Ziaktu-Hlimpuia
Episode 11
Mahse, tlangval a pumpa a nungchung a man tur chuan hnaih erawh a ngai dawn hle ani, engtin nge a hnaih theih tak ang le... Muk leh zualin a ngaihtuah tha leh a, thil pakhat a hrechhuak ta, mahse a tha ber lo maithei tih erawh a hria. Chutia rei tak a thut takah chuan khua pawh alo tlai lam ta a, Kunga chuan a eitur neih ang ang chu eiin a inhnawh puar a, tichuan khawchhung lam pan tur chuan a pen chhuak leh ta thauh thauh mai le. Thui pawh a kal hma in ni chu kawlah a herliam ruai ani ta mai a, hmanhmawh chuang hranlo chuan a kal zel a, unau hmelhai velah khua chu a thleng leh ta a. Ruata te in lam hmana a tawm tawhna thing hmun ngaw thim map lam chu a pan nghal a, a awmna hmasa thingbul ah chuan a thu ta ran mai le, muangchang a tho i a bula ram hrui nel tura a rin chu a lakhawm a, kut tum tiat vel thing chu satin a tum ram hman a Sawma an thah na ruata te inthiar na dai lam chu a pan zui ta nghal a, hnim in a bawh deuh laih thingbul chu phên in a thu âwn der der a, tipawh lo kal se hmuh chian theih a nih avangin a awmna hmun chu thlang fuh hle hian a inhria a, a nui ru ver ver mai. Thil ri deuh rap a hriatna lam chu a hawi vat a, Ruata pa inthiar tur a lam pana lo kal bauh bauh chu a hmu thei a, Kunga chu thawk pawh thaw ngam lovin a ip chawih chawih a, Lal nge nge chuan huhang a ngah deuh ani mahna.
Kunga chuan vanlam thlirin arsi tam tak de tuarh msi te leh thlasik kawng paw raih mai te, thla eng bial pup mai te chuan a nun khawhar tak chu an hnem sawng sawng in a hria a, a rilru ah a hmangaih Zampuii alo lang nghal a, hunrei tak a hmuh tawhloh avang pawhin Zampuii chu a ngai in a rilru chhungril tak mai chuan a thlahlel ngawih ngawih a, chutoang a thildang a ngaihtuah vang nge ni a hriatloh karin khuan hmasa an khuang ta al al mai. Angaihtuahna atanga rawn harh zawkin a insiam sawk sawk a, a innghah na dai lam chu a pan vat a, a zan khatna ah chuan Ruata chu a chang chhuaklo ta phawt mai. Mahse, beidawn mai chu a tumlo a beidawng thei pawh ani heklo. Amah avanga buaina nasa tak tawk a thianpa Fela te chhung chu a chhanchhuah a ngai a, tin, A nu phuba a lak zawh ngei a ngai bawk. Khua a var tan tihah chuan a awmna chu him tawklo deuh ni a hria in thingkung ah a lawn ta daih a, chuta țang chuan thinghnah phenin khua chu a thlir dauh dauh a, a lung a leng in nauoang ho tualchai a han hmuh te chuan ati tlei sawng sawng hialin a inhre bawk a, khua a thim thet thet țan tih ah chuan thing atanga chhukin a chân khân thingbul lam chu thawm dim thei angber leh muangchang in a pan a, inbul mai mah nise a ram a ngaw that em avangin chepa leh thehlei hi an hram tiar tiar reng thin a, chepa leh thehlei ho inhmuh tirlo thei angber in a kal zel a, a tum ram chu thlengin a thu leh ta ran mai.
Rei pawh ala thut hma leh khua ala thim chian hma chuan pen ri thlarh thlarh a hre ta a, pen thawm awmna lam chu rang takin a bih dek dek a, a thil hmuh chuan ati phu zawk hialin a hria. Thim chian tak tak hma chuh a inthiar tura dai lam pana lo kal chu a mi duh ber mai a nun tichhe vek tu leh a Nu that a, amah tuartir tu Ruata ani tlat mai. Rang tak leh thawmdim takin Kunga chu a thu tung zawt a, chutih lai tak chuan Ruata chuan a kal pel ve chiah bawk. A tawnhriat leh hunrei tak alo zir tawh thin ang in kunga chu rul tleng ang maia thawm awm lovin amah hnungchhawn zawnga kal Ruata chu a veh ta den den mai le, Ruata lah chuan thawm engnah hre lovin zial pet va va chungin van lam chu a thlir leh zauh thin a, chutah kunga thing ken chu a phe vuai a, Ruata lu chu a ri bap a,aw rawl pawh chhuah lovin a tlu zawi ta der mai a, lei a tluk thlen hma chuan hnehsawh zet mai in kunga chuan a pawm nawlh a, ramhnuai ah chuan a pawmlut vat a, a lawnna thingbul ah chuan nghatin a kut leh ke chu nghet takin a phuar mawlh mawlh a, chutia a insiam rem zawh chuan zo takin a pu nawlh a chak tak leh hnehsawh takin a chenna ramril lam chu a pan pui ta vang vang mai, khawchhung lam ve thung chu an buai nuaih nuai ve bawk a, khatia Ruata inthiar tura kal kha a rei tak em avangin a pa ngaih tha lo chuan a au va, chgangtu sn awm tak loh ah chuan meichher chhi eng in an inthiarna dai lam chu thlithlai turin a kal vat a, inthiar na thlen hma deuh a thingtum leh thisen tlemte lo bua chu hmu in Ruata pa chuan a khawnbawl te ko khawmin tlangau a au tir ta a, mipa puitling chin chu lal tualah an tlim hmur mai a, pasaltha Lalnâwta hovin Ruata zawng tur chuan an chhuak mek a.
Kunga erawh ram mi tih takah ramhnuai ah pawh Ruata pu chung chuan sakei ang mai a chakin a put zung zung a, reife a kal hnu chuan a chenna pûk tereuh te chu a thlen pui ta a, Ruata chu bghatin a phuarna te chu a han en leh zung zung a, Ruata hmai ah chuan tui un a leih țhawt țhawt a muangchang in a rawn che țial țial a, Ruata chuan a lu a rawn thing a, a lu dawm tum ni awm takin a kut dinglam chu chêt a han tum a, mahse a rawn meng kawk a a kut chu phuar belhbawm tlat ani tih a hmu rang kher mai, a mit chu phawk taka lenkual in amah lo en reng tu kunga chu a hmu ta, phawk lehzual in a meng kawk kawk a, a dangro vang nge a hlauh lutuk vang zawk lem tur pawh awmlo a chil chu lem tumin a hrawk bawk chu a kal rukh rulh thin a. Chutah kunga chu țawng chhuakin "Ruata, i va hlauhthawn hmel ve" ati zawi sap a. 'Ruata chu țawng ngaihna hre lovin a meng phawk hra reng mai a.
Episode 12
A changin an inhnek leh chawrh thin a, Ruata chu a mangang in a lungngai hle tawh mai, thudik puanchhuah ni tase a chan chhiat dan tur leh khaw mipui ten an ngaihdan turte, Zampuii' a ngaihdan turte leh a nu leh pa te zah dan turte a ngaihtuah chuan thih mai te pawh a duh zawk hial a, mahse thih em chu a ngam biklo ni tur ani, Kunga sawi ang apiang chu tih a inpeih lo ngam bawk silo, chu puka mi pahnih awm ten ngaihtuahna hrang daih pu a an ngawih vang vang lai chuan an thlang deuh ah chuan thir leh lung inkhak ri rak hi hria in an hawi thla rual țhawt a, an meng phawk dun ngei mai. Pakhat tan thawm lawmawm a nih laiin pakhat tan erawh ralțit dar ani tlat thung. Kunga chuan rang takin a awmna puk chhung thim druh raih mai atang chuan thawm awmna lam chu a bih dak dak a, an khaw pasaltha Lalnâwta tlu, in siamrem leh mek chu a hmuchiang hle mai. A silai chuan uluk takin a tin vang vang a, Lalnâwta chu che lo tur leh a silai dah thla turin a au tuarh a, pasaltha Lalnâwta meuh pawh a meng phar awn mai.
Kunga chuan na tak maiin a hmaiah chuan a hnek ri chawrh mai a, Ruata chu a țe țhawt a, a thal chiang ngei mai. Leiah chuan remlo zet a tlu in a khur hlawk hlawk bawk a, Kunga chuang tung tho in "zawhna ka zawh che in min chhang tha tawh angche, chutilo chu ka that mai angche" tiin a vau zui a, a ngawi leh ta vang vang a.
Muangchang a tawng chhuak leh in ruata chu rum em em a melh in "i thiltih zawng zawng kha puang vek la, in chet dan zawng zawng te nen. Tin, ka tih a nihloh thu te nen. Tichuan tun țum ah hi chuan i nunna ka zuah ang" ati ban chat chat a, Ruata hleu leh mangang lutuk chuan a 'aw' zung zung mai a, Kunga chuan sawi zawm leh in, dawt i sawi a min thah an tum a nih chuan i dam chuang lovang tih hria la, tuman min that dawn reng reng lo a nia tiin puk chhunglam chu a pan ta nghal a.
Khawchhung lam pawh an buai mup mup reng a, Lalnu leh Lalpa pawh in an fapa Ruata chu a ruang tal hmuh chu an beiseina neih chhun leh an sawi ber ani tawh a, an fapa chu a dam reng an ring tawhlo ani. Zanlam a ruata zawngtute pawh an hawng kim thawkhat tawh a, beidawng takin haw mahse beisei pakhat anla nei a, chu chu pasaltha Lalnâwta ani. A hmel hmuh tur ala awm ve lova, chanchin engemaw tal a hawn beisei in an khaw pasaltha Lalnâwta lo hawn hun chu an nghak țhap a.
Lalnâwta chu pasaltha tih takah beidawng a hawn mai chu a duhloh avangin ramhnuai ah chuan a vak kual zung zung a, chutia țhahnemngai taka a kal kual fe hnu chuan kunga hnu chu a hmu fuh ta hlauh mai le, riltam pawh sawilo vin a hnu hmuh chu uluk takin a chhui zui ta ngat ngat a, rei ngial a chhui hnu ah chuan kunga hnu chu luikawr ah chuan a hloh ta tlat mai, muangchang in lui chu a zawh chho zel a, kawrkam ah a perkai nge perkai lo tih chu uluk takin a mitmei reng bawk a, luikawr chu a zawh rei tulh tulh a, a khawkrawk in a te chho telh telh bawk a, Kunga te ve thung chu, Lalnâwta'n an awmna alo thleng tep tih hre lovin thudik puanchhuah dan tha ber tur ngaihtuah in chu puk tereuh te ah chuan thu eng eng emaw hi anlo la inzawt ve reng bawk a.
Khawchhung ah thlamuang taka awm a chak tawh hle in a ring a, mahse uluk leh fimkhur takin thil ati thin tih a hrechiang ta hle a, mi nazawng tan do chi a nilo tih pawh a hre bawk. Lalnawta chu a iptepui leh a silai lam panin a chhuk zui a, Kunga nen chuan duhsakna inhlan tawnin lalnawta chu a haw ta vang vang a, Lalnawta a thlirliam hnu chuan a eitur neih ang ang te chu ruata eitir in amah pawh chuan a ei ve pah bawk a, Ruata chu a taksa chauh vang nge a rilru chauh vang zawk, puk bang ngheng chuan a thu kun lap reng a, a phuarna chu uluk takin a han enkual leh zung zung a, a tha thawkhata a hriat avangin ngaihtha takin ruata chu a mut tir ta a. Khua a thim tan thet thet ta bawk a, Kunga chuan a zalenna hun lo thleng turte zampuii pa a thah sak avang khan zampuii'n a ngaidam thei angem tih te chu a lehlam kawng zawng takah chuan khua a han luh pawh chu a chakloh phah viau letling a.
Thuawih takin a silai chu leiah a dah a, Kunga chuan a ipte pui chu leia dah leh tur leh an awmna lam puk pawnah engmah keng lova lo kal chho turin thu a pe leh a, Lalnâwta pawn thuawih takin kunga sawi ang chu a zawm ve mai a, puk kaw kotlang a rawn thlen chiah chuan kunga chuan a hrui neihsa chu vawm phei in, a ke chu uluk takin a phuar tir te te a, muangchanga a ke phuarna a en hnu chuan a silai chu dahin lalnâwta ban chu a hnungkhirh zung zung a, puk ko eng laiah chuan a țhut tir a. Ruata chu a kaiphei ve bawk a, Kunga chuan engkim a bul atanga a tawp thleng a lalnâwta hrilh turin ruata chu thu a pe a, hreh zetin ruata chuan, Zampuiia duh em avang leh zampuii pa ten anlo duh ve bawk thu te, Kunga nu an thah dan leh kunga tih ang a an sawi dante, Kunga an sawisak a thi tura an hnutchhiah dan zawng zawng te chu kim takin lalnâwta chu a hrilh fai ta leng a. Lalnâwta chuan mak ti tak leh uluk takin alo ngaithla kar mai bawk a, Kunga chuan pawisawi lo Fela te chhung an tuartir dan leh zova an thah chhan te chu a sawitir zel a, Lalnâwta thinur lutuk chuan ruata chu a melh dur khuih tawh mai a, Kunga chuan lalnâwta en in, "hengho in ka chunga an tih zozai hi ka tuar thei tawh ngang biklo ani, keimah avanga a khawchhung an ralți em em te hi pawi ati takzet ani tiin thupha a chawi a.
Episode 13
Lalnawta chuan "inthiam lo reng reng suh, i thiamloh a awmlo. Heng mi nunrawng leh dawihzep ho hi khuati ralmuang lo tute zawk an nih phiangsen hlawm hi tiin a in sehruh hle mai a, Kunga chuan lalnawta a phuarna chu a phekh sak a, a kut leh ke phuarna a phelh chiah chu ruata chu panin a hnek let țhuai mai a, chhir zui leh ngha a tum lai tak in kunga chuan lo dangin in bengdai turin a hrilh zui a, Lalnawta thinrim lutuk chuan thah nghal mai duh mahse kunga chuan thudik sawitu atana zuah a duh thu a sawi tak avangin lalnawta pawh chuan a tilui ta lova, Ruata chu tung tho vin tui tlem an intir a, Lalnawta chuan khua ah hruai a thil engkim tihfel chu tha a tih thu a sawi chat chat a, mahse kunga chuan rem a ruat a. " Lo zu hawng la naktuk tukțhuan eikham ah ruata nen khua kan lo lut ang a, khawdai ah min lo hmuak dawn nia. Tlangval tlem a zawng lamțang min lo neihsak bawk la ka duh ani" tiin a ngen zui a. Lalnawta pawn kunga rawtna chu tha ati in fing ati ru hle bawk ani.
Kunga chuan thil thalo tak thleng tur a awm in a hre tan ta. Mipui lam lah chu anlo lang thei hauhlo mai leh nghal a, Kunga ngaih chu a tha thei tawh mawlhlo, a hlauhthawn ang ngei chuan thil hmuh a nei ta tlat mai a, lungphun chân khân remlai tlangpawng pakhat chhip chu silai keng mi pakhat hian a veh chho dan dan ani tih a va hmu thei a, mi pakhat chauh hmu mahse mi pakhat chauh a nih erawh a ringlo, Ruata lah chu lalnawta te ho chuan an dinhual țaih mai bawk si a, kap dawn pawh nise ruata chu hmuh pawh a hmu thei tawh derlo. Rinhlelhna leh fimkhurna neilo in lalnawta te chu khua ah zuilut na se chuan dam tur a awm tawh hauh lovang le. Tunah pawh a ruahman na thlak mahse a tan chuan an hlauhawm hle thei tih a hria, a hachang a țhial bap bap a, a awmna chu an rawn hualbeh hma a tlangchhuah a țul tih hria in a inher vat a, ala chen ngailoh na ram, an khaw thenawm te ram hnaih lam chu a pan ta vang vang a, ramhnuai kal a chak bawk a, chawhnu her ah chuan an khaw thenawm te ram chin chu a thleng ta der mai a, an khaw ramri ala hnaih avangin tlem a kal leh deuh a, luikawr ah tla thla in luite tui hang vawt raih mai chu a khiat khawlh khawlh a, a awmna ram chu thlek kualin tunhma a ala kal ngailohna ani bawk a, khawhar thlak ati hle mai a, a huntawn te a ngaihtuah letin â a inti hnuhnawh hle zawk a, ani hmeithai fapa nai mai in Lal fapa meuh tluk inring a, mite thinlung hneh alo inring ve kha tlem a tlem ah a thih phahlo chauh ani si a, mahse a dikna chu engtik ni ah enaw chuan hailan ala nih ngei a beisei tlat thung a.
Zingkhua alo var a, a hmabak chu nghakhlel tak leh huphurh ru tak chungin a ngaihtuah nasa hle a, Ruata muhil bawrh bawrh chu kaitho in a han inphih harh te te a, Ruata pawn enge an tih tur chu a hrechiang viau mai. Kunga chuan ruata kut chu hmalam ah a țawn sak ta a, a ke phuarna phelh sak bawk a, khaw lam pan turin luikawr chu an zawh thla ta hnak hnak a, Ruata chuan hma hruai a, a kut phuarbeh a nih avangin a kal chak thei silo nen kunga cguan dawhthei takin a chhawm zel a. Kunga chuan "i pa Lal ani a, khawchhung mite hma ah thudik sawi lova ka tihluih tir che anga i sawi vaih chuan that nghal lo che mah ila i dam khawchhuak dawnlo tih hria angche"tiin a vau deuh reng mai bawk a, a awmlo hran lemlo. A chhan chu kunga chuan thah ah a vau avanga sawi angah a insawi chuan kunga chan chuan maian chan pawh a tluk dawn silo a, muangchang a kal mah nise zing fir a chhuak an ni bawk a tukțhuan eikham vel awm ah khawdai chu an lut ta a, an piah lawka lalnawta leh a thiante pahnih ding pawh kunga chuan a va hmu thei a, Lalnawta te bul an thlen chuan kunga chuan a ruahmanna a thlak leh ta thut mai le, a chhan chu. Lalnawta emaw tupawh nise a ring zo tawhlo. A mi rin ngam chhun chu a thianpa Fela chauh ani.
Khatiang khawpa hmingchhia leh khawtlangin an hlauh khan, a mi man Lal fapa in a him nan a sawiluih tir mai ani ang tiin mipui in rindan an nei lovang tih a ring ngam biklo a, mi tam takin silai nen anlo chang lovang tih a sawi theih tlat loh. A ruahman dan chu tihian a'n sawi ta a. "khawdai lungphun ah khan i din pui ang a, tichuan thudik tak a sawi ang a, keichuan ral atangin ka lo ngaithla ang" tiin a sawi a. Lalnawta te chuan ngawi reng in kunga thusawi chu an zawm ve mai a, an lal fapa ruata chu an kai ta dat dat a, chu veleh kunga chu rang takin ramhnuai pik karah a put bo zawk a, kawng pangngai a mi kaldan aia chakin lungohun kawtchhuah thlirna tura an rinloh na lam tur ni a a hriat thakpui tamna lam chu a pan ta daih a, a hmun a thlen veleh thing phenin, a awmna chu fuh hle in a hre nghe nghe a, lungphun lan chian theihna ber niin a hre hial a.
Episode 14
Khua te alo tlailam ta bawk a riahna tur hmun zawngin a tei chhuak a, ramngaw dur khup ah chuan lutin chunglam chu a thlir dauh dauh a, thing pakhat kak lian deuh a zar pathum a ințhen na lai ah chuan buk sak tha in a hria a, hruizam ah chuan inham chho vin thing ah chuan buk a sa a, rin aiin a nuam zek leh nghal. A ril chu țam hle mahse eitur zawng a chhuahna hun ani tawh silo, riltam tak chungin a buk sakah chuan a mu ta ringawt a, a nu nena an chenna inah ralmuang taka mut a, chaw kawpuar ei a, a hmangaih em em zampuii nena inrem taka len a beisei tawh laiin chu a beiseina chu mangchhia ang lek ani zo leh ta si.
A silai chuan ruata dinna tura a rinlam chu a tin vang vang a, tha thawkhat hle in a hria. Chutia a țanhmun a siamrem vel chhung chuan ruata te pawn lungphun chu an thleng ve mek bawk a, Kunga chuan Lalnawta leh ruata chu an inbe ru tlat in a hria a, Lalnawta te thian pathum chuan ruata chu an veng niin a hre ta tlat mai, enghun ah pawh tawhsual tawk thei dinhmun ah a ding ani tih hria in a inring ta ran mai le. An chezia chu chîk takin a en reng a, a ngaihbel nge ni dawn lalnawta te chuan lungphun en na rem tak tlangpawng pahnih, Kunga pawn bihruk nana tha a tih em em, mahse fimkhur thu hla avanga a pan ngamloh lam chu an melh leh zauh zauh thin in a hria a.
Kunga ve thung chu rammi tih takah zanthim hnuaiah pawh a kal liam zung zung a um phak rual ani tawhlo. Pasaltha lalnawta'n thil thleng a hriat chuan a silai nen kunga zawng turin amah in a chhuak ve nghal a, an khaw innghah na leh an thlamuanpui ber miten an zah der em em a nih avangin kunga chu zawn hmuh a, a ruang chu an khua thlen ngei tumin a inseh ruh sauh sauh a, khawvar dawn thlenga an zawn pawhin tumah kunga hmu emaw a thawm hria emaw pawh an awmlo, Lalnawta tihloh chu an haw zo ta, khua a var hnu chuan lalnawta chuan kunga hnu chu a hmu fuh leh ta tlat mai a, a hmaa a awmloh na kam ramah kunga chu a awm a ring tlat a, tuna a hnu chhui pawh hi a dik ngei a ring tlat bawk. Ahmaa kunga a hmuhna ram nilo lamah a hnu a hmuh vang ani, uluk tak leh pasaltha ramvachal tih hriat takin zei tak leh remhre takin kunga hnu chu a chhui zel a, Lalnawta chuan luite tui, tui em em mai awmna kunga tlan ber mai chu a thleng ta der mai le, a chhawl hal lutuk chuan luite tui chu a in khawlh khawlh a, a duhtawk a in hnu chuan a zial pai chu a zu khu laih laih a, chutia a han hawikawi vel chuan mihring hnu a hmu leh ta a, hlawhtlin ngei a tum avangin a lawm rilru veng veng mai. Kunga hnuhma ni ngeiin a ring nghet tlat bawk a, a hma aiin thawm pawh a dim zual sauh a, Kunga chu a aia thiam zawkah dahin uluk takin a inbuatsaih a, Kunga chu thawmdim takin a veh leh țan ta.
A awmba ram chu hriatchian tumin a fangkual zung zung a, luite tui vawt khang raih mai chu a lem ri khalh khalh a, mitthla in nimin lama a huntawn te thlirlet in a thin a rim em em a, hma han lak zel dan tur pawh a bangbo ta khawp mai. Athinrim lutuk chu puakkeh thei mai dawnin a inhre hial a, Ruata chu thah a, an khua chu kumkhua atan chhuahsan vang vang mai te a duh rilru hial tawh ani.
A mit atanga mittui luang ngiai ngiai chu a kutin a hui kiang puat puat a, a rilru ti paukhauh in a hmabak chu hlenchhuah a nih theih nan ruata thah dan kawng a zawn tir ta zawk a, kawng hrang hranga a ngaihtuah hnu in kawng khat chauh a awm tih a hrechhuak ta a, a silai zen chu nisa ah pho in khawchhung a lut turin a inbuatsaih ta, Ruata chu an in ngeiah thah a tum ta ani. A rilru chuain tuman an umphak a ringlo tlat a, lo umpha in that pawh nise pawi tihna pawh a nei tawhlo bawk, a hmarua te ukuk taka a siam hnu chusn khua a lut turin a chhuak leh ta thauh thauh mai le, tlai thim thet thet ah khawdai chu a thleng ta hlawl a, khua chu nghah tkai deuh țha in a hria a, a vaihlo la neih tkem chu a zu vang vang a, a duh leh hmangaih em em zampuii chu a ngaihtuah rauh rauh a, kumkhua atan nei thei dawnin a inhre tawhlo, mahse vaeikhat tal zampuii hmel hmuh chu a chak hle mai.
Episode 15
Khua alo tlai tak deuh avang chuan thawm dim takin ruata te kawmthlang ramhnuai deuh chin chu a thleng ta a, uluk keh finkhur theihtawp in ruata te in chu a pan zak zal a, ralveng an awm nge awmlo tih chu uluk takin a melh kual reng bawk a, ralveng an awmlo hlauh mai, a tan pawh chet a awlsam ta sawt a. Ruata mutna lam ni awm a a rin chu a pan hret hret a, an inleng te chu anlo la ri lat lat a, Ruata mutna lama bang awng atang chuan a bih a, Ruata chu a nu in a pemlai ah chuan tualțo hnim damdawi alo hnawihsak mek chu niin, chulai taka thah chu kunga chuan a duh ta tlat mai. Bang awng lian deuh chu thing țangin a kam kau a, a silai hmawr chu tinlut in ruata lu um chu a tin ta teu mai, a kutzungțang a che zauh a silai chu a puak țhuai a, Ruata chu a let hnawk a, Kunga chuan engmah ngaihtuah zui lovin a silai hnungpauk in a tlan nghal vang vang a, Ruata nu chu a hamhaih hle mai, thil thleng an hriat meuh chuan a fapa duat em em chu a mutna ah thisen nen inpawlhsawp nuai in nunna a nei tawhlo tih hriat takin a let sawp reng mai a, amah pawh chu thisen per vel chuan a bual sen ve nguai mai bawk a, choka lama mite pawh silai ri avang chuan ruata mutna lamah anlo tlanlut ve nghal thuai a, chuta an thil va hmuh chuan a tute mai pawh chu a barakhaih tlang ngei mai. Ruata nu leh a unau te chu an țap hawm hawm hlawm a, Ruata pa an khaw lal nibawk erawh chu thinrim tih hriat takin a mengrum ul a, thenawm a tlangau pa rawn tlanlut hnenah chuan a rang theo angber a tlangval ho khawm tur leh kunga um zui a an hmu a nih chuan that ngahl tura hrilh turin a tir nghal a. Kar lovah a hre hmasa a piang mai chuan silai nen kunga tlanna niawm a an rin lam mi pathum zela inzui in an inthen darh a, Kunga chu an umzui zel a.
PART 16 - 19
PART 16 - 19
Post a Comment