India Zalenna Sualtu Pu Darthawma chu kum 99 mi niin tukin dar 2:40 khan Civil Hospital Lungleiah natna hrang hrang vangin a thi.
Mizo zinga India zalenna sualtu la dam awm chhun ni a hriat Indian National Army (INA) mi leh sa Pu Darthawma hian a fate 6, a tu 19 leh tuchhuan 28 a kal san a, vawiin chawhnu dar 1:30 khan vui liam a ni. India ramin zalenna a neih theih nan a tha leh zung sengtu zalenna sualtu tia vuah Pu Darthawma hi May ni 15,1921 khan Pu Chhingliaia leh Pi Nubuangi te inkarah Lunglei bul Pukpui khuaah a lo piang a, unau 5 zinga upa ber dawttu niin kum 1939 a khawvel Indopui 2-na a lo chhuah khan India ram chu British sorkar hnuaia awm a nih angin Japan sipai do turin Mizo tlangval 17 te nen fehchhuak in kum 1940 Nov ni 27 khan Indian Army Medical Corps ah a lut a ni.
Japan rallian do tur hian British sipai dangte nen Malaysia thliarkar Penang-ah an lut a, hetihlai hian India chu British lak atang a chhuah phuttu Subash Chandra Bose in INA din tak chu Pu Darthawma hian Kum 1942 May khan a zawm a, INA-ah kum 3 a awm hman tih hian British Sorkar-in kumpinu sorkar laka helah puh a an man zingah a tel a, Singapore, Chittagong leh Calcutta Jail ah te kum 3 chhung tantir a ni a. Hemi hnu hian ram inrelbawlna lo danglam chho zelah Kum 1945 Jan ni 15 khan Lucknow jail atanga chhuah a ni a, India Sorkar in kum 1972 khan 'Tamrapatra' award chu pe-in hemi kum India Independence day khan Chief Minister Pu Ch. Chhunga chuan a hlan a, Tawlhloh puan a pek a ni bawk a ni.
Pu Darthawma hi kum 15 kalta atang khan pawn chhuak thei lovin a awm a. ‘Zalenna lamtluang’ tih lehkhabu a ziah chu kum 2006 khan a chhuah a, MJA Lunglei ten an tlangzarh sak a ni. Pu Darthawma vuinaah hian mipui an kal thahnem hle a, sorkar mi pawimawh tak tak Dist. Administration hotu, NGO hrang hrang hruaitu, Sipai hotu leh Ex-Servicemen Association ten a ruang chungah pangpar an dah a ni.
AIR/LUNGLEI PTC