AGRICULTURE DEPARTMENT-IN A TIHTUR A TI LO - TIMES OF MIZORAM

30 Mar 2019

AGRICULTURE DEPARTMENT-IN A TIHTUR A TI LO

Thuziak lawrkhawm Agriculture Minister Pu C. Lalrinsanga chuan Mizoramah hian leilet a siam theih ram hectare 74,644 a zau a awm a, chumi aţang a hectare 17,000 chuang hret chu leilet a siam a nih tawh thu tunhnai khan Assembly a hrilh a. ZPM member Pu V.L. Zaithanzama zawhna, ziak a chhangin Pu C. Lalrinsanga chuan Agriculture department hian Mizoram pum land survey data a neih loh avangin Mizoram pum buh thar theihna zau zawng hriat theih chiah a nih loh thu a sawi a. Mizoram Remote Sensing Application Centre (MIRSAC) in an hmuhchhuah danin Mizoramah hian ram zâwl, leilet a siam theih hectare 74,644 a zau a awm a, chumi atanga hectare 17,000 chuang hretah leilet siam a ni tawh a. Hei bakah hian kumtinin tlangram lo neih a ni a, tlangram lo neihna atan a buh that theihna awm zau zawng hi chhut chhuah a ni rih lo niin a sawi.

 He zawhna a chhanna-ah hian Minister chuan kum 2017-18 a Mizoram buh thar zat chu metric tonne 59,605 a ni a ti a, kum 2016-17 khan metric tonne 61,516 tharin a hma kum 2015-16 khan metric tonne 62,089 thar chhuah a ni ati. He zawhna hi zawhna pahnih anga kal a ni a. A hnuhnung zawk chhanna aţanga a landan chuan, kum 10 chhung kan hrawn sorkar kal ta-in program pawimawh ber a a neih leh term 2 zet sorkarna pawh siamtir theitu NLUP hlawhtlin lohzia a ni a. A tum ang leh sorkar hotute’n an sawi ang khan NLUP hi hlawhtling ni sela chuan buhfai thar hi pung chho zel âwm a nih laiin, a thar tlem zawngin Mizoram lo neitute thar chhuah hi a kal a ni. 

 Mizoramah hian Agriculture hi department awm hmasa pawl ami a ni pha a. Agriculture department aţang hian Horticulture te, Fisheries te, Minor Irrigation te Animal Husbandry and Veterinary te hi an indang a. Department upa ber pawl a nih bakah a lian hle a, chuvangin Directorate pahnihah ţhendarh hial a ni. Ram hruaitu leh sorkar hotute sawi dan chuan Mizoram mihring awm zinga za zela 70 vel hi lo nei a eizawng an ni a, hei hi a dik a nih ngat chuan he department upa leh un tak mai hi Mizorama department pawimawh ber zing ami a ni lo thei lova. A pawimawhzia hi he department-a thawkte ngei pawh hian an hre tawk lovang tih a hlauhawm khawp mai.

 Sawi lan loh theih loh ţhin chu Mizoram mipui sum thawh chhuah hi a ni. Mizoram pumpui sum thawh chhuah a a tam ber,  za zela 60 vel hi sorkar hnathawk leh service danga thawk, a mihringah chuan Mizoram mipui zawng zawng zinga, za zela 6 bawr velte thawh chhuah a ni a. Thil siam chhuahna leh sawngbawlna (Industry) hi state dangte ngaihtuah chuan nei lo anga ngaih kan ni a. Kan neih ve chhun pawh small industry pawh ni pha lo ‘khadi and village industries’  an tih ang chi, chhungkaw khat enkawl tham lek thil sawngbawlna a la ni ber. 

 Chutianga industry nei a enkawltute chu tam tak an ni lo tih leh Mizoram mipui zat chhut phei chuan ui-hûm lek an ni ang tih chu a lang reng a. A chhan chu kan Industrial Estate leh Industrial Growth Centre neih ve chhunah te hian industry dintute aiin sorkar thuneitute laka thei deuhte an inbengbel ţeuh ţeuh tih hi zêp rual a ni lova. Industry lam ai mahin mimal chenna hmun (residential) a ni ta deuh zel mai. Chutiang a nih lai chuan Mizoram mipui za zela 70, lo neiha eizawng, ţhenkhatin kuthnathawktu an tih mai, Economic Survey lamah chuan agriculture and allied sector a inhmangte aiin an thawhchhuah (contribution) a la tam zawk zu nia maw le!!

 Chu tak chu kan ram ţhanmawhbâwk, kan ram ţhan ti ţhutu chu a ni. Mi za zela 70-in mipui zawng zawng thawhchhuah aţang a, za zela 14 bawr vel chauh an thawk chhuak ve a nih chuan Mizoram hmasawnna hi chu rualkhai lo leh inkhuangrual lo (lopsided development) ti lo chuan sawi dan tur dang a awm lo. Mizoramah hian kan ram hruaitute hian inthlan dawn apiang hian vote nei zinga za a 70-te hi an rĩm uar zual ber ţhin a. A chhan chu tlin theihna atana vote kawl tam ber an nih avang a ni. Mizoram a LUP, NLUP, MIP leh SEDP kan tih zawng zawng hi kuthnathawktute tinzâwn a policy duan vek a ni a. Hetiang hi kum 1972 aţang khan Mizo kuthnathawktute hi chi hrang hrangin an lo tawktarh tawh ţhin a, mahse, an dinhmun hi a la sang hranpa chuang lova, intodelh kan la hlat em em a, an thawhchhuah pawh a la tam lo mai ni lovin kum khata thla 12 a awm laiin thla 3 daih vel awrh chauh a la ni ta reng mai.

 Kan sorkar hrawn tawhte an hlawhchham kan ti dawn nge, mipui kan hlawhchhamna chhan hi chhui thui vak a ngai lova, Agriculture Minister-in assembly a zawhna a chhan dan aţang hian a lang reng mai. Kum hetizat hna an thawk a, anni chuan thawk tam leh ţha an inti viau mai thei, mahse, an thawh chhan, kuthnathawktute ngaihdan erawh chu a dang a nih a rinawm. Agriculture hi tuifinriat emaw vansangah emaw a kalpui chi a ni lova, leilungah ngei kalpui tur a ni a. A tihhlawhtlinna hi sorkar hnathawk tam lamah emaw department len leh tet-ah emaw innghat lovin kalphung dik leh thawktute rinawmna leh taimakna, tunlai khawvel thiamna hman tangkaina lamah te a innghat a. Chumi atan chuan sorkarin tih tak taka ruahmanna a siam a ngai tawh.
 Ram hruaitute’n ei leh bar a intodelh an sawi ve reng a, sorkarna an chanin engmah an ti leh tak tak lem chuang lo. Agriculture department hian tun thlenga Mizoram pum ‘land survey data’ a la nei lo hi chu ngaihhnathiam theih a ni lo tawp. Hemi bakah hian kan ram leilung hi endik a, eng ang china atan a ţha nge tih pawh hre lova kan la âr-khaw-thim-dai chhung hi chuan intodelh chu kan la hlat lutuk. “Kan ramah engkim a chin theih a, a ţha thei vek” tih ngawt a ni lo, tunlai khawvelah thiamna (scientific farming) tel lovin a hlawk thei lo. Mizorama loneitute thawhrim leh hahzia han en hian an thar chhuah nen hian a inmil thlawt lova, an khawngaihthlak takzet a ni.

 Ruahmanna hi han siam ve ngawt mahse, thil reng reng hlawhtlinna chu inbuatsaihna ţha-ah a innghat ţhin. Lo neih leh huan thlai siam lama hlawhtlinna thleng tur chuan a leilung dinhmunte, sik leh sa leh ruahtui tlak dante zir chian phawt a ngai a. Chutiang ‘data’ awm lova ar-khaw-thim-dai ngawt chuan hlawhtlinna a beisei theih lovang. Kan ram leilung leh boruak dinhmun hi chiang taka hriat a ngai a, chumi hriat chu, lo neih lam hawi zawngah chuan Agriculture department mawhphurhna a ni. Ram leilung bakah a zâwl leh awih dante an hriat chian a ngai a, a léi endik (soil testing) hi buh leh bal leh thlai china atana hman theih ramah chuan an tih vek a ngai bawk.

 Chutiang hriatna nena loneitute kaihhruai an nih hunah chauh kan ram hian buh leh bal leh thlai a intodelh turin ke a pen thei ang. Leileta siam theih zawng zawng hi siam a pawimawh ang a, chumi atan chuan sorkarin a hmunah ngei tui leh eng a pe thei tur a ni a, inkalpawhna kawng ţha tak a siam tur a ni bawk ang. Chutianga kan tih hunah chuan intodelh turin bul  kan ţan tak tak thei ang. Khawl hmanga lo neih hi a theih ang anga kalpui a ngai bawk a, mihring tha heh lutuk lo chi lam kan hawi a hun tawh. He’ng zawng zawng ti tur hian vote zawnna atana tawktarh ringawt ni lo, hmasawnna tak tak thlen thei tur ruahmanna ţha leh famkim, tunlai thiamna nemngheh ngei mai hi sorkarin a siam chhuah a hun takzet tawh a. Chutiang ti thei tur mithiam chhawr tur kan nei a, a chhawrtu ţha erawh kan la nei rih lo. Mithiam chhawr thiam ram hruaitu kan va mamawh em!

NEWS COMMENTARY: 23.03.2019
AGRICULTURE DEPARTMENT-IN A TIHTUR A TI LO
Ziaktu : HC.Vanlalruata, Principal Correspondent, PTI

No comments:

Post a Comment

Post Bottom Ad