HNAHTHIAL DISTRICT THAR ROPUI TAKA LAWM A NI - TIMES OF MIZORAM

Home Top Ad

Post Top Ad

HNAHTHIAL DISTRICT THAR ROPUI TAKA LAWM A NI

Vawiin chawhma dar 11 khan Hnahthial HBSC Ground No.1-ah District Celebration Committee buatsaihin Hnahthial District thar lawmna programme ropui tak buatsaih a ni a. Health & Family Welfare etc changtu Minister leh South Tuipui Assembly Constituency bialtu MLA ni bawk Dr. R Lalthangliana chu khuallian a ni.

Hnahthial District thar lawmna programme ah hian khuallian bialtu MLA Dr R Lalthangliana chuan thu sawiin District thar awm theihna tura tha leh zung sengtute zawng zawng chungah lawmthu sawiin kum tam tak tha thlah lova an beihna rah an seng a ni, a ti a. Hnahthial District mipuite inkarah inlungrualna leh inpumkhatna tha tak a awm chu lawmawm a tih thu sawiin he District ti puitling tura theihtawp chhuahtu Mizoram Chief Minister Pu Zoramthanga leh Council of Ministers-te leh official-te chungah lawmthu a sawi a. Kum tam tak a liam hnua District thar pathum tih puitlin tak - Hnahthial, Saitual leh Khawzawl mipuite a lawmpuina leh duhsakna hlanin hmathlir fel tak neia mipuite kaihruaitu Mizoram Chief Minister Pu Zoramthanga chungah lawmthu a sawi a ni.


District thar hnuaia hmasawnna awm zel tur te sawilangin Minister chuan Hnahthial Hospital thawm that a nih tur thu leh hmanraw dah belh zel a nih tur thu te, Department office hrang hrang hawn zel anih tur thu te, Hnahthial District tan Convention Centre changtlung tak buatsaih a nih tur thu te, Zirna in tha tak tak la buatsaih tur JNV, KVS leh Eklavya School-te, thlenna in tha Circuit House ruahman a nih tur thu te kalkhawmte a hrilh a. UD&PA Department kaltlangin Hnahthial khawpui chhunga mirethei chhungkuate insak tanpuina (PMAY-HFA) pe vek tura ruahmanna siam mek a nih thu sawiin chhungkaw 593 tan cheng sing ruk theuh a, zavaiin Rs.355,80,000/- insakna tur 1st installment chu an bank account a dah luh nghal tura ruahmanna siam a nih thu a puang bawk. 

Tin, a Department chan Health and Family Welfare Department hnuaiah RIPANS ti changtlung zel tura Rs. 40,000 lakhs sawrkar laipui atanga hmuh tawh a nih thu te leh Cancer Speciality Hospital din tura Rs. 50,000 lakhs hmuh tawh a nih thu kalkhawmte a hrilh bawk. Minister chuan inkalpawhna tha (Physical Connectivity) leh inbiakpawhna tha (Digital Connectivity)lamah te hmasawn tur tam tak kan la nei tih sawrkarin hria in kawng siam thatna turin Budget ah pawisa tam tham tak dah hran niin Mizoram hmun hrang hrang ah chak taka hmalakna a kal mek thu a tarlang a. Ram hmasawn tur chuan Minister leh mipuite an inpawh that a tul a ni tiin Minister chuan bial leh ram hmasawnna tura rawtna an neih te sawi hreh lo tur leh thurawn te pe fo thin turin mipuite a sawm bawk.


He hunah hian I&PR Minister Pu Lalruatkima pawhin thu sawiin Hnahthial District mipuite tana ni lawmawm leh chhinchhiah tlak District thar lawmna programme ropui tak ah a tel ve thei chu vannei a in tih thu sawiin Hnahthial District mipuite duhsakna a hlan a. Kum tam tak liam hnua District a piang ta chu Hnahthial District mipuite thawhrimna, inpekna leh huaisenna rah a ni, a ti a. Mizoram Chief Minister Pu Zoramthanga kaihhruaina avangin a chungah lawmthu a sawi bawk. Hnahthial District - in administrator official viak tha leh mithiam tha tak tak sawrkarin a rawn dah chu an vannei takzet a ni tiin a Department chan Rural Development, I&PR leh Revenue office hmunhma te ruahman tura chak taka hmalak a nih thu a sawi a. Christmas hma ngeiin MGNREGA kaltlangin in hlawhna ni 10 aia tlem lo pek an nih tur thu kalkhawmte a hrilh bawk.

Lunglei HPC Vice Chairman Pu Lawmawma Tochhawng pawhin thu sawiin Hnahthial District hnuaia khuate chu a lawmpui rualin a ui takzet thu a tarlang a. Hnahthial  District mipuite chu thawhrimnaah hlawhtlinna a awm a ni tih a taka hmu tu te an ni tiin an kal zelna turah duhsakna a hlan a. "District neitute hian he District hi eng atana hman nge in tum tih inzawt fo thin rawh u" tiin District mipuite chu hmasawn zel tura tan la tur leh intodelhna ngai pawimawh turin a chah a ni.

Lawmna programme hi session hniha neih niin Pu B. Lalhmingliana, Vice Chairman, Organizing Committee-in 1st session a kaihruai a. Khuallian Dr R Lalthangliana'n District lawmna lungphun a hawn hnuah I&PR Minister Pu Lalruatkima'n District thar lawmna balloon chhuahin Pu Lawmawma Tochhawng, Vice Chairman HPC Lunglei in Souvenir a tlangzarh a. Tin, Mizoram Rural Bank (MRB) ten Hnahthial Hospital hman tura an donate Ambulance chu khuallian in a tlangzarh nghal bawk a ni.

Chairman, Organizing Committee leh Hnahthial DC ni bawk Pu Vanlalmawi’an kalkhawmte lawmna thu sawiin Pu K. Lalsangzuala, Secretary, Organizing Committee hnen atangin Hnahthial District a lo pian dan chanchin tlangpui report ngaihthlak a ni bawk.


Hnahthial District thar lawmna programme ah hian I&PR Minister Pu Lalruatkima, Lunglei HPC Vice Chairman Pu Lawmawma Tochhawng, Dr ZR Thiamsanga, MLA, Prof F. Lalnunmawia, MLA, Pu Ramthanmawia, MLA, Pu Lalrinsanga Ralte, MLA, Pu Zothantluanga, MLA, Pu C. Ramhluna, Ex-MLA & Vice Chairman, Industrial Development Board, Pu C. Lalrammawia, Chairman ZOHANDCO, Pu Lalthanliana, Ex MLA & Chairman, KVIB, Pu TC Pachhunga, Ex-MLA & Vice Chairman, SYS and Tourism Board te bakah Department hrang hrang official-te, party hruaitute, chanchinbu mite  leh Hnahthial District mipuite bakah Mizoram hmun hrang hrang atangin mipui thahnem tak an kalkhawm a ni.

2nd Session-ah hian intih hlimna hun hman niin MUP atangin District Hlado, Block MHIP, Hnanhthial atangin Par Lam, a huhova Cheraw kanna leh Hnahthial khua leh a chhehvel, Lunglei leh Aizawl ziathiamte atangin zai ngaihthlak a ni bawk a. Pu. C. Lalbuatsaiha, Treasurer, Organizing Committee in lawmthu sawiin hun tawp a khar a ni. HBSC Ground No 1-a District thar lawmna programme neih zawhah veng tinah khawtlang ruai buatsaih a ni. ~DIPR

No comments:

Post a Comment

Post Bottom Ad