Durtlang Leitan Ramthar venga Basic Service to Urban Poor (BSUP) complex-a building thenkhat lei leh lung tawlhin a tih chhiat vangin helai hmuna chengte chu an him zawk nan BUSP complex dang Rangvamual leh Endenthar-ah te sawn chhuah mek an ni.
Nilaini khan Durtlanga BSUP complex-a chhiat tawhna a thlen chungchang ngaihtuah hian Chief Minister hovin sorkar mi pawimawh te an thukhawm a, Durtlang BSUP Complex-a chengte chu hmun him zawkah sawn chhuah nise an ti a, he ruahmanna bawh zui hian nimin leh nimin piah khan helai hmuna chengte hi BSUP Complex dang Edenthar leh Rangvamual-ah te sawn chhuah an ni.
Chhungkaw 8 te chu BSUP Complex dangah dah an nih tawh thu UD&PA Department hotute'n an sawi a. Sorkar thupek anga sawn chhuah vek tur ni mahse hmun danga in sawn chhuak duh lo an awm nual tih UD&PA hotute chuan sawiin, insawn chhuak duh lote awm mahse an him zawk nan sawn chhuah tho tho an ngai tih an sawi a, hmun danga in sawn chhuak duh lote hian an chhuan lam ber chu an fate school kalna a sukuk dawn nia an hriat vang leh BSUP complex bul hnaiah huan te an lo neih tawh vang a nih thu an sawi a ni.
UD&PA hotute chuan, Durtlang Leitan Ramthar Venga BSUP Complex-ah hian awm nghet chu chhungkaw 118 an nih thu sawiin, awm nghet lem lo sorkar-in allotment a pek ve tho mi 79 vel an awm tih an sawi a. Helai hmuna cheng zawng zawngte chu in sawn chhuak vek tura hriattir an nih tawh thu sawiin, hriattirna an pek tawh zingah mi 136 te chu BSUP complex danga an awmna tur allotment tih fel sak an ni tawh tih an sawi.
Durtlang BSUP Complex-a cheng te sawn chhuah an nih dawn avanga tih fel tur tam takte chu tih fel chhoh zel a nih thu UD&PA hotute chuan sawiin, helai hmuna chengte fate lehkha zirlaite chu education department lamin an school luh lehna tur an tih fel sak tawh tih sawiin, Ration card leh document dangte pawh an in sawn thlak fel hnua an hman nghal mai theih turin tih fel sak vat tum a nih thu an sawi bawk. ~ AIR
Post a Comment