SAITUAL DC LEH SP HMASA BER LAWMNA BUATSAIH
Vawiin khan Saitual District in Saitual Deputy Commissioner Pu C Lalpeksanga leh Superintendent of Police Pu PC Lalduhthlanga lawmna hun an hmang a, P&E Minister Pu R Lalzirliana, bialtu MLA ni bawk chuan DC Office thar a hawng nghal a ni. DC leh SP thar lawmna program hman zawh hian Saitual District Implementing Demand Committee (SDIDC) thiah a ni a, hruaitu hluite thlahna hun hman a ni bawk.
Minister Pu R Lalzirliana, bialtu MLA ni bawk chuan,'Saitual District DC Office hi Saitual khua leh a chhehvel khua zawng zawngte tan duhsak bik awm lo leh thlauhthlak bik awm lova hmasawnna inkhairual a awm theih nana din a ni,' a ti a,' District thangduang ni tur chuan inlungrual tak leh inthliarna awm hauh lova hma kan lak ho a tul dawn hle a ni,' a ti bawk. Pu R Lalzirliana chuan District dangte aia ropui tum ngawt lova district dangte aia nep loh tum hmasak hi hmasawnna hlawk zawk thlentu anih thu a sawia Sawrkar hnathawkte kawm nel a khawtlang tan a hlawk thei ang ber a chhawr thiam turin a chah bawk.
Pu C Lalpeksanga, DC Saitual chuan District thar enkawl chu Deputy Commissioner kut chauh ni lovin, district mipuiten chanvo pawimawh tak an neih theuh thu a sawi a,' District zingah chuan boundary nei tha ber pawl, district boundary ralmuang tak kan neih dawn avangin kan vannei hle a ni,' a ti a, District thar hmasawnna atana hmalakna kawng hrang hrangah sawrkar chu tha taka thawpui thin turin a ngen bawk.
Pu PC Lalduhthlanga, SP pawhin thu sawiin Saitual chu district tharte zingah ralmuang ber leh dan leh thupek zawm tha ber district a nih theihnan a bul atanga tha thlah lova tan la tlang nghal turin leh thawh hona tha neihpui turin Saitual district mipuite a sawm nghal bawk.
Vawiin Saitual DC Office hawnna leh DC leh SP thar lawmna hi Pu R Vanlalsawma, SDO (Sardar), Saitualin a kaihruaia, Pu Vanlalzawma, Ex MP leh Pu K Vanlalauva, Ex Minister, Pu Valbuanga, Secretary Irrigation & Water Resources, Dr Lalzirmawia Chhangte, Secretary Power & Electricity Department, Pu C Lianlunga, Engineer in Chief, P&E, Pu R Hmingthanzuala, Director Art & Culture leh department hrang hrang hotu engemaw zat an tel a ni.
Saitual district DC leh SP tharte hi Keifang Dawrkawn ah khawtlang hruaituten lawmpuina parthi hlanin an lo hmuak a, Keifang leh Saitual khaw naupangten Keifang Dawrkawn atangin Saitual DC office thar thleng kawng dung tluana intlarin lawmpuina lehkha inziak hrang hrangte kengin an lo hmuak bawk a ni. Saitual DC Office thar hawn zawh hian Saihmar tlangah bialtu MLA, DC, SP thar te leh mi pawimawh zualten thing an phun a, Saitual Auditorium ah hun hi hman chhunzawm leh niin chawhnu hun hi Pu Rohmingliana, Chairman, Saitual District Implementing Demand Committee in a kaihruai thung a ni.
Saitual District dilna hi 1974 khan a hmasa ber atan dilna thehluh alo ni tawh a, kawng hrang hranga hmalak chhunzawm niin 1993 khan chak zawk a hmalak anih theih nan Citizen Committee din a ni a. September ni 12, 2008 khan district pathum puan zingah Saitual hi a tel ve ta a ni. ~DIPR
Post a Comment