HMANGAIHNA AVANGA TUALTHANA RAPTHLAK - PART 1 - 4 - TIMES OF MIZORAM

Breaking

Home Top Ad

Post Top Ad

HMANGAIHNA AVANGA TUALTHANA RAPTHLAK - PART 1 - 4

HMANGAIHNA AVANGA TUALTHANA RAPTHLAK

Ziaktu-Hlimpuia

Episode 1

(Ziakmi ka nilo tih inhre chung leh mahni insit em em chungin, tihian ka han thaikawi ve ang e)
Kunga te khua chu khaw nuam ve pangngai tak, in zanga khua a ni a, an lal fing tak leh zahngai thei tak, a khaw mipui te chunga rorel thiam mai avang chuan chu khua chu a nuamin sa leh ral lakah pawh an thlamuang em em thin a, buh leh balah pawh an intodelh angreng phian bawk a, an khaw tlangval te tan lah an pasalțha Lalnâwta chu thlamuanpui tlak khawp a pasaltha chak leh huaisen, ral rel thiam ani bawk vei nen, khaw thenawm te nen tukchhiat tawk thutin inrun ngai pawh nisela tu khua mah hi han huphurh an nei lem awm love.

TUALTHANA RAPTHLAK

Chu in zanga khua ah chuan a pa in a boral san tâk Kunga pawh chu a nu in harsa takin a hmeithai pui ve a, kawl a nichhuak chhiarin khuantevîk ah feh chhuakin leilung lan chhung zawng chu hna a thawk a, a hah thei hle mai thin. chuvang a niang Nu la valai tak mah nise a hmel en mai chuan 'uaithla lam ani e' tih mai tura mawi ani. A fapa Kunga lah naupang chhia mai ala ni si, chutia hah thikûl a a thawh avang chuan buh hawp khawp hi chu an thar ve mai zel a, anni nufa tan chuan ei tham fe a ni ve zel tho mai.

Kum te alo vei a, thing delh loh lung delh loh nafam chu Kunga pawh alo tlangval ve dawn ta reng mai, hmeithai fa tih takah rualkawm tam ngam talo chu a naupan tet atanga a kawm ngeih em em leh a thian tha bera a ngaih Fela nen chuan ram lamah thang te kamin an an panlai nun chu an hmang chho ve a, naupang mai mah nise varung leh vahrit te, ramar te chu an ak haw nitin ve thin a, an chantawk ah an hlim ve em em tho mai. Kunga chu karlo ah rawlthar dinhmun ah lo ding chho in a âwrâwl pawh alo danglam ve țan a, a taksa a inphut mawi in rawlthar pianthiam tak alo ni chho ve reng mai. A malpui phiar ohek tlat mai leh a banbul han en reng reng chuan a chak tawkin thahrui a nei ani tih a chiang reng mai a, a hmaifang han en chuan khawnbawl fapa emaw tih mai tura mawi ani bawk, a mitmeng fiah felfai tak chuan a huaisen zia a tilang a, a nghawng han invuah vel te hrim hrim chu a dik thlarh mai a, mi naran tan chuan cho sual awl tak tur ani.





Episode 2

Chutiang mi a nih avang chuan an awmna veng kilkhawr deuh mahse an khaw mite en bik leh enthlak ruk ani reng a, an lal upa min fanu zampuii chuan a ruk tak hian alo ngaizawng ru ve em em mai bawk a, an dinhmun inthlau lutuk avang chuan engmah a sawiin a tilang ngam lo a, a hmeichhia zawk tan phei chuan thil tih chi a nilo bur tih lah a hai bik silo, tuk khat chu tukțhuan eikham ah zampuii chu a thiannu in thingphurh puiah a rawn sawm a, Zampuii pawh chuan lo hnial lemlo chuan an inzui chhuak ta a, an thing phurh tur an fawm ngah ta bawk a țhu chawl paha an titi melh melh lai chuan zampuii thiannu chuan kunga chanchin a sawichhuak ta phawng mai a, Zampuii chu mumang ram atanga harh zawk ang mai hian alo meng phawk hra mai, nula fing tih takah reilote ah a insiam tha leh nghal thuai a, a thiannu chuan 'veng mawng lama hmeithai fapa kunga khu tlangval hmeltha leh huaisen tak ala ni ngei ang, kan khaw tana pasaltha ala nih ngei ka ring ani' ti a a sawilai te chuan a ngaihtuahna chhungril tak atang chuan suangtuahna khawvel ah a cheng ani tih hairual a nilo a, rei fe an chawlh hnu chuan in lam pan zai an rel ta a.

Kum alo vei leh meuh chuan kunga pawh tlangval tak tak tih theih alo ni ve ta. An lal upa min fanu zampuii nen chuan inkawm ngeihin an inlâwm ta hial a, chutiang a nih avang chuan an hriatloh karin an inkar ah chuan nula tlangval in hmangaihna thianghlim tak chuan an thinlung ah bu alo khuar thuk tawh hle hi alo ni a, Zampuii chu khawnbawl fanu tih takah nula lian lampang, a bahsam ngil leh dum hlap mai chu a inhmeh hle a, a sam bu a tha bawk a, a mitmeng fim kar mai leh a hnar ngul invuah fuh tak mai leh a heh sen vam ham mai te chuan tlangval ho mit ala hle thin a, an upa min fanu meuh chu tu tlangval mahin cho en ah en ngam heklo. An uipui tuilian thlir hi ani ngawt zel mai lah taka. A hmekthat mai piahlam ah a nungchang a mawiin hmeithai leh harsa zual deuh te chungah hian a ngilnei em em leh zel a, hei vang hian mi ngainat leh duhsak a hlawh em em a, a tute mai pawh hian an ngaina emaw tih tur ani.

Kunga leh zamtei inlawm chu an hlim thei hle mai a, tudang ngailo in nileng in turnipui an dodai hi ani ringawt zel mai a, an lal fapa Ruata chuan zampuii chu alo ngaihzawn ve thin em avangin kunga leh zampuii te inlawm chu a ruk tak hian alo haw ve em em a, alo insawh alo insawh ve thin ani.

Episode 3

Hun leh nite alo ral zel a Kunga leh Zampuii te in hmangaihna pawh in a tawng sang ta hle mai, chutah Zampuii pa chuan a fanu in hmeithai fapa a hmangaih ani tih thu a han hria chu a lungin lo em em mai a, a rilru chhungril takah chuan a fanu chuan an lal fapa Ruata chu nei se tiin alo suangtuah ve thin, a fanu zampuii hi khaw khat nula hmeltha tia sawi tur nilo mahse a pa meuh pawn a ruk tak chuan alo chhuang ve hle thin a, a tisual tampui lemlo e. Chuti ang rilru chu lo pu thin mahse tunah a beisei loh leh a rilru lo lutuk anga a fanu in hmeithai fapa daikil kar ami a han kawp ta tlat mai chu a hringtu pa tan chuan pawmzam harsa tak tur chu ani ve reng a, a fanu chu kunga te ang michhe fa, thingbul tlukar nun ve mai mai tan chuan a phal thei mawlhlo ani.





Lal fapa tih takah chuan Ruata chuan thian tha tak tak an khau a mi awmthei deuh fate amah ang rual vel mi paruk hi kawmngeih deuh bik a nei a, a thiante nen chuan zampuii te in a chuangkai tam pawl pawh an ni ta ve ang, chutiang a nih avang chuan kunga tana ngaihthlak nuamlo leh hrehawm tihna tur khawp tawngkam han chhakchhuah chang pawh an nei ta fo mai a, a rilrem zawng nilo hle mahse kunga chuan chhanlet tlakah a ngaihloh mai bakah, mi tawng mai mai lo leh a huna huaisen tak si a nih avangin a ngawi liam ve mai thin.
Vawikhat chu le. Zawlbuk atanga nula rim tur tlangval ho an chhuah hma lawkin tlangau alo au ta... "khaih khaih khaih. Venghmawr lamah sakei in vawk a lak avangin pasaltha leh tlangval ten um zui nghal tur ani e..." a tih zawh rual chuan tlangval ho chu meichher nen an ri ta suau mai a, silai lek chhuakin sa tlakna lam chu an pan ta sung sung mai, Kunga pawh zawlbuk riak zingah a telve avangin a pa in hmana a pu silai a rochun chu lek chhuakin a che chhuak hmasa pawlah a tang a, zanthim hnuaiah pawh tu tluk phak a nilo. Sa tlakna lam chu a thleng hmasa ber a, midang pawh nghak talo chuan sakei in vawk a kalpui na lam ni a a hriatah chuan sakei hnu chu a chhui zel a, thui fe a chhui hnu ah chuan vawk chu hliam na tak tuar a lo let reng mai hi a hmu ta, a fimkhur zual hle. Chutihlai chuan tlangval dang leh val upa ho pawh anlo thleng ve tawh a, sakei lah chu vawk a dahna thlang kawr ruam hnimpik karah alo in hrosa ve mek bawk a, hlauh nei miahlo leh in ringtawk taka sakei veh phei mektu chu val upa leh tlangval dangte chuan an meichher eng riai ruai atang chuan an thlir ta ngawt a, an silai chuan sakei awmna lam chu tin ve bawk mahse chu tlangval chu tu tak nimaw ti a ngaihtuah leh ava huaisen em em ve.. , ti rilru chungin an silai tin lam pawh chu an hrechang tawhlo niber in a lang.

In ralring tak leh hlauhna nei miahlo a sakei tawmna lam a pan mek lai chuan hlam sawm vel chiahin an hlat tawh ang tih ah sakei chuan hahum chungin a rawn zuan ta mai le, alo inrin lawk em avang leh hlauhna chhete mah a neihloh avangin chi ai miahlo in chhaklam ko ah chuan rang mangkheng a perkai zawk a, sakei leia țum leh lai chiah chu a silai hmanthiam em em mai chuan a zakdawh ah tak mai a kap ta. Sakei chu a lum hlawm thla tawp a, thlanglam chuan thui vak a lumlo tih hriat takin a thawm a reh ta hmak mai, tlangval dang Amah lo thlir rengtute chu mak tiin an ka ho mai a, chet mai nachang pawh an hrelo hial ani, tichuan val upa te chuan tlangval ho chu hlâng siam tura thu pe in, a thenin sakei anlo zawn chhuak bawk a, an haw haw dur dur mai ani.

Kunga chu hlâng chungah chuantir a zawn haw an tum pawhin a duh tlatlo a, an rik luih luih laiin thim chinah alo relhru daih a, an ina a luh chuan a nu pawh alo la meng a, enge in chanchin, sakei chu in kap em? tiin alo be sawk sawk a, Kunga chuan kan pasaltha ten an kap a, anlo zawn haw mek tiin a chhang mai a, sakei zawn haw tute chuan kawtchhuah ah hlado chhamin tlang an rawn tlir thum ta dur dur mai le, khaw mipui anlo pungkhawm chak ngei mai, hman atanga an khaw ti ralti tu chu sakei chu an haw em em a, chutia an han kaphlum mai chu an lawm hle ani.

Kunga pawh a insil fai hnu chuan lal mual lamah an sakei kah en tur chuan chhuak ve mahse miin an hmuh tam hma in a haw leh ta mai a, an lawm em avangin tunge a kaptu tih lam pawh ngaihtuah changlo in sakei chu an hual luih reng mai a, lal leh upa te chuan zan a rei ta e tiin țin zai an rel ta hlawm a.

Episode 4

Hun leh ni lo ralin kumte alo thar ve leh ta a, lal leh upa ten lo tura an țheh chu ramchang tha tak ani bawk a, pachhe kumtiam in Kunga pawhin lo chu a vat ve leh ta a, a nu alo tar lam ve tawh bawk nen kunga chuan a nu chu a duatin a hmangaih em em a, inlam ah a awm hahdam tir thin a, nikhat chu kum hmasa lama an chulram fangin kunga nu chu a feh a, Kunga pawh chapchar awllen lai tiin a ramvak ve bawk a, chawhnu thlangher alo nih chuan a sakhi kah ak haw in inlam a pan ta a, khua a thim thet thet tawh tih ah pawh a nu chu ala haw thei talo, hah pawh sawilo leh a sakhi kah pawh buaipui zui talo chuan ramlam ah a nu ngaihven in a chhuak leh a, an chul thlam kaițen ah chuan a nu chu hliam na tak tuarin ngau kah thlak ang derin alo let reng mai.




Kunga'n a han hmu thut chu a hamhaih ngei mai le, tlangval huaisen leh chak kunga meuh pawh a sakruang ah laitha reng a zamlo emaw tih mai turin a zawi raih mai a, inlam ah zualko a tlan tur nge a nu bula awmremg tur tih pawh hrethiam lovin hnemtu ngai em em leh mal ngawih ngaih a inhriatna chuan a tuam vel a, a rilru na lutuk chuan a nunna lak ve nghal mai te pawh a duh rum rum hial ani.

Hun engemaw chen atanga zampuii nen an inkar ah hmangaihna hrui an thlun avanga a ruka lo thik em em tu an lal fapa Ruata chuan zampuii pa chu lo hmin in, a thiante nen ruahman na tenawm tak anlo siam hi alo ni a, khami ni a kunga nu chulram fang a feh kha Ruata te thianho ramvak haw lam chuan tawngfuh in anlo sawisa a, an thlam kaițen ah thichhawngin an hnutchhiah ta kha ani a, a hliam tawrh chu tuar chhuak zo lovin a nunna chuan pialral lam a pan ta kha ani a, Kunga nu thihna avang chuan khawtlang pawh an ralkhel hle a, hmeichhia leh kum upa lam deuh phei chu ram lamah pawh an kal ngam ta meuhlo ani.

Chutia kunga'n a nu a sun ta mai chu zampuii chuan kunga a lainatna leh a khawngaihna avang chuan a hma ai mahin a hmangaih emaw tih mai turin a ngaihven in a ngaihsak em em a, Kunga nu chu tu thah nge ni ang, tunhma in hetiang inthah na hi anla tawn ngai lemloh avangin lal leh upa ho pawh an lu a hai ngei mai.

Chapchar awllen hun an hmang zo a kunga pawh a lusun na chuan tlemin zia awm lam a pan ta bawk nen, lo hal alo hun a hna țau alo țet chho zui ve bawk a, khawhar takin an thlawh sawmfang mualah chuan a liam nitin thin a, a hmangaih a nu ngaiin a mittui hi tla ru fo thin mahse a inti pachang hram hram thin a, chutiang hun harsa leh hrehawma a awmlai te chuan a thianpa Fela chu a kiangah awmin alo hnem thin a, kawng lehlam takah chuan naupan tet atanga inkawm ngeih em em leh unau ang maia in en an nih avangin kunga tan pawh lusun khawhar chu a tawrh a tinep deuh a, hlim taka han nuih dun bawk bawk changte pawh an nei fo mai. Fela mai nilo in zampuii pawn a theih chen chen ah leh mi ngaiha a mawitawk chuan kunga khawhar chu a hnem hle mai bawk a, Kunga tan chuan khuanu ruat tihloh phal ni an nilo.

Hmanni lawk emaw tih mai turin kunga mitthla ah chuan a nu boralna chu la reilo riau angin hriat mahse kumsul alo vei leh tep tawh a, thlawhhma lamah pawh buh te seng zovin khawtlang mipui mimir chuan buh chhek pawh an zo thawkhat leh ta der mai, Kunga pawh buh leh balah harsa lutuk a awmlo tawkin a chungah khuanu'n zah a ngai a, buh pawh tuthlawh zâwn zet a thar ve a, an lalpa zahngaihna leh thatna avangin hlothlawh chhung te, buhseng leh a chhek thlengin thenawm khawveng ten an khai chhuak a, duhlo teh mahse an lalpa thu a hnial ngamloh avangin kaichhan leh lâwm te neiin țul chhe lutuk lovin a awm theih phah ta a, an lalpa chungah pawh a lawm thiam hle thin mai. Sa a kah a piangin a bawk chu an lal hnen a thlen thin a, lalpa pawh a lawm thin ngei mai.

Nakin ah chuan Ruata te thianho chuan ro dang an rel leh ta.
Anmahni thah ngei mai phumna tur thlan an lai a, khawhar lusun te hnem turin an leng a, ro dang dap zai an rel leh chu ani si maw...




Zing nichhuak chuan enge a rawn herchhuah pui tih hre lovin khaw mipui te chu mahni hna theuh thawk turin lo lamah an liam zo leh ta. Tar chaklo leh naupang tualchai ho bak khawchhung ah an awmlo a, fehrehsân lai a nih avangin khua chu a reh ruih mai hian a hriat a, in zanga khua meuh ni mahse in a awmchhun te chu sanghar in a la mai ang a tih hlauhawm khawpin khua chu thei reh tak hian a reh tlawk tlawk mai a, veng lu lam leh vengmawng lama arpa khuang inchhawn leh, arpui tui lai a chhiar atanga a tuizo hlim rawn thlawk chhuak kawkawdak tih mai loh chu thawm dang a vang hle a.


An khaw pasaltha Lalnâwta ho a sai ramchhuak te pawh zan sarih an riahna a ni ta reng mai, sakhi leh sazuk tih vel chu riakbuk chawhmeh atan an kap a, sa ah chuan an hnianghnar hle awm e, riah chawfai an chham deuh tawh avangin tlangval thenkhat chuan haw mai te pawh an duh rum rum tawh a, sai ramchhuak ve ta chu hlawhchham a haw an hreh bawk si, a tuk zingah chuan a hma ni a an chhui fuhloh lam panin kunga leh lalnâwta chu kalin sai chu kah ngei tumin an chhui tha leh ta a, a hma ni a an chhui tawpna ah insem darhin an ințhen ta a, thui fe a chhui hnu ah kunga chu thu chawlin mei te a han zu vang vang a, luite ah chuan tui te a in hnu ah thui vaklo a kal leh chuan thawm a hre ta, fimkhur tak leh uluk takin a silai chuan kah mai inring rengin a veh phei zel a.

PART 5 - 10

No comments:

Post a Comment

Post Bottom Ad