Mizoram Ramri Buaina: MNF President, Chief Minister Pu Zoramthanga’n ramri buai chu chinfel tum dan fel fai tak an nei a, tuna puanzar mai chi a ni lo, a ti.
Vawiina an party MNF Hqrs Office, Mizo Hnam Run-a an party Dan bu chhut thar a tlangzarhnaah thu sawiin Pu Zoramthanga chuan, Assam leh Meghalaya in ramri buai an nei a, Assam leh Arunachal-in an nei a, Assam leh Nagaland-in an nei bawk a, hmun thenkhatah chuan inkahnate pawh a awm a. Assam Chief Minister Tarun Gogoi-a nen ramri buaina hi an lo sawi dun tawh, a ti a.
Ramri buaiah hian Boundary Commission-in a rorelna leh a report chu tu State pawhin an zawm tur a ni a; mahse state pakhatin a pawm kha a leh lam state-in an pawm thei lo zel bawk a ti a. Anni chuan ramri buai chin fel dan tur fel fai tak an nei a, tuna puanzar mai chi a ni lova, ramri buai ching fel tur hian hmanhmawh phut phut chi pawh a ni lova, tihdan tur lo sawi lawk vak avang hian thil fel lo a awm phah thei zawk a ni, a ti.
Mizoram châk lak luhna ber Silchar lamin an hrêk thin chu hmun dang dang atanga kaltlang theihnate siam fel hmasak phawt a ngai a, a hunah chuan an la ti mai dawn a ni, a ti a, Chief Minister chuan an sorkar hmalakna leh kal zel dan chungchang an sawi tlem nia mi thenkhatin an sawi chungchang chu a dikna chen a awm a. Mahse, anni chuan sawi vak aiin a takin SEDP, Bamboo leh hmalakna dang pawh an kalpui dawn a ni, a ti.
Congress party chungchang pawh sawiin MNF President chuan, kum 1998-ah sorkarna lain 2008 leh 2013-ah te an tla a; 2013-ah khan lo sorkar ta se Congress sorkar chhiatzia hriat hman a ni lovang, a ti a. 2013-ah Congress chu sorkar nawn lehin zu an zuar a, chhiatna tinrengin a bawm ta a, a sawia sawimawi theih rual lohin an lo chhe ta a, tunah chuan Congress-in India ramah President pawh an nei lo, a ti. ~AIR