- M.Lalmanzuala
Kan sawrkar thar chuan hmanhmawh taka zu khapna thu an chhuah ang deuh khan MIMER hming chu an han thlâk leh nghal vat mai a. An ṭuanṭhatna lamah chuan an ṭuanṭha khawp mai. Zu khap thupek an buaipuizui vak ang hi chuan buaipuizui tur chu a awm ệm lovang chu.
Hming thlâk hi chhan ṭha takah lo chuan tih zen zen a ni lo va. A thlâk theituin thlâk a ṭul leh ṭul loh uluk taka a en a ngai ṭhin. Mimal hming thlâk dawn chuan District Magistrate hnena affidavit nen meuha beih a ngai a. State hming thlak dawn chuan memorandum thehluha Parliament-in a lo ngaihtuah chi a ni. Statutory body-te phei chu thlâk an ni zen zen lo va, chuvang chuan Gauhati High Court, Gauhati University te an la ni reng a, Aijal Club te pawh a la ngai reng a nih hi.
MIMER hi a dinna a la rei loh ang hûin, a dintu nih kan puten an inchuhna lamah hriat a hlawh hman hle a; a hming thlak ui tâwk pawh an tam hman viau ang.
MIMER din a nih dawn khan a hming vuah tur hian uluk taka ngaihtuah a ni a. Khatih laia Jt. Secretary Health khan Mizoram Institute of Medical Education and Research tih kha a rawt a. MBBS zirna ngawr ngawr ni lova, post graduate course leh research tihzui theihna bakah ‘referral hospital’ ni tur te-a thlirlawkna neia rawt a ni. Chutiang zir theihna chu college mai ni lovin ‘institute’ a nih a ngai a, chuvanga a hming atana Institute rawt an ni. College hotu lu chu Principal a ni a, Institute hotu lu chu Director a ni ṭhin ang hian he institute hotu lu atan pawh Director tih ruahman sa vek a ni. He thu ngaihtuahnaah hian Mizoram Sawrkar mi pawimawhte bakah Director General of Health Services, Govt. of India pawh a tel ve a, lungrual taka an pawm a ni.
Chutiang taka uluk leh awmze neia hming an phuah chu meeting ṭum khat neihah Zoram Medical College tihin an thlâk tawp mai a ni a, a inawlsam hleih khawp mai. Kan thudawnnain a sawi dan chuan a hming thar tur atana department-in file-a an rawt chu Mizoram Medical College a ni a, Cabinet meeting-ah khan Mizoram chu Zoram ti-a thlak a ni. College a nih takah chuan MBBS bak zir theih lohna a ni dawn ta em ni ang? An hotu pawh chu Director ni tawh lovin Principal an ti tawh mai dawn em ni ang?
Sawrkar thil hi chu sawrkar thil a ni a. Mizoram State hming chu Mizoram a ni a; Mizoram Sawrkar hming chu Mizoram Sawrkar, Govt. of Mizoram a ni. Zoram State a ni lova, Zoram Sawrkar a ni bawk hek lo. MIMER ni ṭhin pawh kha Sawrkar thil a nih avangin Zoram Medical College tih tur a ni lo vang a, hetiang hming hi puttir hram an tum a nih pawhin Mizoram Medical College a ni tur a ni.
Social Media te-a mi ṭhenkatin Zoram Medical College tih a nih chhan chu tu emaw hming chawia tih a ni, an tih te hi a dik a nih ngai chuan a chhangchhiat thlak hle ang le.
MIMER aṭanga Zoram Medical College tih chu a lam a awlsam vang tih hi a chhan an sawi kan hriat chhun chu a ni a. Thatchhiat Theology aṭanga inṭana zai lam, a intihlimzawnga ka sakhua kan kalpui leh chumi tihphungina a hrinchhuah A THLAWNA THILSEM, NLUP, SEDP tih angrengte hi kan hnam nun tichhe barhtu an ni a. MIMER tih lamrik ringawt pawh harsa ti-a a aia lamrik awlsam zawk ni-a kan ngaih vang ringawta thlak a nih chuan a va chhangchhiat thlak e, tih bak chu sawizawm vak tur a awm lo vang a. Thatchhiat Theology kal zel a ni ang a, chawmhlawma kan awm khua erawh a sei zel dawn a ni ang.
Post a Comment