MIZO TUALCHHUAK DAMDAWI SIAMTU HLAWHTLING CHUNGKUA

-Dr. C. Lalrampana

A KAMKEUNA:

Mizo Tualchhuak Damdawi (Mizo indigenous Medicines/Traditional medicine) sawi rik chang apiangin Pute R. Rozika (L); C. Chawngkunga; RC Thanga; Lalhmingliana etc. rilruah an lo lang thin angin Dr. David L. Siamthara Pakhuangte hi hemi kawnga Pathianin thiamna a pek ropuizia hi theihnghilh theih rual a ni lo.

KHAWI LAM MI NGE? 

A pa hi K. Chungnunga a ni a, Khawlian khawchhuak an ni. Dr. David hi 15/07/1968 khan a lo piang a, naupang zakzum, mi ngawichawi, mi pawisawi hlau tak, inthlahrung mi, nu leh pa leh aia upate thu awih mi leh zakzum tak a ni.

Ama sawi dan takah lehkha hi chhete eih mah a zir lova. Educationist tawngkam chuan 'illiterate person' (ziak leh chhiar thiam lo) a ni. Mahse, Adult Education lam hmalakpui ngai lovin Pathianin thiamna a pe a; lehkha zir hauh lovin ziak leh chhiar a thiam em em lawi si a ni.

RAMHMUL DAMDAWI A HMELHRIAT DAN:

Kum 1987 atang khan Ramhnim Damdawi atchilhin mi ang lo hiala ngaih theihin a awm a.

Kum 1992 atang khan ring herh leh thana zutdam leh ruhtliak siamrem thiamna Pathianin talent rooui tak a pe tan a; ruhkau tuamzawmna, thaduar tet/chat tuamhnana inzawmlehna Ramhnim Damdawi hriatna a nei chho zel a, tichuan, Kum 2006-ah natna chihrang hrang hriat theihna a pek belh a. Tangkai taka a hman chhun zawm theih nan damdawi chawh tur hriat theihna kum 2007 atang khan Pathianin a pek belh chhah leh ta zel a; zanlai dar 12:00 leh zing dar 3:00 inkar apiangin zel anga awmin Pathianin ramhnim damdawi tha hriat theihna a pe thin a ni.

Tichuan, zanah pawh ni se thuawih takin ramngaw hnuaiah Ramhnim Damdawi tha, zel anga a awm laia a hmuh lawk thinte chu hmuh tumin a feh chhuak thin a, a hmuh lawk ang ngeiin a lo awm zel thin a ni. Natna atana a hmanna zawi zawiin Pathianin A hriatir chho zel a. Beidawng lova a chhunzawm tang tang avangin Kum 2011 atang Khan LPS vision chuan Zoram pum hriatah a talent phochhuahsakin interview-na a nei a. Zoram mipuiin an tangkaipui hle.

ENGTE NGE A SIAM?

Dr. David-a hian Pathian talent pek angzia zelin tualchhuak damdawi tha tak tak a siam a, tunah hian Ramhmul damdawi Clinic hran tawp neiin ama chenna inah dam lovin an pan thin a ni. chung a damdawi siamte chu:

BR Mix syrup

G. Mix syrup

KC mix powder

AC mix powder

SU mix powder/tablet

SPM powder

A-1 powder

FR Mix syrup

HC mix powder

ST Mix powder

Amla juice

Red amla juice

KNT syrup etc.

KD Mix powder

Ani hian Gennesaret Herbal keifang hmingin hma a la a, damdawi siam lamah a fapa leh a unaute bakah thian thate a chherchhuak tha hle a, Ephraim Herbal neitupa KC Ruata pawh hi ama hnuaia zir leh indang ta niin ka lo hria a, Dr. Davida damdawi siam hming then khat pawh a hmang chhunzawm chho ve mai niin a ngaih theih awm e. (Hei hi chu an pahnih inkar thu ni se). Dr. Davida siam zingah hian SPM powder leh BR mix Syrup hi a thain belhchian a dawl hle a, nerve damdawi S.U tablet phei chu stock a awm hman meuh thin lo.

MIZO HERBAL KEIFANG

Tin, Dr. Davida hian a fapa Lalchhandama Pakhuangte pawh hi a chher chhuak tha hle a, ani hian Keifang atang thovin Mizo Herbal (Ramhmul damdawi) Keifang tiin damdawi a siam ve mek a, a pa ang bawkin a siamte hi a tha hlawm hle a, chungte chu:

Jopan plus syrup

HP Rope syrup

Gynox syrup

Sang-Patch paste

Urifar syrup

Zygal syrup

Secop-T syrup

Far-T syrup

Kansar syrup

Mzo Herbal Keifang siamte hi tangkai taka hman a ni a, a bikin Ril damdawi Far-T, Thisensang damdawi Jopan plus, chhul damdawi Gynox, pumpui damdawi Zygal leh kal/zunkawng damdawi HP Rope phei hi chu a kal chak hle. Tin, damdawi dang tha tak tak siam tumin hma an la leh mek bawk. Anni hian online hmangin mamawhtute tana damdawi order theihin an siam a, hmun hrang hrangah an thawn zung zung thei a ni.

IMANUEL HERBAL SAITUAL

Tin, Dr. Davida pianpui unaupa Imanuel Lalremruata Saitual hian damdawi siam lama hriatna tha tak a nei a, mahse, hun rei tak a hrisel that loh avangin a che chhuak ve vak lova, a thiamna rilpui pui pawh a u Dr. Davida a hlan chhawng thin. Thut mai mai tum bik lovin hman deuh atang khan mamawhtute lam atan ama inah a damdawi siam a kawl reng thin a, tun hnaiah chhenfakawm zawka hma la chho zelin hengte hi a siam chho ve ta zel a ni. Chungte chu:

Asthma syrup

TR-Lung syrup

R-changkom syrup

Sikserh syrup

Nervit Syrup

P-Takaza syrup

HR-Pol syrup

Ani hian Imanuel Herbal Saitual tiin hma a la a, damlo mamawh tan chhen fakawm hle tura ngaih a ni. A bikin kal damdawi a siam phei hi chu a thain a rintlak hle tih ataka eia hretu ka ni.

Dr. Davidate chhungkuain hetiang taka ramhmul damdawi an tuipui leh a siam chhuah dan kawnga hriatna tha tak neia hma an la a, an inpeizawn tlang hi an fakawmin mizo mipui hriselna kawnga an thawh hlawkna zawng zawng en hian Pathian malsawmna dawng tlak leh hlawhtling tlak an ni tih Zoram mipuite hian kan hriatpui a pawimawh hle.

A TLANGKAWMA:

Hetianga mi hlawhtling leh entawn tlak chhungkua Pathianin Zofate chhawr tangkai theih tur min pe hi a lawmawm takzet a ni.

An damdawi siamte hi a tha hlawm em em a, itsikna avanga insawithaih chingte pawh an awm mai thei. Mahse, damlo mamawhte ei turin ka rawn (advice) thin a, Pathian zarah tun thlengin vanduaina tawh phah an awm thawm ka la hre lem lo. Kei ngei pawh hian Dr. Davida siam BR mix syrup (original) leh a fapa siam Jopan Plus Syrup phei hi ka la ei char char a, ka thatpui hle a, a hlawk thlak takzetin ka hria.

Hetiang mi bik hi Zofate zingah an awm nual a; kan Sorkar hian an talent dawn hi duh angin a pho chhuahsak tha tawk lo deuh em a tih theih awm e. Sorkarin hma lakpui tak tak se'ng chuan Pr. Saihkhuma inlarnaa lo lang- Zoram hmul damdawi chihrang hrangte hi khawvel hmun dang atangin dam nan an rawn hmang tangkai ngei dawn niin a ngaih theih. I lo thlir chho zel teh ang u.