Thla thar April ni 11-a Lok Sabha inthlan neih tur atan candidate tur a chiang tawh a, ruling party MNF Candidate Pu C Lalrosanga chuan MP atan thlan tlin anih chuan Mizoram vote khat chu thil tithei tak leh tangkai taka hman a tum tih a sawi.
Mizoram Lok Sabha MP Candidates 2019
Vawiina kan correspondent in a kawmnaah he thu hi sawiin Pu C Lalrosanga chuan India ram zau zawk ah Mizo te sakhua leh nihna nek chep emaw sawrzim emaw a nih lohna tur leh nasa taka hmasawnna hmuh anih theihna tur in hmalak a tum em em a ti a.
India ram khawpui ber Delhi lamah te Mizoram tan tihtheih thil tam tak a awm tih a hriat thu sawiin ramchhung hmun hrang hrang ahte sorkar hnathawkin a awm tawh a, chutah chuan state dangte an hmasawn zia te, Mizoram erawh kawng hrang hrang ah a hnufual zia te, kum 10 kalta chhunga Mizoramin hma a sawn tam loh zia te a hmuh thu sawiin, hmasawnna tura MNF sorkar hmalakna theitawpa tawiawmin parliament ani emaw pawnlam ani emaw, central sorkar ministry leh dept leh hmun hrang hrang ahte theih ang tawka Mizoram mipui mamawh leh an beisei te bawhzui a tum tih a sawi a ni.
Central sorkar hnuaia subject hrang hrang ramri chinfel ngai chinfel te, ramri humhalh ang chite, leilung hausakna lakchhuah leh humhalh kawngah te nasa zawka hmalak a tul a tih thu sawiin, Mizo hnam ziarang leh sakhua te nasa taka humhalh tul a tih thu a sawi bawk a, hemi ti thei tur hian hnam zalenna leh chanvo te humhalh a ngai a, a dal zawnga hmalakna a awm chuan chiang takin dodal a tum tih a sawi a, parliament-a Mizoramin vote khat chauh a neih chu tangkai taka hman a, Mizoram tana thalo leh pawi thei thil reng reng chu, a do zawnga vote thlaka phar mai zel a tum tih a sawi.
Congress party leh ZPM ten an thlawp, Independent Candidate Pu Lalnghinglova Hmar chuan Mizoram ah chuan a inghahna chu party a innghat ve lemlo mipuite a ni a ti a, chumite chuan an puih chuan a tling thei ngei ang a ti a, Mizo thalai India parliament ah an auh a hun tawh a ti.
Pu Lalnghinglova chuan MP a thlan tlin anih chuan Mizoram tan tun aia nasa zawkin rawng a bawl thei dawn tih a sawi a, sports lamah football chu an bultan na ani a, engmah neilo a bul an tan theih chuan, MP fund nen tangkawp in MP dang a hmelhriat tur te leh corporation lian zawka hmelhriat tur te nen tangkawp chuan Mizoram tan tun aia nasa zawkin rawng a bawl thei tawh ang a ti a, a theihna sang ber, a pension hnu ah nilo, a taksa pawh a that laiin thawh a inhuam tih a sawi a ni. ~ AIR Aizawl
Post a Comment