ZIRNA KAWNGA KAN INENKAWL DAN SIAMTHAT NGAI NIA KA HRIAT THENKHAT
~Eleazer (Tetea Hmar)
Tunhnai kum 10 liamta atangkhan zirna lamah hian hma kan sawn viau nain chhawr tak tak tura thiamna nei erawh kan pung lo hle a, hetiang reng a nih chuan hniam lam kan pan leh mai ang tih hlauhthawnawm tak a ni. Result tha hi a pawimawh em em a, a chhan pawh midang mithmuh ah kan hmel timawitu a ni tlat. Mahse, chhungril lam belhchian thlak kan awm leh si loh chuan, a tuartu tur chu keimahni tho a ni.
Chuvangin, tunlaia kan education system leh inrelbawl dan ka hmuh ve dan leh siamthat ngai nia ka hriat te ka rawn tarlang dawn a. Nangpawhin ilo ngaihtuah zui ve chhin dawn nia.
1. Pakhatna ah chuan Nu leh Pa hi kan pawimawh khawpmai, kan fate chu lehkhathiam tak ni turin kan duh vek a. Mahse, kan enkawl dan hi kan ngaihtuah lêt ngai si lo. Kan tawngkam hman duhzawng te, thiam thei ni tura kan nawr dan te hi.
Tunhma deuha tawngkam lar deuh pakhat ka la hriatreng chu "sikul i kal peih loh chuan, hna i thawk ang, Hlo i thlo ang'. He tawngkam hi a ni, kan fate zirna ah hian kan tang-ulh lek lek thin niin a lang. Chumi nghawng chu kan fate hi lehkhathiam ni lovin passed thei turin kan zirtir zawk a ni.
Hetiang lam aiin engkim an tihna kawng tinrengah thlawp ila, tupui ila, zalenna pe thiam ila tichuan engemaw tak chu an ni ngei ang. Doctor leh engineer nihna chauh hi hlawhtlinna a ni lo, electrician pawh zir chhuak rawh se, hlawhtlinna tho a ni. An tuina leh thiam ang tawk te te chu zir mai rawh se, an hlim pui phawt chuan engkim hi eizawnna thlak vek a ni. Khawvela zirlai zawng zawng hi Doctor emaw engineer emaw IAS emaw kan ni vek theilo tih hriatthiam pui thin tur.
A chhan chu maw lehkhathiam chuan engpawh an thawk hreh tur a ni lo a, engpawh an thiam tur a ni. Tuna kan sawi tak angah khi chuan hnathawk hlauhna kan neih tir mai ni lovin zirlai thatchhia ah kan siam a ni ringawt.
2. Pahnihna chu zirtirtu te hi kan ni. Nu leh pa lamin ngaih ngam takin an fate sikulah rawnkal tir in kan kutah an dah ngam tawh a, kan tih ve tur chu tha tak a enkawl a ni.
Tunhnai kan zirna system kan en chuan sawrkar sikul leh private sikul inkarah nasa takin competition a awm a. Kan experiment atan sikul naupangte kan hmang a, experiment atana tha vak lo chu exam dawnah emaw rei fe kan enkawl hnuin sikul atangin kan drop-out leh a, naupang beiseina siamtu tur khan amaha beiseina zawng zawng chu kan tihtawp sak leh lawi si a.
Thiam theilo te promote tur kan nih laiin zirtirtu thenkhat chuan thiam thei deuh leh thiam thei vaklo an la thliarhrang khanglang a.
Thiamna emaw an zirtir dawn tih laiin mark hmuh san dan an zirtir daih thung a. Hetiang a nih reng chuan hmasawn lam aiin hniam lam kan pan tulh tulh dawn.
Zirtirtu lam hian ngaihtuahna lo seng thar leh sela, tuna naupang thian thei leh thiam thei vaklo te hi nakin huna kan ram hruaitu tur leh kan hnam tana ding tur an ni ve thei tih hi. Chutiang zawng zawng an tih ve theih nan tunah hian kan pawimawh zia lo hre thar leh sela ka duh ngawt mai.
3. Pathumna ah chuan Sawrkar hi an ni.
Kan sawrkar hian kawng chhawng emaw NLUP emaw scheme chi hrang hrang a buaipui ang hian kan rama thalaitr zirna hi ngai pawimawh ve tawh sela, zirtirtu indaihlo reng te zirtirtu mahni hna pawh thawk tha peihlo te ruihtheihthila buai tlat te hi zirna-ina thawk thlak an nih loh avangin ban tir ngam se. Tuna zirtirtu senior tak tak te hi thalai zawk te hmangin thlak ngam bawk sela. Tichuan hma kan sawn ngei ang (kum 200 liamtaa zirtirna anga kan zirtir reng chuan hma kan sawn lo ang. Kan zirtir dan te hi kan thlak a hun tawh - JACK MA). A chhan chu, kan zirtir dan te hi tih danglam a hun ve tawh a ni. Kum upa lam tha tak tak karah hian taksa lam hrisellohna vanga thawk tha hleithei tawhlo leh zirtir dan thar ngaihtuah chhuak hleithei tawhlo an awm nual ka ring a ni. Hetiang ang mite hi kan thlak ve a hun tawh takzet a ni.
4. Palina ah chuan zirlai hi dah ta ila thenkhat chuan a hmasa pawlah in lo dah maithei bawk a, kha lam kha chu nangni ngaihdan dan ni se.
Zirlaite hian kan ngaihtuah nawn fo tura ka duh chu 'thiante vang emaw, chhungte hlauh vanga lehkhazir ka ni em! Nge ni a keima tana zir zawk tih hi ngaihtuah nawn fo thin ila. Kan vawiin hun hi nakin atan thil tangkai tak ala nih theih avangin tha taka kan hman a ngai a ni.
Tunlai zirlai tam tak chu social media in a tibuai a, zirna aiin thil maksak pui pui an buaipui zawk a. Lehkha an zir hman hmain mobile ah bawk an let leh a, hetiang zirlai te hi chuan kawng thui tak an zawh ngai lo. Chuvangin, zirlai i nih chuan social media lakah hian fimkhur hmasa phawt thin ang che.
Zirna line ah reng reng zuan luh hma hauha thianten an sawi tough vang maia bansan emaw skip ve loh tur mahni ngeiin dai ve chhin phawt tur a ni. Chumi hnuah thei tawp chhuah tawh mai tur a ni.
Tunlaia kan zirlai te'na an ngaihtuah leh ngai nia ka hriat chu "enge nih i tum?" tih hi a ni. Officer sang tak nih tum ngawt hi hlimna a ni lo, midang tana malsawmna te midang tanpuitu nih fo te hi hringnun hlimna minpe theitu chu an ni.
Sawibelh duh neih tan comment lamah aw ni ang.