TUI IN HNEM LUTUK HI TAKSA TAN A ȚANGKAI EM? - TIMES OF MIZORAM

Breaking

Home Top Ad

Post Top Ad

TUI IN HNEM LUTUK HI TAKSA TAN A ȚANGKAI EM?

Dr. C. Lalhmingliana, General Surgeon

Tui in a thaTaksain tui a mamawh zat hi chhut ngun a ngai khawp mai. Țangkaipui vak loh thil hahpui vak te pawh a awm thei awm e.

# Chaw kan mamawh chuan kan ril a țam mai țhin ang bawk hian tui kan mamawh chuan tui a hal mai țhin. Tuihal chunga tui in loh reng chu taksain a chhiat phah thei a. Kan mamawh aia tam lutuk tui kan in pawhin taksa tan a pawi thei.

# Mi hrisel pangngai tan sawi ila, damdawi ang hiala ngaia in tam ang zela hriselna pung chho tura zirtirna hi a awm ve țhin a. Taksa huat khawp ni lo miin a in chuan, țhiante aiin lo in tam pawh ni se, a țhatpui danglam chuang lem lo ang.

# Tui kan tlakchham chuan zun a fír sen deuh a, (zun tisen thei thil kan ei a nih loh chuan). Zun a fîm țhat chuan tui kan tlachham lo tihna a ni bawk. Hei hi a finfiahna tlânglâwn ber a ni.

# Hna thawh dawn leh exercise lak dawna tui in lâwk hi tih dan țhaa ngaih a ni bawk. Taksa a hah vang emaw, khaw lum vang emawa thlan a tlak nasat chuan tui in tam deuh a țha. Tui in tura ORS pawlh theih phei chuan a țha lehzual.

# Kan chawhmeh tuihâng leh thlaiahte hian kan taksaina tui a mamawh phuhrûkna tur eng emaw zât a awm sa a. Kan mamawh bak aia tam kan in vak chuan thisen volume a lo tam thut a, lung (heart) tan phurrit nasa tak a thlen thei. Kal (kidney) tan pawh paih chhuah sen loh hna a pe a. Thisen a lo dal (diluted) a, thisena sodium tak dan (concentration) a tlahniam a, tisa kârah tui a tlin tam avangin taksa leh thluak thlengin a vûng thei a. Kal pawhin hliam a tuar hial theia sawi a ni bawk. Tichuan, luakchhuak, luak, luhai, kaih leh nikhawhrelova awmnate a thlen thei a, a thih phah theih bawk. Tui in intamsiak avanga thi ta sawi tur pawh an awm hial a ni.

# Taksa mamawh aia tam tui pai hi 'overhydration' tih a ni a. Mi hrisel pangngai chuan tui tam tak in hi an chhiatpui lo mai thei, a aia tlem an in aia țhatpuina erawh chu a awm lêm dawn lo a ni. A tâwk aliam bâk tui in chungchangah hian lung hrisel lo, chuap hrisel lo leh kal hrisel lo te, natna benvawn neite tan phei chuan fimkhur a ngai hle a ni.

Post Bottom Ad