DOCUMENTARY FILM THA BER ATAN “DAMPA TIGER RESERVE” THLAN A NI
Vawiin khan Documentary Film Competition 2019 lawmman semna hun I&PR Auditorium-ah neih a ni a. Information and Public Relations Department changtu Minister Pu Lalruatkima chu khuallian niin I&PR Director Pi Lallianpuii chu khual zahawm a ni.
Tunlai thangtharte zingah ziak ai mahin milem che theiin rilru a la a, thinlung a hneh hma bik niin a lang, tiin khuallian I&PR Minister Pu Lalruatkima chuan kan ram mawina te, Mizo nunzemawi tlawmngaihna te, chhiatni thatni a kan intuamhlawm dan te leh Mizo nunphung leh culture khawvel hriata phochhuak tura theihna nei, film siamtute chu tan la lehzual turin a fuih. I&PR Minister chuan Mizorama film-in hma a sawn theih nan nodal department I&PR leh film siamtute inkarah inpumkhatna leh thawhhona tha a pawimawh, a ti a. Film hmangin mi thinlung ram kan la thei tiin sawrkar pawhin a pawimawhzia a hriat avangin Ailawngah Film City din tura ruahmanna siam a ni a, mini theatre sak mek a ni bawk Pu Lalruatkima chuan a ti a, theatre lian zawkte pawh buatsaih chhoh zel tul a tih thu a sawi bawk.
Pi Lallianpuii chuan tun tum Documentary Film intihsiak hi Mizoram Film Forum member chauh ni lo Mizoram chhunga hetilama tui mite zingah a theih anga zaua puandarh a ni a, film siam hautak dan leh sum leh pai a ngaih hnem zia ngaihtuahin he intihsiaka film 24 zet a lut chu a lawmawm hle a ni, a ti. Film lama bul tan mek Mizote hian kan thenawm state dangte kan la um pha lo hle a, engtinnge hma kan sawn ve theih ang tih ngaihtuahin sawrkar chuan I&PR Department kaltlangin film competition te, workshop te a buatsaih thin a, state pawna film festival chhim tur pawhin Mizo film siamtute tirh chhuah ve thin an ni a ti a, hmasawnna tur erawh kan la ngah hle tih hriaa tan la leh zual turin I&PR Director chuan kalkhawm te a sawm a ni.
Documentary Film Competition 2019 ah hian lawmman pakhatna dawngtu chu Lalzawna Pachuau niin a film siam hming hi “Dampa Tiger Reserve” tih a ni. Pahnihna dawngtu chu Napolean RZ Thanga, “Bairabi - Zophai, where we bled for our land” niin pathumna chu TC Vanlalzauva “Khawlailung Model Village” a ni. Lawmman dawngtu dangte chu David M.Thangliana “Climate Change”, Zohmangaihi “No Plastic”, F.Lalhmingchhuanga “Kawtchhuah Ropui”, KC Zoherliana “Bahadur Larka”, H.Lalsangzela “Mizo Film Kungpui”, HC Rodinmawia “Nungchate Nunphung” tih leh K. Romuana “Mizo Videographer” te an ni.
Programme hi Mizo Film Forum President Pu Lalawmpuia Khiangte chuan a kaihruai a. Lawmman pakhatna leh pahnihna la tu - Dampa Tiger Reserve leh Bairabi - Zophai, where we bled for our land tih te chu an thlirho zui nghal a ni. I&PR Department buatsaih Documentary Film intihsiak hi January atanga April, 2019 chhung khan neih a ni a, film 24 a lut a. Lawmman pakhatna dawngtu hian cheng 40,000, pahnihna in cheng 30,000 leh pathumna in cheng 20,000 an dawn bakah a tel zawng zawng hnenah certificate hlan a ni. A endiktute hi Pu Biakthansanga leh Pu C.Lalremsiama te an ni. ~DIPR
Post a Comment