MIHRING BO DAN MAK ZUAL DEUH TE - TIMES OF MIZORAM

Breaking

Home Top Ad

Post Top Ad

MIHRING BO DAN MAK ZUAL DEUH TE

By: Andy K Zarzoliana (KVLC)

Kan chenna khawvelah hian darkar tinin thil mak chhuichhuah hleih theihloh hi a thleng reng a. A bik takin, chhui zui ngaihna awm miah lo khawpa mihring bo dan makte a thleng țhin a. Burmuda triangle hi hetiang lamah chuan a hmingthang phian a; mahse, mi tam tak chuan Burmuda triangle hmuna thil thlengte hi an awih chiah lo a ni. Mizote pawh hian chutianga mihring bo chu sawi tur kan ngah mai a;

“Khawmû-in a chawi” kan ti mai thin. Mizo’tena Khawmu chawi kan tih ang hi khawvel hmun hran hranah pawh a thleng nasa ngiang mai a. Hetianga mihring bo dan mak chungchuang bik thu-hlaah hian Sawrkar meuh pawh a lo inrawlh fo tawh țhin a. Amaherawhchu, Sawrkar Detective hmingthang meuh pawh kutbeng hlawhchhama an awm chang pawh a tam nangiang mai, han sawi sen chi pawh a ni awm lo ve.

Khawvel thiamna sang zelin thilmak tam tak a chhui chhuah rualin, vawiin thlenga Science thiamna sang ber pawhin a la finfiah theihloh leh a la chhui chhuah theih loh thilmak tam tak sawi tur a la awm a, a la awm zel dawn niin a lang. Hei vang hian khawvela cheng mihringte aia thil tithei zawk leh thilsiam chungnung zawk khawvel dangah khian an awm ngeia rinna a rawn pianchhuahtir țhin a; chu chuan ruahțhamloh ngaihdan mak pui pui rawn chhawp chhuakin, khawvel mi thiamte thlunglu tihaitu ber a lo ni ta țhin a ni.

Chung zinga mihring bo dan mak țhenkhat chu han tarlang teh ang.

1 ) Owen Parfitt-a bo dan mak

Kum 1763, June khan England khua leh tui, Shepton Mallet hmuna taksa chak lo, zeng hripuiin hun rei tak chhung a phuar mek Owen Parfitt-a, kum 60-mi chu chin hriat lohvin a khuangcher bo hmiah mai a, a bo dan chuan mite mak tih a hlawh kher mai.

Owen parfitt hi pianphungah pawh rualbanlo leh zeng hriin hun re tak a lo tuam tawh a ni a. A lo hrisel zawk nan tiin zing leh tlaiah ni lum ai turin pawn lerah a inphochhuak țhin a. Tin, amah hi zeng natna tlakbuak a nih avangin inchhung dung velah a tap chawt a ni ber mai.
Thil thlen dawn ni chuan Owen Pparfitt chuan kawrfual hain, a țhutna piah lawka lamlian sirah chuan mi țhenkhat chu buh hmunah hnathawkin an țul hlawm hle mai a. Chung hnathawktute chu Parfitt chuan ngun takin a lo ral thlir dauh dauh mai a.

Khua a tlai lam tawh a, tlai lam dar 7 vel a lo nih chuan, ruah sûr tur ințhițhoh velah khawpui a ri kal ruih ruih a. Owen Parfitt-a unau Susannah chuan pawna țhu Owen Parfitt chu inchhung lamah seng luh a han tum ngawt a; mahse, Owen Parfitt-a reng reng hmuh tur a lo awm tawh lo. Chutih mek laiin, mak deuh mai hian Owen Parfitt-a thawmhnaw hak lai erawh a țhut hmunah kim biai hian a awm leh ang lawi si a!!! Chumi ni atang chuan Owen Parfitt-a chu tumahin an hmu leh tawh ngai reng reng lo a ni.
Pianphung rengah pawh ramtuileilo leh mahni pawh insaseng thei lo a nih mek laia, khawi lama pa țuan țha ber ang maia mitkhap kar leka a lo bo hman daih mai chu thil mak a tling hliah hliah awm e. Chua-chhapah, a silhfen tlawng hnuchhiaha a lo awm leh zel zel hian a timak thuahhnih leh zel bawk a ni.

Owen Parfitt-a bo dan mak tak chungchangah hian ngaihdan a tam a, pawm dan lah a tlem chuang si lo. Dam hrisel chakvak tak pawh lo ni ta ang se, a thawmhnaw a hlih zet hnua kalbo tur niin a lang a; chumi a nih rualin an chenna Shepton Mallet buh hmun cham duai maiah chuan inzawn hmuh a harsa fahran dawn lo tih la a hriat reng mai si. Chutih mek laia pawn lerah lung muang taka patling ni-lum ai lai mit khap kar leka a pum bo hmiah thei mai hi Sappui-ho tawnah pawh thil mak a tling chiang hliah hliah a ni.
Chuvang chuan he thil thleng mak, namai lo tak hian mite ngaihven a hlawh a, ruahțhamloh rindan leh ngaihdan mak pui pui a rawn pian phah ta reng a. “Mi thianghlim lawr a ințan ta,” tia mahni mimal ngaihdan nena lo suihzawm tawk lah bo lo.

Chutiang chu thil awmdan a nih avangin, Owen Parfitt-a bo dan case hian khawvel hriat a hlawhin hnuchhui-thiamte buaipui pawh a hlawh rei hle a, kum 170 chhung teh meuh mai hnuchhui-thiam Dectective rualte thlung-lu a lo ti-hai chhawlh tawh a. Blind case-ah dahin, 1763-kuma thil thleng kha 1933-kum tawp lam thleng khan, engemaw ti tala hriatchhuah tumin an lo bei ngat ngat tawh a; mahse, vawiin thleng hian Owen Parfitt-a bo dan thu-hlaah mithiamte len tlak a la rual thei chuang lo va, tumahin he thil thleng chanchin hi an la chhui chhuak thei lo a ni.

2 ) Benjamin Bathurst bo dan mak

Kum 1809 khan Britist diplomat pakhat Benjamin Bathurst chu midangte mit hmih lai rengin boruakah a thamral ringawt mai a ni.
Hemi țum hian Bathurst hi Australia rama a țhiante nen a hnathawhna hmun Hamburg lam pana a hawn lai tak a ni nghe nghe a. Thil thlen hma hian Benjamin Bathurst leh a țhiante hian Perelberg khua paltlangin chu khuaah chuan chawhlui an kil za nghe nghe a; tumahin Bathurst-a thil tawn tur hi an hre lawk bik lo a ni.
Chaw an han ei kham tê tê a, Benjamin Bathurst chuan a chuanna sakawr-tawlailir lam chu a pan hnai a, chuan leh mai tumin sakawr chu a han chul vel thiak thuak a; mahse, chutia sakawr a chul vel lai chuan a țhiante hmuh lai rengin Benjamin Bathurst chu boruakah a thamral ringawt mai a ni. Chumi hnu atang chuan Bathurst chu tumahin an hmu leh ngai tawh lo va, a chanchin pawh puallenga thlang tla ang vang vangin a reh hlen ta hmiah mai a ni.

He chanchin hian thuneitute beng a thleng thuai nghe nghe a;mahse, han chhuizui ngaihna reng reng a awm lo. Bathursta bodan thu-hlaah hian ngaihdan erawh a piang lo thei lo va, chu ngaihdanah chuan, Bathurst chu, hun dangah a cheng thut (time travel) emaw, hun dang kalna kawngkâ (time door) ah a lut ta daih emaw niin mi țhenkhat chuan an ngai mauh mai a. Amaherawhchu, thu chiang zawk leh prove-na erawh engmah a awm chuang lo a ni.

Benjamin Bathurst bo dan an tehkhin thiam dan ber chu, meikhu kara pilbo ta mai hi a ang ber a; mahse, chutiang meikhu erawh hmuh tur awm lovin boruak thiang kak hnuaia thamral a ni thung si a. Mi țhenkhat Paranormal lama tui-mite erawh chuan, Benjamin chu chumi ni zingkar atanga a chetdan kaltate an chhui kir chiam thung a, a chhan chu kha mi Benjamin Bathurst bo ta kha a ma thlarau zawk niin an rin vang a ni.

Benjamin Bathurst bo dan thu-hlaah hian vawiin thlengin vantlang mipui ngaihdan a la thuhmun thei tak tak lo va, a chhan la chhui chhuah lo (blind case) ah a la awm ta fan a ni.

3 ) Martha-i bo dan mak

Kum 1975 khan, Jackson Wright leh a nupui Martha chu New Jersey, New York panin motorin an tlan vang vang a.

Lincoln Tunnel (lei-verh) chhung an han tlan lut a. Chutih lai tak chuan vawi leh khatah car darthlalang chu țiauchhum bawh ang mai hian a rawn paw zing chuk mai a, car chu ti-dingin Wright chuan pawnchhiain a han hru vel thuak thuak a. A nupui Martha pawh chu darthlalang tifai tur bawkin motor hnung lamah a phei ve a.

Wright-a’n darthlalang a hru zo, motor hnung lam a han hawi phei a; mak tak maiin a nupui Martha chu a lo awm tawh reng reng lo va. Chin hriatlohin a khuangcher bo hmiah ringawt mai a ni.

Tunnel chhungah chuan a nupui chu a han zawng ngial thin a, a kehniak takngial pawh hmuh tur a awm lo. A perfume rim la nam chang chang chauh chu a nupui sulhnu awmchhun a ni mai. Han bikbo va, han relhrukna tur lah a awm hauh si lo. Inchhung dung chen em pawh inkarhlat lova Martha a bo hmiah mai chu Wright chuan mak a tibang lo va, thuneitute a be pawp nghal thuai a.

Detective rual te chuan theih-tawp chhuahin an han zawng ngial a; buhpawl kara hriau bo zawn nen a lem chuang lo. Chu vang chuan han zawn ngaihna reng reng an hre bik lo va. Chumi ni atang chuan Martha-i chu a ruang pawh hmuh tur awm miah lovin a bo hlen ta hmiah mai a ni.
Martha-i bodan hi, mi thianghlim lawr ngaihdan vawrdarh nan chuan duhthu a sam chiang kher awm asin!!!
Martha

4 ) Sipai rual bo dan mak

Kan ramah ngei pawh hian Khawmu chawi mibo chanchin hi sawi tur a awm nual a. Vanneih vang liau liaua an hmuh kir leh tak te pawh an awm a. Heng Khawmu chawi kan tihte hi an bo reng rengin mi pakhat aia tam an bo ngai lem lo va; an lo awm palh a nih pawhin kutzungțang thliak tham pawh an tling awm lo ve. Mahse, khawvel hmun dangah erawh mi pahnih-khat mai pawh ni lo, a huhova bo pawh an awm tho mai nia!!!
Kum 1915 khan, thil mak lar tak, mite mak tih em em chu a thleng a.

Mahse, he thil thleng hi a thlen atanga a hnu kum 50-ah puanzar a ni ta chauh a ni. Engvanga a hnu kum tam liam hnua puangzar chauh nge an nih tih erawh kalsan rih phawt ila.

British leh Turkey inep lai tak kha a ni a. Royal Norfolk Regiment-te chu Suvla Bay, Turkey phaikuama an kal lai chu New Zealand Field Company sipai pathum te chuan tlang atangin lambun tumin an lo thlir reng a. Heng sipaite hian lambunna hun remchang an hmuh chuan an battalion-ah hriattir nghal vat tura tih an ni nghe nghe a. Chung sipai rual kal lai chu chung lam atang hian chhumin a rawn bawh zing ta chuk chuk mai a. A landan chuan chhum an pelh hnuah chhum bawh loh chinah rawn chhuakin an rawn lang leh tur kha a ni a. Nimahse, chumi chhum zinga an luh hnu chuan mak tak maiin chhuak tur reng reng an awm ta lo. An bo ta hmiah mai a ni.

Royal Norfolk Regiment-a sipai kal hnuhnung ber chhuma a luh hnu chuan, chhum chu van lamah zawimuangin a chho leh ta a, van lama chhum dang te chu a han fin leh ta mai niin a lang a; mahse, chhumin a bawh tak sipai battalian chu an vaiin an bo hmiah mai a ni. Engvanga bo ta nge an nih tih erawh tu hriat a ni law! Rin dan chuan chhum zing chuk mai khan van lamah a tuam chho ta daih niin an ngai ta a ni.

Indo a reh hnu chuan British Govt chuan Turkey hnenah an sipai hrensak takte chu pekir tawh turin thu an pe ta rup mai a; mahse Turkey lam erawh chu an hmui chipin an ngawi tlat thung a, chu chuan ngaih a ti țhalo takzet a ni. Hemi țum hian heng ram pahnihte sipai tam tak chu an chinchang hriat lohin an bo țeuh mai a. An ruang takngial pawh hmuh tur a awm lo. Ram pahnih te hian an sipaite bo dan chungchang chu an hriat miau loh avangin bawhzui ngaihna pawh a awm ta lo a ni.

Tlang chung atanga phaikuama sipai kal lai thlirtu sipai pathum te chuan sipai battalion khat an hmuh lai renga an bo daih thu erawh an sawi a. Mahse, chumi an bo dan thu chu hun rei tak chhung puangzar ngam lovin an upbet tlat a. Thil thlen hnu kum 50 -naah puanzar ani chauh hian dem pawh a hlawh viau nghe nghe a ni.

5 ) Mr Tetford-a bo dan mak

Kum 1949, Dec 1 khan mi pakhat a hming Mr Tetford chu Bus-a a chuan laiin a bo hmiah mai bawk a. A bo dan lah hi fapa tlanbo anga bo ni lovin, hniak phawi lova bo an tih ang chi kha a ni lehnghal a. Rinhmang pawhin han chhui thiam a har fû dawn tih a hriat reng mai.

Amah Mr Tetford hi, Bennington khaw tui-ãl liak niin, sipai a pension hnuah Bennington khuaah a inbengbel a. Sipai bang tih takah mi chengvawng tak leh intuaifai peih tak a ni nghe nghe. A chungah eng thil nge rawn thleng dawn tih hre miah lovin a zinna hmun St. Albans, Vermont atangin an khua Bennington lam panin bus-ah a chuang a. A chuanna Bus-ah hian mi 14 lai an chuang ve nghe nghe a ni.

Tichuan, Mr Tetford chu bus a chuan lai chuan a muthlu lawp lawp a, a muthlu lai pawh bus-a chuang ve midang ho pawh chuan an hmu a; mahse, a chuanna bus-in an khua Bennington a thlen meuh chuan Mr Tetford-a chu a lo awm tawh hauh lo mai a, a kianga țhu ve midangte chu an hrilhhai kher mai.
A țhutna hmunah chuan a bungrua engkim mai chu pangngai takin a la awm thlap mai si a, chu tak chu a makna ti thuah-hnihtu tak pawh a ni awm e. Patling pumpa Bus tlan laia chuang ve reng chutia a han pum bo ta ringawt mai chu han suangtuah thiam pawh a har fû ngei ang. Mahse, a bo tlat si a ni.

A zuangthla a niang e, han ti dawn ila, a kianga midangte chuan a che vel lai tal chu an hmu ngeiin a rinawm a; nimahse tumahin chutiaga a che vel lai an hmu si lo. An hmuh tawp ber chu a țhut hmunah a muthlu lawp lawp tih a ni. Chuvang chuan Tetford-a bo dan chungchangah hian a ngaihna hria reng an awm lo a ni. Mr Tetford-a hi bus-a a mutthluk hnu lamah tumahin an hmu leh tawh ngai reng reng lova, Bennington khuaa a chenna inah pawh a hawng leh tawh ngai reng reng lo a ni.

6 ) Paul Welden bo dan mak

Kum 1946, December 1 khan sikul naupang pakhat, kum 18-mi Paul Welden chu, zing excer laa a zing-tlan lai chu chhuizuitur awm lovin a pum bo daih mai a.
Paul Welden hi, Glastenbury tlang kawngah chak lutuk lovin a tlan a. A hnung lawk, a awmna atanga yard 100 vela hlaah nu-pa tuak khat an awm ve nghe nghe bawk a. Anni pawh Paul anga zing excer la ve tho an ni a. Anni hian Paul-a bo lai chu chiang takin an hmu a ni.

Paul chu chak lutuk lovin a tlan a, chutia a tlan mek lai chuan a tlan dan ngai ngai chuan boruakah a thamral daih mai a ni. A hnunga nu-pa tuak khat amah rawn hmu ve rengtute chuan mak an ti ngang mai a, engmah sawi hmasak tur pawh hre lovin an awmhmunah an ding kâ hau ringawt mai a ni. He mite nupa hian Paul-a bo dan an tehkhin thiam dan berah chuan, “Paul chu țiauchhum chhah tak chhunga tlan lut ang mai hi a ni” tiin an sawi a. Nimahse, chutiang țiauchhum chu hmuh tur reng a awm si lo a ni. Hemi hnu atang hian Paul Welden-a chanchin chu hriatzui tur a awm leh ngai tawh lo va, tumahin an hmuh ngai tawh lo a ni.

7 ) Paul Jepson bo dan mak

Kum 1950, Octeber thla khan, kum 8 leka upa Paul Jepson chu ranvulhna Farm-ah a tlan kual vel a, chutia a tlankual vel lai chuan vawi leh khatah chin hriat lohin a bo hmiah mai a ni.

Paul-a chhungte hi ranvulh-mi niin a eizawnna ber pawh ran vulh a ni a. Kel, beram leh vawk te a vulh a. Ran-in zau nuam tak an sa a, Paul chuan an ran vulhte chu a chhaih vel țhin a. Chumi ni pawh chuan vawk-vulhna farm-ah Paul chu lutin vawk note a chhaih kual vel a. Chutih lai tak chuan Paul chu boruakah a bo daih mai a ni.

Thuneitute hriattirin Paul chu ngawrh taka zawn nimahse, a ruang hmuh chu sawi loh, a silhfen them tê takngial pawh hmuh tur reng reng a awm lo. Chu thil thlen hnu atang chuan Paul Jepson chu tumahin an hmu leh ngai tawh lo a ni.

Post Bottom Ad