MICHAEL C. LALSIAMLIANA, LALKROSCHHUANGI & LALCHUNGNUNGA TE AN CHHUANAWM E
- Dr. VR Ralte
Online Marketing AMAZON.in-ah YÎSHU (Jesus) tih ringawtin ka search chu a rawn lang zîngah MP3 Audio CD,Pauline Communications, Mumbai siam - “YESHU MERA MARG” (Jesus My Way) tih chu a lo lang tel a, zai list-ah MIZO HMING ka hmu chu min barakhaih hle mai!! A chhan chu kan rampum țawngpui ber HINDI țawnga hla sak (thiam) chu kan harsat a ni tih kan hriat țheuh a ni a, chu ai mah chuan Mumbai ațang ngei maia hnamdang unau Company/Ministry pakhatin NATIONWIDE-a a siamchhuah Music Album-ah Mizo zaithiam an tel pha hi mi tamtakten kan rin phak loh a ni tlat a, Mizo an tel avang hrim hrim hian he MP3 Album hi MIZO HNAM TAN THIL HLUTAK A TLING ve tlat a ni. Chuvang chuan ka chah chhuak ta nge nge a.
He Album-a Hla No. 10. -na “Mujhe Chhu le” (मुझे छू ले) tih leh Hla No. 18.-na a “Bharat Ka Har Insaan” (भारत का हर इंसान) tih hla pahnihte chu Michael C. Lalsiamliana sak niin a thiam êm êm mai a, a awphawi leh a lamrîk dan a dik a, ngaihthlak a nuam. Lalkroschhuangi sak Hla No. 11. –na “Jab Yeshu Ki Aatma” (जब येशु की आत्मा) tih chu a nung hle a, min dek harh thei bawk. An hla te hian thlarau an dek nung thei a ni ber e. (Group-ah te hian an lo awm ve a nih chuan min rawn ‘pawh’ se ka ti mang e.)
Hindi thumal pahnih khat lam ãwn lek lek erawh an nei a, angaih zam theih; achhan chu tunlai Hindi Hla sa thiam hnamdang zingah pawh hian a ‘Western Style’ an hman avanga lam ãwn deuh te hi chu an nei ve zeuh zeuh țhin, a tur rěnga ngaihna an neih phah ta hial !!!!
Heng Mizo sak Hindi Gospel-te hi a Music Lalchunghnung (hei hi an chhut sual nge ni Lalchungnunga tih tur niawm tak) in a siam an ni vek lehnghal. A music a changkangin a mawi hle. Hetia PATHIAN CHAWIMAWIA MIZO HMING TI ȚHATUTE LEH CHAWISANGTUTE hi an chhuanawm loh tih phal rual a ni lo. A ropui thlawt e.
He MP3 hi engtika siam/chhuah nge a nih erawh a album-ah ziah lan tel a ni lo. “Do not Copy/Pirate, Help our Mission” tia ziaka inngen a nih avangin a hla (audio) te erawh ka ‘share’ che u a remlo tlat mai a, rawngbawlna a nih avangin theih chuan lo chah chhuak ve teh u.
[HRIATZAU NAN – 'ISUA' hi Hindi țawng diktak chuan 'YEESHU' (यीशु) emaw 'YÎSHU' ti a ziah emaw lamrîk a ni a, HINDI BIBLE-ah pawh a inziah dan a ni. Chutiang chuan Indiaram hmar lam hnamdang Kristian (Hindi tawng hmang) unaute chuan an lamrîk dan a ni. Chutih lai chuan Marathi țawngin YESU (येसु) tia lam a nih avangin Indiaram chhim lam hnamdang Kristian (Hindi tawng hmang ve) unaute erawh chuan YESHU (येशु) tiin an lamri ve thung. A dik ve ve.]
Post a Comment