Mizo Hmeichhe Man Tam Ber Pi Sainguri Sailo

MIZO NULA MAN TAM BER 

( Phullen lal fanu Sainguri Sailo) 

(Pi Sainguri hi Mizo lal ropui Vanphunga Sailo tunu a ni a, a pa chu lal fing leh taima, Kohhran tih mi Awksarala Phullen lal a ni. A chanchin hi a ngaihhlutawm em a, ka hriat ang angte ka rawn tarlang ve a ni. – Buata Bawihtlung)

Mizote hian nupui pasal kan inneih dawnin, a hmeichhia zawk hian man an nei thin a. Hei hi hnam dangten an ching ve vak lo a ni mai thei a. Mizote erawh chuan, hma sang atang tawha kan inrochun, tihdan phung a ni a. Chin dan ṭha a ni nge ni lo tih chu, mithiam ten an la chhui fiah turah ngai ila.

Mipa in Hmeichhiate kan lei a ni em:

Hetianga man in hlan hi, a lan dan chuan, mipa ten hmeichhiate hi kan lei a ni ber mai a. Hmeichhia te chu bungrua emaw ang maia ngaih theih lek lekin man an nei a, an man pek hnuah chuan, a leitu mipa ta a ni tawh thin. Man leh  mual sawifel hnuah ringawt pawh mipa lam ten hmeichhia (nula) chungah chuan an inti neitu hle ṭhin a, Man inhlan hnu ah ngat phei chuan, hmeichhia zawk kha mipa ta a ni fel hle a ngaih a ni. Chutiang a nih rual chuan, hmeichhe man kan inpek dan leh kan sawngbawl dan vel hi chu thil dang kan lei dan nen chuan a inang chiah lo deuh chuan a hriat bawk si.

Hmeichhe man a in ang vek lo:

Hmeichhe man hi, kan pi leh pute atanga kan rochhun, tihdan thin a ni a, chuvang chuan tun thlengin man kan la inhlan zel a. Tun hma chuan lal fanu man chu Rs 300 te pawh an lo ti ṭhin a ni awm e. Chutiangin Mizo hnam peng hrang hrangte zingah pawh, hmeichhe man kan inchhiar dan hi a inang vek lem lo a, Pachuau te pawhin an inchhiar to deuh ṭhin a ni awm e. Mizo hnam hrang hrang zingah hmeichhe man atan  Rs 420 hi tun thlenga hman tlang lawn tak a la ni. Tun hma kan nu leh pa, pi leh pute hunah chuan Hmeichhe man hi an in bat sak fo ṭhin a, tun laiah erawh kan in batsak ngai lo ti ila a dik awm e.

Mizo hmeichhe man tam ber Pi Sainguri Sailo:

Ka hriat ve theih chin a, Mizo hmeichhiate zinga man tam ber chu Phullen lal Pu Awksarala fanu upa ber, Phullen nula hmeltha Pi Sainguri Sailo a ni. Tumkhat chu Pi Sainguri hian inleng a nei a, a pa lal Awksarala chu an rawn bia a. Pu Awksarala hi Sailo lalropui Vanphunga fapa a ni a, amah Awksarala pawh hi lal fing leh taima, buh leh bala intodelh tak, an hun laia Chief Council a Vice President a ni nghe nghe a. Lal fanu Sainguri chuan pasal la neih rih loh chu a duh deuh a, chutiangin, a pa Awksarala pawh chuan pasal la nei hrih lo se a duh a, mawihnai taka hnar dan tur a ngaihtuah rauh ruah a. A fanu man chu tam tham tak, a rawn be tute neihin a tlin loh tur khawpa tam chhiar chu lo hnarna atan a ruahman deuh a ni awm e. Tichuan Pu Awksarala chuan a fanu Sainguri Sailo man atan chuan Rs 1500/- (Sangkhat zanga) lai mai a chhiar ta a.

Pi Sainguri Sailo pasal neih kum hi 1940/41 bawr vel ni a ngaih a ni a. Cheng sangkhat zanga hi kum 1940-41 vel khan Rs 244000 /- (nuaih hnih sing li sang li) vel zet a ni. (Hei hi infogram.com in pawisa hlutna a chhut dan behchhan a chhut a ni a. Infogram.com in a chhut dan chuan kum 1940-41 vela Re 1 chu kum 2013-14 khan Rs 162.6666 ang hu a ni. Tichuan khatih lai (1940-41) vela Rs 1500 chu kum 2013 angah khan Rs 244000 /- vel zet a ni tihna a ni a.  Khang hun lai khan chutiang zat zat a tam pawisa chu neih harsa tak a ni a, lal Pu Awsarala meuh pawh chuan, an inlengte chu an reh zui mai a ring a ni awm e.

Pi Sainguri man atan a bûk zât hu Pawisa seng ngam:

Tichuan inleng Palaite chuan anmahni tirtu Pu Henkaia hnenah chuan, an indawrna thu chu an hawn ta a. Pu Awksarala chuan a fanu man atan Rs 1500 /- lai mai a lo chhiar thu chu an thlen ta a. Mahse, mak tak main Pu Henkaia chu a lo lawm em em zawk mai a, “Lal fanu hmeltha Sainguri man atan chuan, a bûk zât (Pi Saingur rih zawng ang hu pawisa) pawh chhiar se ka ngam ang chu” a lo la ti ta deuh deuh zawk a. Khatih lai khan pawisa thir an hmang ṭhin a, Pi Sainguri bûk tâwk ang vel tura an chhut chu Rs 3200 (Sang thum zahnih) a ni a. Khatih laia Rs 3200 kha, kum 2013-14 vel khan Rs 520533.12 (Nuaih nga, singhnih leh zanga sawm thum pathum) lai a ni.

A man pangngai bakah thil hlu dang pawh:

Tichuan, Pu Awksarala chuan a fanu man atana a chhiar chu a inleng Pu Henkaia chuan a ngam a ni tih a hriat chuan mak a ti hle a. Khatih lai khan Sailo lal an la ropui hle a, Pu Henkaia kha Paihte hnam ṭha a ni na a, Sailo lalfanu Pi Sainguri chu khaw mipuite pawhin an ui ve deuh a ni awm e. Mahse, Pu Henkaia chuan a man an chhiar zat  chu pek a inhuam miau mai si a, Phullen lal Awksarala pawh chuan, “Thu ka lo tiam tawh a, mahni thutiam ngei bawhchhiat chu a dik lo e” tiin a insawirempui ta a ni. Pu Henkaia hian Pi Sainguri man atan hian pawisa Rs 1500 /- mai bakah thil dang hlu tak tak – Silai leh thil dangte pawh a pe tel hial a. A thil pek zingah hian Sakawr pawh a tel nghe nghe a. Pi Sainguri pa Pu Awksarala kha Sakawr chung chuan thiam tak a ni a. Mizo lal ho inzawmkhawm pawl Chief Council ah Vice President a ni a, Lal Conference a tel tura a kal nan Sakawr chu a hmang thin a ni.

Pu Henkaia hi Burma rama Sipai bungrua vel supply a sumdawng a ni a, a taimain a hausa hle a. Chuvang chuan pawisa chu a lo nei hle a, Rs 1500/- pek pawh chu a tan thil harsa lo tak a lo ni awm a. Pi Sainguri man tam zia hi a hun lai mite sawi leh titi a tling a. Hriat theih chinah Mizo nula man tam ber niin a thang nasa hle a, a hun lai hre pha leh an chanchin hriate chuan tun thleng hian hahipin an la sawi thin a ni.

Pi Sainguri hi nu leh pa thu awih tak, nula hmeltha leh fel tak a ni a. Tichuan, a pa thu awihin lungawi takin pasal chu a nei ta a. A pasal nen chuan hlim taka awmin chhungkua an din a. Nu leh pa thu awiha innei an ni a, malsawmna pawh an dawng zui zel a. An chhungkuain Shillong-ah te an awm hnuah, tunah chuan a tu leh fate nen USA ah In leh lo neiin an inbengbel tawh a ni.

Pi Sainguri hi hriselna ngaipawimawh mi, mahni invawng fai tak thin mi a ni a. A pain Meizial, Tuibur leh thil dang dang, taksa tana tha lo chu ti lo tura a fuihna chu a zawm tlat a. Tunah hian kum 93 mi niin USA ah a awm a, a hmel pawh a la thain a la nula hle a ni. Tun thlenga damna leh hriselna a la neih theihna chhan pawh, Pathian awmpuina bakah, a pa thu awih a, zuk leh hmuam te a tih loh vang niin a sawi ṭhin a, a u leh naute pawh, a pa thu zawm a, zuk leh hmuam ti lo turin a la fuih ngar ngar thin a ni.

Mizo hmeichhe man tam ber Pi Sainguri Sailo, Phullen lalfanu hi, a man tam vang chauh lo pawh, nu leh pa thu a awih theihna avang pawh hian a fakawmin a chhuanawm tak zet a ni. Hlim taka dam reng turin duhsakna ka hlan e.

~Buata Bawihtlung