JOINT NGO CALLED OFF ELECTION BOYCOTT - TIMES OF MIZORAM

Post Top Ad

4 Apr 2019

JOINT NGO CALLED OFF ELECTION BOYCOTT

Mizoram Times ChanchintharTripura relief camp 6 a Bru vote neite’n electoral roll a an hming chuanna polling station theuhva vote an thlak ngiat vanga Lok Sabha inthlanpui kawmserh tum NGO Coordination Committee chuan an thiltih tum an thulh.

Hemi chungchangah hian nimin khan Chief Secretary Pu Lalnunmawia Chuaungo leh sorkar hotu thenkhatte, election department hotute leh NGO Coordination hruaitute chu an inhmukhawm a. Nizan zan rei lam tawhah khan NGO Coordination Committee hruaitute hi thukhawm lehin April ni 11 a Lok Sabha inthlanpui vote thlak tur kawmserhna atana kar leh Thawhtanni atanga Mizoram pum huapa tiam chin awm lova pawn chhuah khap (Bandh) huaihawt an tum chu an thulh ta a. NGO Coordination Committee-in nizana thuchhuah a siam dan chuan Mizoram sorkar aiawha Chief Secretary thu thlente chu thutlinga an pawm tak avangin bandh hi thulh a ni ta a ni an ti. 

NGO Coordination Committee Secretary Pu Lalhmachhuana thuchhuah siamah chuan Bru ho vanga harsatna tawh thinte pawh a tawp ngei beiseina an neih thu tarlan a ni a. Mizorama lo let duh lote ngaihsak zui tawh lo tura Mizoram sorkar leh Ministry of Home Affairs-te’n hma lak nghal an tum avang leh a tawp tak takna atana Bru ho hruaikir hna pawh kumin chhung ngei a zo fel nghal tura hmalak an tum chu lawmawm an tih thu an sawi a. Sorkar hmalak tumna chu NGO Coordination chuan ring tawkin Parliament inthlanpui boycott a tum leh April ni 8 atanga tiamchin awm lova total bandh huaihawt a tum chu thu leh awm hma chuan thulh turin a rel ta a. Sorkar chu an hmalak tumna a hlawhtlin ngei theihna’n chak taka hma la turin a beisei bawk niin a sawi.

NGO Coordination Committee in inthlanpui kawmserh an thulh hma hian nimin chawhnu lam khan Lunglei NGO Coordination Committee leh Kolasib YMA Sub Headquarters te chuan NGO Coordination Committee-in state pum huan Total Bandh neih tura thu a lo tihtluk tawh chu ngaihtuah nawn leh a, thu tlukna dang siam turin an ngen a, ram puma mipui nun tibuai lo zawnga hma la turin an ngen nghal a. Mara Thalai pawl (MTP) leh Lai thalai pawl YLA chuan NGO Coordination Committee kal tum dan chu an thlawp dawn leh dawn loh vawiin hian tih chian chauh an tum thu nimin khan an sawi bawk a ni.

Puan tawh angin, NGO Co-Ordination Commitee hian Thawhtanni khan inhmuhkhawmna neiin Tripura relief Camp-a Bru te tana Special Polling Booth siamsak duh loh lantirna na zawka kalpui ni se an ti a. Tripura relief camp a Bru vote neite an vote neihna polling booth theuhva vote thlak tura an phut a hlawhtlin theihna’n karleh Thawhtanni atang khian tiamchin awm lovin Mizoram pumah Total Bandh huaihawt a rel a. He a thurel hi, Mizoram pumah inthlanna muanawm leh tluang taka neih a nih lohna’n hmalak tha a lo tih tawh bawhzuina a ni an ti a ni. 

Chief Electoral Officer (CEO) Ashish Kundra chuan NGO Coordination Committee in an thilphut ngiat nana hmalak an tum hi thulh turin Thawhlehni khan a ngen a, NGO thutlukna chu pawi a tih thu sawiin, mipui te chanvo chhuhsak lo tura ngenin, Mizoram chuan India ram rorelna in-ah aiawh an neih ngei na tura hma la zawk se a ti a ni.
Nikum Assembly inthlan dawn khan ECI, NGO Coordination Committee leh State Election department te chu inbia in, Mizoram chhung ngeiah Tripura a cheng Bru ten vote thlak se tih an rel bawhzui nan Kanhmunah polling station siamsak an ni tawh tih sawiin CEO chuan hetihlai hian Bru te hming chuanna polling station ah kher vote thlak tir tumna a awm lova, sawi ho a nih a hrelo a tih a sawi a ni. 

Bru te hi nikum Assembly inthlanpui neih tuma vote thlak tir an nih dan ang thovin tun tumah hian ramri hnaih Kanhmun ah special polling station 15 siamsakin vote thlak tir leh tum an ni a, hetah hian Tripura relief camp 6 a awm vote nei mi 12,081 te vote thlak tir tur an ni. ~AIR Aizawl

No comments:

Post a Comment

Post Bottom Ad