MZP HRUAITUTE LEH EDUCATION MINISTER INKAWM - TIMES OF MIZORAM

Breaking

Home Top Ad

Post Top Ad

MZP HRUAITUTE LEH EDUCATION MINISTER INKAWM

Vawiin ni 25th April 2019 (Ningani) chawhnu dar 2:00 khan MZP hruaitute chuan Pu Lalchhandama Ralte, School Education Minister chu a Pisa-ah an kawm a. He hunah hian school fee, a bikin private school-te fee tam lutuk chungchang te, zirtirtu transfer chungchang te, CADC area chhunga Mizo khua ten school chungchanga harsatna an tawh chungchang te leh Zirtirtu nghet lo (Muster roll)-a zirtirtu 946 Sorkar-in lak thar a tum chungchang te sawipui a ni.



MZP hruaitute chuan Zirtirtu nghet lo (Muster roll)-a zirtirtu 946 Sorkar-in lak thar a tum mek chu zirtirtu atana tling ngei B.ed leh Dl.ed training chhuak ngei ni se an duh thu School Education Minister hi an hrilh.Pu Lalchhandama Ralte, School Education Minister chuan, ''Sorkar-in Zirtirtu nghet lo (Muster roll)-a zirtirtu 946 lak a tum hi zirtirtu atana tling ngei B.ed leh DIET (Dl.ed) training chhuak ngei lak a ni dawn a, post ruak awmnaah chuan a khaw mi training chhuak an awm a nih chuan duhsak bik a ni ang a, a khaw mi an awm lo a nih chuan a khua aṭanga hnai deuh duhsak a ni leh dawn a ni. Hetia kan tih chhan chu khawpui lama transfer an dil lo a, a awmna khuaa an awm ngheh theih nan leh zirtirtu ṭha zawk kan neih theih nana ruahman a ni a; tin, zirtirtu transfer & posting rules mumal zawk kan neih theih nan hma lak mek a ni," a ti.


MZP hruaitute chuan school fee, a bikin private school admission fee leh monthly fee to lutuk chu zirlaite tan harsatna tling a nih thu te, Mizoram pumah khai rual dan awm se an duh thu te an sawi a. School Education Minister chuan school fee chungchangah ruahmanna siam tum mek a ni a, siam ṭhat ngai laite siam ṭhat tum a ni a, School Education Department Director kaihhruaina hnuaiah zirtirtu pawl hrang hrang hruaitute leh MZP hruaitute te nen sawi ho turin ruahmanna siam mek a nih thu a sawi a ni. School Education Minsiter Pu Lalchhandama Ralte chuan zirtirtu transfer hi tih loh theih loh thil, damlohna avang te leh harsatna danglam bik avang tein a awm ṭhin a, kan theihtawp chuan transfer an nih loh nan kan ti ve ṭhin a ni a ti bawk.

Chakma Autonomous District Council (CADC) area chhunga Mizo khaw pathum Saizawh West, Damdep leh Parva khuain zirna chungchanga harsatna an neih thu MZP chuan School Education Minister hi an hrilh a, Minister chuan a ṭul anga lo enpui a tum thu leh Parva High School-a zirtirtu awm ṭha duh lo chungchang pawh Education Department lam hriattir nghalin a ṭul anga lo en fel turin a hrilh nghal a, Minister chungah hian MZP chuan lawmthu a sawi tak meuh a ni.

MZP hruaitute leh Pu Lalchhandama Ralte, School Education Minister te hian zirna siam ṭhat a nihna turin inpawh tlang takin an sawi ho a, Mizoram zirna siam ṭhat tuma Pu Lalchhandama Ralte, School Education Minister hma lakna MZP chuan lawmawm a ti hle a, a ṭul ang apianga Mizoram zirna siam ṭhatna turah thawh ho zel ni se an ti bawk. ~MZP PRESS RELEASE


Sd/- 
(H. LALTHIANGHLIMA)
Asst. General Secretary

Post Bottom Ad