INKHAWMPUI !
Tu emaw tawngkam takin "Inkhawmpui uar hnam kan ni"
Keini anga hnam tlemte si, eng Level pawha Inkhawmpui uar hi ram dangah awm ve tak ang maw?
ENG KHAWMPUI MAW?
Kohhran lian deuha chuan Thlasik anga khel lovin Kohhranpui inkhawmpui, Nu ho Bial Inkhawmpui, Thalai Bial Inkhawmpui, Pa ho Bial Inkhawmpui a nih loh vek pawhin Rorel Inkhawm tal kan nei ta dah a, Ram pum huap Inkhawmpui (Kum hnih/Kum khat) danah a awm leh a, heng bakah hian phuah chawp inkhawmpui, Mission Convention, Musical Meet, Zai Kutpui, Bial Musical Meet, Bial Rimawi kutpui etc. A awm kum tin Deuhthaw bawk a!!
NGO lamah rampum huap Conference, Inkhawmpui, Assembly, Group Conference, Branch Social, Section Social a awm leh a, MZP, MSU lamin an nei bawk a, Sorkar hnathawk leh pawl neuh neuh nen khawmpui hian kumpui linglet kan hmang a ni ringawt ta mai.
BUATSAIH CHHAN -
Kohhranah sawi hmasa ta ila, kan telna Level Comittee ah chuan zau zawka kan in tarlanna tur kan dap a, Bial huap Programme neih ngei kan tum a, Mission, Music Committee hmang chuan lansarh kan tum ta a, Bial huap Programme hlung lo zet kan siam a, inkhawm tlem hlauin Zaipawl kan ruat nghek a, Zaipawl ruat lo ila, tlemte inkhawm tur kan ni. Thupui tur uluk takin kan thlang a, tu thenga thawngah a lut lem hlei lova, "Tluang taka Programme hman theih chu hlawhtlinna ah kan ngai a, mi rilru a thu a sawi dan kan Evaluate ngai tawh lo!!
Nihna chanvo kan chelhna zawnah chuan a Level sang thei ang ber, kan in tarlanna remchang tur kan melh hra hlawm a, Chunglam hnathawh leh a tulna kan hisap tawh ngai lo.
KAN DUH BER -
Kan nihna tarlanna Badge kan bel a, Secretary Report a hming lan kha kan lawm tawk a, engnge kan tum ni a, enge kan beisei ngaihtuah hi chuan a LEM thin em ve bawk a ni. Rorel kan nei a, Press a pek Thlap, Secretary Report ah chuan a kimchang hle nachungin Secretary chu zawhna a awm leh awmloh aiin Report pe turin kan han sawm a, a ziaka awm thlap tawh chu Suit nen in la thupuifun leh hmuamup takin a rawn thual leh tak tak a, Rorel ti reitu zinga tang, MAWL tak a ni ringawt!
OB chin chuan Badge an bel vung mai a, "OB ka ni, min hre lo palh ange, ka pawimawh teh a nia, ka Badge bel atang hian min lo hre tawh dawn nia" ti ni awm fahranin Badge an han siam ah!! Pulpit veilam sirah an puala inkhawmpui ah an han thu far mai chu Inkhawmpui hi an tan a hlawhtling em em a ni. Mahse a ho hle a, inkhualtelem a ang a, nutling, patling an lawm lawi si!!. A tam zawk lawmna chu ti zel phawt ang u. Inrtroduction a an din zuai bak hi kan Notice tawh lemlo tih tal hi hria se in tarlanna remchanga hmanga inkhawmpui rawt sek hi a bang mahna...
SPEAKER -
Speaker ah chuan Bialtu Pastor kan hmang tha duh lo hle. A hmasa nen kan khaikhina tuna mi hi an tling lo duh viau mai. Thlarau lama pachhe tak, in la Administrator viau te hi Speaker a sawm an hlawh duh lo viau mai. Speaker thusawi vanga thinlung kehsawm hi an vang viau a, Speaker a din dawn atanga rawngbawlna hlen tawh hi kan thu kuh tul a, zunram thiar chhuanlamin kan pak khu tulh tulh hlawm thin a nih hi.
CHHUANLAM ZAIPAWL -
Zaipawl chu thiam loh dan indawtin an ko thin a, thupui leh Inkhawmpui huaihawttu Committee a zirin hla an thlang ve thin. Inkhawmpui hlung tak tur chuan zaipawl ruat tam a ngai a, an ruat loh chuan Zaipawl Member inkhawm tum an awm ngai lo. A nêp vel vek thin tih hi an man thiam tawh khawp a, zaipawl hi atantirh atangin an ruat nghek nghek mai thin. Hlawkpui aiin Kal kan tam phahna a ni tlat!!
ROREL -
Rorel ah chuan mahni Unit/Branch thatna tur hre ranin Budget Estimate ah an tang khawng thei hle hlawm a, Unit, Branch pachhe deuhte awka leh Agenda chu kan nuih tet tet hlawm a, kan phar thla leh dual hlawm thin. Smart tak leh Constitutionaly ti a, chawrchhuahna hulum deuhte thu hla a chu ni deuh ruihin kan hria a, a Move tu ho hai ve tak pawh nise kan phar thlu dual thin!!
THUPUI -
Thupui lah chu kan thlang uluk viau a, nun kehsawm phah hmuh tur an awm lem lova, thusawitu chu a sawi rei loh thiam chuan Thusawi thiam a ni mai. Thla 2/3 zaipawl kan inbuatsaihna chu "Kan zai tha/thalo" tih vel mai mai chu a hlawhtlinna ah kan ngai chhunzawm a. Hetiang tur hian zan tam kan inhmu khawm a, kan nui khek uarh uarh a, RAWNGBAWL kan inti zel bawk a, a satu nun a thleng lova, a ngaithlatu nun phei chu a teuh lo!!
THLIRLET PEIH KAN AWM LO!
Kan Inkhawmpui chu a hlawhtlinna, chhunzawm tlak a ni em? Tih thlir let peih kan awm lova, kum dangah pawh kan nei tawh thin tih hmangin neih leh zek kan tum a, a va han lem tak em!! Zaikutpui, Musical Meet ah chuan kan zai tluk tluk ngai lova, chanvo insemzaina hmunah kan hmang a, Mission Convention ah chuan chhehvel leh Ramthim/Thar vei thut phah kan awm hek lo. Mihring man tura siamte chu Budget man tur leh Seminar, Consultation Programme leh thil changkang duan thiamna ah kan in tlansiak zo a, a hlawhtlinna ber: "Lamlianah leh daiah te chhuak la" tuh chu kan peih hlawm der si lo. Chhehvel Thlarau bo te ei miah lohin hmelhriat loh vai ram lam Mission ah kan intlakral a ni ber mai.
RAWIHTLAK LOH SPEAKER -
Kohhran 4/5 lek bialtu Pastor chu Speaker a rawih tlakhah kan hmu lova, mikhual kan chaw lut a, KHUALCHAWM KOHHRAN kan ni kumtluan thin. Kan Pastor chuan Dan leh Dun a hria, Thlarau mi hek lo!! An bial chhunga Kohhran ten Camping/Crusade a an tel ve ngai loh Pastor te hian in enfiahna atan hmang ngai tak maw?!! Quarter a bawp thluang duai a, Fb leh Wsp a Active tak, an fate zirna a thahnem ngai em em ringawt, Transfer leh Posting a phili thei tak mai, hrisel lohna chhuanlam tur nei reng Pastor te hi kan thanmawh bawk an ni!!
HMANRAW DANG -
Kumtluanin kan khawmpui a, a changin Inkhawmpui kawr leh thuamhnaw, a changin thangchhuah kawr nen kan in tem up a!! A thu tak leh thupuia inchiah mang si lo, Stage Performance, Fashion, Chhas a innghat Inkhawmpui ho hi kei MIHRING hian ka hne chuan "In Inkhawmpui urhsun te hi ka Hua" tih sawitu kan Chung pathian hi ka dem love!!
Chumi/Khami hruatu chu ka nia, ti a Badge nena in thuam up mai, khami zan kha kan lam nasa a nia, kan thlenin te chu.. Kalkawngah kan nui nasa lutuk, inkhawmpui kawr ka ti fuh tawp tih vel mai mai kan changchawi dawn a nih chuan bansan tawh zawk ang u. Miten hruaitu a nih an Introduce kher loh, Badge an bel kher loh a hruaitu a an ngaih, an lam vir vut vut lem loh a an nun Isua tlat, mipui leh mihriat hlawh lem loh a midang tana nung peih kan tam hun hunah INKHAWMPUI hlawk lo hautak hi kan hnualsuat zel ka beisei !
@David Sailo
Post a Comment