Hriselna Huang - ANTI-BIOTIC RESISTANCE CHUNGCHANG - TIMES OF MIZORAM

Post Top Ad

30 Mar 2019

Hriselna Huang - ANTI-BIOTIC RESISTANCE CHUNGCHANG

Hriselna Huang

ANTI-BIOTIC RESISTANCE CHUNGCHANG



India rama doctor voluntary pawl lian ber Indian Medical Association (IMA) chuan tun hnai mai khan thuchhuah siamin hrik thahna damdawi “Antibiotic” hman dan dik lo nasa avanga antibiotic thah theih loh hrik “antibiotic resistant organisms” a pun nasat thu an sawi a.

Hriselna Huang

Mipuite mahni thua hetiang damdawi ei mai mai lo tur leh, doctor te pawh a nazawnga heng damdawi te chawh lo turin ngenna a siam ta hial a ni. An ngenna ah hian hritlang khawsik nazawngah chuan heng antibiotic te hi chawh loh nise tiin doctor te pawh min ngen ta hial a ni.

He thu hi a serious hle a, kan ramah pawh hian he harsatna hi a thleng tan mek a, a la zual zel thei bawk a, chuvangin hemi chungchang hi vawiin issue atan chuan mipui hriat tur information pawimawh nia ka hriat avangin ka han ziak dawn a ni.

In zawhna te chhang lova hetiang zawnga information inpek hi in lo ngai thiam turah ka beisei, India ram hi doctor chawh loh a mahni thua damdawi lei (over the counter sales) nasa ber pawl kan ni awm e.Chung zingah chuan antibiotic drugs te hi an lei nasat ber pawl a ni bawk.

Mizoram ah pawh hian mahni thua damdawi han inchawh mai hi kan ching viau mai a, thenawm te ngeih zawng hi ngeih ve nghal tura inngaihna kan nei leh mai thin a, chu damdawi chu engtinnge hna a thawh? Side effect a nei em? tih te hi kan ngaihtuah khat khawp. Chu mai pawh ni lovin a hming pawh kan hre zui lo fo a, doctor a inentir te an damdawi ei lai emaw lo ei tawh hming an han zawh pawh hian an sawi thei lo fo a ni.

Mipui lam chu lo dahtha ta ila, keini doctor lam community te pawh kan fimkhur tawk lo fo mai. Professional kan nih anga mipuite damlohna enkawl kawngah, a enkawlna “treatment” mai ni lovin thu pawimawh hriattir “information pek” hi kan mawhphurhna lian tak a ni. Damlo tam tak inentir hian doctor an ngeih zawng nia an sawi chu “tidam thuai thuai ru” kha ani ta ber a.

Mahse dam thuai thuai tur chuan damdawi chak hman a lo tul a, chu mai ni lovin a tul lem lo, kan sawi tak ang hritlang khawsik angah te pawh antibiotic hi kan chawh leh mai thin. Chu chuan resistance a siam duh em em a, thenkhat phei chu a hmaa an lo chawh tawh an ngeih nia hriat vangin a hnua an damloh leh pawhin a ngai bawk kha mahni thu in an ei leh mai thin. 

Anti-biotic zingah chuan Azithromycin hi hman common pawl tak mai a ni a, ni khatah vawi khat leka eiin ni thum chhung hi a ei dan a ni a, a awlsam vangin mahni thua ei mai an tam hle.He damdawi hi tunah hian resistance (ngeih lo/thawk tha tawh lo) a awm nasa tawh viau.

Anti-biotic thar hmuh chhuah emaw siam chhuah kawngah hian khawvel hian hma a sawn nep a, a class thar ber pawl “Carbapenem” an tih te pawh hi kum 1990 chho vela an hmuh chhuah daih tawh kha a ni. India ramah phei chuan organism chi khat, eng antibiotic mahin a thah hleih theih loh te pawh an hmu chhuak mek a ni. TB te pawh damdawi tam tak thah theih loh “Multi-Drug resistant” a awm tam ta hle a, kan ramah pawh buaipui tham a tling ta der anih hi.

Taksa chak lo zual emaw natna neih vanga taksa vengtu chak lo “Immuno-compromised” an tih hi mi tam tak an awm a, HIV leh Cancer te hi kan hriat lar a ni a, hei bakah hian zunthlum (Diabetes) leh, lung lam tha lo (heart disease) nei te hi an immunity a hniam a, hrik an kai hma bik a ni. Chu mai nilovin damdawiin atanga inkaichhawn natna hi a tam hle bawk.

Chuvangin damdawi, a bik takin antibiotic ang chi reng reng hi chu mahni thu in ei lo ila, kan damloh pawhin dam thuai thuai lam aiin taksa in a hun taka a intihdam hun nghak chungin damdawi chak chi bawh kher lo ila, insawiselna nazawngah antibiotic ei mai ching lo bawk ila, chu chuan antibiotic resistance pung zel tur lakah hian min veng thei ngei ang, Sawi tur tam tak la awm mahse duhtawk phawt mai ang.

Source : Zalen

No comments:

Post a Comment

Post Bottom Ad