Mizorama thuthehdarhna lam thawktu hriat hlawh, ZONET Cable TV-a Director, nimina Ebenezar damdawiina cancer avanga thi ta R.K. Lianzuala chu vawiin khan Bethlehem Venga an chenna inah vui a ni.
R.K. Lianzuala hi Bethlehem Presbyterian kohhran bialtu pastor Rev. Lalzawmliana'n vuiin chhungkaw aiawhin R.K. Lianzuala nupui Pi Tabith Laltlanchhungi leh a u, Dr. R.L. Dangvela te'n thu an sawi bawk a. A vuinaah hian mi an tam hle a, chief minister Pu Zoramthanga, minister engemawzat leh MLA thahnem tak, political party hruaitu lawk, Mizoram sorkara official pawimawhte, kohhran leh media lama a thawhpuite leh amah uitu leh ngaisangtu tam tak an kal a. A vuina inkhawm hi Zonet chuan a hunlai la la in tv-ah an pe chhuak a ni.
Kum 53 mi Pu RK Lianzuala hian a nupui leh a fate pahnih a kalsan a. Kum 1991 atang khan chanchinthar theh darh lam hna thawk tanin All India Radio Aizawlah chanchinthar chhiartu leh saptawng chanchin thar lettu, News Reader cum Translator hna contract-in a thawk a, kum 1992, April thla atang khan Mizoram sorkar hnuaia Printing & Stationary Deptt.-ah Editor hna a thawk a. Heta a thawh lai hian kum 1996 November thla atangin Deputation-in All India Radio-ah Assistant News Editor hna a thawk a. Hemi chhung hian Thomson Foundation UK-ah training-in Diploma in Broadcast Journalism a zo a ni.
Kum 2004, November thlaa Zonet Cable TV Pvt. Ltd. a din tan khan sorkar hna a thawh chu bansanin hun puma thawkin, a khaipa ber a ni a, a thih ni thlengin he hna hi a thawk a ni. ~ AIR
Post a Comment