HMANGAIHNA AVANGA TUALTHANA RAPTHLAK
Ziaktu-Hlimpuia
Episode 16
Kunga muhil chu thingțang tliak ri rap chuan a tiharh zaak mai a, nidang ah pawh thingțang tliak chu a hre fo mai. mahse a muhil a harh meuh chuan ni chu vanlaizawl ah alo her mek tawh a, inthing harh in leia chhuk a tum a, lei lam a han en chuan a rinloh ber te zinga ami ti ila kan tisual tampui awm love, Lalnawta a zuk hmu thut mai a le. Lalnawta lah chuan uluk leh thawm dim em em in alo veh țham țham mai si, kunga tho phang pawh chu a harh nghal kâwk a, a silai chu thawm dim taka banin lalnawta chu uluk takin a tin vang mai a, Lalnawta thil tihsual lianber chu chunglam en nachang a hrelo chu ani. Kunga chuan lalnawta'n a phatsan dante a ngaihtuah chhuak uar uar a, Lalnawta chu a that nghal dawn nge hun a pe leh zawk dawn tih chu bengsik in a ngaihtuah vang vang a, hun tlem tal pek leh chu tha a a hriat avangin lalnawta chu faifuk in a ko zauh a, pasaltha lalnawta meuh pawh a phu chiang ngang mai, a meng phar awn mai a, thla chu nei se a thlawk nghal daih lovang tih sawi theih a nilo, Kunga chuan an au ta lang lang a, a silai paih a chunglama ban phar turin ati zui a, Lalnawta chuan a hlauh em avanga lungphu in thum rawn tluk tluk chungin chunglam chu a han melh chho hram a, silai a tin rengtu kunga chu a hmu ta, chutia amah lo tin rengtu chu nimin maia a phatsan tak kunga ngei ani tih a hailo kher mai. a silai chu muangchang a dah thla in chunglam ah a ban a phar nghal a, Kunga chuan thinrim takin engvanga phatsan nge a nih a zawt zui nghal zat bawk a, Lanawta meuh pawh kunga hma ah chuan a zam chhe der mai, midang in lo hmu se chuan pawnfeng feng tlak lek ani anti hial mahna. An Lal leh khaw mipui te thusawi leh ruata te thusawi a awih avanga phatsan a nih thu te chu a thlun phelh ang zar zarin a sawi ta a, Kunga chuan a ring thei tawh tlatlo.
A kaw tawp atang chuan rin ngam neuh a har tawh pawh ani mahna le. Lalnawta chu silai in ala tin reng a, a cheng hmetper turin a kutzungchal hmawr chu a inring reng mai bawk a, Lalnawta chuan a silai chu chuhin a inbin ta thut a, chu veleh kunga silai chu a puak zui ta țhuai a, Lalnawta a eu zawk a, a thla zui nghal tawp a, Kunga chuan a silai zen chu a kua ah a beng leh mawlh mawlh a, lei lam panin a chhuk zui nghal a, ngau kah thlak ang maia let reng lalnawta chu a han thlithlai a, nunna a nei tawhlo tih hairual a nilo. Lalnawta zial leh silai mu leh zen te chu laksak in a ruang chu a pu uai a an khaw lam chu a pan pui ta a, reife a kal hnu chuan tuma hmuhloh in an khawdai chu a thleng thei hram a, Lalnawta ruang chu kawngbul ah dahin chepa kawngkân pet țhelh ang zawka rangin a inthiar fihlim nghal a, muangchang in a buk lam chu a pan leh ta a, Lalnawta ruang chu khaw mipui lo sûl haw thenkhat in an hmuh avangin chanchin chu a darh chak hle mai a, an khaw pasaltha lalnawta a thih avang chuan mitin mai chu an ngui ruai mai hian a hriat a, an Lalpa pawh a innghah na ber a thih avangin beisei tur dang neilo vin a indawm kung reng mai bawk a, an khaw pasaltha lalnawta chu an theih ang a ropui in khaw mipui te chuan an thlah liam ta.
Zampuii pawhin kunga chu a nitel in a haw ve ta telh telh a, a pa that tu leh an khawchhung ti ralkhel tu tiin a pawm țan ve mek ta mai a, Kunga pawhin a buk chu him takin a thleng ve leh tawh a, a eitur neih ang ang chu eiin a inhnawh ouar te te a, a pawisawi tu nilo an khaw pasaltha Lalnawta a that ta mai chu a inthiam lo ve hle mai. Kawng lehlama a ngaihtuah chuan amah phatsan tu a nih avang leh a nunna derthawnga dahtu a nih avang khan a inthiam chawp viau lawi a, a hmangaih zampuii a ngaihtuah leh a. Engtin tak ngai ang maw tiin zampuii'n a ngaihdan tur a han thlir leh rih thin a, a bukte ah chuan mu in karlo ah alo muhil zui ta a.
Khawchhung lam ve thung erawh chu an lal fapa leh an khaw pasaltha thattu chu zawnchhuah ngei tumin anlo inbuatsaih ve tluk tluk mai bawk a, Kunga lakah chuan mitin mai chu an thinrim takmeuh ani. Tukțhuan eikham a kunga zawng turin an inbuatsaih țheuh hlawm a, tlangval leh val upa te, pavalai deuh ho thlengin tumah awl tum an awmlo. An Lalpa meuh pawhin awl a tumlo ani, Kunga tan chauh chuan huphurhawm tak an tling ngei ang le.
Tukțhuan eikham ah chuan mipa puitling chin chu Lal in mualah chuan an ngir khup ta mai a, an Lalpa chuan pasaltha dang pathum ko chhuakin mipui pawh pawl thumah țhen lehin pasaltha pathum te chuan pawl khat țheuh ho turin a'n ruahman zung zung a, mipui insiamrem thawm vel chu a ri ham ham a, nu leh nula te, tar chaklo leh naupang chenin an khaw hmelma kunga zawng tura inbuatsaih mek te chu leikapui atang te chuan anlo thlir ve țhup bawk a, Lalpa pawhin pasaltha Vala pawl a zawm ve a. Khua chhuahsan a kunga zawng turin pheisen rual te pheilai an khai ta suau suau mai le.
Mahni pawl huamchhung chu hmaih nei hauhlo tura an infuih hnu chuan mahni ramchan lamah țheuh chuan an insem darh a, Kunga awmna lamah chuan Lalber leh a pawlte chu an kal ta thauh thauh hlawm a, thawmdim tak leh uluk thei ang berin ruam leh puk te thinzar te thleng chuan an en zel a, inhmu phak tawk thei zel tura kalin an tuamchin chu tu han hmuh hmaih theih chi a nilo. Kunga lah chu a buk bulhnai ah eitur a van tawh avangin eitur zawnga chhuah alo tum vek mek bawk a, kalna lam tur hre lovin a han ding vang vang a chutah mi khaw ram lama kal aichhuan tiin an khaw ram lam chu a pan ta, amah zawngtu an awm mek tih hria se chuan a kalna lam kawng chu a zawh hauhlo tur a nia, thawm pawh dim lutuk lemlo in thei leh sa kah tur melh in luikawr chu a zawh chho zel a, an khaw ramchin thing hmun ngaw lamah zawng kah turte a hmuh beisei in a perkai a, a hmuh theih chin tawk vela zawngrual țe thawm chu a hre zui nghal a, ti fuh inti takin zawngrual awmna lam chu a pan a, zawng ho chuan hlauh nei an ang riau hian a hria, mahse chutiang hmunah chuan mihring an kal a ring silo. Ram vak an ni thei tho tih hria in inring takin a awmna lam pana zawng lo phei te chu alo chang ran a, an rawn hnai hlawm ta hle maw tih ah a hmahruaitu a pa lian ber chu kah tumin a tin vang vang a, Kunga chuan anmahni um tu mihring an awm nia hria in kah loh mai a tum a, mahse chu zawng pa lian tak mai chu a ui angreng bawk si, a silai chuan a tin reng tho a. Mihring thawm chu a han ngaihthla leh phawt a, mahse zawngrual thawm chu a bengchhen em avangin thawm dang chu hriat har ati hle, chutah ngaihtha zanlo chung chuan a chungzawn a amah en kurtu zawng kian tha zet mai chu uluka takin a tin a, silai ri ah chuan ramngaw chu a khawk ta raih raih a.
Kunga chu a phu nasa ngei mai, a banpuam lum puat chu a dap nghal a, leiah chuan thu hniamin a ban thi țiam țiam chu a hup bet a,a kawr tlang chu pawt thlerin a theih ang ang chuan a tuam nghal a, Kunga chuan thil thleng mek chu a hre chiang ta ngang mai le. A dam khawchhuah nan a tlanchhiat ngei a ngai ani tih pawh a hailo, a rang thei ang berin ngaw chhungah chuan a zikzak in a thlun phelh ang maiin a tlan duk ta par par a, hmun hrang hrang atangin silai a ri țhuai țhuai a, Kunga bul thing leh hruizam te chu silai mu chuan a deng per leh sawk sawk thin a, an inkar a hlat tham deuh avangin kunga chu a him hram zel ani. A kap hmasa ber tu kha an pasaltha leh val û lam ni lovin rawlthar lam ani hlauh zawk a, chuti nilo se kunga chu a dam tawh hauh lovang.
Episode 17
Tin, khuannu remruat pawh ani ngei ang. Kunga um tute chuan an theih anga chakin um ve mahse ramhnuai a khawsa țhang kunga chu a mawngohe pawh an hmu zui hmanlo. Mahse a hlau tlanchhia a nih avangin a hnu erawh chhui a awl viau a, bansan mai tum lovin a hnu chu an chhui zel a, Kunga erawh chauh pawh sawi thei lovin hmalam panin a tlan zel a, a awmna chin pawh hre lovin a sahim nan a tlan mawp mawp ringawt mai ani. Khua a thim țan tih ah chuan thingbul ngheng in a thu hnawk a, a chau tawngkhawng bawk a niang a muhil zui ta bawrh bawrh a.
Kunga zawngtute ve thung erawh chu zanah pawh chawl lovin meichher nen an kal zel a, chutiang a chawl lova an kal zel chuan an inkar chu hla hle mahse karlo ah kunga awmna chu an thleng thei reng si, engthil emaw ni hian kunga muhil pawh a tiharh zawk mai a, vanlam chu thlirin thinghnah kar atanga arsi leh thla eng chu en in zanlai pelh lam hret ani tih chu a hre thei mai a, a chet zawnga a ban na zawk chu hrechhuak in a dawm vang vang a, a tuamna in a dan zawhloh avanga thisen ko chhuak thang ham ham leh thikhar tharlam lo hnam reng mai tih reh nan a kawr chu zai thler lehin a veh hnan leh a, a thisen chhuak reng avang chuan chau deuh viau in a inhre hial a. Mahse zanthim pawh sawilo in a sahim nan a kal zel a ngai si, a silai chuan a han inhawlh ding a a thlang kawr a kalna lam a hawi thlak nak chuan amah zawngtute meichher eng a zu hmu ta mai a, rang takin a hmalam ah chuan a kal zui vat a. Hliam neiin chau druh mahse ramhnuai ah chuan mi nazawng aiin ala vak chak ang tih hial tur ani, a kal pah chuan a hnu atanga chhui thei anni tih a hrechhuak a, a hnu a tih reh a ngai ani.a in ngaihtuah lah chuan luite chu a pan thla rawk mai a, a hnu thup dan tur chu a hrechhuak ta. Luikam lehlam ah chuan kalkai lovin luimawng lam chu a zawh thla a, thui fe a zawh thlak hnu chuan lung pialtlep awih deuh a hrui lo uaithla ah chuan a uai chho a. Harsa ti takin luikawr ruam chu hruia uai chho in a lawn chhusk hram a, lui atanga a penna hnu chu pialtlep lungah chuan a lan dawnloh avangin luikawr atang chuan a hnu chhui a har viau tawh ngei ang le. Tichuan tlangdung zui zawngin muangchang deuh hlekin a kal zel a, hah in chau viau mahse a theih anga thui chu a kal a ngai si ani.
Kunga um tute erawh an buai map map hlawm hle a, lui a pawhthlak na hnu chu an hmu ngei mai a, mahse luikawr a kanna hnu erawh an hmu ta tlat silo a, luimawng lam a zawh ang lui hnar lam tiin an inrin siak nak nak hlawm a, mi sawmthum vel an nih tho avangin Lalpa chuan pawlhnih a inthen a luimawng lam leh luihnar lam zawh turin rem a ruat ta, an lalpa chuan luimawng lama kal turte a hruai ang a, pasaltha Vala'n luihnar lam a hruai ve thung ang. Zing varțian ah engmah an hmuhloh chuan tuna an awmna hmuna inhmu khawm leh tur chuan an ințhen ta a. Luikam tawn tawn chu uluk takin an en zel a, zing khawvar thleng pawha engmah hnuhma an hmuhloh avangin an hmuntiam ah chuan inhmu khawm lehin ro hran an rel ta a.
Episode 18
Lalber chuan a mite chu fuihin beidawng lo a zawng zel turin a ti a,"a hma a kan zawn dan angin kan inthen leh ang a mahse kan zawn dan erawh kan thlak thung dawn ani, kawr kam atanga hla deuh ah luikawr kehlam lehlam ah inthen in kan zawng ang a, tin inhmu khawm tawhlo in mahni remchan dan angin kan awm mai dawn nia" tiin ro a rel a, an lalpa rorel dan ang chuan an inthen ta a.
Kunga pawh a hliam avang chuan a chau in a awm a nuamlo țan hle a, hmun rem deuh laiah chuan thu chawlin a hliam chu a theih ang ang in a tifai a, a kawr pawtthler leh in a tuam tha leh te te a, muangchang in khawilam nge a pan pawh hrelo chuan a kal leh ta zel a, amah zawngtu an lalpa leh a hote pawn kunga in uia chhoh na hmun chu reilote ah an thleng ta a, luikawr atang chuan a hnu langlo mahse a uai chhohna tlangzawl ah chuan a hnu chu an hmu a, kawr lehlam a an thiante au khawm in kunga hnu chu an chhui zui leh ngahl vat a, Kunga chu a rinlawk hauh lovin tlai thim dawn thet thet ah chuan tu lo nge tih pawh hriatloh ah hian a chuangkai ta hlauh mai a, buh hmin țan tawh eng sut hmun chu zawh chho in thlam chu a pan ta tawp mai a, nu pakhat thlam kawta mau ro lo tan mekin kunga a han hmu thut chu a phu nasa in a meng phawk hru mai a, tlangval samsei tak leh bal tak, hmuihmul buk zet mai, hun reitak ramhnuai a khawsa tawh tih hriat reng, hmel hriatloh keh nghal chutiang hmuna a han hmu thut chu tu tan pawh makti a hlauh loh chi pawh a nilo reng ani. Mahse kunga chuan hlauh tur a nihloh thu leh tanpui a ngaih thu te a sawi hnu chuan chu nu pawh chuan a hlau ko ta deuh ani ange kunga chu thlanah luh tirin an oa chawhmeh zawng chu a ko zui lauh lauh a, an pa pawh rang takin thlamah chuan lo lutin kunga a han hmu thut chu mak a ti ve tho mai.
Kunga hkiamah chuan an dawmdawi hriat ang ang te hnawih sakin thlam ah chuan an mut tir a. Khawi khaw mi nge a nih a engtia helai ram lo thleng nge a nih te an zawt ve a, Kunga chuan a chanchin chu a bul ret atangin kimchang takin a hrilh ta vek a, Kunga thusawi an han hriat meuh chuan kunga chu an khawngaih in an lainat ani zep rual lohin an hmelah alo lang chhuak ta hial a, nu ber chuan eirawng a bawl zawh tawh avangin hmamhmawh takin chaw te a chhum belh leh hnuhnawh a, khua alo thim tan tawh bawk avangin an pathum chuan kunga chanchin te sawiin zanriah an eiho ta a. Kunga pawh chaw pangngai leh chawhneh pangngai tak a eiloh na a rei taeh bawk a, a duhtawka a han ei meuh chuan chau rawihin a inhre hial mai. Chaw te an eikham hnu chuan lawmthu te sawiin kunga chu kal leh mai a tum a, mahse chu mite nupa chuan riak ve tura an tih tlat avang chuan riak ve turin a in tintuah ta nge nge a, mahse a ralmuan loh thu leh anni nupa tan pawh amah lo tanpui chu thil hlauhawm tak a nih thu te a hrilh vek chung pawhin riak tur chuan an tilui tlat ani.
Eng en emaw sawia an titi fe hnu chuan mut zairel in an puan chu a hrangin kunga mut nan an phah sak a, Kunga chuan lawmthu sawiin, hun rei tak chutianga a mut tawhloh avang chuan mut thiam har riau in a hre hial a, puar taka chaw a ei avang leh hun rei tak mutmu tuah tha meuhlo a nih avang chuan a muhil zui ta der mai.
Kunga hnu chhuitute pawh an chauh ve tawh em avangin ramhnuai ah chuan mut a,a tukzing ah umzui leh tha a an hriat avangin ramhnuai hmun rem laiah chuan muthmun an khuar ve ta sang sang a, Kunga an huatna leh an thinur na avangin a tute mah chuan kunga menlo emaw thatlo a haw tum reng reng an awmlo. Kunga an man emaw an thahna tur a nih dawn phawt chuan an nunna pawhin tawrh phah dawn mahse pawi tihna an nei tawh hlawmlo. An khaw muanna tur leh an chhungte himna turah ngaiin eng thil pawh tawrh an huam em em vek ani.
Zing khua a var tan tih ah kunga chu kal mai tumin a insiam a, amah khawngiah em em tute nupa khuanu malsawmna dil sakin chu thlam chu thlahlel hle mahse thawmdim takin a chhuahsan ta zawk a. Pan lam tur pawh hrelo in a tuikuk chembo hawi leh vang vang a, feh kawng zawha khawchhung luh mai nge tha angaram pilril lam pan tiin a rilru chu a insual buai hle mai. A taksa nawmsak duhtu a rilru lehlam chuan khaw lam pan a duh laiin a rilru lehlam thung chuan ramril lam pan chu a duh thung a, chutia a in ngaihtuah lai tak chuan silai puakri țhuai mai leh hmeichhe mangang au ruai ruai thawm a hre zui nghal a, chu ri chu khawi hmun atanga ri chhuak nge tih pawh a hrechiang hle bawk, rang takin thawm lo chhuahna lam, amah tanpui tute thlam lam chu fimkhur leh chak thei angber in a pan ta a, buh hmunah chuan bawkvak in thlam chu a pan zel a, thlam atanga hka vaklo a thlen chuan engthil nge thleng a tute thiltih nge tih pawh chiang takin a hre thei nghal mai. Lalpa chuan chu mite nupa chu Amah avang chuan alo dawpin kut alo thlak tih chu hmu theilo mahse an thawm atang chuan a hre thei a, thlam chhung hmu thei turin a awmna chu tlemin a siamrem a, chiang takin thlam chu a hmu thei ta. Thlam kawtah chuan patling panga hi silai kengin an ding a, thlam chhungah chuan amah tanpui tute nupa chu phuarbet in silai in anlo tin ran bawk a, Lalpa chuan a nau te pahnih chu mitmei in chu mite nupa khawngaih thlak tak mai chu chiang takin an tin ta teu mai le, an nu zawk chuan tap chungin an khawngaihna a dil laem lawm a, an fate anla naupan thu leh kunga kalna an hriatloh thu chu mittui nen a sam inthlah pawrchhap kar atanga Lalber en chung chuan a sawi țawk țawk a, mahse chung phuba lak chak a thinrim em em te lakah chuan awmzia a awm hmel loh hle mai a.
Lalber chuan, " a tawp nan vawikhat ka zawt leh angche u, in sawilo a nih chuan in thi ang. Kunga chuan uluk takin alo ngaithla kar a, nu ber chu a țap nasa ngang mai, an thi takngial dawnin kunga chuan a hria a, chu mite nupa lah chuan an sahim nan dawtsawi reng an tum bawk silo, mi khawngaihna ngah leh fa naupang tete nei lehnghal, tin amah avaga an thi mai tur chu kunga chuan a hmu thei ta nganglo a, a bawhna hmun atang chuan dingchhuak in 'Heta hi ka awm e" khawk rum rum khawp chuan a au ta tawp mai a, thlam kawta awmho chuan rang takin kunga chu silai a tin nghalin kah mai an tumlai tak chuan an lalpa chuan "kap suh u, a nungchung in i hawn ang u" tiin aw a rawn chhuah vat a, chutiang nilo se zawng kunga chu a fam chiang khawp ang. Muangchang in thlam lam chu a oan phei zel a, thlam kawt a thken chuan a tukhum chu a ri bur a, a mit chu a thim zui riai riai a engmah hre lovin a awm ta.
LAST EPISODE
Lalber chuan a naute chu thinrim taka hau in kunga chu hnunglam ah a kut phuar turin thu a pe a, a kut hnungkhirh a phuarin thlam kawt leichar ah chuan saruang ang maiin an mut zui a, lalpa chuan chu mite nupa chu ngaihdam a dil leh hnuhnawh a, Kunga chu an khaw tan a hlauhawm zia te leh mi a thah zawng zawng te chu hrilhin inthiamlo ang tak chuan a awm leh lawi a, Kunga thidang chu tuia leih harh in chaw an ei leh te te a, hlawhtling inti tak leh hmanhmawh takin an khaw lam pan turin thlam chu an chhuahsan ta a, rampalaileng kawng mumal awmlo a hah taka an kal hnu chuan kunga leh dimlo taka amah hruaitute chuan an khawdai chu an thleng ve ta nge nge a, an khawdai lungphun ah chuan hlado chhamin silai an hmetpuak dur dur a, khaw mipui a hre hmasa apiang te chuan lungphun lam chu panin an khaw ti mangang em em tu an unau an fapa, an nuțapa te thattu kunga mantute chu eitur leh intur anlo pe zung zung bawk a, Kunga erawh zawng chutiang petu leh lainat tu reng a nei lova, an lak atanga a hmuh chhun chu lung a vawm leh ben leh hnek te chu ani mai a, lal in tuala kaițen ah chuan kunga chu an phuarbet a, a dangro lutuk leh a taksa chau lutuk avang chuan men pawh meng tha hleithei lovin a ding sai ngar ngar a, lal chuan tihian thu a han sawi dap dap a. "Zanin ah kunga chungchan hi ka upa te nen kan rel ang a, kan thu tlukna chu naktuk zingah tlangau in a puang ang,tlangval hahdam deuh ho mi pali zelin inthlak in kunga hi ven zel tur ani" ati charh charh a, inchhung lamah a luhsan ta a. Zampuii chuan kunga an man tih thawm chu a hre na a, thudik tak engmah a hriatloh avang leh a pa pawh thah sak duhtu kunga chu a dem em avangin khawngaihna em em pawh a nei vak tawhlo. Miin kunga hmuh tuma Lal in an pan sup sup lai chuan an inah a inkhung bet tlat a, Kunga hian engvang in nge heng thil zawng zawng hi a tih ang tih pawh alo la ngaihtuah ngai reng reng loh chu a ngaihtuah chhuak hlawl a, thil pakhat hriatchhuah a nei ta. Kunga khan anu a that an tih kha hrechhuak in thil diklo inphum a awm ni ngeiin a hre hnuhnawh a, Kunga khan a nu a thatlo tih a hria.
Thil awmdan chu a bul atangin uluk takin zampuii chuan a ngaihtuah vang vang a, hetiang em em a kunga a awmna chhan alo ngaihtuah ngailoh avangin a inhaw tlai khawhnu leh a, a pa leh ruata ten kunga nu an thah sak kha kunga tih ah an puh ani tih a hrethiam ta a, thil awmdan leh kunga tawrhna zawng zawng a ngaihtuah chhuak a, amah a hmangaih avanga kunga hrehawm tawrh leh anu hial an thahsak dante chu ngaihtuah zelin kunga alo thiamloh a alo huatna te avang chuan dan rualloh in a mittui chu a sur zung zung a, eng ang hmel nge a put ang a, engtiang a țawp nge a nih ang? Chaw kawpuar a ei nfai awm silo, Kunga a khawngaih lutuk avang chuan zampuii chu a rilru a na takzet a, hlauh leh zah pawh dawn lovin an in atang chuan kunga hmuh tumin a chhuak zui ta a.
Lal in tualah chuan mi pali in kunga chu anlo veng a, mei eng pup avang chuan leika ban a an phuarbeh chu kunga ani tih a hre nghal mai a, a lu a kun tlat avangin a hmel erawh a hmu theilo. A sam sei tak chuan a hmel chu a khuh hlup a, a thawmhnaw lah chu a thler hniar uai sung mai bawk si, ramhnuai ah mahni in hmu ila chuan ramhuai ani tih mai tur khawpa bawrchhawr ani a, Zampuii pawh chuan a ringlo lek lek hial a, a huaisenna zawng zawng sawmkhawm in kunga chu a pan ta a, vengtu ho chuan lo tiding in a hmuh theihloh thu leh a tan a hlauhawm zia te, apa thattu a nih thu te lo hrilh in hawng leh nghal turin anlo hrilh a, mahse hun reilote tal hmuh a dil luih tlat avang chuan an phalsak ta hram a, muangchang in kunga thusawp kun lup mai pan chuan hmu chak si huphurh bawk si chuan a pen phei chhet chhet a, a bulah chuan thingthi in kunga sam chu hui kian sak pahin a kuai dak ta a, Zampuii mak ti lutuk chu a phu dawrh mai.
Hmana a hmangaih kunga nen kha chuan a in persan lutuk, a hmuihmul leh khabe hmul chu a buk chhup a, a cher in a dawldang em em mai bawk nen, a hmai te chu a ki hriamhraih mai a, a biang lehlam lehlam a dawmin zampuii chuan kunga chu zawi sapin a au ta a, muangchanga a mit rawn meng țial țial in kunga chuan amah au rat rat tu chu a hmu ta, hunrei tak a hmangaih keh duh em em maiin a hmai dawm chunga amah alo en khiau mai a hmuh chuan a mumang emaw ati hial a, mahse a hawikual vel a, a mumang a nilo tih chu a hria. Zampuii mittui tla chuan kunga thinlung chu a su nghing ngei mai, an khaw tana misual leh a pa thattu ani si a, Kunga chuan zampuii'n a pawm leh theih pawh a ring tawhlo kha ani si a.
Zampuii'n aw thâm thawp sat keh fiah tak si a ngaihdam a dil meuh chuan a țang a pawm vawng vawng a chak na ngiang mai. Mahse a kut chu banah phuarbeh ani si a, Kunga chuan ngaihdam a ngaih zawk thu te sawiin a hmangaihna biahthudi chu zawite vawt raihin a hlan ve leh a, chutihlai tak chuan vengtute chuan zampuii chu haw tawh turin an hrilh a, Zampuii chuan kunga chu kuahin a pawm vawng vawng a, chutah tlangval pahnih chuan zampuii chu țhâmin an pawt țhen a, Kunga chuan zampuii chu a thlir zui vawng vawng a, thim chin atang chuan zampuii pawn a thlir ve bawk a, muangchanga inher in zampuii chu a pilbo zui ta. Kunga chu thihna kotlanga ding ni mahse a hlim hle mai.
A tuk zing takah chuan tlangau chuan lal leh upa te thutlukna chu khaw mipui te hriattir in a au ta a, Kunga chu tukțhuan eikham ah kawtchhuah lungphun ah khaihlum tur ani a, mipui zawng zawngin en bawk tur ani ang tiin a au ta.
Chu thu avang chuan zampuii chu chaw lawh ei thei lovin a khumah mu in a țap tlawk tlawk reng a, Kunga pawh a hmabak thm tak avang chuan beisei nei tawhlo tih hriat takin a hmel chu a ngui em em bawk a, tukțhuan eikham chuan mipui ho chu Lal tualah lo pungkhawm in kunga chu kawtchhuah lungphun lam panin an kailiam ta. Chu tlangval, a naupan lai atanga pa neilo, a nu in rethei taka a enkawl seilen, rual awt reng reng a khawsa, a damchhung hun tawitea hrehawm tinreng tuar chu a thih dawn thlengin ava vanduai tehlul em. Mite huatna tinreng phur chungin khaihlum ani ang a, vuitu leh uitu pawh neilo, lainattu pawh awmlo in a ui thisawn thih mai dawn ani si a. Thing a an hrui hlin hmawr a an valh ah chuan a lu an rawlh ta ran mai le. Tlangval pahnih in a malpui lehlam lehlam ah an chawi a, a kuthnung an suih sak bawk a, Lal in thlah tura thu a pek hunah kunga chawitute chuan an thlah dawn ani.
Mi tamtak thattu misual leh mi nunrawng tak a nih avangin khaihlum a nih tur thu te chu a aupui lang lang a, khaihlum tur thu a pe ta. Chu veleh kunga chawitute chuan an thlah nghal a, Kunga chu a inkhai ta. Khuanu hian fahrah rethei leh chhantu ngai em em te rumri hi a ngaithla lovem ni..Nilo.. a ngaithla reng ani. Kunga inkhai rual deuh thaw chuan silai a puak ri dur a, Kunga inkhaina hrui chu a chat nghal hmawk a, Kunga chu leiah a tla thlawrh mai a.
Silai puakri leh kunga inkhai na hrui chat bawk nen mipui ho mak ti lutuk chu an hawi phawk hru vek mai a, mitin mai chuan silai a rawn kaptu lam chu an hawi țhup a, mi tamtak chuan eng thil nge lo thleng tih pawh an hrethiam hauhlo. Mahse kunga mantute ho chuan an hma a ding kunga lo humtu leh mi țhahnem tak an hmuh chuan thil awmdan chu an hrethiam mai a. Chungho chu thlam a kunga lo bawihsawm tute khaw ho kha an ni. Thil awmdan chu hetiang hi alo ni ta a, khatia thlam a an nupa thah tum a kut an thlak vak hnu a an kalsan veleh khan an khaw lamah tlan hawngin an Lalber hnen ah thil awmdan zawng zawng an hrilh nghal a. A ram chhunga lal dangin a khaw mite kut a thlak avanga an lal thinrim chuan a zan la la in kunga te khaw lam chu an pan alo ni a, a hun takah an thleng nge an thleng tlai hret ni dawn le. Kunga chu thlam a lo bawihsawm tupa khan an lamah a pawm phei nghal in a buaipui nghal char char bawk a, khaw lehlam Lal chuan ring fiak țhakin tihian thu a sawi zui a.
"Nangni hian midik thiamloh in chantir ani, tin, ka ramchhung ah rawn lutin ka khua leh tuite kut thlakin thah hial in tum a, he tlangval huaisen, dik leh rinawm tak avang chauh vin ka khaw mite an him a, he tlangval avang bawk hian in him phah ani. Ka khaw mite kha lo that ni ula chuan tumah ka zuah lovang che u, tunah hian ka khaw tlangval ten silai nen an hual vek cheu a, chet thawh in awm chuan in thi ang" ati lang lang a, chutah khawtual Lal zawk chu lo țawng ve in, Kunga chu a fapa thattu a nih thu leh midang tamtak thattu a nih bakah an khua ti ralți tu a nih thu chu a sawi vel leh a, mikhual Lal zawk chuan kunga rawn țhu chhuak en pah in "he tlangval hian kan zavai a hma ah hian thudik tak chu han sawi tehse" tiin kunga chu a sawm a, Kunga chu muangchang in lungphun pawnglai ah chuan dingin,an sawisak dan zawng zawng te, thi tura an kalsan dante. Ruata thianho zing ami zova thu hriat, a nu an thah dante, Zova kha a thah a nihloh thu leh ruata te thah a nih dante, ama thah ang a an puh thu te,thudik sawi tura amah puih a tum avanga a thiante ngeiin an thah thu te, heng zawng zawng thlen chhan chu Zampuii nen an in hmangaih vang a nih dante, Ruata'n zampuii a duh ve thu leh zampuii pa pawhin makpa atan ruata a duh thu te, a nu thahna a zampuii pa a inhnamhnawih thu te, mi zawng zawng thah a tumloh thu te, phuba lak a duh vang mai a khang thil kha ti a nih zia te mipui pungkhawm ho hriatah chuan a au chhuahpui ta a, hmeichhe rilru no deuh ho chuan kunga chanchin an han hriatchian chuan an mittui an lo hru malh malh hlawm mai a, khaw mipui te leh Lal in chu thu an han hriat meuh chuan kunga chu an lainat in an khawngaih hlawm hle mai a, khawtual Lal zawk chu rawn ding chhhuakin muangchang a kunga rawn panin a hma ah chuan ngaihdam dilin a thingthi a, Kunga pawh lawm avanga mittui tla chungin a hma a thingthi mek an Lalpa chu a kaitho a, muang taka Lal in kianga in sa a, a aiawh turin lal chuan a sawm a, mahse kunga chuan a ngaihven lo. Mipui kata a lam pana țap chunga lo kal mek zampuii chu alo melh tlawk tlawk a, Zampuii'n a bul a rawn thlen rual rual chuan lungchim taka inkuah in danrual lohin an mittui a sur dun zawih zawih bawk a.
Kunga chhanchhuak tute chu riak ve tura an sawm hnu pawh a haw leh nghal an tum tlat avangin an hawng zui a, Zampuii nu chuan kunga chu an in a khawsa turin a sawm a, Zampuii te inlam ah chuan an kal ta nghal a, Zampuii nu chuan zampuii leh kunga chu khum khatah a riah tir a, nupa anlo ni ta a. An khua ah karkhat an awm hnu chuan kunga chuan an khua chu A NU an phumna mah nise nuam a ti thei tak tak tawhlo. Nakin ah a mi thah tawhte chhungten anla huat mai theih avangin an khua chu thlahlel viau mahse kumkua atana chhuahsan turin rilru a siam a, a nu thlanah kalin derhken te a phun a, a mittui chu a rawn hnam țiam țiam a, a nu rauthla chu "Mangtha aw ka nu" tia thlah in, kumkhua a let leh tawhlo turin a nupui leh a pizawn te nen chu khua chu an chhuahsan ta a.
Khaw nuam leh thengthaw takah insawn in tahchuan fanau maltluan chawi in kunga leh zampuii chu hmangaih taka in enkawl in tarkun khupbih thleng a damin mual an liam ta a.
------ A TAWP TA ------
Post a Comment