MPC NENA THAWKHO ZEL TURIN ZPM INHAWNG - Lalduhoma - TIMES OF MIZORAM

Breaking

Home Top Ad

Post Top Ad

MPC NENA THAWKHO ZEL TURIN ZPM INHAWNG - Lalduhoma

Zoram Peoples Movement (ZPM) hruaitu Pu Lalduhoma’n MPC nena thawkho turin an inhawn reng thu a sawi.
ZPM Lalduhoma

Vawiina ZPM Office-a thu a sawiah Pu Lalduhoma chuan MPC mi leh sate chu an la thlahlel em em a. Tunah an zingah Party angin tel thei lo mah se an thian thaah an ngai zui zel dawn a, a rem chinah thawkho zel turin ZPM chu an la inhawng reng a ni, a ti.

ZPM chuan Brig. T. Sailoa’n a vei em em Power-a intodelh leh Basic Needs tipuitling turin hma a la zel dawn a, Pu Thena hming chu a daih an phal dawn lo nia sawiin Pu Lalduhoma chuan policy a lo duante kha an Policy laimu a ni reng dawn a ni, a ti a. Sorkar Kalphung Thar, Mipui Sorkar siam turin Pawl hrang 7-ten ZPM an din a. A tirah chuan a bul tan nan mahni pawl thiat lova thawhhona huang a ni a. Hun a lo kal deuh va, mahni Pawl hal rala Party pakhata infin tul tihna leh duhna a lo lian ta tual tual a, rawtna pawh vawi engemaw zat a lo lut ta a. Chuvangin, kum 2017 tawp lamah daih tawh khan Party pakhata infin rem an tih leh tih loh chu pawl tin inzawtin MPC in rem an tih loh avangin an puitlin ta lo a ni, a ti a.


Independent ang ringawta inthlan hmachhawn chu fel lova an hriat avangin kawng dang dap zui zelin amah ngeiin ‘MPC te hian an Party hming hi ZPM-in thlak se, an Symbol leh Recognition hi chhawm mai ni se tih a rawt thu sawiin Pu Lalduhoma chuan, Election Commission of India-ah pawh a rem leh rem loh an zawt fiah vek a; mahse MPC te hian an recognition leh symbol hman pawh chu an remti thei ta lo va. ZNP ten an theih thu an thlen pawh chu an pawmpui thei ta chuang lo va ni, a ti.

ZPM-a tel te chu Party khata infin rem an tih leh tih loh kumin May thla ral hmaa thehlut vek tura hriattir thar leh vek an nih thu leh pawl dang zawngin rem an tih thu an thehluh vek laiin MPC erawh chuan thu mum an nei thei lo tih sawiin, June thlaa MPC te an hriattir nawn leh chu an chhanna an nghah laiin MPC chuan Press Conference kovin ZPM-a tel an tum loh thu an puan hnan ta a ni a ti. 
ZPM Senior Vice Chairman Pu F. Rodingliana chuan nimin khan MPC President inah lengin, ZPM-a tel ve ngei tura an ngen nawn lehna lehkha pein hmaichhanah a sawipui leh a. ZPM-a tel an tum loh thu chu chiang taka hrilh a ni leh ta a ni, a ti bawk.

ZPM MLA te Party danga pakai mai tur anga thuthang awm chu thu dik lo, sorkar tura ngaituten an huphurh vanga an phuahchawp a nih thu sawiin Pu Lalduhoma chuan, ZPM MLA te party danga an pakai chuan Anti-Defection Act hmangin ban theih an ni dawn a, eng party mah zawm thei an ni lova. ZPM MLA te tan ZPM chauh chu himna awmchhun a ni, a ti. ~AIR

Post Bottom Ad