Sinlung Hills Council interim sorkar, July Ni 8 a term tawp tawh tur, Mizoram sorkar-in thla 4 chhung interim period thla 6 dang a pawhsei leh chungchangah Save Sinlung Council Committee chuan thuthar thehdarhtute kawmin, pawtsei tawh lo se an duh thu an sawi.
SHC Convener Lalremruata Varte chuan Interim term pawhsei anih chhung hian Mizoram sorkar chuan inremna a ziahpui HPC (D) lamte rawn loin SHC member tur chu an duhsak zawngte dahluhna atan hmangin HPC (D) returnee pakhat chiah telh a ni a ti a, hemi chungchangah hian HPC (D) lam pawh an lungawi lo niin a sawi a, inremna thuthlung an zah avangin ngawih an chuh zawk ta, a ti.
SHC hi a din tirh atangin Interim period in kum 25 a kal tawh a ti a, he interim period hi titawpa SHC Inthlan a rang thei ang bera buatsaih turin Sorkar an ngen thu leh Inthlan a awm vat theih na turin hma an la zel dawn tih Pu Lalremruata chuan a sawi a, inthlan neih a nih hma chuan SHC Budget-a Development works khawihna tur budget chu chengkhatmah khawih chet ni lo se an duh thu leh hei hi ngun taka en thli thlai an tum reng dawn tih a sawi bawk a ni.
Save Sinlung Hills Council Committee chuan Mizoram sorkar leh HPC (D) inremna zulzuia SHC tih changtlunna turin Mizoram sorkar post hrang hrang 34 a siam a remti chu lawmawm an tih thu an sawi a, heng post hrang hrangte zinga mi, State post ni lo zawng, non-gazetted post hrang hrangah HPC returnee leh an tu leh fate a theihna apianga thun turin Mizoram sorkar an ngen tih an sawi bawk a ni. - AIR
Post a Comment