HMANGAIHNA AVANGA TUALTHANA RAPTHLAK

Episode 5

Mizo StoryChutia fimkhur tak leh thawm dim taka a veh phei nâk chuan a piah hmunzawk rai nuam tak leh phul awm depna hminah chuan saipadawp lian zet mai hi alo bawk run ta mai a, Kunga meuh pawh a meng phar awn mai le, va pawh nghal mai tur chuan hmun failai a nih avangin ramngaw lamah sai lanchian theihna tur lama a rinah chuan a helkual leh rih a, thingbul phenin a silai chuan a tin vang vang a, a kutzungchal chuan a hmetper ta... Silai puak ri ah chuan chulai vek ramngaw chu a khawk rum rum a, a chaldar ah ngên mu chuan a den avangin saipadawp lian tak pawh chu che leh tur awm lovin a bawhna hmunah chuan a let tual a, a thi chu ani zui ta reng mai. Lawm em em in ava pan hnai a, a chunga rapin hlado a chham ta vang vang a, tlang a tlir zui bawk a, riahbuk lama an thiante leh lalnâwta ngei pawh chuan silai rikna lam chu rawn panin reilote ah anlo thleng chawpchilh ta nghal a, a ngho leh a sa tha lai te hlepin an phurh zawh tawk theuh phur chuan buk lam an pan a, tukțhuan eikham ah haw zai an rel ta a. Tlai ni tlak dawn ruai a an khaw kawtchhuah an thlen chuan hlado chham leh in chunglam ah silai an lâwn un un a, khaw mipui a hmwi a pa in kawtchhuah lam an rawn pan a, an nula ten an tlangval rammu te chhawlhal tih reh nan zupui anlo tulh ve mial mial bawk a, lal mual an thlen meuh chuan mipui anlo pungkhawm tam ta hle mai. Kunga chu lalpa chuan pasaltha chawimawina atan tiin zupui a phâwt a, Lalnâwta thik tawk alo tling em em mai lehnghal.

Kan sawi tawh ang khan kunga hi a hringtupa in boral san hma mahse a naupan lai atanga ram mi leh sa la thei, alo tlangval chhoh hnu ah pawh tlangval tlawmngai leh huaisen, chak bawk si, a fu ke leh a chawnban han en reng reng pawha khaw thenawm tlangval te buantu atana iai awmloh zet mai alo ni a, hmeithai fa ni mahse an lal duhsakna dawng thei hial a pasaltha, fing leh huaisen a nih avangin er duhtu tan chuan er tham ani ve reng a, chutiang dunhmun a a din mek lai pawh chuan zampuii hi a theihnghilh ngailo a, a thinlung ah hmun pawimawh ber a luahtir fo thin.




Ni leh kumte alo vei zel a, Ruata te thianho chuan an rorel tih hlawhtlin nan kawng anlo dap ve reng bawk a, Ruata chuan kunga chu ramvah puiah sawmin zan hnih riaka an khaw ram a sih chanpui turin tukțhuan eikham ah an chhuak dun ta a, riah chawfai leh silai nen, fungki ah silai zen tam tawk tak hnawh in, an in ak bawr ve hle mai a, sih thlen hma hla deuh hlekah chuan in nghatin riahbuk an sual ta a, buk an sak zawh chuan ala hma deuh avangin kunga chuan an sih chan tur chu en thlithai in ava kal a, sa hnu chu alo chiar dup mai hi alo ni a, a rilru tak chuan a phur ru hle ani, rei rial lovin buk lamah chuan a let leh nghal a, zanriah te an ei sawk sawk a sih chang tur chuan an inzui chhuak ta a, khua a thim tan ta maw tih ah chuan thawm danglam tak an hre ta, sih lam pana lo kal ni ngei in an hria a, thla eng deuh ruih hnuaiah chuan sih lam chu mit pawh khap tha phallo in an en kar mai a, nghalphusen hi sih lam panin alo kal a, a hnar a len leh ruai ruai a, a nguk leh hrut thin hi alo ni a, sih alo thleng tep tih ah hlauh nei ni awm takin a nguk hruih a, a phit thut a a pilbo leh ta mai, rei fe an nghah hnu ah pawh thawm dang an hriat mailoh avangin buk lamah an let ta a, a zankhat naah chuan an hlawhchham ta.

A tuk zing khawvar hma in chawhmeh tur zawngin kunga chu a vak chhuak a, an riah buk thlang lawk a kawrte chu zawh thla in a chhuk zel a, vahrit nupa a kap a, tukțhuan hmeh atan an hmang ta a. An silai te hrufai in thing te an fawm khawm a,zanriah an eikham meuh chuan khua a thim tan ta bawk a, sih chang tur chuan an inkhâp chhuak leh ta, tumloh leh beisei loh tak maiin sazuk pachal ki hreu nalh tak mai hian sih chu a rawn in a, Kunga chu thawm dim taka insiam remin a silai a hmet per a, sazuk chu tanchhe tur awmlo in a zal ta der mai. An hlawhtling ta, a tuka an haw chu lalpa alo lawm kher mai, tichuan zanlam ah zampuii te inah lengin, leng hnawtchhauk ar alo khhuan tak avangin kunga pawhin haw zai a rel ta a, an ramvak chau deuh bawk nen a mutui hle mai a, chutihlai tak chuan ruata te thianho in anlo rel lawk tawh leh remchang anlo thlir reng thin a nih avangin chu hun chu remchang ah la in kunga mutui lai chu an inah lut ru in ruata chuan a lu ah thingfak in a hlap ta. Nikhaw hre lova a awmlai chuan daiah hruaiin an sawisa zui a, thichhawng in an haw san ta a.

A tuk zinga feh kal hmasa ten an hmuh mailoh nan tiin kawng atanga langlo turah kunga chu an dah a, zing khua alo var chuan thil danglam a awm ani tih pawh hrelo in lo lamah an liam leh ta duak a, Kunga chanchin ngaihven leh hria pawh an awmlo.

Mahni mai awm a nih avangin zing tak takah pawh a ramchhuak daih thin a, chuvang pawh chu ani mahna tuman an kunga te in pawh tuman an ûksâk lemloh ni.

Ruata thianho erawh tihsual neilo ang maiin an awm a, a thiante pawh an dan pangai in lo lamah an țuan ve mai a, tuman engmah an sawi chhuaklo ani.

Khatia rampalaileng a thichhawng a an kalsan tak hnu zanlam ah khan lo harh chhuak in kunga chu a hliam tawrh na tak avang chuan a thinrim em em mai a, a lu a an vuak a nikhaw hre lova a awm hnu, daipawn a an hruai a alo harh deuh khan amah khawihtute chu an aw atangin a hre thei nghal mai hlawm a, a chhan chu mi fing tak a nih avangin zampuii te ina leng ve thin ruata leh a thiante ho aw chu alo hai hauhlo mai. A ngaihtuahna a kalthui in a thinrim chu sosang hle mahse tunah chuan tih theih a nei ngang silo, an khawdai a luite lam chu a theih ang ang a panin a chang leh bawkvak in, a chang leh lum deuhthaw te in engtin tin emaw a thlang thei hram a, tui chu a in hnu ah a dangro lutuk chu a zia awm a, harh hawkin a inhria a, chutah a taksa chau lutuk avang chuan alo muhil leh a, a han harh leh meuh chuan khua alo thim tan der tawh a, a rilru in tiharh in theihtawp chhuahin ramhnuai ah an inlam a pan tawk tawk a, tuma hmuhloh in an kawmthlang zawn a thleng der mai.

Inchhung ah chuan a lumlut tawp a, a muhil zui leh nghal a, alo harh leh chuan zanrei tawh tak ani tih a hrethiam mai a, a rilru leh ngaihtuahna pawh alo fim leh deuh a, a tawrh chu na a tiin a thin hi a rim em em mai a, an sawisak laia an thilsawi a hriat khan a thinrim a tizual hle mai bawk a, a nu pawh kha ruata te thianho thah ani tih an tawngkam atang ngeiin a han hria khan a rilru a tina in a thin hi a tirim zual em em mai a, a rilru chhungril takah chuan phuba lak duhna in a khat ta ani.




Episode 6

A nu thattu leh Amah ngei sawisa a that tumtu ruata te thianho chu a haw ngawih ngawih a, thinrim teh mahse tun dinhmun ah chuan engmah ti thei a nih loh avangin a in bengdai hram hram a, hachang țhial rawt rawtin a inseh ruh nasa hle mai.

Tichuan a taksa a chauh en avang chuan alo muhil leh sek a, zing khawfing chah hma deuh ah lo harh chhuak leh in a hliam atanga thisen chhuak te pawh alo reh ta deuh bawk a, a silai leh a chemte chu la in ramhnuai lamah a theih ang ang a pilbo tumin a in saseng ta a, hah tak leh chau taka kal a nih avangin a duh angin a thleng thui chaklo hle a, mahse pasaltha tih takah a chakna zawng zawng leh a thahrui neih zawng zawng sawmkhawm in a kal lui hram hram zel a, a han chawl leh deuh dat thin bawk a, chutia nileng a a kal hnu ah chuan ram pilril tak alo thleng ta reng mai.thlam ram tawh tak pakhat hi a hmu a, tahchuan inbenbel tumin a lut ta a.

Inlam ah ve thung chuan kunga chu zan hnih ngawt a bo tak avang chuan zampuii ngaih a tha thei tawhlo, engmah a hrilh lawk bawk silo. Zan hnih zan thum vel rammu tura a kal dawn chuan a hmangaih zampuii chu a hrilh thin kha ani si a, tunah erawh thei reh tak hian a reh ta hmak mai si, Zampuii ngaih thalo chuan kunga thianpa fela chu kunga chanchin a zawt ta tawp a, fela lah chuan engmah a hriatloh thu in alo chhang ve mai bawk nen, an buai ru angreng hle.

Nakin lawkah chuan kunga awmloh thu chuan an lalpa beng alo thleng ve ta. Kunga zawng turin a khaw mipui tlangval leh rawlthar te thleng a thawkchhuak turin thu a pe ta mai le, an khaw ram vel zawng zawng an dap kim hle hnu ah pawh kunga hmel reng hmuh tur a awmlo, Mizo dan ang a huntiam chhung an zawn hnu ah pawh an hmuhloh avangin zawn hun ti tawpin sunna hun an hmang ta a, Zampuii chuan tawrh thiam har a tiin na hi a ti em em a, chaw lah a ei thei silo. Tuman an be țawng zolo a, a hmelthatna leh a sakruang mawina te chuan an kiansan tan mek ani tih hairual a nilo, nimahse nula fel leh hawihhawm a nih avangin chutia awmreng chu tha bera a hriatloh avang leh a hmangaih kunga chu engtik ni ah emaw chuan alo haw leh a rin tlat avangin a inti pachang hram hram a, a taksa pawhin ngai alo awh leh chho tan ta. Athinlung chhungril takah erawh chuan kunga chu a ngaiin a thlahlel em em thin ani si a, Kunga tello chuan a hringnun lamtluang zawh a zuam nganglo ani.

Kunga ve thung erawh chu a tawmba thlamah chuan a theih ang ang a in enkawl in ramhnim damdawi a hmuh phak tawk te chuan a hliam te chu a enkawl reng a, in atanga a chhuah dawna a buhfai ken pawh ala ngah bawk a, mumal lo tak leh thinrim khaw hmulo khawpa hun hman chang nei mahse dam tha vervawr a awm phawt a ngai ani tih a ngaihtuah chhuah leh thin na chuan a bengdai leh thin a, thla khat dawn a in enkawl hnu chuan alo dam tha ta hle a, a tawmba thlam piah deuh a luite tui chuan a in enkawlna kawngah nasa takin a pui hle ni te pawn a hria a, tichuan a taksa hliam leh na ten ngai anko awh chho leh ta bawk a, rilru fim tak pu in a tih duh ngailoh ti tura nawrtu lian tak avang chuan a rilru in ruahman na a siam tan ta a.

Zan chu alo tlailam tan ta bawk nen a silai chu ken chi a a hriatloh avangin rapah a dahtha a, a chemte nen chuan khua a tualthat turin a penchhuak ta zal zal mai le. Khua a thlen meuh chuan a reh ruih tawh a, mahse ruata te inah keh zampuii te inah erawh chhungkhat laina leh thenrualte chu anla titi mam mam thung a, Kunga chuan thawmdim tak leh mi hmuhloh turin ruata te inlam chu a pan zal zal a, Ruata te inhnuai thim lai chu chuhin âwng atang chuan inchhung chu a bih dek dek a, ami duhte pawh anlo kim țhap mai. Kunga'n a nu thattu te a han hmu chu a thin a so but butin a hria a, mahse a tum a puitlin theih nan a inven a ngai tih hria in a in bengdai hram hram ani.

Rei fe a nghah hnu chuan a vanneih cang nge a hmelma te vanduai vang zawk, an zinga pakhat Sawma'n "ka inthiar lawk ang e" a tih ri chuan kunga chu a tiharh zawk a, rang takin ruata te ekin kawnga thing chu phen in sawma chu a chang ta ran a, a rinlawk ang ngeiin sawma chu zial pet eng vet vet chungin a rawn kal ta chhat chhat a, Kunga awmna zawn a pel hret tiah chuan a ka hupin a nak thâwl ah tak mai a chemte chuan a vit thawih mai a, Sawma chu a eu zawk a, Kunga ban tha chak tak maiin a ka a hup beh avangin aw râwl reng a chhuahlo, a rum nghut nghut tih mai loh chu. Kunga chuan sawma hnenah chuan "tunge ka nih i hria em?in hmuhsit leh in tih duhdah leh nun beidawng a in siam kunga ka nih hi" ati sap a, Sawma chuan talchhuah tum ve deuh mahsea taksa hliam avang chuan rei a tal theilo, Kunga chuan a vit leh hrawih a sawma chu a zal raih a, Kunga chuan zawi muanga nghat in a thlir vang vang a, a kut leh taksa chu sawma thisen chuan a bual sen nguai a.

Episode 7

'Sawma, kan hawng dawn' tih thawm chuan kunga chu a tiharh zawk a, a kal vat a ngai tih hria in rang takin a kalna lamah chuan a putbo zui ta nghal a, thlam a thlen leh chuan khua chu a tlai viau tawh mai a, tuikhur ah kalin a in tifai a. Mut pahin a chet dan chu ngaihtuah letin mi nunna lak chu nuam a tilo hle tih inhre chhuak mahse phuba ka lak ngei a ngai ani tiin a phun sap a.

Khaw lamah ve thung chuan sawma thih dan leh thih thu chuan khua chu a fanchhuak rang ngang mai, mi tin mai chuan mak anti in tu thah nge tih chu an inzawt sup sup hkawm bawk a, mitthi inbul thim laiah chuan ruata te thianho leh zampuii pa chuan thil pawimawh tak sawiho an nei ani tih hriat takin hairual lovin muk tak leh zawite te in an tawng sep sep a, Kunga thah ngei a nih an rin rualin mak pawh anti hle a, Kunga chu damchhuak thei turah an ngailo ani. An zingah chuan Zova, Kunga an sawisak laia thah duhlo tu kha a awm ve a, mahse engmah sawi ve lovin a ding ngawi reng ringawt thung a.

Zanah chuan a sa kah chu a then repin a then a mung tluk tluk bawk a, mahni a khawsa țhang ani bawk a, mahni a awm chu hrehawm ti hmel pawh a pu tawhlo, mahse a hmangaih leh duh em em zampuii'n pasal a nei mai tur chu hrehawm ati in tawrh thiam har ati em em a, amah thlamuan tu ber tur a Nu lah a awm tawh silo.

Khawchhung lamah erawh chuan Ruata leh zampuii te inneih pawh sawnhlat loh theih a nih takloh avangin a karlem lamah an sawn ta a, Zampuii pa leh ruata te thianho chu an hlauhthawn na leh an thinrimna chuan a inhmuh khawm tir zing ve hle mai bawk a, Zampuii pa chuan "kunga ngei ani,ala thi lo ani ang e, in panga hian in zawnchhuah ngei a ngai ani. Kan zawng chhuaklo a nih vaih chuan kan vai hian kan thi vek ang" tiin ro a rel chat chat A, kunga leh a thiante chuan 'naktuk atanga zawn a, kan hmu a nih phawt chuan thah ngei ngei tur' anti sap sap hlawm a, an zingah chuan Zova pawh a thu ngawi ve kar a, a tuk atanga kunga zawng tur chuan an țin ta sang sang a.
Zova chuan an inlam pan talo chuan fela te inah kalin, an thiltih tum zawng zawng chu a hrilh vek a, a tuk zing takah kunga hnena chanchin hrilh turin fela chu a kal ta vang vang a, thlam a thlen chuan kunga chuan rawng alo bawl mek a, Kunga'n fela a hmu chu mak ati hle mai a, fela chuan ruata te thianho in zawn an tum thu te,zovan chanchin a hrilh dan ang chuan kunga chu a hrilh ta vek a, Kunga chu a nui suk ringawt a, fela chuan mak ati zawk hle a, Kunga chuan "infiam pui an ngai dawn a nih chu" ati ban chat a.




Fela'n kunga sarep a han hmu chu a nui var var a, Kunga chuan a zahve aia tam chu fela hawn turin a ipte puiah a khung sak a, chaw ei an peih ta bawk a, titi pahin puar el euh in an eidun ta a, in ngai leh in thlahlel taka reife an inkawm hnu chuan fela chuan haw zai a rel ta a. Kunga pawh amah zawngtute zawng ve tura insiam tanin a silai chu uluk takin a tifai a, a chemte pawh uluk taka tathriam in a paiah chuan a rawlhlut zal zal a, a silai ah chuan kah nuam tawk turin zen a thun a, musep leh mupui a chherchhuan bawk a, muangchang in thlam chu a chhuahsan ve ta a.

Pan lam tur hre mai lovin a han ding dat a, chutah hmana amah an sawisak na hmun lam kha pan tha in a hria a, chulam hawi chuan a kal ta hlawk hlawk a.

Lui tui luang ri kerh kerh a hre thei tan ta, a dangro tawh luktuk avang chuan lui tui chauh a ngaihtuah tawh a, chak takin a pan ruak ruak tawh mai a, a dang ro lutuk chuan thihna ruamah a tir teuh hle ani. Luikawr ah chuan ruata leh ngila chuan zial anlo zu vang vang lai hi a zuk hmu ta thut mai le, amah pawh a phu zawk nghe nghe a. An nin hmu hmasa ngat se zawng minung ani tawh hauhlo tur hi a nia. Muangchang a tawlh letin lui mawnglam chu a pan ta zawk a, Ruat te hmuh phakloh ah chuan tui chu a in khawlh khawlh a, duhtawka a in hnu chuan puar awlh in a inhria a, tunah chuan ral bei tutin tharum leh chakna a nei leh ta.
Muangchang leh thawmdim takin ruata te awm na lam chu a pan leh riai riai a, Ruata te thian dun chuan mei zuk pahin engemaw ni hi anlo sawi sep sep a, Kunga chuan a silai chu lek kawhin ruata chu a tin ta vang vang a, mahse ruata chu chutianga nuamsa taka thih tir chu duhlo in a silai chuan Ngila chu a tin ta zawk a, silai a hmetper ta.. Ngula chu a tlu hnawk a, a lu ûm chu a kaw tlang ta phût mai. Ruata phu nasa lutuk chu a tlu ve hnawk tho mai.

Kunga chu ramhnuai lamah zei tak leh rang takin a pilbo zui nghal vat a, Ruata thung chu a hamhaih in a rilru a buai zo vek a, enge tih ber tur tih pawh hrelo in ngila ruang chu a thlir tawp mai ani. A harh chhuah leh meuh chuan kunga hmel reng hmuh tur a awm tawhlo, khawilam atanga lo kap nge tih pawh a hre zui heklo, a mangang lutuk chu a țap pûr tawh mai a, luimawng lama a thiante au thawm avang chuan a inti pachang thar leh a, karloh ah a thiante ruata chu an rawn pawh zui a, an thianpa ngila ruang chu en in an phawk hru hlawm vek mai a, Kunga zawn zui pawh tum tawhlo in hlâng an siam a, ngila ruang chu an zawn haw ta zawk a. Khua a an han zawnlut chu miin mak anti in mipui anlo pungkhawm chak ngei mai, Ruata te chuan mipui hma ah thusawi in, Kunga thah a nih thu leh he khua a mite hi kunga chuan a haw vek tiin, Kunga chu miten haw vek se an duh avangin kunga chu misual berah an chhuah ta a.

Chutia ruata ten a chhe thei ang bera kunga an puh tak fo avang chuan khaw mipui te chuan kunga chu an țih in an haw hlawm hle a, Lal leh upa te pawn kunga chu an hmelma lian berah ngaiin Ngila an vui zawh lamah tlangval ho zawng zawngin kunga zawn chu an rel ta hial ani. Fela'n chu thu a hriat chuan a zan a zanin kunga chu chanchin a zuk hrilh vat a, Kunga pawh a lu a hai tan ta hle mai. Mi zawng zawng in ral beih a beih an tum ani ta si a, a tuk nileng chuan thlamah awm in naktuk ah khawiah nge ka bihruk ang tiin a ngaihtuah char char a, ruahman na tha tak a hre thar ta. Chu chu khaw daifem a awm ani. Khaw daifem a awm chu him ber tur ni in a hre tlat a, dik pawh a dik reng a, tumah in khawdai mai ah a awm an ring hauh lovang le, a zawn pawh an zawng heklo ang.

Episode 8

Engchen nge a muthilh chiah pawh hre lemlo mahse a han harh meuh chuan zan tir lam chu ani tawhlo tih a hrethiam mai a, thlam chu luahloh ang thei ber turin a'n siam zung zung a, a silai leh chemte chu kengin a tum ram lam chu a pan ta nghauh nghauh a. Lehlam taka a ngaihtuah chuan khaw hnaih thei angber a awm chu nuam dawn viau in a hria a, a awmhmun tur ni a a hriat lal in hnunglam thing hmun ngaw lam chu a pan ding nghal nalh a, khaw chhungah chuan a khat tawkin ui an bauh leh chuah chuah thin a. Ui bauh thawm mai mai pawh kunga tan chuan a thlamuan thlakin hlimna thlentu ani hial mai.

Tlangval leh pa valai deuh chin zawng chuan tukțhuan eikham ah kunga zawn tur ani a, tukțhuan eikham veleh lal in mualah in nghahkhawm tur ani tiin tlangau alo au leh ta lauh lauh mai a, Kunga chuan a hlauhawm chin chu khawchhung ah an awm dawnlo tih a hre nghal mai a, khawchhunga luh a zampuii pa chu thah ngei a duh ta tlat mai.

Chaw eikham hmasa apiang chu lal inah an kal khawm tih hriat takin an ri mar mar tawh a, a hnu ah chuan lalpa chu a rawn tawng ta a "vawiin hian kan khaw tana hmelma lo ni ta kunga chu a hmu apiang in thah tur ani ang, kan pasaltha Lalnâwta'n min hruai ang a, a kutah engkim a awm ang. Hman deuha sawma a thahna ram bawr vel kha tuam tur ani ang, tunah i kal nghal ang u" tiin a thlah liam ta a.

An kal liam ta tih hai rual lohin thehmeh ang maiin a reh ta duak a, a rilru chuan khawdai a awm chu finthlak hle in a hre leh hnuhnawh a, a awmna ah chuan chaw fak hun thleng a thut hnu in zampuii te inlam pan chuan ramhnuai chin zelah a tawlh phei hret hret a, karlah ah zampuii te in zawn chu a thleng ta a, Zampuii te ina kal tur chuan in pakhat kal pelh a ngai a. Mahse misual, mite huatrawn ani ta sa sa tiin mi inhnuai ah chuan a per lut zauh a, Zampuii te inhnuai ah chuan tuma hmuhloh in a a thleng thei ta hram a, inchhung lam thawm chu a ngaichang ran a. Zampuii pa chuan "zampuii nu, khawnge zampuii hi a awm?" ati lang lang a, Anu chuan 'a thiante inah a kal lawk a nih kha, alo haw harlo ang' tiin alo chhang a. Va ko teh, nula pumpa khawlai len mai mai hi a mawi ngailo ve, a tuh chuan zampuii ko turin a nu chu a chhuak nghal a.

Pawna zampuii nu chhuaklai chu thlirin a kal liam ta maw tih ah chuan rang takin zampuii te inchhung ah chuan a inperh lut ta nawlh mai a, Zampuii pa in kunga a han hmu thut mai chu a hamhaih lutuk avangin chet zai reng a rel theilo, a ka ho ringawt mai a, Kunga chuan pan hnai in a chemte chuan a tin a, ka chunga i thiltih zozai te hi ka thlirliam mai mai thei in i ring em ni tiin a chem hriam tak mai chuan zampuii pa chu a vit hrawih mai a, Zampuii pa chu a țe țhawt a, Kunga chuan a chemte chu phawi in a thinhnun ah a vit tlum leh pawk a, chutah a hrawkhrui chu chhat in a chhuahsan vat a, ramhnuai lamah a pilbo zui ta nghal a.



Amah zawngtuten khua an luh a, chanchin an han hriat chuan a barakhaih hlawm ngei mai le. Kunga chu misual tawpkhawk ah an ngai nghet bur tawh hlawm a, a bialnu pa ngei a that duh chu mak anti hle ani. Zampuii pawhin a pa thihna chu a tuar ngang mai a, mahse a hmangaih kunga chu a thiamlo phal biklo. Kunga dunhmun chu a hrethiam in awm tihna chin chu a nei ve reuh a, tin, ruata leh a thiante la dam chhun ho pawh hlauhna leh thinrim na chuan a bual hneh ngang mai. Kunga zawnga lo haw leh ho chuan khua leh a vel chu an dap leh chiam a, Kunga hmel reng hmuh tur a awm silo. An bangbo ve hle mai.

Kunga'n hetiang tak maia thil ati duh hi mak anti in thil fel zanlo a awm ni te pawn an hre ve țan hial mai, Zampuii pa lal upa min ani bawk a, ropui takin an vui liam a, khua chu an ralți in an mangang takzet tawh ani. Kunga avangin mi pathum an thi ta chu a nia, mi engzat tak la thi ang maw tih chu mitin ngaihdan leh titi ber ani ta a, mi thenkhat ngaihdan ah chuan kunga hian thil tihsual a neilo ani ngei ang, heihi a phuba lakan ani ang tiin an rindan an sep kual sup sup mai bawk a, khua chu an buai takzet ani.

Kunga pawh chuan a riah thin na thlam chu bel ngam tawhlo in ram ril ngaw khup maiah chuan awmhmun a khuar a, ram reh leh thawm mak tak tak awmna hmunah chuan khawhar takin a hmabak a thiltih leh dan tur ngaihtuah in khawhar takin a awm rak rak a, Zampuii pa a thah atanga kar khat lai a liam leh ta tih ah chuan a hmabak hna chu thawk leh turin a in buatsaih leh țan ta a.

Mahse, chanchin engkim hrilh thintu Fela chu a hmu thei silo, amah a engkim a rel a ngai dawn ta ani.

Tunah chuan mi pathum chiah a hmabak tawh a, mipa pathum a that a, mi pakhat erawh chu a zuah a ngai ani, Kunga chu a in ngaihtuah vang vang a, zanah khua a luh a, a mi duhte chu a mal mal a thah theih ringin a inbuatsaih zui ta nghal a. A silai chu tifai in a chemte hmanthiam em em mai chu a tathriam tle var mai a, a sa kah rep chuan inhnawh puarin a tum ram chu a pan leh tan ta.

Fela te inhnuai chu harsa lo takin a thleng ta mai a, fela chuan chaw alo ei mek tih a hmu thei a, inleng anlo neihloh avangin fela chaw eina zawnah chuan kalin fela chu thawmdim takin a ko a, fela'n kunga âw a han hria chu a phawk hra mai le, Kunga chuan ruata thian thum va thlithlai a, chanchin rawn hrilh tur leh, an inhnuaia alo nghah tur thu te chu zawi sap leh hriat nuam tak si hian a sawi sap sap a, fela chuan rang taka chaw eiin kunga thu ang chuan ruata te zawng turin an awmna tura a rin zampuii te inlam chu a pan ta nghal a, bang awng atang chuan zampuii te inchhung chu a bih dak dak a.

Episode 9

Kunga mi duh, Ruata leh a thiante chu anlo awm ngei mai.ruata chuan zampuii chu inti neitu takin alo țhutpui ran a, Zampuii thung erawh chuan a ngaina vaklo tih chu kunga thianpa fela chuan a hrethiam mai a, Fela chu hmanhmawh taka letin an inhnuai a amah nghak rengtu a thian khawngaih thlak tak mai kunga chu panin thil awmdan chu a hrilh zung zung a, Kunga chuan thil tih dan tur a ngaihtuah ta vang vang a. An zinga in fal ber mai ngheta chu bitum tha in a hre ta a, Fela nen chuan rei tak an inkawm hnu ah kunga chuan ngheta chang tur chuan a kal ta a, Kunga chuan zei takin ngheta te in thlen hma kawngko atang chuan alo chang ta ran mai le, tuibur hmuam da vel a thu hman ang tih ah chuan leng hnawtchhuak ar anlo khuang ta tliar tliar a, Kunga chu a awmna hmunah chuan insiam remin a inring ta hle mai. Nghakhkel takin ngheta chu alo chang ta ran a, chutah le, a piah deuh a mi pakhat lo kal a hmu ta, a zawn a rawn thlen hma in tunge a nih hriat tumin ngun takin alo thir a, a hmel hre theilo mahse a ruangam atangin ngheta ngei ani tih a hre thei ta a, a zawn a rawn thlen chuan ko atanga zuanthlak pahin ngheta naknem ah chuan a chemte tlum hmawk khawpin a vit ta buaih mai a, ngheta chu a țe thawt a, Kunga chuan hneh takin a man bet a. A chemte chu phawi in a hrawkhrui chu a zai chat zui nghal a, ngheta chu a zawi hnawk a. Che tur a awm zui talo. Kunga chuan ngheta kutzungtang chu tanin a bibo nghal a, ramhnuai ngaw pilril lam panin hmanhmawh takin a kal ta sawk sawk a.




A tukah chuan khaw mipui ho chu an thlabar leh ta ngei mai, an khaw tlangval ngheta thih dan chuan khua chu a fanchhuak nghal a, Kunga thah ah an ngai nghet bur nghal a, Ruata te thianho la dam awmchhun chu pathum chiah an ni ta. A nihna takah chuan pahnih anni zawk hma awm e, an zinga pakhat chu kunga lamțang Zova kha ani tlat si, tu emaw thiltih avangin khua chu a ralmuang lo hle mai a, chu pawh an khua leh tui te vek an ni si a. Chu khua ralmuang lo takah chuan titi a tam sawt ta hle mai a, lal leh upa ten ro an rel deuh reng nachung in tualthattu kunga erawh an zawng hmu thei chuanglo.

Mi titi lengvak a tam bawk a. Thil pakhat chuan an beng a verh zar ta mai, chu chu kunga thianpa ber fela chuan a awmna a hriat an ring ta tlat mai. Fela chu lal leh upa te chuan ko in kunga awmna chu an zawt ta a, mahse fela chuan a hriatloh thu in a chhang mai a, a hriat ngei an rin thu leh thudik a sawilo a nih chuan khua atanga hnawhchhuah a vau in kawng hrang hrang in an dawpin an zawt a, mahse fela chuan a hmuh ngailoh thu leh a awmna chin a hriat bikloh thu in a chhang ve tlat reng a. Lal leh upa te thin in a tuar talo, Fela leh a chhungte chu khawchhung chhuahsan a, buh seng zawh lamah an khaw ram chin chhuahsan turin an hnawtchhuak ta a, Fela chhungkua chu an thlamah awm in buhseng hun an nghak chu ani tawp mai a, lal leh khawnbawl upa te chuan kunga'n a tlawh ngei an rin avangin mi pahnih zel intir in fela te chhungkua chu an enthlak tir reng bawk a, chhun leh zan zawm a karkhat lai an thlithlai hnu pawhin kunga hmel lan tikni a awm silo, an mangang rilru hle ta zawk mah a.

Ruata leh a thianpa la dam chhun Ruma pawh an chi ai nansa ngei mai, Zova erawh chu a thla a muang em em thung si, mahse engmah a tilang lemlo.
Nikhat chu Zova'n amah chauha hlo a thlawh kur kur lai chuan thawm pawh neilo thlâ ang maiin kunga chu a bulah alo ding reng chu zova'n a han hmu thut chu a phu nasa kher mai, mahse ngai a awh leh vat a zova chuan khua atanga fela te chhung an hnawhchhuah thu leh a chhan te chu kunga chu hrilh in, Ruata leh ruma te fimkhur dan te, ram an kal duhloh thu leh zanah pawh an lenchhuah vak ngamloh thu te, zanah pawh an riah dun zel thu te chu a hrilh ta zel a, Kunga chuan a thianpa feka te chhungin amah avanga an tawrh dan te chuan a rilru a ti hrehawm in a hmelma te chu a huat belhchhah leh sauh a, Zova chuan fela te chhungkua chu enthlak reng an nih dan leh nangamah an hmu che a an man che a nih chuan fela te pawn an tuar dan turte chu a hrilh zung zung a.

Episode 10

Kunga chuan, rei kan rial theilo ang phuba ka lak zawh vat a ngai dawn a nih hi nangpawh thudik sawi turin inpuahchah angche, Fela te chhungkua hian rei tak an tuar tur a nilo, ka kal ang e, tiin a kal zui ta nghal a.. Kunga chu tlang thengthaw nuam, thlifim tamna leh ram thlirna nuam takah thu in, tlangdun inkham zui mai te kawr ruam thuk tak tak a romei zam chiai mai leh lung kham sang tak tak te thlirin a hmalak dan tur chu a ngaihtuah neuh neuh a. Zanah chuan awlsam takin khua chu a thleng thei mai a mahse, khawilai nge a pan tak ang le? khawchhung hnimbuk karah chuan a biru ta kar mai, rei a thut hma chuan mi tawng thawm a hre ta a, an thusawi chuan a beng a verh zak mai le. Chu chu zova thih thu leh an lainat thu te, an lal leh upa te an dem thu te ani. Chumi te pahnih thlan lai tura kal titi atang chuan a zan a zana phum tur ani tih a hrethiam mai a, Kunga chuan chanchin chiang zawk hriat a chak khawp mai. Mahse, amah ringtu leh rin ngam an awm silo, thudik sawi tura ami zuah zova thih thu chuan a barakhaih takzet ani. Kunga chuan thawmdim takin thlanmual lam chu a pan ve ta tawp a, thlanmual a thlen chuan thlanlai tur tlangval ho pawh anlo ri ham ham tawh a, meipui an chheh hluah avangin ruata leh ruma te hmel pawh a hmu thei a, chu mite hmel a han hmuh chuan a thinrim na chu a sosang in a thaw kawk kawk mai a, a silai chu a tin kawh ta vang mai le, kap mah ila tuman min umpha dawn chuanglo tii a silai chu a ak tha leh te te a, a piah mualpawng tlanchhiatna rem tak ni a a hruatlam chu a pan phei leh rih a. Chulai hmun atang chuan a țhelh a ring chuanglo na in tlem chuan a hla hretin a hria a, mahse an nanchin hmanloh na turah a awm a ngai si a, an inkar a kawrruam an rawn thlen meuh chuan hla tak a thlen thlen hman a ring ani.




Kunga chuan a silai chuan Ruma chu a rin ta vang vang mai le, a duhthusama a tin hnu chuan a hmetper ta. A thinte zinga ruma thu lai chu a thal tawp a, Kunga chuan a silai chu ak in hmanhmawh takin a chenna lam chu a pan ta nghal a. Tlangval thlanlai ho thung chu an chiai in a then an tlanchhia a, a then an bawk a, mahse rei vaklo ah ngai awh in a thenin ruma chu an buaipui a, a then khau ah kalin an zualko nghak bawk a, ruma chu hlang siamin thlan pawh laih chhunzawm talo chuan an zawng ta zawk a, Zova pawh zana phum lovin a tukah ruma nen a phum an tum ta zawk bawk a, Ruat ve thung chu, a hlauh em avangin khawiah mah chhuaklo in a tawm ta chawt a, Ruata chauh lo khaw mipui ho pawh an bang biklo, a tute mai pawh chu an ralți vek tawh ani ber. Kunga avangin mi paruk an thi zawn zat ani si a, naupang tap thlem nan pawh 'kunga alo kal' tiin an sawi țhaih a, naupang tap uar tak pawh an bang hmak hial thin ani. Khawchhung mi a lian a te in kunga chu sakei hliam ai pawhin an hlau vek tawh a, Kunga tan chuan chetlak pawh a har ta hle mai, khawchhung ah tlangval silai keng an duty a, chhunah ramhnuai ah an zawng reng bawk nen, Kunga tan chuan ruata han pelh pawh a harsa ta țalh mai. Chutihlai in ram palaileng ah mutmu tuah tha lo leh eitur tha pawh ei lova awm reng chu kunga tan pawh a hrehawm tan ta hle mai bawk a.

Tlemin khawchhung pawh an ralmuang ta deuh nge ni an hah tawngkhawng tawh zawk ni, zanlam ralveng pawh an awm talo a, chutihlai in ami duh ber ruata lah chu khawimah chhuak ngam lovin inah a tawm tlat mai bawk si, Fela te chhungkua pawh naupang nen an thlam tereuh te ah chuan tudang mah ngai bik lovin buh hmawr hmin êng tan tawh lawm ni awmtak in an ri laih laih a, mei eng chianglo ruai hnuaiah chuan naupang pahnih in chaw an bar malh malh mek bawk a, chutihlai tak chuan an thlam leika chu a ri țhat țhat a, puitling chuan ngawi rengin kawngka lam chu an thlir țhap a, an rinloh leh beisei reng reng loh in kawngka ah chuan kunga a rawn lang ta hlawl mai le, Fela'n kunga a hmu chiah chu a phu zawk hial a, Kunga chu lut turin an sawm ta nghal bawk a, thlam chhunga kunga lut mek chu fela nu leh chuan an lawm hmel em em loh na in an tilang lemlo a. Kunga chuan amah avanga an harsatna tawhah chuan a inthiam lo tih hriat takin thupha a chawi a, Fela nu leh pa pawh a hma aichuan an lungawi ta deuh a nih hmel. Kunga chu chaw te eitir in riak ve mai turin an sawm a, Kunga pawhin riah ve mai chu a hnial lemlo a, duh dahna tura an sak ah chuan kunga leh fela chu an mu a. Eng eng emaw sawiin an tlaivar deuh thaw hial ani. A tukzing tukțhuan eikham ah chuan rampalaileng lamah chuan a liam leh ta a, thudik puangtu tura a ngaih zova kha la dam se chuan tun dinhmun ah hian a ding reng tawh hauhlo tur.mahse thudik au chhuahpuitu tur a awm tak silo ah chuan a nungchunga ruat man mai loh chu a dikna hailan dan kawng a vang ta hle ani.

PART 11 - 15

Post a comment

Powered by Blogger.