MIZO ZINGA CHAK BER P. LALCHAMLIANA, LUNGLEI - TIMES OF MIZORAM

1 Apr 2019

MIZO ZINGA CHAK BER P. LALCHAMLIANA, LUNGLEI

MIZO ZINGA CHAK BER P. LALCHAMLIANAMizoram Powerlifting Association (MPA) leh ZONET Cable TV Pvt Ltd buatsaih Mizo Pa chak ber thlanna chu zanin March 30, 2019 khan Hawla Indoor Stadium-ah ropui taka khar niin a chak em avanga ‘Cham-Chaka’ tia hming lem an vuahsak hial P. Lalchamliana, Venglai, Lunglei a champion.



Kum 2011 a Mizo Pa chak ber zawnna buatsaih a nih ţum khan Chama hian hnehsawh takin pakhatna a hauh a, kum 8 hnuah pawh a ber nihna hauh nawn lehin kum riat kal ta ai kha chuan elpui a nei hrawl zawk.

Tun ţumah hian Mizoram hmun hrang hrang atangin ‘kei ka ni’ inti chin thiau, a tul a nih phawt chuan truck hnunga bawng chal thehkai thei mai tura ngaih mi 15 an tel a. Inelna chi hrang hrang 12 hmanga ni 7 chhung zet intihsiak a nih hnuah zanin khan a tawp na’n 80kg zeta rit Thing tum incharkan tam siak (log press) hmanga inelna neih niin hnehna chan phu Chama chuan a ber nihna a hauh ta a ni.

Intihsiakna chi hrang hrang 12 – (1) Buklung 50kg a rit kut khingkhata incharkan tam siak, (2) Truck Body a bungraw inhlankai siak, (3) JCB ke innam leh siak, (4) Lungtum inchawisiak, (5) Ritkhai chunga intlansiak, (6) Motor inhnuh kalsiak, (7) Buhfai bag inthiar siak, (8) Motor ke hnung zawnga invawrhsiak, (9) Lei atanga Motor inchawi kan tamsiak, (10) Motor inpawh kalsiak, (11) Weight Plate 20kg a rit inchar reisiak (12) Kokia rit pu chunga thawhpui leh dinpui hmanga inelna neih a nih hnuah Lunglei pa chak Chama leh Thingsulthliah pa chak Ngurthanzauva Sailo ten point 176 ve ve hmuin champion zawk tur hriat loh khawpin an intluk a, hei hian final boruak lian tak a siam .

Inelna chi hrang 10 an tih hnu thlengin Chama hian hma hruai mah se, Kawng leh Malpui tha hman tam ngaihna - lei aţanga motor inchawi kan tam siak leh kokia rit pu chunga ţhutpui a thawhpui leh (squat maximun) hmanga inelnaah erawh a che fuh tawk lova, point 7 ve ve chiah hlawhchhuakin hemi ni hian belhkhawmin point 14 chiah a thawkchhuak.

Hetih mek lai hian a elpui Thingsulthliah tlangval Ngurtlanzauva'n inelna pahnih aţanga point 33 a hmuh belh theih avangin point 176 tho hmuin Chama hi a rawn nihrual ta thung a ni.

Zanin inelna (item) hnuhnung ber hi ban tha chakte chungnunna tura ngaih niin pachak inthlur bing pahnihte hi a tawp lama inlan turin an awm dun a. Chama hi Ngura hma chiahah inlanin 80kg a rit chu vawi 13 zet a chawi a, a hnuhnung zawka chawitu tur dinhmun tha zawka ngaih ni mah se, a theihna zawng zawng sawmkhawma a hma chiah ami khum ngei tum Ngura hian vawi 8 bak a chawikan theih tak loh avangin Chama hian kum riat kal taa Mizo Pa chak ber nihna a lo hauh tawhna chu a vawnhim chhunzawm ta a ni.

Cham-Chaka chu : 
MIZO ZINGA CHAK BER P. LALCHAMLIANACham-Chaka tia sawi mai thin hi awmhmun rawtah na na na chuan Mizo zinga chak bera ngaih niin nikum October 3-6, 2018 chhunga Mongolia-a khawvel huap rit inchawisiak 36th International Power Lifting Federation huaihawt World Masters Powerlifting Championships neihah pawh khan ‘Bronze Medal’ a lo la tawh nghe nghe. Mongolia khawpui mihring nuai 13.8 zet khawsakna hmun Ulaanbaatar-a intihsiakna neihah hian khawvel ram hrang hrang 23 atangin Powerlifting Athletes telin a ram ang pawha hetiang kawnga chhuk en India tan P. Lalchamliana hian medal lain Mizo leh India a lo tihmingtha tawh a ni.

(Khawvawt a tuar thei hle a, Mongolia khawpui vur sur seng seng karah pawh T-Shirt banbul, Kekawr bul leh Chapal nen khawlaiah vawt thununtu niawm takin a tei ţiah ţiah thei a, mi mak tih a hlawh hle).

Amah i han en thuak chuan ţhalai chaw ei tui satliah, ţhangthar mut duh satliah, awm awl eitui avanga vum ta thur emaw i ti mai thei! A bulah awmin han titipui mahla pa chak a ni tih i la hre chuang lo vang. A chanchin i hriat duh chuan a ţhiante i zawh emaw a ritchawi lai emaw i hmuh a ngai ang. A chhan chu a infak ngai lo va, chhimbu dawi titiha zawh fe loh chuan a chakzia a sawi ngai lo. Mahse, India ram pum huap ang pawhin a chak a ni!

Pu P. Lalchamliana hi Pu Lalrozara leh Pi Chawngthanzami te fapa niin pianpui unau mipa 2 leh hmeichhia 2 a nei. Naupan lai aţanga mi chak ngaisang niin kum 1998 khan Tuikual Gym-ah a kal ţan a, mahse, thla hnih bak hun a nei lo. Kum 2002 khan Aizawlah lehkha zir turin phei leh mah se Gym kal bak a rilruah awm thei lovin hemi kum hian a chakna lam hi a luhchilh ta nge nge.

Mahse, a hlawhtling mai lo. A ţha ber dawttu nia a tawp a khar chang a tam. Kum 2003 khan Ţhuamluaia Muala Insuknawr an buatsaihah telin semi-final a thleng. Palian huangah ani 76kg chauha rit tan a ber nih a har rih. Kum 2005 a AR Lammuala Insuknawr leh Inbuan an buatsaihah khan Palian huangah telin 2-na ve va a hauh pha ve ta a, kum 2006 a Lungleiah Inbuan leh Insuknawr neih leh a nih chuan 1-na ve ve a hauh thei ta.

Infiamna dang tharum hman tam ngaihna Wrestling leh Arm Wrestling khel pah bawkin Wrestling-ah hian Mizoram huapin Gold 10 leh Silver 2 a la, Mizoram pawnah Silver 4 a la bawk. Senior bikah phei chuan National Games khel tura tling hmasa ber a ni. Arm Wrestling-ah pawh kum 2003 khan Silver Medal lain Judo a khel tel bawk a, North East India huapah Gold Medal 1 leh Silver Medal 11 a la bawk a ni.

Mi chak ngaisang, a ngaihsante nihna ang nei chho mek a nih avangin thahrui hman tam ngaihna infiamna hrang hranga tel chho zelin kum 2006 a Sub-Hqrs YMA, Lunglei huaihawt ‘Chhimbial Chak Ber’ zawnnaah pakhatna a ni a, kum 2011 a Mizorama chak ber zawnna ‘Mizoram Strongest Man’ ah khan telin 1-na a hauh leh bawk. Khami ţum khan a tel ve dang ten an khan lo hle a, a elpuite hi 2-na nih tumin an inel a ni ber.

Awmhmun rawtah a ţha em em a, tunhnai deuh aţang phei kha chuan Power Lifting-ah India ram ang pawhin han ter pha an awm lo hle. Nikum January thlaa National Level Power Lifting Championship, Tamil Nadu-a neihah khan Gold Medal lain, kum 2018 February thlaa North East India huap inelna Silchar-a neihah khan a telpui ten ‘A re’ an tih khawpa rit chawiin Gold a la leh.

Tichuan, September 26-27, 2018 chhunga National Classic Championship neihah khan Gold Medal la lehin Mongolia-a intihsiaknaah India ram aiawha telin Bronze Medal a hlawhchhuak leh a ni.

Pa chapo lo tak, tawng tam lem lo, bang phen aţanga a aw ringawt hre tan phei chuan zuamawm ve tak tur Chama hi Pathian ţih mi niin tun ţum inelnaa a tel dawn hian a duh anga inbuatsaihna hun a neih ţhat tawk loh avangin ţum dang zawng aiin a ţawngţai tam a, ţawngţainaa bul ţanin ţawngţaina vekin a tawp a khar.

Zanin intihsiakna dawn khan ţhingţhiin Pathian hnenah a inkawltir a, a ber nihna a hauh hnuah pawh khan tun dinhmun hruaithlengtu chu theihnghilh lovin ţhingţhia ţawngţaiin Pathian hnenah lawmthu a sawi a, ama theihna a ni lo tih hriain mipui hmuhah ‘Ka Chakna Lalpa’ tih inziahna T-Shirt a rawn phochhuak nghe nghe a ni.

Hei mai hi a la ni lo, champion lawmman pawisa fai Rs, 1,00,000/- a dawn zahve zet chu Pathian hnenah a hlan let dawn a ni!

Eizawnna lamah kum 2007 khan Mizoram Police-ah lutin Constable rinawm tak a ni mek. Police Department tihmingţhatu a nih piahah Mizo leh India ram tana mi chhuanawm a ni a, ram; hnam; sorkar tana a thiltih ţhat tam tak avang hian mipui leh pawl mai ni lo, sorkar pawh hian a chawimawi let a hun ta hle mai.

Ani aia chawimawi phu hi tun dinhmunah tunge awm chuang? Dinhmun sang zawka hlankai lo ni ta se tu han thik rual a ni dawn em ni?

Chhinchhiah theih chinah hetiang hi a medal lak tawh dan a ni (hmaih palh a awm mai thei):-

Mizoram : Gold 19, Silver 4
NorthEast India : Gold 5, Silver 5, Bronze 1
National : Gold 3, Bronze 1
International : Bronze 1

Nikum World Masters Powerlifting Championships, Ulaanbaatar, Mongolia-a medal a lak tuma a thusawi hian hnu khar dawn teh ang :

"Ka tan he medal hi a hlu tak zet a, kum 20 zet sport ka luhchilh hnua International medal ka lak hmasak ber a ni. Hnam dang, kei aia pumraw lian leh chak zawkte zingah medal ka la thei hi Pathian min kaihhruaina avang liau liau a ni." – P. Lalchamliana

~Lallawmkima Hmar

No comments:

Post a Comment