MBSE in HSSLC ( SCIENCE) Result 2019 a tih chhuah tak-ah Mizoram puma pahnihna leh Physics a topper LALDUHAWMA, Buhchangphai khua St Johns H.S.S Kolasib Sikul a kal a ni.



Chhungkaw awm thei an ni hauh lova, ei khawp nei hram hram an ni. Apa hi Security niin Oil palm herna ah a thawk ṭhin. A nu chuan a ṭul ṭul a thawk bawk.


Unau pathum zing a a laihawl a ni. An chenna hmun hi khaw chhung luh hma 1½ km vel a ni ang.

Primary leh Middle hi a awmna Buhchangphai leh Kolasib Sikul-ah te alut kual nual mai. Pawl 9 St Johns, Kolasib ah lutin pakhatna a ni tluan chhuak zak. 
Pawl 10 ah internal mark a hmuh chhiat deuh tak avangin Mizoramin a hre thei ta lo a ni.

Lehkha thiam thei uchuak a ni hauh lo va, pangngai tak kan tih erawh a ni thung. Naupang fel tak niin Pathian a ṭihna hian sawi a hlawh hle mai. Zing ṭawngṭai inkhawm thleng a kal thlap thlap a ni. Lehkha a zir dawnin Bible a chhiar hmasa phawt a, a lukham bulah ngei mai Bible a dah ṭhin a ni. Inkhawm a thlahthlam ngai hek lo. A nu leh pa te hian zuk leh hmuam an ti ṭhin a, Duhawma an bulah a awm tawh chuan a nu leh pa te hian a rukin zuk leh hmuam an tih a ngai tlat. An fapa hian ṭha takin a hau zek zel a ni. Naupang pui tak chu a ni.

Pawl 9 azirlai hian a dawhkan ah pawl 11 Science zirlai bu hi alo inchhawp daih tawh bawk. Pawl 10 anih ṭum hian Beth Aven Hostel ah a thlawnin a neitupain a awm tir a, hostel ah chuan hun bik nei thil anih avang in zirna kham khawp lo va, study hour piah lamah a zir chung pawh in ala kham khawp ta chuang lo va, hmun dangah awm leh a, a duh ang a tam lehkha zirna hun a nei thei chuang lo. Monfort Hostel ah a thlawn in an awm tir leh ta a ni.

Hmun hrang hrangah awm kualin a chhungte in ah te a awm lawr a, a duh ang a tam lehkha zirna hun hi a nei thei ṭhin lo a ni.


Librarian te hian Library hrik an tih khawp kha a ni ve reng reng bawk. Lehkha a zir loh chuan Bible chhiar, ṭawngṭai, chaw ei, leh zan a a mut kha a ni mai a, tichung pawh khan hun hian a daih thlawt lo a ni.

Mi inngaitlawm tak a ni a, an khawsak a harsat em avang hian ṭhiante zingah inkiltawih tlat mi a ni. Result lam tur pawh hian a chhung te an kal hman loh chang a awm ṭhin. Doctor nih a tum a, pawisa a ngaih hnem zia te a hria, an dinhmun a ṭang chuan hla tak a ni. Chuchuan a rilru a tihrehawm ṭhin hle.

An exam zawh hnu a, a kal zel dan tur ka'n zawh phei chuan "tun bak hi chu ka kal chhun zawm theih ka ring tawh lo" tiin min chhang tlat mai.

Hetianga naupang entawn tlak tak hi a chawimawi ṭhin Pathian chuan alo ensan lo kher mai. A nunah hian zir tur tam tak a awm. Sawisen pawh a ni lo tunah chuan Mizoram in alo hre ve ta. Ka chhuang hle mai. A awmna Buhchangphai khua tih hmingṭhat duh em em tu a ni bawk.

Source: Lal Nunsanga Six June

Post a Comment

Powered by Blogger.