Zoram Peoples' Movement (ZPM) MLA ṭhenkhat leh ZPM ṭhalaite chuan June 4, Thawhlehni khan State Referral Hospital leh Mizoram Institute of Medical Education & Research (MIMER), sorkarin Zoram Medical College tia a thlak chu a hmunah an tlawh a; damdawi-in leh medical college hmun hrang hrangte an enfiah.
ZPM MLA pahnih - Dr Vanlalthlana leh Lalchhuanthanga te leh ZPM ṭhalaite hian social media-a sawisel hlawh tak, State Referral Hospital ICU room chhunga ceiling chim mek te, Paediatric room leh Orthopaedic room chung leh bang chhiat dante an enfiah a a ni.
ZPM thuchhuah chuan, ICU room celing tla mek chu damlo leh thawktute tana hlauhawm khawp a nih mek thu tarlangin, "Hei vang hian ICU chu hman chhunzawm theih a ni lo a, khum 20 zingah 19 chu rauhsan mek a ni a, loh theih lohna vangin ventilator-a enkawl mek pakhat chiah ICU-ah awmtir a ni," a ti.
ZPM ṭhalai thuchhuah tarlan danin, Paediatric room leh Ortho ward chung leh ICU chungah tui a luh nasat vangin damlote'n harsatna an tâwk nasa a, Paediatric ward leh Ortho ward chhunga thosi lên zarna tura siamah ceiling tla laka him nan silpouline zâr a ni.
Power supply line a ṭhat tâwk tawh loh avangin khawl man to tak tak an neihahte-ah kawlphetha an pek lut ṭha ngam rih lo a, chu chuan inzai ngaite a nghawng zel a ni. ZPM ṭhalaite chuan, State Referral Hospital/MIMER hian khawl man to leh changkang tak tak an kawl avangin, power sub-station hranpa an neih a ṭula an hriat thu an tarlang.
Dr Vanlalthlana leh Lalchhuanthanga te chuan director Dr L Fimate chu a pisaah an kâwm a, harsatna an neihte an zâwt a ni.
Dr L Fimate chuan, Mizoram state chhung aṭang chauh chuan faculty duh ang neih theih reng loh hun a awm ngei dawn tih sawiin, Aizawl aṭanga a hlat deuh bakah, infrastucture leh marketing, recreation leh indoor stadium kan la neih loh avangin, state páwn aṭanga faculty ṭhenkhat chu an thawh chhunzawm duh loh phah thu a sawi a; hun lo kal zelah faculty neih zat tur tlin loh vangin harsatna a awm phah theih thu leh, tuna medical college hi a puitlin loh chuan medical college neih a harsat tawh tur thute a sawi bawk.
Dr Vanlalthlana chuan, Mizoramin medical college a neihchhun chu infrastructure lamah tihchangtlun a ṭul a tih thu sawiin, "Hnathawk leh zirlaite tan facility ṭha leh kan pek thuai a ṭul tak zet a, Mizoram sorkarin rang taka hmalakna a neih thuai ka beisei tak zet a ni," a ti.
Lalchhuanthanga chuan, MIMER hming thlak chu ṭul loa a hriat thu leh hun lo kal zel turah Mizoramin medical college neihchhun chuan harsatna a tâwk ang a, a hlamzuih mai a hlauh thu a sawi.
MIMER/ZMC-ah hian doctor specialist 69 awmin, damlo khum 259 a awm mek a; MIMER/ZMC-ah faculty 72, resident 44, doctor 11, NHM doctor pathum, technical & incillary 43, record staff panga, nursing staff 262 awmin, teaching staff 72 leh non-teaching staff 486 an ni. A bul ṭanna, kum 2018-19 academic session-ah zirlai mipa 40 leh hmeichhia 59, an vaiin 99 an awm bawk.
~Vanglaini
Post a Comment