CYMA PRESIDENT-IN MIZOTE HLAWK NAN WESTSIDE A HAWNG
Central YMA President Pu Vanlalruata chuan vawiinah Chanmari, Aizawlah Tata Retail Enterprise hnuaia mi Westside dawr lian a hawng a, YMA duh dan leh Mizoram hlawkna tur a ni, a ti.
Mizorama Tata Motors dealer Zothan Autoworks chuan Tata hnuaiah tho huang an zauh a, thawmhnaw zawrhna dawr lian Westside an din. A hawngtu Pu Ruata'n YMA duh dana kalpui tur a nih avangin a lawmawm hle tih a sawi.
Pu Ruata chuan : "YMA-in Mizoram chhunga Mizote eizawnna siam theitu a duh a, hetiang dawr lian leh changkang hi Mizoramah awm se tih chu YMA duh dan a ni bawk.
"Chutih rualin a enkawltu leh a neitu erawh Mizo ni ngei se tih hi YMA duh dan a ni. Chutiang tak chuan he Westside dawr lian tak hi Pu Zothantluanga leh a pa Pu R Zatawna ten an tihlawhtling a, an hmalakna a ropui hle a ni.
"Mizo pa ngeiin sumdawnna a keng a nih chuan Mizoramin hlawkna a hmuh phah thin a, Mizo thalaite tan hna an siamsak thin bawk," a ti.
Mizorama dintu leh a neitu ni nghal Pu Zothantluanga chuan tuna mi hi India rama Westside dawr 149-na a nih thu a sawi a, Mizo thlalai 30 chuangin hna an thawk.
"Changtlung zawk leh a nih tur ang takin thla thum hnuah kan kalpui theih kan beisei a, thil pho chhuah reng reng kar hnih khatah a thar zela thlak a ni dawn a, a duh tan lei nghal zel a ngai tihna a ni," a ti.
Dawr thar hawnnaah hian Central YMA Vice President Pu R Lalngheta leh Aizawl Municipal Corporation Ward Number V bialtu Pu Rosiamngheta bakah sawm bik an tel a ni.
Source: Thang Khuma T-a
Source: Thang Khuma T-a
Post a Comment