hle a. Sex ka hman pui dawn apiangin zu ka in ta bawk a, a tir ai kha chuan hrehawm tihna ka nei tlem tial tial a. Mahse, ka rilru chhungril chu a inthiam thei lo a, ka ngaihtuah che apiangin ka rilru a na ngawih ngawih thin. Ka chanchin hi zep duh ni i la engmah hre lovin i awm ang a, ka bum thei lutuk ang che. Mahse, ka bum ngam lo che a ni. Tunah chuan i tân chuan mi tenawm ka ni tawh a, tal chhuahna kawng lah a ping vek si, min kal san tawh zawk mai rawh" a ti a. Chuti ang thu a sawi lai chuan ka rilru a na ngawih ngawih a, tenna aiin khawngaihnain ka khat a, huatna aiin ka hmangaihna chu a sang zawk a. Ka khawngaih takzet a ni.

A hmêl chu ka han en thin a, thil sual ti tu hmel nilovin sualna reng reng nei lo ang maiin ka hmu a. Tenawma a inhriatna te chu a thianghlim zia ti fiahtu a ni a, a tenawmna chu ka hmangaihna chuan a en khûm vek a, a thianghlimna chiah a ni ka hmuh ni. 'Cindy, vânduaina hi i pumbilh vek thei lovang, ka phal lo, ka hmangaihna hian a la la chhuak ang che. Ka hmangaìh tawh che a, ka kalsan dawn lo che. Bul ka tanpui che a, a tawp ka thlenpui tur che a ni, mahse, tunah mai chuan ka la nei thei dawn si lo che a, rinawm takin i lo awm thei ang em? Tuna i tih ang hi ti tawh lo turin ka duh che a ni, chu chu i thei ang em?' Ka ti a. "Ka thei ngei ang, min hmangaihna hian chakna min pe ngei ang" a ti a. A khabeah dawmin a hmui no takah chuan ka fawh sak ta vawng vawng a. 

Kan haw hnu chuan ka rilruah Cindy chu a awm reng mai a. A thu min hrilhte kha midang chanchin ni lovin ama chanchin ngei a ni si a maw! Ka mumang ni zawk se ka va ti ém. 'Cindy, ka hmangaih tawh che a, ka hmangaih reng ang che. Tui tla chhan ngai em em mahni a in hai chhuak thei tawh lo, chhantu hmu si lovin maw i awm, keiman chu tui atang chuan ka la chhuak che ang a, chawlhna vaukam ka thlen pui ngei ang che' ka ti rilru vawng vawng a.

Ka lainat takzet a ni. .

Hei hi hmangaihna a ni. Hmangaihna leh indonaah chuan duh hun hun a tawp san theih a ni lo. Cindy chu hmeichhiaah pawh tawmkailo ber mai, mi tenawm a ni. Ani ka hmangaih tlat hi nang pawhin min demin nêp min ti viau maithei. Mahse nula tam tam zinga ka hmangaih a ni miau si a. Ka dinhmun thlir chuan kohhran upa fa ka ni a, chhungkaw puitling tak atanga seilian ka ni a, chutah fa tlum ber ka ni bawk si. Cindy chu eng ang paw'n hmangaih i la ka nei thei dawn em ni? Ka chhungten hria se engtin nge min ngaih ang. Min pawmpui dawn lo tih ka hrechiang, min tuithlar duh hial ngei ang.

Cindy chu ka hmu reng thei lo va, biak pawh a har telh telh bawk a. Zan khat chu min lo phone nawlh a. A awmnaa a thiante chu an véng Y.M.A in an hnawt chhuak a, chuvang chuan a thian dangte lnah a riak kual a, mahse, rei fin theih a ni si lo a, hmun li laiah a lo riak kual tawh a lo ni a. A inthlahrun vangin zan lamah riah na'n a hmang a, chhun lamah chuan Thingpuidawrah te a in hnawh puar thin a lo ni. Chumi zân chuan ruah a sûr nasa hle a, thli a thaw vûk vûk a, tek a tla deuh reng bawk a. Cindy chu a riah tumna a thiante an awm si lo va, ruah a sur nasat bawk vangin tih ngaihna a hre lo va min lo phone tawp a lo ni a. Ka mitthlaah chuan Cindy chu khawilai kawtthlerah emaw ruahsur hnuaiah vawt tiin khur beuh beuh chunga tawm hulna a zawng vel tur chu ka hmu a, ka lainat takzet a ni. Ka chhungte pawh zah zo lovin hetah rawn riak mai rawh ka ti ringawt a, a kal dan tûr zawng zawng ka hrilh hnu chuan Taxi lo la la, ka lo châng ang che, a fair ka lo pe nghal ang ka ti a. Kan inbiak zawh chuan ka chhungte chu ka hrilh a, sawi dan thiam a har khawp mai, mahse, a hunin a zir miau si lo va, dawt sawiin ka thiannu a nih thu leh a chanchin tlangpui chu ka hrilh zung zung a. Ka chhungte lah chuan an lo khawngaih nasa mai a. A chanchin kimchang hrilh i la chu an khawngaih kherin ka ring lo. 

A lo thlen chuan a huh hliam a, ka khawngaih khawp mai. Amah chu a inthlahrung dék a, lnah pawh chuan a lût ngam mai lo va kan innawr lut chawp chawt chawt a. Chumi zan chuan kan mikhual room-ah chuan kan muttir a. A tûk khua a lo vâr a hma takah a tho a, kan lnah chuan awm reng thei a ni bik si lo. Chaw eitir kan tum lahin a duh der si lo a, a chhuak tur chu ka khawngaih ngawt mai. Kan kawt gate tawp thleng ka thlah a. 'Cindy khawi lam nge i pan leh tak ang?' ka ti a. "Ka hre lo" a ti a, a hnuk a ulh teuh a. A mittui chu a hru zeuh zeuh a. Vakvai leh ringawt turin a chhuak leh ta chu a ni si a, ka va lainat tak êm. A kal liam thleng chuan ka thlir zui vawng vawng a. Tih theih eng mah ka nei si lo. Cindy, i va han lainat awm chung chuang tak êm. Khawvelah hian vakvai tur ringawtin em ni i lo pian bik le. Hahdam tak a lu nghahna pawh nei lovin mi kawm kar a himna tur zawn chiah maw i chan tawk lo ni. A va mak em hringnun hi tiraw.

Cyndy chuan kan ln atanga a chhuah hnu kar hnihnaah chuan phone n0.dang atang chuan min lo phone leh nawlh a. "Inluah tûr min lo zawn pui teh, khawi hmun pawh ni se pawi ka ti lo a, ka tan chhe lua a awm lo. Gas leh bungrua zawng zawng pawh ka nei tawh a" a lo ti a. Chumi ni atang chuan theihtawpin ln luah tur chu ka zawn pui ta a, mahse, kum laklawh a nih avangin ln luah tûr a vang duh phian mai. A awm chhun lah a man a tam hlawm avangin a tân tih chi a ni si lo. In luah tur chu ka hmuh pui thei ta tlat lo a. Kan hmuh ve pawhin a chanchin min zawt chiang a, an phal lo zel mak bawk si. Ni e, ani chu fahrah riangvai, mi hmusit leh endawng, tenawma an ngaih a ni tlat si a. Aw. . Thei ni ila cindy chauh lo pawh hêng ang nun tleu tir, la chhanchhuah theih te hi chhan chhuah ka va duh êm, mi fel rual awmkhawm ho zingah an tan hmun a awm ve lovem ni!

In luah tûr ka hmuh pui tak loh atang chuan cindy chu ka hmu ta ngai lo a, min lo phone tawh hek lo. Tui tla chhan ngai tak, ka chhan loh avanga tla pil bo ta a ni si a, ka inthiam thei lo va, mite chuan engahmah an ngailo a ni thei, kei chuan a dinhmun ka siam tha thei a, ka thei si lo. Tunah te hian khawnge a awm ang a, khawiah nge a riah ang? Tu tlangval nge a kawp ang a, eng nge a ruih ang? Nge, Y.M.A leh CADS ten dim lo em emin an vua ang? A duh reng vang leh a thlan bik rêng vang a ni si lo. Cindy, i tân hian ka va tlak tlai lo tak em. Ka bulah chuan hlim viau thin mahla hlimna tluan tling ka pe thei si lo che a tiraw. . Mahse, lungngai suh, ka hmangaih che a, ka bul a awm tawh turin ka lo zawng chhuak dawn che a ni. I nun chu engtin pawh lo hmang mah la a pawi lo, ka chhungte pawn an phal lo a nih pawhin ka hmangaihna che hi tumahin min pawh thensak thei tawh lovang tiin cindy zawng chhuak turin ka rilru ka siam ta sauh sauh a.

A Bul tan na'n Volcom leh hotel hmun thenkhat leh home hmun hrang hrang a mi chu ka en thli thlai ta reng a, mahse, rin aiin zawn hmuh a har hle mai. Lo hmu ta pawh ni teh reng i la ka chhungte chuan neih an phal dawn chuang si lo. Cindy chu ka mitthlaah a châm reng a, khawhar tak a kalna tûr hre lo va a kal hnak hnak tûr te, zân riahna tûr hre lo va khawivêng thlanmual emaw a thlan lung vawt tak ngheng a a mu bal tur te ka ngaìhtuah kai meuh chuan ka lung a awi thei ngang lo a ni. A nih nih ni turin kan chhungkaw zanriah ei lai chuan hreh tak chungin Cindy ka hmangaih thu leh neih ka duh thute ka sawi tlang ta vek a. 

Ka chhungte pawh chuan amah chu an lo hre tawh a, a lo riah tawh vâng khân. A chanchin min zawt zau zêl a, zep then pawh nei miah lovin call girl a nih dân thlengin ka sawi tlang ta a. Chu thu an hriat meuh chuan ka chhungte chuan an phal lo nasa mai. Kan inhau nghal a ni ber mai. An rilru hneh tumin ka theìh tawpin tan ka la a, a duh rêng vanga he kawng hi zawh a nih loh zia ka thiam ang tawkin ka sawi a, ka pa ngaihdân erawh ka sawh sawn pha lo chiang kher mai. 'Chuti ang hmeichhia i lo hruai luh dawn ai chuan lo haw tawh lo mai rawh' min ti tawl mai. Khati ang khawpa kapa thinrim kha ka la hre ngai lo. Mahse, Ka rilru ka siam fel tawp a. 'Ni e' tiin thinrimtak chungin ln chu ka chhuahsan ve ta a. Ka chhuah dawn meuh chuan ka nu te ho chu an mangang leh si a, mahse, ka tum tawh. Cindy, ka hmangaih kiangah ka awm dawn a ni.

Chumi zan chuan Cindy chu ka zawng kual ta a. A awmna awma ka rin Vanapa hall hnuai te, Treasury phei te, M.C kawt te, Bazar leh Zarkawt thlengin ka zawng kual a, hmuhtur a vang kher mai. Ka beidawn tawp lamah Bawngkawnah kawng bul step-ah chuan a thiante nên ka hmu ta hlawl a. Taxi chu ka din tir a, ka pan nghal a. Min lo hmu thut chu a phu chiang kher mai. A hmelah chuan zahna, inthiamlohna leh hmangaihna te chu a inpawlh chiat a. Min pawm thlawp a, a tap ta zawih zawih a. Zu rim a nam hiam a, ruih erawh a rui vak lo. 

'Cindy, min zui la, ka bulah ka hruai tawh ang che, hrehawm tuara i nun i hman reng hi ka phal tawh lo a ni' ka ti a. Ani chuan, "Khawngaihin min kal san tawh zawk mai rawh. Mi tenawm ka nìh hi. I tan tlinna ka nei lo a ni"a ti a, a lung chhe hle mai. 'Cindy, i awm ang ang khân ka tân i tling tawk a sin, i tenawmna ka hmu rêng réng lo, ka tân engtikah mah i tenawm ngai lovang' ka ti a, ka kuah vawng vawng a.

Cindy chuang, "Min hmangaih vâng hian ka va lawm ém. Nang ka lo tawng che hi ka va vannei tak" a ti mial mial a. Taxi-in min nghah reng avângin muangchang thei kan ni si lo. A thiante hnenah chuan thil awmdân a hrilh zung zung a, a thiante chuan lawmpui tih hriat takin an chibai lawp lawp a, "Nang chu hmangaìhtu diktak nên nun tharin i nung tawh dawn si a, i thiante hi min lo hre reng ang che aw" tiin mittui tla chungin an inthlah liam ta hlawm a.

Ka thianpa ina kal pui phawt chu tha zawka ka hriat avangin ka kal pui ta phawt a, chutah chuan kan awm zel dân tûr kan sawi a ngai dawn a ni. Ka thianpa chu ka hrilh sa tawh avangin min lo nghak reng a. Kan thei hnu chuan kan sawi ho ve ngial a, kan awm zêl dan tur chu a buaithlak duh kher mai. Inah lah ka hruai haw ngam dawn dér si lo. Ka thianpa inah lah awm reng chi a ni bawk si lo. Khawpui chhung khawi emaw laiah pawh in luah tehrêng ila ka chhungten an hriat chuan min pawt then tho thovin ka ring si. 

A tawpah chuan ka thianpa chuan an khaw hlui lama awm chu tha berah min ngaih pui ta a. Ankhaw hlui chu mizoram chhim chhak lam, burma ram dep a awm a ni a, Aizawl atang chuan a hla hle a, kan tan pawh a him ber a ring a ni. Zân a rei a, mut zai kan rêl a. Tunah chuan ka hmangaih em em Cindy chu nei tawhin ka kiangah ngei a awm ta tiin ka ngaihtuah neuh neuh a. Cindy chuan min kuah chial a, "Min nei tak tak ang tiraw? Min kal san lo ang tiraw?" tiin min zawt mawlh mawlh a. 'Ka kal san dawn lo che a, eng mahin min then tawh lovang' ka ti a. "Ka va han lawm tak êm, nun tharin ka nung ang a, khawvel tharah ka cheng tawh dawn a ni. Nupui tha tak ka ni ang a, ka phatsan ngai lovang che, ka hmangaih che a, KS te tan pawh hian Pathian hian hmangaihna a siam ve asin" a ti a. Duh takin kan inpawm vawng vawng a. Zan laiah chuan ka thang harh hlawl a, ka bul a cindy mu chu ka han en a, tui tak leh thlamuang takin a muhil siai siai a.

"Aw. . Khuanu pawh hian a va duang mawi tak che êm. Mahse, hmel mawina ringawt hian vanneìhna a keng reng si lo. Hun hrehawm vawi engzat tak pal tlang tawh ang che maw. I tawrhna zo zaite kha tunah chuan a kiang ta, ka dam chhung chuan i vakvai tawh bik lo ang' tiin a biang mam takah chuan ka chûl a, a chalah chuan ka fawp zeuh a, a kiangah chuan ka muhil ve ta siai siai a. . A tûk khua a lo vár a, ka chhungten min lo hmuh mai kan hlauh avángin kan fimkhur kher mai. Kan kalna tur hmun direct-a motor kal a awm loh avângin a kal tawpna thleng tûr sumo ticket kan la a, a tûk a chhuak tûr chuan kan inpuahchah sauh sauh a. A tuk zing khua a lo var chuan Thingtlang hmun, hmelhriat pawh awm lohna leh la kal ngai lohna lam pan chuan kan tlan ta vung vung a. 

Ka lo sei lenna, thenrualte nen hlim tak a kan lên hona, kan in nuam tak leh ka chhungte chu engtikah tak hmu leh ang i maw tiin ka ngaihtuah neuh neuh a. Cindy tan khawvêl thar din turin kan kal ngei a ngai si a. Sumo tlan tawpna kan thlen chuan kan chuan puite chu mahniin leh thlenna tur hmun panin hlimtakin an kal darh sang sang a, keini erawh khual ui hawiin kan hawi vai ruai a, hmel hriat hmuh tur an vang hle mai. Kan vanneih asiamin ka thianpa te khaw lam pan tur Mahindra pickup kan hmu fuh hlauh a, a thil phurh lûk chungah chuan kan chuang ta vâng a, kan tum ram, kan zalenna tur ramah chuan kan lut dawn ta a ni. Khua kan thlen chuan ka thianpa chhungte chuan min lo hmuak a. A lo phone lawk vek tawh a lo ni a. Ka thianpa hi chu thian nih a tling teh e, ka mangan ber lai pawhin min thlahthlam lo a, kulh nghet tak angin ka hmaah chuan a ding reng si a, ka va lawm tak em. Ka thianpa chhungte chuan hlim takin min lo dawngsawng a, an inah chuan min chentir a, an fel bawk si, a inthlahrunawm lehling zawk a ni. . Cindy mawlh mai chu ka ngaìhtuah a, thingtlang a awm chu hrehawm a ti ang tih ka hlau a ni. Mahse, a teuh lo mak! ka tluk lo nasa mai a, hmeichhia te hi an dinhmun azir zelin mipa aiin an lo puitling daih zawk a lo ni. 

Thingtlang nun chu nuam a ti êm em a. Tui a chawi a, thing a phur a, zopa thukin eirawng a bawl a, hrehawm tih hmel chu sawi loh a hlim em em a, a nui reng mai a ni. Kan awmna khua chu a nuam ngei mai. A hmun a nuamin thlifim a thaw heuh heuh a, khawpui tawt leh tawp tak, ri bengchheng leh motor horn leh break chik tuarh tuarh kara awm ai chuan a nuam daih zawk. Thingtlang mite chu an nun a thianghlim em em a, mak ka ti zawk hial a ni. Khawpui nun duhamna leh itsikna tinreng kara awm ai chuan tlawmngaìhna leh induhsakna tinreng awmna hmuna awm chu nuam tak a ni nuam tak.

Kan awm atanga rei vak loah chuan an khaw private high school-ah chuan hna ka hmu ve hlauh mai a. Chutih rualin Cindy pawh tet te atanga phai lama awm thang a nih avangin english a thiam hle a, an khaw english medium tharah chuan hna a hmu ve bawk a, kan hlimdun teh a sin. Pawisa tlem azawng kan thawk chhuak ve ta bawk a, kan indang ve ta a. Kan ln luahna hmun chu veng tawp tlang rai nuam tak mai, phulin a bawh vekna hmun a ni a. A piah tlangte tawp lam chu a nuam êm em a, hmuifang leh thei chi hrang hrang a rah tuarh thin. Sunday tlai a nula leh tlangval lenna hmun ber a ni bawk a. Kan in bulah chuan huan te kan siam a, zing leh tlai hunawl apiangah kan thlo dûn rek rek a, kan hlim thei teh a sin. Kan in hual chuan pangpar chi hrang hrang kan phun a, Cindy chuan duat takin a enkawl a, tui a pe reng mai thin a, a nun a ti hlim hle a ni. Ni e, chu lai hmunah chuan mi tenawm ber k.s a nihna te chu kan theihnghilh a, kan hnuchhawn tawh a, khawvêl thar kan siam a ni. Hrehawmna tinreng a hmachhawn tawh a, chulai hmuna hlimna leh zalenna a chhar chu kan tán chuan lawm loh rual a ni lo. A nun chu a hlim takzet a, a thinlung takin a hlim a,a nui a, a taksa pawh khawpuia a awm lai aíin a nalhin a hmeltha zawk a ni. 

Kan awmna chu a tlang san deuh avangin thlifim a tam a, boruak a dai raih reng a, sava hram chitin hriat tur a awm bawk a. Nula leh tlangval lenna ber a nih avang chuan sunday tlai lamah hi chuan min kawm turin an lo kal a, kan in chu kan khat deuh reng a, thian thar pawh kan neih belh reng a, an fel hlawm em em a ni. 

Zing leh tlai leh kan hunawl neihah chuan huan enkawl bakah thingte kan phur dun a. Thiante ho nen luiahte kalin chakai leh kaikuangte kan man a, a la tam avangin kan hawn teuh thin a, Cindy mawlh chuan nuam a ti thin mai, a hlim takzet a ni. Cindy chuan nau thla hnih mi a pai tawh a, chu chuan a ti hlim zual a. A pum chu ka zut sak a, naute chu ka be mawlh mawh a, anu anga hmeltha leh duhawma lo piang turin ka be mawlh mawlh a, a pumah chuan ka fawp zauh a. Chutih hunah zet chuan a hnuk a ulh a, a mittui parawl kiang chungin a nui leh seih seih thin a, kan va hlim dun si em!

Kei aiin sikul a bang hma a, ka haw lam chu kan kawtah chuan min lo hmuak a, min thlahlel takin ka kokiah min kuahin min fawp a, kan inkai lut a, ka thawmhnaw a phelh a, ka inthlakna tur a lo dah fel sa diam a. Ka inthlak zawhah a thingpui lum chu kan in dûn a, chumi hnuin huanah hna kan thawk dun thin. Chu chu kan nitin nundân a ni. Kan inhau ngailo a, a ni chuan nu nih a tlin em em a, ka hlimna tur hlir a ngaihtuah a ni ber mai.

Kan kawta pangpar te chu an lo par tan a, an vul chuk a, kan thlir ning thei mawlh lo, kan zalenna ramah chuan chung pangparte chuan min tihlim zual a ni. Cindy chuan tui a pe peih em em a, a pangpar vulmawi tak kiangah chuan a hmelthatna te chu a va mawi zual tak ém! Pangparte pawh chu a zar a mawi ve ang chauh an ni si a.

Kan inteah chuan kan hlim dun a, khaw mite pawh chuan kan nupa nun chu an awt a, min fak a, thenrual tha pawh kan ngah phah sawt a. Heti tak mai a k.s ve mai mai kha mi nun tha lutuka a lo awm thei hi mak ti suh. Khawvel inher hian mahni duhloh thleng thlengin min hruai thei a, mahni nungchang lo tawpin min awmtir thei a sin.

Kan huan a maian te chu a lo thar a, fanghma leh vaimim te chu a lo thar ve ta. Kan hlimna min va pe nasa êm. Mahni thawh rah ngei han hmuh a han ei chu a tui dan a lo danglam teh a sin.

Furpui kan hmang zo a, favang thli a lo thaw tawh a. Thing hnah a chawrno hlep hlep a, Sava no an lo lian tawh a, an hram chiah chiah a. Favang thereng te chu kan in bul tlang phul hmuna khiang thing tuai tawi nalhtak kungah te chuan an tana hun duhawm lo thleng chu awiin an hram chiah chiah a. Chu hun; hringfate tana hun duhawm leh boruak nuam ber mai thingtlang hmun a kan tem ve ta chu a lo nuam ngei mai.

Zan lamah chuan cindy chuan a sikul naupang mize hran hran chu min hrilh thin a. Chung naupang ho chu a hmangaih a, an bula chen chu nuam a ti em em thin. Amah anga fahrah a hmuh phei chuan a khawngaih zual a, tanpui theih dan a ngaihtuah tlat a, a chang chuan chaw-eiah te a lo sawm ho fo thin a ni.

Thlasik a lo thaw a, kan awmna lai chu thli a tam vangin a vawt duh fú mai. Kan in bul vela Tlangsam leh Japan-hlo te chu Lal piancham lawm turin an kuhmum tan a, Tlaizawng te pawh an lo kuhmum tan bawk a. Kan in bula pangpar thenkhat chu an par tawh lo a, thlasik pangpar erawhin par an lo chhuang tan a, an mawi kher mai. Cindy pawh a nau pai a hrâm tawh hle a, thla a ral leh meuh chuan nau a hrin a hun tawh ang. A naupai a fual deuh avangin kan khua a nau lama an mithiam neih chuan a en sak fo a, a sawi danin mipa a nih ngei a ring nghe nghe a. Nau neih hun tur mawlh chu kan nghakhlel tawh a, kan khaw thenawmah chuan naupuan turte ka lei khawl sauh sauh a, thenrual thate chuan an naupuan hlui la tha tak takte chu min lo pe bawk a. Zo Artui angai an ti a, zo artui chu phur takin ka zawng sauh sauh a. Kan fâ lo pian hun chu ka nghakhlel a, ka phur turh turh lutuk a ka nui reng mai a ni. Cindy chuan sikul a kal tawh lo a, in lamah chuan hahdam tura ka duh avangin sikul a kal pawh ka remti tawh lo a. Kei erawh chawl ve ngawt thei ka nih loh avangin ka kal chhunzawm reng a. Sikulah te chuan ka hlim lutuk chu ka thiante ho chuan min fiam reng mai thin. Ina ka haw chuan a tihdan ngai tein Cindy chuan lawm em emin kawtah min lo hmuak a, min kuah a, ln chhunga kan luh chuan a khawhar thu leh min ngaih thu a sawi siam siam a, min thlahlel takin ka bulah chuan a thu a, min kalsan hlei thei thin lo.

Thla a ral a, keini pawh kan exam zo tawh a. Result kan tih chhuah ni chuan Cindy pawh chuan nau a vei ve chiah a. Kei lah chhuah ngei ka ngai si-a ka thianpa chhungte leh thenrual tha ten an lo awmpui a. Damdawiin a awm loh avangin khawtuala nau chhar thiam chuan min chhar sak dawn a ni. Rilru pelhe tak chung chuan in chu ka chhuahsan a, ka haw leh hunah chuan ka ril a rah fa duhawm tak ka nei ngei dawn a ni. Ka hlim ngei mai. Result kan puang zo a, office kan khar that lai chuan tlangval pakhat hmanhmawh takin a lo tlan a, Cindy that loh thu min hrilh a, hmanhmawh takin in lam ka pan ta nghal a. In ka va thlen chuan Cindy chu mangang em emin a lo phar a, a thlan chuan a bual huh vek a, naute chuan a hlam a lo ei a lo ni a, a boral ta nghal a. Cindy pawh chuan a nau hrin tuar lovin a lei taksa chu a thlah liam ta. A thih dawn chuan 'ka hmangaih che' a ti sep a, a zal ta rawih rawih a. Chhan theih a ni ta lo a ni.

A va mak êm! Engtinnge ka awm ka hre lo. Ka lo thidang a lo ni. Ka harh leh chuan Cindy chu ka kuah a, ka pawm a, ka fawp vawng vawng a. Ka au a, ka ko lawm lawm a, min chhang tur reng a awm tawh lo. Chatuan ramah min kalsan tawh a ni. Ni e, he khawvel a keimah chiaha min hnutchhiahin a kal ta a ni. 

Kan in chu a ruak huai a, ka thinlung pawh a ruak a ni. Thlasik khaw nuam tak te chuan mawina a keng tawh lo a, thlasik pangpar lah a mawi tawh hek lo. Kan kawt pangpar te chu a chul thiap a, ka office bâng tunge min lo lawm leh ta ang? Cindyin nui hawr hawr chung a min lo kuahna hmunah te chuan tunge min lo kuah ta ang? A ni thei lo, cindy, engkim huamin khawvel thar kan din dun a, dam chhung a inthen tawh lo turin kan intiam dun a ni lawm ni? I tello chuan kan inte, kan hlimna run hi ka bêl ngam tawh lo ang, i tello chuan khawnge hlimna kha a awm tak ang? Aw. . Cindy. .a pawi a ni. I hlimthla ka hmu anga atak erawh hmuh tur a awm tawh dawn si lo. I aw ri hriat tumin ka beng ka chhi ang a, i nui ri thlahlelin ka zawng vel ruai che ang a, Mahse, engkim hi atak ka tawng tawh dawn si lo.