Indus International School, Bengaluru-ah chuan Grade 8B physics class-ah an class teacher, Murali Subramanian chuan amah puitu tur humanoid robot Eagle 2.0 a nei a, hei hi India-ah chuan school-a robot zirtirtu ni thei hmasa ber a ni ta a ni. Eagle 2.0 chuan, "Invaiin chibai ule. Vawiin chu thermal physics kan zir ang!" a ti a, a lu te chu a ti che ve deuh nê nê a. 
 robot zirtirtu an hmang
Eagle 2.0 hi hmeichhe lem anga siam a ni a, kawr var hain, a nghawngah scarf a awrh a, an titi pui ve theih. Zirlaite zawhna te pawh a chhang thei a, zawhna te pawh a zawt thei a, a zawhna an chhan dan zulzuiin thildangah a pakai ve leh zel thei a ni. A zawhna pakhat zirlai ten an chhanna chu a duh angin a dik tawk lo a, "A tha viau e. Mahse, kha aia dik famkim zawka chhan dan a la awm a..." a ti ve leh zel thei a ni. 

Indus International School-ah hian an classroom thenkhatah zirtirtute pui turin humanoid robot hi an hmang tan a, class 7, 8, leh 9-ah te chuan physics, chemistry, biology, geography leh history-ah te robot zirtirtu hi an nei a, zirtirtu pangngai te kawng hrang hrangin an tanpui ve a ni. 

Eagle 2.0 hi team member 17 awmna ten an siam chhuah a ni a, an zingah hian zirtirtu tawn hriat nei tha tak tak te, graphic designer animation leh gaming lama background nei te, IIT atanga zirchhuak programmer leh Chinaa robot siam zirchhuak engineer te an tel a, heng team te hian kum hnih chhung an buaipui hnuah humanoid robot, zirtirtute tanpui thei tur hi an siamchhuak ta a ni. 

Tunah hian hetiang robot zirtirtu hi pathum an nei tawh a, pakhat pawh hi Rs 8,00,000 man a ni. Indus International School hian humanoid robot, classroom-a zirtirtu pangngai an awm loh pawha mahni tawka class la thei tur leh naupang lehzual tan pawh nelawm zawk siam leh tumin hma an la mek bawk e.

@The Aizawl Post

Post a Comment

Powered by Blogger.